May təkəniy təm talan mahayək a njə kə pətar yikwan avə Bayzlav
4
Kaɓarma avə jəgəmiy tə dab kin ɗaw kə yiy a zəki? Kaɓarma avə jəgəmiy səna, ɗaw kə yiy a mə tamah mə njə kə jəgəmiy hoyhoy am nəv ngəkin kwən vu? 2 Hin mə njə kə ɗiy tamah am təkəniy sənan, zəni hin ma jan ɗahkwən. Kadaban səna, hin ma gər kə wəzl micin ngə hidigi, hin ma ɗiy ngərak. Hin mə ɓəs kə jan təkəniy hin mə may bugwən, hin ma ɗiy gadaray, hin ma jəgəm. Hin mə jan təkən hin mə may bugwən, kadaban hin mə tar angər Bayzlav bugwən. 3 Ko hin tu tar təkən angər tik, hin mə jan kwən, kadaban hin ma mar ɓən mə ngavngav. Mana kə luw kaɗ, hin mə njə kə tar kə fet tamah mə ngavngav təm nəv ngəkin a gendik dap.4 Hin hidiy mə buwentadəwən a Bayzlav! May təkəniy təm talan mahayək, ɗaw kə ɗiy hin kə zel Bayzlav, hin mə sən bəgwən vu? Mə zlimu, mana hin tu may təkəniy təm talan mahayək wər, hin tu mbaɗ kə mosumiy ngə Bayzlav. 5 Deftere ngə Bayzlav a luw: ‹‹ Bayzlav tu may mbiɗ sin mə ɗiy tə talan yikwan nhi godokwən.›› Deftere ngə Bayzlav a zləgam may may kwən. 6 Zəni ko a səna Bayzlav ɗef a yikwan may ngetik avə malaw ngetik day baha. Kadaban səna acin, Deftere ngə Bayzlav a luw: ‹‹Bayzlav a njə kə zel hidiy mə kafiy kocofron, zəni a njə kə ɗiyen malaw a hidiy mə njə kə daɓiy talan tan. ›› 7 Kadaban səna, mə daɓen talan a Bayzlav. Mə gər kə yək ma ngə bay musuruf kwən, zəni av kə geɗeh hin kaɗ, av kə si tik gaf avə hin. 8 Mə yah mbeh mbeh avə Bayzlavª, zəni sin təm av kə vay mbeh avə hin. Hin hidiy mə ɗiyiy mə ngavngav, mə pan ngəra kin kweɗek kweɗek. Hin hidiy mə səbiy Bayzlav a nəv səsaray, mə buw nəv kin kə ɗiy kweɗek kweɗek. 9 Hin hidiy mə ɗiyiy mə ngavngav, mə den, mə cə wəla, mə han. Mbis ngəkin mə mbaɗ kə han, zəzay ngəkin mə mbaɗ kə den. 10 Mə daɓen talan a Bayzlav Məmar yikwan, zəni sin av kə kafeh hin.
Mə gər kə zləgam mə ngavngav atalan celeh kin kwən!
11 Galmayɗigi, mə gər kə zləgam ma mə ngavngav am walan kin kwən. Hid mə zləgam ma mə ngavngav atalan galmən, asənkwən mə zlen dalgway, hidi səna a zləgam ma mə ngavngav atalan mə taktak ngə Bayzlav. Sin a ɗiyen dalgway a mə taktak səna. Mana hoh tu ɗiy atəgo , hoh mbaɗ kə hidi mə səb mə taktak səna bugwən, asəna wər hoh mə mbaɗa kə hidi mə zlen dalgway dap. 12 Bayzlav a gendik acin mə vəl mə tak tak, za sin a gendik acin mə hos gəga kə zla dalgway. Sin a gendik acin kwəl kə mbəl hidigi ɓəw ngə lek micin ngə hidigi. Yah hoh acin wər yi kə zlen dalgway a galmocoh?
Mə gər kə kaf talan kin kwən!
13 Mə zlimu, tanjinhi, hin hidiy mə njə kə luw tik: ‹‹A picah, asənkwən a pat, yikwan məv kə va am hayək tattah, kə ɗewey kin di takan abəgo . Yikwan məv kə ɗiy terere abəgo kə jan suloy. ›› 14 Hin hidiy mə njə kə zləgamiy atəgo , hin ma sən təkən tu kə ton a pat ɗahkwən. Hin wa seleh mə njə kə sibir, gwedek adəwən səna kə cakwayaytik angaw. 15 Law law hin kə luw: ‹‹Mana Bayzlav mə may za wər, zəni mana tu geɗ micin ngiykwan zoɗ wər, yikwan məv kə ɗiy təkən nhi avə təkən nhi ›› 16 Zəni tanjinhi hin ɗaw kə kaf talan avə kə njol ma, njol ma man anhi ɗah law kwən. 17 Yaw, mana hidi a sən kə ɗiy kəzəɗ malaw, zəni aa may kə ɗiy kwən, hidi səna mə ɗiy mə ngavngav za.