प्रकाशित वाक्य 21

कालाउ का एलोङ नावा स्वर्ग कालाउ नावा पृथ्वि तिङ्घा, हाइपालिपानु लाम्फा स्वर्ग कालाउ पृथ्वि माहि, कालाउ एला इन्ता सागर मान्थुघाहि | 2 कालाउ का परमेस्वरसो डाराको भासिङ दारवाइनि भापाङ साजाइतेङ ताअ्का, पबित्तरो नगर , नावा यरूसलेम स्वर्गसो लेता खुअ्तेङ हिका तिङ्घा | 3 का सिङ्हासनसो लोका एसा दोअ् बारका गाला हिङ्घा,इङ्को गाला दोअ्हि,''खाङ्सु ,परमेस्वरको सा दयाङ्गेलाइ दोफा हि | वा ओबालाइ दोफा ह्नयावा ओबालाइ वाको दयाङ्गेलाइ जेनावा | परमेस्वर स्वयम ओबालाइ दोफा ह्यावा कालाउ ओबालाइको परमेस्वर प्रजा जेनावा | 4 परमेस्वर ओबालाइको मिसियासो गोताङ म्हिति योप्यावा,एला उसो इन्ता सि:का,सोक, खारका तुका हाइदोङ माज्यावा, गोताङ पुरना काथागेलाइ बितितेङ हानिहि |'' 5 सिङ्हासनता बिराजमान हिका कासेहेङ दोअ्हि,''खाङ्सु ! एला का गोताङ काथागेलाइ नावा पादोङ खा | कालाउ वा दोअ्हि,''यासेहेङ लेखे.हाइपालिपानु इदोइ चवनगेलाइ खान्धुरि पालि सोबाइका हि कालाउ सत्ये हि |'' 6 वा कासेहेङ दोअ्हि,''एला दोअ्होइ, का अल्फा कालाउ ओमेगा, सुरु कालाउ न्हुसो का दोङ चि आम्लि किकालाइहेङ जिवनको चिको मुर्कासो एन्साङ प्याङ्का | 7 हिदोइबुङ दयाङ,ज्याइ बिजय निङ्खे,इदोइ वा गोता उतरधिकार निनावा कालाउ का वाको परमेस्वर जेनाङ्का वा काङ्को चान जेनावा | 8 कालाउ थिकालाइ, खान्धुरि मापाकालाइ, आखेका सिकाका जेङ्कालाइ, से:कालाइ, कासिबिरिगेलाइ ,तन्त्तरमन्त्तरगेलाइ ,मुर्ति पुजापाकालाइ कालाउ गोताङ धाताइतेङ नुइधुइकालाइ कालाउ झाराङ्को भाग , वाङ्खाराका खाराको मेता दालाङ्गा-दालाङ्गा थामे निनावा , इदोइ न्हेतेङ सि:का जेनावा | 9 न्हिलोङ स्वर्गदुतगेलाइ मध्ये एमि दुत काङ्कोता लोहि , वा स्वर्गदुतगेलाइ मध्येको एमि जाइको आखिरि बिपतिगेलाइ पोङ्घाका न्हिलोङ जाम बात्तिगेलाइ हिघाहि| इङ्को स्वर्गदुत दोअ्हि,''का दोफा लोउ | का नासेहेङ परमेस्वरको थुमाको दरवाइनि (बेहुलि) लितिम्पाङ्का जाइ परमेस्वरको थुमाको 'बे' हि'' 10 उङ्को स्वर्गदुत कासेहेङ आत्माता चुम्पुतेङ मेनाङ बारका वथे झाउका लाखता चुम्पुहि,कालाउ पबित्तरो नगर,यरुसलेम तिम्पाहि | इङ्को नगर परमेस्वरको स्वर्गसो लेता हुल्तेङ हिघाहि | 11 इङ्कोता परमेस्वरको महिमा चिल्कातेङ हिघाहि ,इङ्को चमक एकदम जाङ्का रत्न झोसे भाइपा जाहाका हिघाहि | 12 इङ्को सहरता तेन्हे फिनुगेलाइ कालाउ एलोङ बारका झाङ्का बेरेम हिघाहि जेता तेन्हे स्वर्गदुत गेलाइ हिघाहि | गोताङ फिनुता इस्राएललिगेलाइको तेन्हे हारागुतियागेलाइ मिङ लेखिका हिघाहि | 13 नुहेपाहा सुमलोङ फिनु दाहेपाहां सुमलोङ फिनु,माहेपाहा सुमलोङ फिनु कालाउ दिहेपाहा सुमलोङ फिनुगेलाइ हिघाहि | 14 सहरको बेरेम तेन्हे जोगहोइ ,बानाइका हिघाहि इङ्को सिलागेलाइता थुमाको तेन्हे प्रेरितगेलाइको मिङ लेखेका हिघाहि | 15 उङ्को स्वर्गदुत जाइ का दोफा काथा पाहि,वाको खुर्ता दोङ्का सोनाको डान्ठा हिघाहि | इङ्को स्वर्गदुत दोफा हिका दान्था,इङ्को फिनु कालाउ बेरेमगेलाइ दोङ्लिको भाअ्सिङ हिघाहि | 16 इङ्को सहर एलोङ गोलाइका खालको हिघाहि, इङ्को र्हिङ्का कालाउ फाराका बाराबोर हिघाहि | स्वर्गदुत इङ्को डन्ठा होइ सहर दोङ्हि, दोङ्लाउ इङ्को सहर न्हेहाजार दयासाइ किलोमितिर हिघाहि |इङ्को सहरको रि्हिङ्का कालाउ फाराका बाराबोर हिघाहि | 17 स्वर्गदुत बेरेमहेङबुङ दोङ्हि,इङ्को एसाइ द्- याकुरि दया खुर हिघाहि |इङ्को दयाङ्गेलाइको दोङ हिघाहि, जेदोङ स्वर्गदुत चालाइहि | 18 इङ्को बेरेम बिल्लोर होइ बानाइका हिघाहि,इङ्को सहर सुदृद सानाहोइ बानाइका हिघाहि |कालाउ जाहाका कासको भाइपाङ चिल्काघाखे | 19 इङ्को सहरको बेरेमगेलाइ उल्लिदुल्लिको मेनाङ जाङ्का रत्नगेलाइ होइ गासेका हिघाहि | एलोङ जोग बिल्लोरको,न्हेतेङ निर,सुमतेङ हरित रत्न,दयातेङ पन्ना, 20 नातेङ पितमनि,तुतेङ पिरोजा,न्हितेङ पोखराज,ऐयतेङ लहसुने,क्वाहातेङ धुम्रकान्ता, तेतेङ चन्द्रकान्ता, तेए निलमनि, कालाउ कोटेला रत्नगेलाइ हिघाहि | 21 तेन्हे फिनुगेलाइ तेन्हे मोतिगेलाइ हिघाहि ,गोतेङ फिनु मोतिसो बानाइका हिघाहि | सहरको दामागेलाइ सिसा भाइपाङ चिल्काका,कालाउ जाहाका निखुर सोनाको भाइपाङ जाहाका हिघाहि | 22 का इङ्को सहरता हिदोइबुङ मुन्दिर मातिङ्घा, हाइपालिपानु इन्ताको मुन्दिर स्वयम् परमेस्वर सर्बसाइमान कालाउ थुमादोङ सहरको मुन्दिर हिघाहि | 23 इङ्को सहरहेङ थाअ्साइपालि तालि कालाउ बेला मागोइखे, हाइपालिपानु परमेस्वरको महिमाहोइ इङ्को सहरहेङ फाइसालामका पिखे कालाउ इन्ताको सहरको गेसाचाहि थुमा ताइमिदोङ हिघाहि | 24 वाकोङ थाअ्साइकाहोइ जाति जातीगेलाइ सहरको थाअ्साइकाता तेगिल्लावा,पृथ्विको राजागेलाइ ताइको वैभव इङ्को सहरता चुमावा | 25 सहरको फिनुगेलाइ हिदोइबुङ दिना,मागिन्हावा ,हाइपालिपानु इन्ता हेलाउबुङ माबेलातावा | 26 इम्बालाइको जाति-जातिगेलाइको माहानाता कालाउ सम्पति इङ्को सहरता चुमावा | 27 कालाउ थुमाको जिवनको किताबता मिङ लेखेका हिकालाइ खिनिङ हिदोइबुङ असुद्दद काथा, आखेका काम पाका कालाउ धाताइका नुइ धुइका हिदोइबुङ खालको दयाङ इङ्को लिता दुल्लि मानिनाङ |