Jəgwan Titus tu kə ɗiyen aa mbusurigi
2
Amma hoh, a jəgwanen zləgam maa mindiwin ngə Bayzlav a hidigi. 2 A luwen aa mbusur hidiy mə puwiy talan tan law law am təkəniy cike. Mə ɗiy təkən a mozlokotuf kə jan hidiy kə vəlenta mordoy. Za mə hezliy təkən a hezl təm. Mə gariy lawlaw am vəl nəv ngatan a Kristu, mə mayiy celeniy tan a nəv takan, za mə musufiy hoy hoy am səb mozlokotuf ngə Bayzlav.3 A luwen a mbusur wertiy təm mə ɗewiy ɗew malaw ngə fet nəv ngə Bayzlav. Mə gər kə zəmiy madabah ngə hidiy kwən. Za mə gər kə ɗewiy kə bahlam ngə movu kwən. Mə jəgwanenta ɗew malaw a hidigi. 4 Mə jugwanenta a saɓar wertiy kə mayiy zeleniy tan ɓəw wəriy tan, 5 mə jəgwanenta kə ɗewiy kə wertiy mə njə kə hezliy təkən a hezl, za kə ɗewiy kə wertiy mə səniy zeleniy tan a gendik dap. Taniy kə kawiy hidiy tə de ngatan lawlaw, kə ɗewiy kə wertiy malaw, kə zlimenta ma aa zeleniy tan. Mana tu ɗiyta atəgo , hidiy ɗah kə zləgamiy ma mə ngavngav atalan zləgam ngə Bayzlav kwən.
Jəgwan Titus tu kə ɗiyen aa wəriy gawligi
6 A vəl gədan a wəriy gawliy təm mə ɗewiy kə hidiy mə hezliy təkən a hezl. 7 Hoh talan koh, am təkəniy cike a ɗiy malaw hidiy kə səbiy ngar koh. Hoh kə ɗiy jəgwan mana Bayzlav mə mayu, hoh gər kə ɗewer avə sin kwən. 8 Zləgam tə kəmkoh mə ɗew tiɗtiɗe, kə jan taa hidiy kə safta kə polkoy. Asəna acin, mosumiy ngiykwan a janiy mozlokotuf ngə zləgam mə ngavngav atalan yikwan kwən, za weli av kə ɗiyenta.
Jəgwan Titus tu kə ɗiyen aa baalamigi
9 A luwen a baalamiy təm kə zlimiy ma ngə hidiy məmarta ko am təkən ngemi. Say taniy kə ɗiyiy kəzəɗ ngə fetenta nəv ngə məmarta, mə gər kə ngəway a taniy kwən. 10 Za mə gər kə həliy təkəniy ngatan kwən. Mə ɗiyiy kəzəɗ malaw kə jan taa hidiy məmarta kə wəzəniy atalan tan. Asəna acin, am təkəniy cike wayza, taniy av kə vəlenta zay a jəgwan ngə Bayzlav mə mbəl yikwan.
Malaw ngə Bayzlav acin mə mbəl hidigi
11 Hidiy ngə Bayzlav kə ɗiyiy mana kat mə luw nhi, kadaban Bayzlav tu ɗef malaw ngetik mgban mgban a hidiy cike wayza. Sin kwəl kə mbəlta cike waykaɗ. 12 Malaw səna a njə kə jəgwani yikwan kə geɗ kə ɗiy mə ngavngav, ɓəw kə geɗ tamah ngə təkən təm talan mahayək. Asəna acin, yikwan məv kə mar bərngəzl talan malaw, yikwan kə ɗew kə hidiy maa tiɗtiɗe, mə ɗiyiy təkən mana Bayzlav mə mayu am talan mahayək nhi. 13 Anhi acin, yikwan maa puw pic ngə zəzay mordoy ngiykwan yikwan taa bəbəc atalan tik. Am pic səna, yikwan məv kə lim mə mbəl yikwan Yesu Kristu av kə yah avə gədan ngetik mordoy. Sin acin Bayzlav ngiykwan mordoy. 14 Sin vəl micin ngetik makavay yikwan, kə jan kə zlambaɗah yikwan a mə ngavngaviy ngiykwan cike wayza, za kə jan kə goh mə ngavngav ngiykwan kaɗ, za yikwan kə ɗew kə hidiy ngetik. Hidiy ngetik mə mayiy kə ɗiy kəzəɗ malaw hoyhoy. 15 Anhi acin təkən hoh tu kə ceɗen a hidigi. Hoh kə vəlenta gədan ɓəw kə ndəlta avə gədan Bayzlav mə vəloh. Hoh gər kə geɗ hid kə jərəvoh kwən.