Jude
यहूदा
1
येसु:ख्रिस्तको बान्धाइति (दास) कालाउ याकुबको एमि ओने, यहुदासो | इङ्को झाराङ द्-याङ्गेलाइ दोफा ज्याइ परमेस्वरसो चुनिका(साल्का) हि | आबा परमेस्वर नेलाइहेङ प्रेम पाखे कालाउ नेलाइ येसु: ख्रिस्तको खान्धुरिता रेम्फा त़ाअ्न्हाका हिनाहि | 2 गोताङ कृपा, सान्ति कालाउ प्रेम नेलाइता ह्याको | 3 प्रिय आनाउ सानाइतिगेलाइ, का नेलाइहेङ केलाइ झाराङ एदोफा सहभागि(जोम्का) जेङ्का उदारको बारेता लेखिलि मेनाङ मन्तालागिका हि | का नेलाइहेङ परमेस्वर वाको मन्दाताका पबित्तरो द्-याङ्गेलाहेङ प्रदान पाकाहि खान्धुरिको भाअ्सिङ हेन्साङ थाङ्का दु:खल्होपालि उत्साह प्रदान पिलि मन पाखा | परमेस्वर इदोइ खान्धुरि एखेताङ(एधेमासिङ) पिअ्का पिहि कालाउ इदोइ गोतेङ समयको भाअ्सिङ जेङ्काजेङहि | 4 आधिमि द्-याङ्गेलाइ नेलाइको जेरता सिक्कापा डुल्का हि | नेलाइको पातेङ् हिका काथासो भाअ्सिङ दोसिलि ठहराइका दोअ्का हि | हेन्साङ लाम्फा, अगमबक्तागेलाइ इम्बालाइको बिसयता लेखिका हिघाहि | इम्बालाइ परमेस्वरको सतुरगेलेइदोङ | इम्बालाइ केलाइको परमेस्वरको अनुग्रहहेङ हेसापातेङ्लाबुङ पाप काम पालि खाबारा पातारा बानाइका हि |इम्बालाइ केलाइको एनोङखीनिङ माझन इन्साङ प्रभु येसु:ख्रिस्टहेङ मन्दामाताखे | 5 नेलाइ गिलिदोका काथागेलाइ नेलाइहेङ फोमपापिलि का साघाइलि भोअ्खा: फोमपासु कि प्रभु मिस्रो सरभिसो बाहार चुमातेङ वाको द्-याङ्गेलाइहेङ बान्चिपाहि | कालाउ वा इङ्को झाराङ द्-याङ्गेलाइहेङ मोअ्पाहि ज्याइ खान्धुरि मापाहि | 6 कालाउ फोमपासु, इङ्को स्वर्गादुतगेलाइ ज्याइदोफा खाबारा हिघाहि कालाउ वा माताअ्हि | इम्बाइ ताइकोङ सा लाअ्हि | ओदोङ भाअ्सिङ प्रभु उङ्को स्वर्गदुतगेलाइहेङ कितिकितिकाता ताअ्हि | इम्बालाइहेङ हेलाउलाउबुङ हितेङ हिका वन्धनता धेउ्हि | वा इङ्को बाडादिनाता निसाप पालि इम्बालाइहेङ ताअ्हि | 7 सोदोम कालाउ गमोराता सहरगेलाइ कालाउ चारपाहाको भेनेङ सहरगेलाइ फोम्पा | इम्लाइबुङ उङ्को स्वर्गादुतगेलाइ कोनिङ्दोङ(भाइका) | इङ्को सहरगेलाइ कासिबेरि कालाउ अप्राकृति बाहारको रोङ्गि- चङ्गि हाउसारङ्गाता झुम्म्रि हिघाहि | इम्बालाइको अनन्त मेतादुनाङ भाइका डन्द भोग्याङ | इम्बालाइको डन्द केलाइको भाअ्सिङ उधारन्दोङ | 8 इङ्को नेलाइको समुहता(जेरता) दुल्का द्-याङ्गेलाइबुङ इङ्ताङ अनुसरन (झुवाइनाखे)| इम्बालाइहेङ ओबालाइको सपनाहोइ थोङगिल्खे कालाउ इम्बालाइ ताइमि सवयमहेङ मारेम्जाकापाखे (अनैतिक)| इम्बालाइ ताइमिहेङ मारेम्जापाखे | इम्बालाइ परमेस्वरहेङ सुइकार मापाखे कालाउ महिमामयस्वर्गदुतगेलाइको मरेम्का काथा पाखे | 9 प्रधान स्वर्गदुत मिखायेलबुङ इन्सा मापाहि | मिखायेल साइतानदोफा मोसाको जिउ हि दोअ्का काथाता माकिहि | कालाउ मिखायेल मारेम्का बचनसो साइतानहेङ चेर्लि आट मापाहि | अदोङ भाअ्सिङ मिखायेल दोअ्हि, “ परमप्रभुदोङ नासेहेङ दण्डडित प्यावा |” 10 कालाउ इदोइ द्-याङ्गेलाइ जेदोङ काथागेलाइ ताइमिदोङ गिका मान्थु इङ्को बारेता मारेम्का सब्दगेलाइ दोअ्खे |कालाउ इम्बालाइ जेदोङ बुझीखे बुधिसो माको कालाउ लाटा दिमाख कालाउ सुना गुपुस भाइपा बुझिखे |कालाउ इदोइ काथागेलाइसो इम्बालाइ नासातावा | 11 या नेलाइको भाअ्सिङ मेनाङ मारेम्फाङ मारेम्का ज्याङ | इदोइ द्-याङ्गेलाइ कयिन हिगिल्का दामाता पाकपिखे | धन सम्पति कामाइलि इम्बालाइ बालाम हानिका दामाता हिगिल्खे |इम्लाइ परमेस्वरको काथाता कोरह खिनिङ फेसुखे | इन्सासि कोरह खेनिङ इम्लाबुङ आयाङ | 12 इदोइ द्-याङ्गेलाइ नेलाइको समुह भातियारता हिका फोहरको दागगेलाइ भाइकादोङ हि, गोराभाइकादोङ | इम्बालाइ नेलाइको चाका-आम्काता आल्तिपिखे (साथ दिन्छ ') कालाउ डाकार उल्टिपाङ चाखे | इम्बालाइ ताइमि खिनिङ स्वार्थ केन्द्रित गोठालागेलाइ | इङ्को मिमातिङ्का गालागेलाइ | भेरमाहोइ नेलाइहेङ द्-यापाहाङ उ इङ्कोगेलाइ इङ्को सिङ्सोङ्गेलाइदोङ जेदोङ समयता मा-माउलाइखे कालाउ सेका मापिखे भोनोइसो उन्हाखे |एसापा इङ्कोगेलाइ चारपाङ पुरा रूपता सेङ्खे | 13 उङ्कोगेलाइ समुन्द्र थिलीगोइका भयानक सालगेलाइ (चानदोइनाका) भाइका चि, साल्कालाउ फिज उब्जिखे एनसादोङ भाइपा लेडेरखुदरका हिका काथागेलाइ दोअ्खे |इदोइ द्-याङ्गेलाइ उङ्को खुरुगेलाइ कोनिङ्दोङ जेदोङ बादेल्ता जिसोनिङ ओसोङ घुराइखे | इम्लाइको भाअ्सिङ चुक कोनिङ दाकाथामेता दिनाङ्को भाअ्सिङ ताअ्काहि | 14 आदमको न्हि सन्तान हनोक इम्बालाइको बारेता एसा दोअ्काहि : “खाङ्सु, प्रभु वाको हाजारौ-हाजारौ पबित्तरो दुतगेलाइदोफा लोदोङ्खे | 15 प्रभु ग़ोताङ द्-याङ्गेलाइको निया निसाप पाप्याङ | प्रभु गोताङ द्-याङ्गेलाइको निया निसाब पालि कलाउ ज्याइ परमेस्वरको बिरुदहि , इम्बालाइहेङ दण्डपिलि लोदोङ्खे | परमेस्वर इम्बालाइ पाका परमेस्वरको बिरूदि गोताङ काथागेलाइको भाअ्सिङ नेलाइ झाराङ्हेङ दण्डप्याङ |वा इदोइ पापिगेलाइ , ज्याइ परमेस्वरको बिरूद्ता जेथे दोअ्लि मायेल्का काथा दोअ्हि इङ्को झाराङ्को भाअ्सिङ दण्डप्याङ |” 16 इदोइ द्-याङ्गेलाइ जेलाउबुङ मारेम्का हाङ्खे कालाउ अरुको चाहि मारेम्का तिङ्लि भोखे | इम्बालाइ दिनाङ ओबालाइ पालि खाङ्का कु-कामगेलाइ पाखे | इम्बालाइ तामिहेङ गर्ब पाखे, इम्बालाइ आरु द्-याङ्गेलाइको बिसयता एल्का काथा दोअ्का कारन ओबालाइ जेदोङ भोखे इङ्को निङ्लिदोङ | 17 प्रिय सानाइति, केलाइको प्रभु येसु: ख्रिस्टको प्रेरित हाइ अगम्बानि पाकाहि, यात पासु | 18 प्रेरितगेलाइ नेलाहेङ दोअ्का हिघाहि, “आखिरता इन्ता द्-याङ्गेलाइ हिका ह्याङ, ज्याइ परमेस्वरको आसा पावा | इम्बालाइ ताइको इच्सा पुरा पावा कालाउ परमेस्वर बिरुदको काथागेलाइ पावा |” 19 इदोइ द्-याङ्गेलाइ जेङ, ज्याइ नेलाहेङ खेङ्नापावा | इदोइ द्-याङ्गेलाइ नेलाइको पापमय आत्माहोइ भोका खीनिङ भाइपा, इम्लाइको आत्मा मान्थुखे | 20 कालाउ प्रिय सानाइति नेलाइ, ताइमिहेङ बलियाका बानाइलिको भाअ्सिङ नेलाइता हेथे हेङ्साङ पिबित्तरो खान्धुरिसो प्रयोग पासु | पबित्तरो आत्मादोफा दोमचासु | 21 नेलाइ स्वयमहेङ परमेस्वरको प्रेमता ताअ्सु , नेलाइहेङ हेलालाउबुङ्को भाअ्सिङ जिवन पिलिको भाअ्सिङ वाको कृपा सुधाङ प्रभु येसु: ख्रिस्टको दामा खाङ्सु | 22 जेदोङ द्-याङ्गेलाइ साङ्खा पाखे इम्बालाइहेङ दाया तिम्पा, नेलाइ हिदोइबुङ द्-याङ्गेलाहेङ बान्चिपालि आस्वयक हि | 23 नेलाइ इम्लाइहेङ मेसो हाइसु, कालाउ खुबै सतरक जेङ्सु ना भेनेङ द्-याङ्गेलाइहेङ साघाइसुखेना |इम्लाइको धाबा सुधाङ सि-सि दुर-दुर पासु जेदोङ पापसो आखेका हि | 24 परमेस्वर सरबुङ्साइका हि कालाउ नेलाहेङ नासालिसो जोगाइलि कालाउ साघाइलि पिलि योग्य हि | हिदोइबुङ दोसिलि कालाउ माहा आनन्द बिनाङ वाको महिमामय लोका आगाउरि नासेहेङ चुमाली योग्य हि | 25 वा एमि खीनिङ परमेस्वर हि ज्याइ केलाइहेङ बान्चिपालि दोअ्खे |गोताङ बितिका समय, एला, कालाउ हेलाउ-हेलालाउबुङ केलाइको प्रभुयेसु: ख्रिस्ट दोफासो महिमा, माहानता, सरबुङ कालाउ खाबारा वाको दोफा ह्याको | आमेन |