22
Adəwən səna, mbaslay ngə Bayzlav səna ɗefek gaw yəm ngə vəl micin mətak way a hidigi. Gaw səna aa lir, kiliw kiliw kiliw, wa durugwal. Yəm təm gaw səna a pətahah aa mə lay ɗew ngə Bayzlav ɓəw aa mə lay ɗew ngə Kər təmak za, 2 aa kwar aadabdab mozlokotuf tə liɓde səna. Pay ngə vəl micin mətak way tu təviy am gozlumiy ngə yəm taa kwar səna saray tik. Payiy səna ɗaw kə mbuwiy jəɓ gəɓ a talan saray am di, mana kə luw kaɗ taniy ɗaw kə mbuwiy kə təra kə təra. Vidiɗiy ngə payiy səna, mazlərəc ngə mbəl hidiy təm səbaniy parpar təm talan mahayək cike wayza. 3 Bayzlav a ngav hidiy ɓəw təkəniy a liɓde səna ɗaba. Lay ɗew ngə Bayzlav avə Kər təmak av kə ɗew abəgo, za hidiy mə njə kə ɗiyiy kəzəɗ ngə Bayzlav av kə səbaniy Bayzlav abəgo. 4 Taniy av kə limiy həriya ngə Bayzlav, za Bayzlav av kə ɗəɗef zlim ngetik am muzərohiy tan. 5 Abəgo, vuɗu a ɗiy kwən, hidiy a mbaliy zləzlaɗ cəbelbel asənkwən zləzlaɗ ngə pic ɗaba, kadaban Bayzlav Məmar hidi av kə zləzlaɗenta avə zləzlaɗ ngetik. Za taniy av kə zəmiy bay ko apu.Yesu a luw sin mbeh kə jəɓaha
6 Zəni mbaslay ngə Bayzlav səna ɗiya luwakku: ‹‹Zləgamiy hoh mə zlim səna cike, zləgamiy maa law kə yək ɓəw maa mindiwin. Bayzlav Məmar hidi mə vəl ɓən a mokotufiy tik, sin acin mə zlən mbaslay ngetik kə ceɗ a hidiy mə ɗiyiy kəzəɗ ngetik təkəniy maa mbeh kə hosohoh.››
7 Yesu ɗiya luw: ‹‹Mə zlimu, kat wər, kat mbeh kə jəɓay. Hid mə səb ma mə ɗəɗef ɗəɗef təm deftere nhi, kadaban Bayzlav acin mə ceɗ tik, nəv ngetik mə zəzay!››
8 Kat Yuhana, kat mə zlim təkəniy səna za, za kat mə limta za. Adəwən kat maa zlim za, ɓəw kat maa limta za, kat gbilih titimbiz akibik mbaslay ngə Bayzlav mə ɗefek təkəniy səna kə mbəzl tik. 9 Amma sin ɗiya luwakku: ‹‹Hoh gbili titimbiz kaɗ kə mbəzlak kwən! Geleɓ a mbəzl Bayzlav ɗər. Kat wər, kat hid mə ɗiyen kəzəɗ a Bayzlav wa hoh, wa golmocohiy mokotufiy ngə Bayzlav, ɓəw kat wa hidiy taa səbiy zləgam maa mindiwin təm deftere nhi.››
10 Za sin ɗiya luwak baha: ‹‹Hoh gər kə geɗ zləgam Bayzlav mə ceɗeh təm deftere nhi aliɓ koh kwən, kadaban mandal təkəniy səna tu kə tonigi, mbeh kə hos. 11 Hid mə may kə ɗiy mə ngavngav, mə səb aa kə ɗiy mə ngavngav! Hid mə may kə dəbəz talan tik akibik Bayzlav, mə dəbəzu. Amma hid maa tiɗtiɗe mə səb aa ɗiy malaw. Hid mə njə kə ɗew ɗew ngə fet nəv ngə Bayzlav, mə səb a ɗew ɗew ngə fet nəv ngə Bayzlav.››
12 Yesu ɗiya luw baha: ‹‹Mə zlimu, kat mbeh kə vay. Kat təv kə tepey gədmazlən. Təv kə vəlen gəɗmazlən səna ko a hid ngayi kpekpe ngə kəzəɗ sin mə ɗiyu. 13 Kata acin Alfa ɓəw Omega, hid tizin tik ɓəw hid taa dəwən, diw ngə təkən ɓəw way tik.››
14 Hidiy mə gohiy ləkwətiy tan kweɗek kweɗek, nəv ngatan mə zəzay, kadaban av kə geɗenta mozlokotuf kə pətiy a liɓde aa bərmədigiɗ, za av kə hamiy mə mbuw mbuw ngə pay ngə vəl micin mətak way. 15 Amma hidiy sənan, a geɗenta mozlokotuf taniy kə pətiy a liɓde səna kwən! Hidiy səna acin: Hidiy mə ɗiyiy təkəniy weli, mə ɗiyiy mə wəzlwəzlək, mə ɗiyiy vərndew, mə wəzliy dəwa, mə tiy zugwa, mə njə kə mayiy polkoy ɓəw mə ɗiyiy polkoy.
16 Yesu ɗiya luw baha: ‹‹Kat Yesu, kat zlənay mbaslay ngaɗa kə ceɗehin təkəniy səna cike a hin hidiy təm mgbəw ngə hidiy ngaɗa. Sin kə luwehin təkəniy səna cike mindiwin. Kat wər, kata acin hid hin taa puw tik am səban ngə bay Dawda, kata acin batay taa zləzlaɗ kəkaykəkay ngə zlalay.››
17 Mbiɗ ngə Bayzlav avə miɗiwit ngə Kər təmak ɗiya luwta: ‹‹A yah!››
Ko hid ngayi mə zlim zləgam səna, say sin kə luw: ‹‹A yah!››
Hid maa yəm aa wəzlenni, mə yah.
Hid mə may yəm mə njə kə vəl micin mətak way, təv kə vəlen sin kə sətik maymay.
Zləgam ngə way tik
18 Kat Yuhana, kata zləren zlimi a ko hid ngayi mə zlim zləgam mə yah taangər Bayzlav təm deftere nhi. Kata luw anhi: ‹‹Mana hid tu cap zləgam məpərmay akimin, Bayzlav av kə zlənen takwaniy sin mə ceɗ tik aliɓ deftere səna. 19 Mana hid tu gəgəc zləgam tə liɓ deftere nhi kaɗ, təkən Bayzlay mə luw kə vəlenni nhi, a jan ɗaba. Təkəniy səna acin: A jan kə ham mə mbuw mbuw ngə pay ngə vəl micin mətak way kwən, za a jan kə pət aliɓde maa kweɗek sin mə ceɗ tik aliɓ deftere nhi kwən.
20 Yesu mə luw təkəniy səna cike mindiwin, ɗiya luw: ‹‹Mindiwin, kat mbeh kə vay!›› Amina! A yah! Yesu Məmar yikwan!
21 Yesu Məmar yikwan mə ɗiyehin ngərbay, hin cike wayza!