प्रकाशित वाक्य 17

न्हिलोङ जाम बातिगेलाइ हिका स्वर्गदुतगेलाइ मध्ये एअ्मि लोहि कालाउ दोअ्हि,''लोउ,का नासेहेङ इङ्को दण्ड तिमपाङ्का जाइ इङ्को हेन्जा चिगेलाइता योम्तेङ हिका उङ्को माहा पातर्निहेङ (बेस्या) | 2 पृथ्विको राजागेलाइ वा दोफा लुचाकाहि पृथ्विको द्याङ्गेलाइ वाकोदोफा जिम्तेङ दाखरस आम्तेङ मान्हा भाइपा मान्हातेङ हि |'' 3 कालाउ इङ्को स्वर्गदुत कासेहेङ आत्माता फुटेङ उदाडाङ्का थामेता चुम्पुहि ,इन्ता का एलोङ चिल्काका तिरिहेङ इका रङ्को गपुस हुता योम्का निङ्घा |इङ्को गपुस जेदोङ परमेस्वरको बदनामि लेखेका मिङ्गेलाइ पोङ्घाका हिघाहि | इङ्को गपुसको न्हिलोङ पुरुङ कालाउ ते-लोङ धाङ्गेलाइ हिघाहि | 4 उङ्को बेबाल नेल्पा कालाउ इका रंङ्को धावा लोखन बोअ्का हिघाहि | कालाउ वा इङ्को सिका सोना,रत्न कालाउ मोतिगेलाइहोइ सान्साइतेङ हिघाहि | कालाउ मेनाङ सिकानाङ भाइका वाको कासिबेरिको असुद्द काथागेलाइहोइ पोङ्घाका एलोङ सोनाको जाम बाति खुरता चुमका हिघाहि | 5 वाको कापालाता एनोङ उपाधि लेखेका हिघाहि : इङ्को उपाधिको म्होनाकाको माने हि | पृथ्विको पातरनिगेलाइ कालाउ सिकाका काथापाकालाइको आमाइ ,माहान बेबिलोन | 6 कालाउ का उङ्को बेबालहेङ परमेस्वरको पबित्तरो द्याङ्गेलाइको कालाउ ज्याइ येसु:ता ताइको खान्धुरि दोअ्का हिघाहि इम्बालाइको हिति आम्तेङ म्हाका हिघाहि | जेलाउ का उङ्को बेबालहोङ तिङघा,का पुराङ भारबुसाइघा | 7 जेलाउ इङ्को स्वर्गदुत कासेहेङ दोअ्हि,''ना हाइपालि भारबुसाइना ? का नासेहेङ इङ्को बेबालको कालाउ वा ताङ्का गपुसको ज्याइको न्हिलोङ पुरुङको कालाउ तेलोङ दाङ हि म्होनाका को माने दोअ्प्याङका | 8 इङ्को गपुस ज्याइहेङ ना तिङना,एलोङ समयता बान्चिका हिघाहि | कालाउ एला इङ्को गपुस बान्चिका मान्थु | कालाउबुङ इङ्को गपुसबान्चियाङ कालाउ चिल वाङवाङका खारासो उल्लितेङ नासालि हानावा,प्थ्विता हिका दयाङगेलाइ भारबुसाइ यावावा | जेलाउ इम्बालाइ इङ्को गपुस तिनावा इम्बालाइ भारभुसाइयावा हाइपालि पानु एलोङ ( ए) समयता इङ्को गपुस बान्चिका हिघाहि,एला बान्चिका मान्थु,कालाउ इङ्को आरोङ ल्वाङ | इदोइ दयाङगेलाइ इङ्को गेलाइ ज्याइको मिङगेलाइ सुमिङको सिरजाइ जेङकासोङ जिबनको पुस्तकता लेखेका मान्थु | 9 यासेहेङ बुझिलिको भाअ्सिङ नासेहेङ ग्यानपुर्न हृदयको खाचो हि | इङ्को गपुसता हिका न्हिलोङ पुरुङ गेलाइ न्हिलोङ रा गेलाइ (पाहाड़) जेता उङ्को बेबाल हिखे | इम्बालाइ न्हिलोङ राजागेलाइ दोङ हि | 10 नालोङ राजागेलाइ सिलि दोहोइ | एमि राजा एलाबुङ बान्चिका हि | कालाउ न्हुसोको राजा लोदोङखे | जेलाउ वा,ल्वावा,आतुङसा समय खिनिङ ह्यावा | 11 इङ्को गपुस ज्याइ ए(एलोङ) समयता बान्चिका हिघाहि,कालाउ एला सि:का हि,उङ्को एयलोङ राजा | उङ्को एयलोङ राजाबुङ लाङ न्हिलोङ राजागेलाइको मध्येको एमि कालाउ इङ्को नासालिको भाअ्सिङ हानावा | 12 'ना तिङका तेलोङ दाङगेलाइ तेलोङ राजागेलाइ हि | इदोइ ( इदोइ,एदोइ) राजागेलाइ एला थेकापा राइजि पाका मान्थु | कालाउ नेलाइ ए घण्टा को भाअ्सिङ इङ्को गपुसदोफा सासन पाका खाबारा निनावा | 13 एदोइ गोताङ झाराङ तेलोङ राजागेलाइको एलोङदोङ उदेस्य हि | कालाउ इम्बालाइ ताइको सरबुङ कालाउ खाबारा इङ्को गपुसहेङ प्यावा | 14 इम्बालाइ परमेस्वरको थुमादोफा धुम पावा | कालाउ परमेस्वरको थुमा ओबालाइहेङ हारिपावा, हाइपालिपानु वा प्रभुगेलाइको परमप्रभु कालाउ राजागेलाइको राजा हिकाहि | वा इम्बालाइहेङ वाकोपाहासो चुनिका कालाउ काङ्का खान्धुरि चात्यागेलाइसो जितिपावा |'' 15 कालाउ स्वर्गदुत कासेहेङ दोअ्हि,''ना इङ्को पातर्नि जेसाङ योम्का हिघाहि इङ्को चि तिङना | इङ्को चि सुमिङको (संसारको) हेन्जाङ दयाङगेलाइ,भेनाङ-भेनाङ हारागुति,(बंसगेलाइ),गेलाइ राइजि गेलाइ कालाउ भासागेलाइ हि | 16 इङ्को गपुस कालाउ तेलोङ दाङगेलाइ ज्याइहेङ ना तिङना,इङ्को पातर्नि(बेस्या) गेलाइहेङ सि:कातावा | उङ्को दोफा हिका गोताङ आमेने इम्बालाइ चुम्पावा | कालाउ वासेहेङ नाङघाङ पातेङ लाअ्तावा | इम्बालाइ वाको बिया चावा कालाउ मेता ओपावा | 17 परमेस्वर इङ्को ते दाङ्हेङ ताइको उदेस्य पुरा पालि इच्छुक बानाइहि | इम्बालाइ सासन पालि ताइको सरबुङ इङ्को गपुसहेङ पिलि राजि जेङ्हि |ताइको सरबुङ पिलि राजि जेङ्हि | परमेस्वर दोअ्का काथागेलाइ पुरा माजेङपा थिकापा इम्बालाइ सासन पावा | 18 ना तिङका उङ्को बेबाल इङ्को माहानगर हि ज्याइ पृथ्विको राजागेलाइ हुता सासन पाखे |''