Ɗew ngə hidiy ngə Yesu
3
A zləren zlimiy a hidiy ngə Yesu cike wayza kə daɓiy talan a bayigi ɓəw a mogroyigi. Taniy kə zlimenta ma, za kə sləsləɓiy kə ɗiyiy təkən malaw. 2 A luwenta mə gər kə zəmiy madabah ngə hidiy kwən, za mə gər kə kaɓariy ma kwən. Mə ɗewiy kə hidiy malaw, za hoy hoy taniy mə ɗefenta nja maa tehte avə hidiy cike wayza.3 Yikwan təm, aməcek yikwan ma sən təkən ɗahkwən. Yikwan mə zlimen ma a Bayzlav bugwən, yikwan tu lek. Yikwan mbaɗ kə bahlam ngə tamah ɓəw ngə may təkən təm nəv ngiykwan. Yikwan mə ɗew ɗew mə ngavngav, yikwan maa ɗiy ngəra k. Hidiy aa zeliy yikwan, za yikwan maa zel kəsəm am walan ngiykwan. 4 Amma, Bayzlav mə mbəl yikwan tu ɗefi yikwan malaw ngetik, za tu ɗefi yikwan mana sin ta may hidiy cike wayza. 5 Za sin mbəl yikwan kaɗ. Amma makavay kəzəɗ malaw yikwan mə ɗiy a mozlokotuf tik kwən. Sin a saf kaymah ngiykwan dap. Sin tu gohi yikwan a mə mə ngavngav ngiykwan kaɗ, a ɗiy avə gədan ngə Mbiɗ ngə Bayzlav kə jan yikwan kə mbuw mbuw mə saray, za yikwan kə jan micin ndawyan. 6 Mbiɗ səna, Bayzlav tu vəli yikwan day godokwən avə Yesu Kristu mə mbəl yikwan. 7 Bayzlav saf marɓən ngiykwan, vrək yikwan kə hidiy maa tiɗtiɗe a kibik tik. Kadaban səna acin, yikwan kwəl kə jan micin mətak way maa yikwan ta bəbəc atalan səna.
8 Zləgam kat mə luw nhi mindiwin, may ngaɗa, hoh kə jəgwanen hoyhoy a hidigi, kə jan hidiy mə vəliy nəv ngatan a Bayzlav kə ɗiyiy kəzəɗ malaw hoyhoy. Jəgwan səna law, za av kə mən ko hid ngayi.
9 A kaw talan koh a ngəway maa madabah atalan ɗahkwən. A kaw talan koh a nəf zlimi ngə didigi, a kaɓarma, ɓəw a ngəway atalan mə jaw jaw ngə Bayzlav. Nhi cike wayza, zay tik ɗahkwən, təkəniy maymay. 10 Hid məv kə dah kaɓarma a dab mgbəw ngə hidiy mə səbiy Yesu kə pətar hidigi, maa ngəzu. Mana sin a zlimeh ma ɓahbugwən, ma ngəz bah mə saray tik. Mana a zlim bəgwən baha, hoh gər kə lap avə sin ɗaba. 11 Hoh mə sən za, hid mana təgo tu lek mozlokotuf ngə Bayzlav. Avə mə ngavngav sin taa səb kə ɗiy tik, sin a kaw talan tik am dalgway.
Way zləgam
12 Təv kə zlənay Artemas asənkwən Tikikus kə vay angər koh. Mandal sin tu hosoy, maa mbəlam kə yah kə janakku a liɓde Nikopolis. May ngaɗa kə ton tər cəcən abəgo . 13 A sləsləɓ təkən ngə ɗə mbuluk a alkaliª Zenas ɓəw a Apolos kə jan taa təkən kə ndakenta am ɗə mbuluk. 14 Galmayiy ngiykwan hidiy ngə Kristu təm, mə jəgwaniy ɗiy təkəniy malaw hoyhoy, kə jan kə məniy hidiy təm. Mana taniy tu ɗiyta atəgo , av kə ɗef zay ngə ɗew ngatan.
15 Hidiy ngə Yesu cike tə ngər ɗa awənhi, aa ɗiy mbeli. A ɗen mbeli təm a hidiy ngə Yesu təbəgo mə mayiy yikwan. Bayzlav mə ɗiy malaw ngetik a hin cike wayza!