Mə kaw madaba gana kin law law!
3
Galmayɗigi, hidiy dolom a dab kin mə gər kə mbaɗiy kə mə ɗiyiy jəgwan kwən, kadaban hin mə sən za, dalgway ngiykwan av kə ɗiy lem day kə ngə hidiy sənan. 2 Yikwan cike wayza, yikwan mə njə kə ɗiy mə ngavngav avə mozlokotuf par par. Mana hidi ma a ɗiy mə ngavngav am zləgam ngetik ɗahkwən, sin hidi ma kweɗek, hidi səna ɓəs kə tak talan tik am təkəniy cike wayza. 3 Mə safu, yikwan ɗaw kə təm lezen a kəma ngə pilisigi kə jan kə zlimiy yikwan ma, kə tepiy yikwan am lay yikwan mə mayu. 4 Mə ɓən atalan payiy ngə zlan maza təm! Taniy pəteɗtikwən, mbiɗ njə gədan acin mə njə kə goɗta. Ko asəna, avə pay mendez acin mə njə kə kəzerta, zəni ɗaw kə dambazlta am lay hidi mə kwar tik ta mayu. 5 Wa səna avə gana. Sin acin mendez a dab təkəniy tə kəsəm, zəni a njə kə dədəɗ kə zləgam ma mordoy. Mə ɓən atalan kuhu ma mendez zəni ɗaw kə kəɗaw vurluh lay mordoy. 6 Gana ngə hidi təm wa kuhu mə njə kə kəɗaw lay. Gana səna, a dab təkəniy tə kəsəm ngə hidi cike wayza, sin acin məmar mə ngavngaviy cike wayza. Ɗaw kə dəbəz kəsəm ngə hidi cike wayza, zəni sin acin mə njə kə dah kuhu am ɗew ngiykwan. Gana səna atalan tik, wa kuhu ma a way ɗahkwən . 7 Hidi kwəl kə ngəz təkəniy huvu Bayzlav mə ndənta cike, mana kə luw kaɗ: təkəniy tə donu, viginigi avə wənigi ɓəw kilifigi cike wayza. 8 Zəni gana wər, hidi ngə ɓəs kə ngəz tik ɗahkwən. Sin lem day, a zlim ngəz ɗahkwən, ndərəzl tə kimin gəga kə wəzl hidi. 9 Avə gana səna, yikwan mə njə kə səban Bayzlav Məmar Hidi ɓəw Vay ngiykwan, za avə gana səna baha, yikwan ɗaw kə ngav hidiy Bayzlav mə ndənu ceceh sin. 10 Am ma takan zləgam ngə ɗiyen ngərbay a hidi avə zləgam ngə ngav hidi ɗaw kə pətigi. Galmayɗigi, ɗah law kə ɗiy atəgo kwən. 11 Lay yəm ma njeɓnjeɓ takan a seh yəm ma dindem avə yəm ma heɗek ɗahkwən . 12 Galmayɗigi, sikwiɗ a mbuw ngonok ɗah vu? Awwo! Korbok a mbuw livi ɗah vu? Awwo! Asəna təm, lay yəm ma njeɓnjeɓ ma heɗek a seh yəm ma dindem ɗahkwən .Sən mə yah ta dibizlav za
13 Hidi ngayi məmar sən, ɓəw njə bərngəzl talan mə zlər zlər tə dab kin yi? Hidi səna mə ɗefu avə ɗew ngetik malaw, ɓəw avə kəzəɗ ngetik sin mə ɗiy avə bərngəzl mətak gəl talan tik. 14 Zəni mana hin mawana ngəra k mə ngavngav ɓəw gadaray wek am nəv kin, asəna wər mə gər kə kaf kocofron kwən. Mə gər kə ɗiy polkoy am lay luw mindiwin kwən. 15 Sən madaba mana təgo a yah a dibizlav za kwən. Sən man anhi a pətah am talan mahayək za, a pətah am ɓən ngə hidimambəlen za, a pətiy angər musuruf za. 16 Am lay ta ɗiyiy ngəra k avə gadaray, kpizlik avə ngay awaniy abəgo təm. 17 Yaw, sən mə yah dəga dibizlav za, ɗaw kə ɗiy nəv ma kweɗek. Zəni ɗaw kə dah zoy avə zlerma. Sən səna ɗaw kə ɗiy hidi kə saf kaymah ngə celen, ɗaw kə ɗiy kəzəɗ malaw, a wel hidi a wel ɗahkwən, a ɗiy məplafas ɗahkwən . 18 Hidiy mə gəriy zoy a njə kə ɗewiy ɗew malaw avə hidiy məpərmayigi wa sisin hidi ta njə kə zləg tik, zəni kə ɓasah mə mbuw mbuw tik kə yah a de. Ɗaw kə dahiy zlerma a hidigi.