Zləgam atalan hidiy mə njənjigi
5
Mə zlimu, hin hidiy mə njənjigi tanjinhi! Mə han, mə cəwəla, makavay takwan tu kə hosoho atalan kin. 2 Aray ngəkin tu wəra, jezl mə ham ləkwət kin za. 3 Wa səna, gozu tu zəm suloy ngəkin avə melenge ngəkin. A gozu səna, hin məv kə lim tik, av kə ɗef mə ngavngav ngəkin am pic zla dalgway. Gozu səna av kə kəɗaw kəsəm ngəkin mana kuhu. Talan mahayək mbeh kə way, zəni ngəkin hin ma ɓas aray kin dap. 4 Mə zlimu, hin mə wərək gəd mazlən ngə hidiy mə bəliy ngirmi ngəkin bugwən. Mə zlim han ngatan. Han ngə hidiy mə bəliy ngirmi maa cehceh a ngirmi hiziɗ kin tu hos angər Bayzlav Məmar Hidi məmar gədan atalan təkəniy cike wayza. 5 Hin mə ɗew am talan mahayək, hin ma zəm bay kin, hin ma ɗiy mana hin mə mayu. Hin mə ɗiy atəgo nhi, hin mə geh talan kin kə fat mana hidiy ta njə kə gehiy zuvu kə fat. 6 Hin zlen dalgway a hidi malaw, hin wəzl kaɗ. Sin a ɓon a hin bugwən.Mə musuf kaɗ, Məmar Hidi mbeh kə jəɓaha
7 Galmayɗigi, mə musuf kaɗ hos am mandal Məmar Hidi tu kə jəɓaha. Mə saf mək hidigi, mana hidi mə biz biz ta njə kə musuf. Sin a njə kə puw təkəniy sin mə biz tik kə səɓigi law law. Sin a njə kə puw məndəlven avə way van. 8 Hin təm, mə musuf. Mə sok nəv kin kaɗ, kadaban Məmar Hidi mbeh kə jəɓaha. 9 Galmayɗigi, mə gər kə gəɓəz am walan kin kwən, mana hin tu gəɓəz Bayzlav av kə zlehin dalgway. Mə zla dalgway tu yah, a wan mbeh a mijijik. 10 Galmayɗigi, mə səb mana mokotufiy ngə Bayzlav mə luwta am zlim ngə Məmar yikwan. Hin kə musuf am takwan mana tanigi. 11 Yikwan cike wayza, yikwan ɗaw kə luw, ngərbay awan atalan hidiy mə zləniy takwan, kadaban a geɗiy kə musufiy ɓahbugwən. Hin mə zlim mana təkən mə ton tə talan Ayuba za, sin tu musuf am takwan mə janenni taməcek. Hin mə sən malaw Bayzlav mə ɗiyenni am way tik za, kadaban Məmar Hidi awan avə ndelek ɓəw a njə kə saf kaymah.
12 Təkən ma day ɗər galmayɗigi, mə gər kə luw mbeɗ kwən. Mə gər kə luw mbeɗ a dibizlav kwən, asənkwən atalan mahayək kwən. Mə gər kə luw mbeɗ ko a mi kwən. Hin kə luw ''yaw'' mana mindiwin, za hin kə luw ''awwo'' mana mindiwin kwən, za Bayzlav a zlehin dalgway kwən.
Mə tar Bayzlav atalan hidiy mə dal daligi
13 Hidi ta ruroh a dab kin ɗaha vu? Mə tar Bayzlav. Hidi ta zəzay ɗaha vu? Mə jək drif ngə səban Bayzlav. 14 Hidi mə dal dal a dab kin ɗaha vu? Mə ɗefenma atalan mbalgamiy ngə Eklesiya kə yiy kə tariy Bayzlav atalan tik, kə zekenta ɗawa am talan a zlim ngə Məmar Hidi. 15 Asəna acin, tar avə vəl nəv ngatan a Bayzlav av kə mbəl mə dal dal səna. Bayzlav məmar Hidi av kə wit məc tə kəsəm hidi səna kaɗ zəni sin kə sliɗ tik a mə dal za, mana mə ngavngav sin mə ɗiy ɗaha təm, Bayzlav məmar Hidi av kə geɗen kaɗ. 16 Kadaban səna, mə ceɗ mə ngavngav ngəkin takan takan. Mə tar Bayzlav atalan ko hidi ngayi tə dab ngəkin kə jan geleɓe. Tar ngə hidi malaw tə kibik Bayzlav awana avə gədan dolom ngə ɗiy təkəniy par par. 17 Mə safu, Eliya mokotuf ngə Bayzlav taməcek sin hidmambəlen mana yikwan. Sin tar tar Bayzlav a nəv takan kə jan kə tak van. Zəni di makaɗ avə tər kwəh van a zah ɓahbugwən. 18 Adəwən səna, sin ɗiya tar Bayzlav baha kə jan van kə za, dibizlav ɗiya təzah van, za təkən zəm ɗiya təviy law law.
Mə ngazlah hidiy mə lek lekiy a mozlokotuf