प्रकाशित वाक्य 14

कालाउ का खाङ्घा सियोनको आरदाङ्ता थुमा जाअ्तेङ हिका का तिङ्घा |वाको दोफा ए-लाख न्हेकुरि दया हाजार हिघाहि, जाइको कापालाता वाको मिङ कालाउ वाको आबाको मिङ लेखिका हिघाहि | 2 कालाउ का बाने लोका भाइका बारका गर्जनको गाला स्वर्गसो लोका हिङ्घा | का हिङ्का गाला बिना बाजाइकालाइ बाजाइतेङ हिका बिनाको गाला भाइका हिघाहि | 3 सिहासनको कालाउ इङ्को द्या हुसि हिका प्रानिगेलाइको कालाउ धर्म गुरुगेलाइको आगाउरि इम्बालाइ एनोङ नावा ले लेघाहि | खिनिङ इङ्को द्याङ्गेलाइ जाइ नावा ले धिरलि दोअ्हि,ए-लाख न्हेकुरि द्या हाजार हिघाहि जाइहेङ पृथ्विसो मोल तिरितेङ लाअ्पाका हिघाहि आरू बोमि हासुबुङ इङ्को ले धिरलि मादोहि | 4 इदोइ ए-लाख न्हेकुरि द्या हाजार द्याङ्गेलाइ जाइ बेबालाइ-बेजानगेलाइ दोफा इन्सिका मारेम्का पाप कामगेलाइ हाइदोङ पाका मान्थुघाही पाहि | कालाउ स्वयम ताइमिहेङ सुद्द ताअ्का हिघाहि | इम्बालाइ परमेस्वरको थुमा जोसोङ हानेहि ओसोङ पिताइ पुका एबालाइदोङ | इदोइ ए-लाख न्हेकुरि द्या हाजारहेङ पृथ्विको द्याङ्गेलाइसो मोल तिरितेङ मुक्त पाका हिघाहि | परमेस्वर कालाउ परमेस्वरको लाङ फल थुमाहेङ अर्पन पाका इम्बालाइदोङ लाङ द्याङ्गेलाइ हिघाहि | 5 इम्बालाइको नुइता हिदोइबुङ धाताइका काथा मानिङ्न्हाहि, इम्बालाइको हाइकोबुङ दोसि मान्थुघाहि | 6 कालाउ का भेनाङ स्वर्गदुतहेङ मध्य बादेलता उराइतेङ हिका तिङ्घा | पृथ्विता हिका गोताङ ,जाति,भासा , राइजि, हारा गुतियाहेङ द्याङ्गेलाइहेङ अनन्त थेकापाको ये:बानाल पालिको भाअ्सिङ उङ्को स्वर्गदुत हिघाहि | 7 उङ्को स्वर्गदुत बार्का गालाता दोअ्हि''परमेस्वरहेङ थिसु कालाउ वाको महिमा पासु | हाइपालिपानु वाको इन्साफ पालि समय लोका हि, जाइ स्वर्ग,पृथ्वि,समुन्द्र कालाउ चिको मुर्का मुलगेलाइ सिरजाइकाहेङ सेउपासु |'' 8 कालाउ न्हेतेङ स्वर्गदुत एसा दोअ्काताङ नहु-न्हु हानिहि ,'' नासा हि ! जाति-जातिहेङ ताइको कासिबेरिको क्रोधको दाखरस आम्लि लागाइका माहान बेबिलोनको पतन जेङ्हि |'' 9 कालाउ सुमतेङ स्वर्गदुत बारका गालाहोइ एसा दोअ्काताङ इम्बालाइको दोफा लोहि, | '' एदि हिदोइबुङ द्याङ इङ्को गपुस कालाउ इङ्कोको गपुसको मुर्तिहेङ पुजिना ,कालाउ ताइको कापाल कालाउ खुरता गपुसको चिन्ह ताअ्न्हा पानु, 10 उङ्को द्याङ्बुङ वाको क्रोधको दाखरस जाम बातिता हाइदोङ मामिसालाइसिङ तियार पाका परमेस्वरको क्रोधको जाम बाटिता ओसारा ताअ् दाखरस आमावा , कालाउ पबित्त्तरो स्वर्गदुतगेलाइ कालाउ थुमाको आगाता गाअ्गाअ्का मेको वाङ्खाराको खाराता वासिहेङ सहिलि मादोअ्का याताना प्यावा | 11 कालाउ इम्बालाइको भाअ्सिङ कस्तदायक धुवा हेलाउ-लाउबुङ हुता हानेतेङ ह्यावा | उङ्को दयाङ्गेलाइ इदोइदोङ जाइ इङ्को गपुसको कालाउ इङ्को मुर्तिको पुजा पावा वाको मिङ्को साप चोपावा,इम्बालाइ न्हिसिन नितिम हेलाउबुङ सुकापा माह्यावा | 12 परमेस्वरको आदेसगेलाइको पालन पालि गोइखे कालाउ ताइको खान्धुरि येसु: दोफा ताअ्लि परमेस्वरको सेवकगेलाइको धैर्य इदोइताङ हि | 13 कालाउ,का स्वर्गसो लोका इसिका दोअ्काताङपाका,गाला हिङ्घा,''इदोइ लेखेसु: एला उसो परमप्रभुता सि:कालाइ धन्यको हि |''आत्मा दोअ्खे,''एइ,या सत्ये हि | उङ्को दयाङ्गेलाइ इम्बालाइको थाङका ता-ताइको परिस्रमसो माइसाचावा हाइपालिपानु इम्बालाइ पाका कामगेलाइ ओबालाइदोफाङ हानावावा |'' 14 कालाउ का खाङ्घा कालाउ काङ्को आगाता इन्ता एनोङ जे:का बादेल हिघाहि, इङ्को जे:का बादेलता हुता योम्तेङ हिका द्याङ्को चान भाइका एमिहेङ तिङ्घा | वाको पुरिङ्ता सोनोको भाइका मुकुत हिघाहि कालाउ खुरता एनोङ चु:का काचिया हिघाहि | 15 कालाउ मुन्दिरको बाहार भेनाङ स्वर्गदुत लोहि, उङ्को स्वर्गदुत बादेलहुता,''योम्तेङ हिकालाइहेङ बारका गालाहोइ दोअ्हि , ''नाङ्को''काचिया चुमा कालाउ 'उम' चे | हाइपालिपानु चेका समय लोका हि, हाइपालिदोनु पृथ्विता उम गोताङ मिङ्लि दोअ्होइ | 16 एसापा बादेलता हुता योम्तेङ हिका, ताइको काचिया पृथ्विहुता चालाइहि | कालाउ पृथ्विता सेका उम चेहि | 17 कालाउ स्वर्गता हिका मुन्दिरसो भेनाङ स्वर्गदुत बाहार ओल्लिहि | उङ्को स्वर्गदुत दोफाबुङ चु:का काचिया हिघाहि | 18 कालाउ न्हुसो बेदिसो भेनेङ स्वर्गदुत लोहि, उङ्को स्वर्गदुतको मे हुता खाबारा हिघाहि | उङ्को स्वर्गदुत धार हिका चु:का काचिया हिका स्वर्गदुतहेङ दोअ्हि | ना ,''नाङ्को चु:का काचिया चुमा कालाउ पृथ्विको अङ्गुर बागाइचासो अङ्गुरको झुप्पा चुमातेङ जोम्पा | हाइपालिपानु पृथ्विको अङ्गुरगेलाइ गोताङ मिङ्लि दोअ्होइ | 19 इङ्को स्वर्गदुत वाको काचिया पृथ्विहुता चालाइहि ,कालाउ स्वर्गदुत पृथ्विको अङ्गुरगेलाइ जोम्पाहि | कालाउ इङ्कोहेङ परमेस्वरको क्रोडको बारका अङ्गुर पेलिका कोलता ह्वापिहि | 20 सहर बाहार दाख दानिता अङ्गुर याङ्हि, दाख दानि बाहार हिति हो:हि | इङ्को हिति ओह्याकोको लागाम थिकापा पुगिपा वाङ्खाराका हिघाहि, कालाउ सुमसाइ माइल थिकापा फारापा हिघाहि |