Ɗerewel ngə Pol a
Titus
Pol aa ɗen mbeli a Titus
1
Kat Pol, kat mə ɗəɗefeh ɗerewel nhi, kat hid mə ɗiy kəzəɗ ngə Bayzlav, za kat məzlənzlən ngə Yesu Kristu. Bayzlav zlənak angər hidiy sin mə welta, kat kə mənta kə vəliy nəv ngatan aa Bayzlav, za taniy kə səniy mindiwin atalan Yesu, kə ɗewiy mana Bayzlav mə mayu. 2 Anhi taniy kwəl kə bəbəciy atalan micin mətak way. Bayzlav aa ɗiy polkoy ɗahkwən, mə luwi yikwan za amicek, sin av kə vəli yikwan micin mətak way səna. 3 Mandal sin mə slu, Bayzlav mə mbəl yikwan vəlak zləgam ngetik, kə jan kat kə ɗefen a hidigi. Sin luwak kat kə ceɗ zləgam səna a hidigi.4 Tə ɗəɗef ɗerewel nhi, a hoh Titus kərti ɗa maa mindiwin, kadaban hoh avə kata yikwan mə vəl nəv ngiykwan a Yesu Kristu za. Vay ngiykwan Bayzlav avə Məmbəl yikwan Yesu Kristu mə ɗiyiy ngərbay ɓəw mə viliy zoy!
Ɗew ngə talan mbalgamiy ngə mgbəw ngə hidiy ngə Kristu
5 Kat tə geɗeh am hayək Keretaª, kə jan hoh kə way kə sləsləɓ kəzəɗ ngə ɗiy tə bugo. A liɓdiy cike wayza təm, hoh kə vrək talan mbalgamiy ngə mgbəw ngə hidiy ngə Kristu mana kat mə luwoh. 6 Talan Mbalgam ngə mgbəw ngə hidiy ngə Kristu mə ɗew kə hid maa tiɗtiɗe. Sin kə mar wer takan dap. Wəriy ngetik kə ɗewiy kə mə vəliy nəv ngatan a Yesu, za taniy kə ɗewiy kə wəriy maa hidiy aa janiy mə ngavngav atalan tan ɗahkwən ɓəw mə ɗewiy kə wəriy mə zlimiy ma ngə babay tan. 7 Talan mbalgam ngə mgbəw ngə hidiy ngə Kristu ɗaw kə ɗiy kəzəɗ ngə Bayzlav. Makavay səna acin, mə ɗew kə hid maa tiɗtiɗe. Mə gər kə gəl talan kwən, mə gər kə bas nəv hayya kwən, mə gər kə ɗew kə hid mə njə kə hay kwən, kə hid mə gbezlerma a hid kwən. Mə gər kə jar suloy avə wirwir mə ngavngav kwən. 8 Amma mə yək mbulukiy mə viy tə de ngetik law law, za say sin kə may ɗiy malaw hoy hoy. Mə ɗew kə hid mə njə kə hezl təkən, kə ɗew kə hid maa tiɗtiɗe, mə ɗew kə hid mə vəl talan tik cike a Bayzlav, za mə ɗew kə hid maa ɓəs kə puw talan tik. 9 Say sin kə ɗew kə hid mə kaw zləgam ngə Bayzlav malaw kə yək yikwan taa ceɗen a hidigi. Asəna acin, sin kwəl kə ɗew kə hid mə ɗiyen jəgwan zləgam maa mindiwin ngə Bayzlav a hidiy məpərmay. Sin kwəl kə ɗef mə ngavngav ngə hidiy mə zeliy jəgwan ngetik.
Hidiy mə ɗiyiy jəgwan mə ngavngav
10 A wel hidiy atəgo , kadaban hidiy ɗahiy dolom, kambay a dab yahudiy mə mbaɗiy kə mə səbiy Yesu, maa a zlimiy ma ngə hid ɗahkwən, a njə kə jəkiy hidiy avə zləgam maa madabah atalan ɗahkwən . 11 Hoh gər kə geɗen mozlokotuf aa hidiy səna kə ɗiyiy jəgwan kwən. Kadaban taniy tu ngaviy ɗew ngə hidigi avə jəgwan ngatan mə ngavngav, za kə jan suloy avə wirwir mə ngavngav. 12 Hid takan tə Kireta, taniy ta safta kə mokotuf, mə zləgama za atalan tan. Sin a luw: ‹‹ Hidiy təm hayək Kireta a njə kə ɗiyiy polkoy hoy hoy. Taniy wa təkəniy huvu maa lem, məsəfayigi, a njə kə ɓəniy gadablak ngatan a gendik dap!›› 13 Zləgam ngə mokotuf səna mindiwin. Kadaban səna acin, hoh kə zləgamenta avə ndəl kə jan taniy kə vəliy nəv ngatan law law a Kristu. 14 A zləgamenta kə jan taniy kə ɗewiy mətak cehiy zlimi am mələmbra mə ngawngaw Yahudiy ta njə kə ceɗta. Za mə gər kə səbiy mə zugzugwa ngə hidiy mə buwiy duwən a mindiwin kwən. 15 Təkəniy cike kweɗek kweɗek a hidiy məmariy nəv maa kweɗek a kibik Bayzlav. Amma hidiy maa nəv ngatan ɗah kweɗek kweɗek kwən, za maa aa mayiy kə vəliy nəv ngatan a Yesu kwən, a taniy wər, təkəniy cike hezi. Ɓən ngatan avə sən ngatan mə ngaviy wayza. 16 A njə kə luwta, taniy aa səniy Bayzlav, amma mə ngavngav taniy taa ɗiyta, aa ɗef tik taniy aa sənta ɗahkwən. A njə kə ɗiyiy təkən Bayzlav mə zelu, a zlimiy ma ngə Bayzlav ɗahkwən, za taniy aa ɓəsiy kə ɗiy təkən malaw ɗahkwən.