प्रकाशित वाक्य 16

कालाउ का मुन्दिर लोका एनोङ बारका गालाहोइ , इङ्को न्हिलोङ स्वर्गदुतगेलाइ दोअ्हि,''हाने कालाउ परमेस्वरको क्रोड (चेर ताङ्का) न्हिलोङ जाम बात्तिगेलाइ पृथ्विता हुपि |'' 2 कालाउ एतेङ स्वर्गदुत हानितेङ ताइको जाम बात्ति पृथ्विहुता हुपिहि,कालाउ एन्सा पानाङ इङ्को गपुसको चिन्ह हिकालाइ कालाउ इङ्को गपुसको साप हिका कालाउ इङ्को मुर्तिहेङ पुजिका झाराङ द्याङ्गेलाइहेङ मेनाङ दुःख दायक जेङ्हि कालाउ तुइराङ गेने-गनेका पेचेरा गेलाइ जेङ्हि | 3 न्हेतेङ स्वर्गदुत समुन्द्रता ताइको जाम बाति हुहि ,कालाउ समुन्द्रता सि:का द्याङको हिति भाइपा जेङ्हि | समुन्द्रता हिका गोताङ हुसिहिका जन्तुगेलाइ सि:हि | 4 सुमतेङ स्वर्गदुत ताइको जाम बात्ति झोरागेलाइता कालाउ चिको मुरका थामेता हुपिहि, कालाउ चिको गोताङ मुहानगेलाइ हितिदोङ जेङ्हि | 5 कालाउ का चिको जिम्मा र्-हुका स्वर्गदुत एसा दोअ्का हिङ्घा: ''ना दोङ एलोङ इन्सापता नियानिसाप हिना, जाइ ना हिका हिना, जाइ हिका हिघाखेना नादोङ एलोङ ''हे पबित्तरो परमेस्वर | हाइपालिपानु ''ना एसापा निया निसापगेलाइ पाका हिना, 6 हाइपालिपानु इम्बालाइ नाङ्को पबित्तरो सेवकगेलाइ कालाउ नाङ्को अगमबक्तागेलाइको हिति होपापिका हि | कालाउ इम्बालाइहेङ ना हिति आम्लि पिका हिना , इम्बालाइ इङ्कोङ निङ्लि गोइका हि |'' 7 कालाउ का बेदिसो एसा दोअ्काताङ पाका हिङ्घा: ''हे, परमप्रभु परमेस्वर,सरबुङ्साइका नाङ्को न्याय सत्ये कालाउ उचित हि |'' 8 कालाउ द्यातेङ स्वर्गदुत ताइको जामबाति तालि हुता हुपिही, तालिहेङ द्याङ्गेलाइ 'मे' धाङ्काहोइ ओपालि सरबुङ पिहि | 9 द्याङ्गेलाइ ओसारा सानेको धाङ्काहोइ ओहि, कालाउ इङ्को द्याङ्गेलाइ माहाबिपतिगेलाइ हुता सरबुङ हिका परमेस्वरको मिङ्ता मन्दामाताहि हि | कालाउ दयाङ्गेलाइ पास्ताइ पालि कालाउ परमेस्वरहेङ महिमा पिलि इन्कार पाहि | 10 कालाउ नातेङ स्वर्गदुत ताइको जाम बात्ति गपुसको सिहासनहुता हुपिहि, कालाउ गपुसको राइजिता कितिकितिका ठुम्नाहि, द्याङ्गेलाइ कस्तको कारन होइ देतोङ चिहि | 11 द्याङ्गेलाइ इम्बालाइको निङ्का पिडा कालाउ पेचारा को कारनसो स्वर्गको परमेस्वरहेङ सराप पिहि | कालाउ इम्बालाइ ताइको आखेका कामको भासिङ पास्ताइलि माकिहि भरू इन्कार पाहि | 12 तुटेङ स्वर्गदुत ताइको जाम बात्ति ओसारापा बारका बिसाल झोरा युफ्रितिसता हुहि, नुहेसो तेतेङ लोलि गोइका राजागेलाइको दामा बानाइलिको भाअ्सिङ इङ्को झोराको चि सिअ्हि | 13 कालाउ का सुमलोङ सिकाका दुस्त आत्मागेलाइ तिङ्घा जेदोङ चोम्फे भाइपा तिङ्घाखे , इम्बालाइ इङ्को अजिङ्गर पुय्याको नुइसो,इङ्को गपुसको नुइसो कालाउ धाताइका अगमबक्ताको नुइसो ओल्लिहि | 14 इदोइ दुस्त आत्मागेलाइ चामात्कारर तिङ्पाका आत्मा हिघाहि, इम्बालाइको चामात्कार पाका सरबुङ हिघाहि | इङ्को दुस्त आत्मागेलाइ सुमिङको गोताङ राजागेलाइकोता हानिखे , कालाउ इम्बालाइ सरबुसाइका परमेस्वरको माहा-दिवसता धुम पालि राजागेलाइ जोम्लि हानिखे | 15 'खाङ्सु ! का चोर भाइपाङ्पातेङ ल्वाङका | इङ्को धन्य हि जेदोङ द्याङ माजिमसिङ हिखे, कालाउ ताइको धावा लोखनगेलाइ ताइदोफा ताअ्खे | माकुनुते वा नाङ्घाइ ट्यावा, कालाउ वाको नाङ्घाइ हितेङ लेदेरतेङ हिका तिनावा |'' 16 कालाउ न्हुसो उङ्को दुस्त आत्मागेलाइ राजागेलाइहेङ इङ्को थामेता जोम्पाहि जाइहेङ हिब्रु भासाता अर्मागेदोन दोअ्खे | 17 न्हितेङ स्वर्गदुत ताइको जाम बात्ति भेरमाता हुहि ,कलाउ मुन्दिरको सिहासनसो एसा दोअ्काता पाका बारका गाला लोहि ,''या एला दोहोइ |'' 18 कालाउ बिजिलि चिल्काहि,कालाउ चिलाउ-चिलाउका,गाला जेङ्हि कालाउ बारका भुइचाल हानिहि | इङ्को भुइचाल द्याङ्गेलाइ पृथ्विता सिरजाइ नाकासो पृथ्वीता हेलाउबुङ इसिका माजेङ्हि | 19 इङ्को बिसाल नगर सुम भागता धेअ्नाहि, कालाउ सारभि -सारभिको नगरगेलाइ नासा हि | कालाउ परमेस्वरहेङ महान बेबिलोन याद लोहि, कालाउ वा ताइको क्रोडको थिलिगोइगोइका गोराहोइ पोङ्घाका जामबाति इङ्कोहेङ आ|म्लि पिहि | 20 गोताङ 'रा'गेलाइ मोअ्तेङ हानिहि, कालाउ इन्ता लाखगेलाइ बेपाता जेङ्जि | 21 बारका-बारका झोसेगेलाइ बादेलसो द्याङ्गेलाइहुता हुल्हि, इदोइ झोसेगेलाइ गोताङको ल्हिका एन्साङ न्हेकुरि-न्हेकुरि किलोग्रामको हिघाहि | द्याङ्गेलाइ परमेस्वरहेङ या झोसेसो निङ्का कस्तको कारन साराप पिहि | इङ्को कस्त एलोङ सहिलि मादोका कस्त हिघाहि |