प्रकाशित वाक्य 22

कालाउ इङ्को स्वर्गदुत कासेहेङ जिवनको चि पिका झोरा स्फतिक भाइका जाहाका तिङ्पाहि , इङ्को झोरा परमेस्वरको कालाउ थुमाको सिङ्हासनसो झोतेङ हिघाहि | 2 इङ्को सहरको गल्लिको माझासो झोतेङ हिघाहि , इङ्को झोराको काम्भेता जिवनको सिङ हिघाहि जेदोङ गोताङ माइना तेन्हे खाल्को सेका सेघाखे , सिङ्को ल्हाफागेलाइ जाति-जातिगेलाइको मिसा एल्पालिको भाअ्सिङ हिघाहि | 3 एलासो उसो इनता हेलाउबुङ साराप माजेनाङ | परमेस्वर कालाउ थुमाको सिङ्हासन इनता ह्यावा , कालाउ वाको सेवकगेलाइ वासेहेङ आराधाना पावा | 4 इम्बालाइ वाको र्-हाइ तिनावा, कालाउ परमेस्वरको मिङ इम्बालाइको कापालाता ह्यावा | 5 इन्ता आरुङ हेलाउबुङ माबेलेतावा, दयाङ्गेलाइहेङ तालिको थाअ्साइकाको जरूरि मागोयाङ | परमप्रभु परमेस्वर इम्बालाइहेङ फाइसालामका प्यावा | कालाउ इम्बालाइ हेलाउ-लाउबुङ राजागेलाइको भाइकाङ सासन पावा | 6 इङ्को स्वर्गदुत कासेहेङ दोअ्हि,''इदोइ बचनगेलाइ खान्धुरिनिय कालाउ सत्ये हि | परमप्रभु अगमबक्तागेलाइको आत्मागेलाइ को परमेस्वर हि | परमेस्वर ताइको चाकारिया गेलाइहेङ इङको काथागेलाइ जाइ धेमाङ जेङ्लि गोयाङ,दोअ्का तिङ्पालि ताइको स्वर्गदुतहेङ दिङगिल्हि |'' 7 'हिङ्सु ! का धेमाङ लोदोङ्खा, इङ्को दयाङ जाइ इदोङ पुस्तकता अगमबानिको सब्दगेलाइ पालन पाखे ,धन्य इम्बालाइ |'' 8 इदोइ काथा हिङ्का कालाउ तिङ्का 'का' यु:हान्ना दोङ, जेलाउ का इदोइ काथागेलाइ हिङ्घा कालाउ तिङ्घा, कालाउ कासेहेङ इदोइ काथागेलाइ तिङ्पाका स्वर्गदुतको , खोकोइ भेरपा वासेहेङ सेउपालि तुघुरघा | 9 कालाउ उङ्को स्वर्गदुत कासेहेङ दोअ्हि,''कासेहेङ मासेउपा , का 'ते' नाङ्को कालाउ अगमबक्तागेलाइ पाका इन्सिकाङ का एलोङ चाकारिया | का बोअ् दयाङ्गेलाइ भाइका खिनिङ, इङ्को पुस्तकता हिका सिक्स्याको पालन पाकागेलाइको एनोङ बानधाइति सानाइति खिनिङ | ना परमेस्वरको आराधाना पाअ् | 10 कालाउ स्वर्गदुत कासेहेङ दोअ्हि,इदोइ पुस्तकको अगमबानिको बचन गेलाइहेङ म्होतेङ ताअ्लि माएल | या काथागेलाइ पुरा जेङ्लि समय लोलि दोअ्का हि | 11 इङ्को दयाङ्गेलाइ,जाइ दुस्त काम पाखे पातेङ्दोङ ह्याको, जाइ अस्लिल काम पाकालाइ असलिलदोङ पातेङ् ह्याको, जाइ,खुगिल्का काम पाखे खुगिल्काताङ हानाको ,धर्मात्मा चाहि धार्मिक काम पातेङ ह्याको | कालाउ पबित्तरो जनचाहि पबित्तरो दोङ जेङ्तेङ ह्याको | 12 हिङ्सु ! का धेमाङ लोदोङ्खा, गोताङ दयाङ्गेलाइको वाको पाका काम आन्सारको प्रतिफल का दोफा हि | 13 का दोङ अल्फा कालाउ ओमेगा हिगा, सुरु कालाउ न्हुसोको, एतेङ कालाउ ओटाका कादोङ | 14 जिवनको सिङ्सोङ्को खाबारा निङ्लि,कालाउ सहरको फिनुगेलाइसो लिता दुल्लि निनाको दोअ्ते '' ताइको धावा लोखन गेलाइ जाहापा फेअ्खे | 15 सहर बाहार खियागेलाइ,जादुमन्त्तर पाकालाइ लुचाकालाइ (कासिबेरी),से:कालाइ,मुर्तिपुजा पाकालाइ कालाउ असत्ये मन्दा ताअ्कालाइ, कालाउ असत्ये नुइ धुइकालाइ, धाताइकालाइ, इन्सिकाङ आन्सार हिगिल्काइ दयाङ्गेलाइ हि | 16 का येसु: ताइको दुतगेलाइ नाङ्कोता मण्डलिगेलाइको भाअ्सिङ इदोइ गवाहिगेलाइ पीलि काङको स्वर्गदुत दिङ्गिल्घा | का दाउदको जाहाँका मुल कालाउ सन्तान हिघा | का तल्किका चिल्कावा र्हिमाको फुरु हिघा |'' 17 पबित्तरो आत्मा कालाउ दारवाइनि दोअ्खे,''लोसु''जाइ हिङ्खे वा द्वावाको, ''लोसु''जाइ चि आम्लिकिखे उङ्को ल्वाको,जाइ मन पाखे वा जिवनको चि एपैसा माकोसिङ निनाको | 18 का गोताङ दयाङ्गेलाइहेङ चेताउनि प्यावाङका जाइ इङ्को पुस्तकता हिका अगमबानिको बचन गेलाइ हिङ्खे: एदि हिदोइबुङ दयाङ बचनगेलाइता हिदोइबुङ काथा थपिखे,कालाउ परमेस्वर उङ्को दयाङ्हेङ बिपतिगेलाइ थोपिप्यावा या पुस्तकता लेखेका कस्तगेलाइ प्यावा | 19 कालाउ एदि हिदोइबुङ या पुस्तकको अगमबानिको वचनगेलाइ लाअ्पाखे, कालाउ इदोइ लेखेका परमेस्वरको जिवनको सिङ कालाउ पबित्तरो,सहरसो, वाकोसो निङ्लि गोइका भाग परमेस्वर इन्तासो लाअ्प्यावा | 20 इदोइ काथागेलाइको गवाहि पिका दोअ्खे, या सत्ये हि, निस्चय ''एइ''का धेमाङ लोदोङ्खा मारफाङ ल्वाङ्का |'' आमेन लोउ, हे प्रभु येसु: 21 प्रभु येसु: कोअनुग्रह गोताङ सेवकगेलाइ दोफा ह्याको | आमेन |