प्रकाशित वाक्य 13

कालाउ न्हुसो समुन्द्रसो एलोङ गपुस उल्लितेङ लोका तिङ्घा, इङ्कोको तेलोङ दाङ हिघाहि कालाउ न्हिलोङ पुरिङ हिघाहि | इङ्कोको गोताङ दाङ्ता एलोङ मुकुट हिघाहि , इङ्कोको गोताङ पुरिङ्ता परमेस्वरहेङ मन्दा माताका मिङ गेलाइ लेखेना हिघाहि | 2 इङ्को गपुस नाइभिरिको भाइका हिघाहि खोकोइ लोकारा भाइका तिङ्घाखे, वाको खुवाको भाइका नुइ हिघाहि | इङ्को अजिङ्गर इङ्को गपुसहेङ ताइको गोताङ सरबुङ,वाको सिहासन कालाउ माहान खाबारा पिहि | 3 इङ्को गपुसको एलोङ पुरिङता बारका पेचारा जेङ्का हिघाहि कालाउ वाको पेचारा एल्हि | कालाउ गोताङ सुमिङको द्याङ्गेलाइ भारभुसाइहि कालाउ झाराङ इङ्को गपुसहेङ पिताइहि | 4 द्याङ्गेलाइ इङ्को अजिङ्गर पुय्याको पुजा पाघाखे, हाइपालि पानु इङ्को पुय्या ताइको सरबुङ इङ्को गपुसहेङ पिका हिघाहि | कालाउ द्याङ्गेलाइ इङ्को गपुसको एसा दोअ्तेङ पुजा पाहि, इङ्को भाइका आरु हासु हि हि'?'' वाको बिरुदृता हासु धुम पालि द्वावा ?'' 5 इङ्को गपुसहेङ आहाङकारि वचन कालाउ परमेस्वरहेङ मन्दा माताका काथागेलाइ दोअ्लि कालाउ फादेरलि अनुमति पिहि ,इङ्को गपुसहेङ न्हे कुरि न्हे महिना थेकापा वाको सरबुङ चालाइलि खाबारा पिहि | 6 इङ्को गपुस परमेस्वरको पक्स्यता मारेम्का काथा दोअ्लि नुइ हिअ्हि इङ्को गपुस परमेस्वरको मिङ्को बिरुद्द,इङ्को थामेको बिरुद्द जेता परमेस्वर हिखे कालाउ इङ्को गोताङ,जाइ स्वर्गता हिखे ओबालाइको बिरुद्द काथा पाहि | 7 इङ्को गपुसहेङ परमेस्वरको पबित्तरो द्याङ्गेलाइको बिरुद्दता धुम पालि कालाउ ओबालाइहेङ जितिलि सरबुङ पिका हिघाहि | इङ्को गपुसहेङ गोताङ जाति,हारा गुतिया,(बंस) भासा कालाउ राइजि हुता खाबारा पिका हिघाहि | 8 गोताङ द्याङ्गेलाइ ज्याइ पृथ्विता हिखे,इङ्को गपुसको पुजा पावा, कालाउ इम्बालाइ,जाइको मिङ सुमिङ्को सिरजाइका सोङ्दोङ सेअ्न्हाका थुमाको जिवनको कितावता लेखेका मान्थु | 9 जाइको न्होतेङ हिनु वा हिनाको | 10 हिदोइबुङ द्याङ एमि कैदि जेङ्लि गोइनु,कालाउ उङ्को दयाङ कैदि जेङलिदोङ गोयाङ | हिदोइबुङ द्याङ तरवारहोइ सेअ्न्हालि गोइहे पानि,इङ्को द्याङ तरबारहोइदोङ सेअ्नावा | याको मतलब चा हि कि परमेस्वरको पबित्तरो द्याङ्गेलाइ दोफा धर्य कालाउ खान्धुरि इदोइ ताङ हि | 11 कालाउ न्हुसो का आरोङ भेनाङ गपुसहेङ पृथ्विसो ओल्लितेङ लोका तिङ्घा , इङ्को को थुमाको भाइका न्हेलोङ दाङ हिघाहि,कालाउ इङ्को बारका आजिङ्गर पुय्याको भाइपाङ काथा पाधाखे | 12 इङ्को गपुस लाङ गपुसको आगाता जाअ्खे , कालाउ लाङ गपुस भाइपाङ सारा सरबुङको चालाइखे | वा इङ्को सरबुङ कालाउ पृथ्विता हिका गोताङ द्याङ्गेलाइहेङ लाङ गपुसको पुजा पालि लागाइखे | जाइ लाङ गपुस हि जाइको पुरिङ्ता सि:लि तोम्पाका आइका पेचारा एल्का हिघाहि | 13 न्हेतेङ गपुस द्याङ्गेलाइको मिसियाको आगाताबादेलसो मे पृथ्विता हुल्पाका बार-बारका चिन्हागेलाइबुङ इङ्को पाहि | 14 इङ्को न्हेतेङ गपुस वासेहेङ पिका सरबुङ चालाइतेङ पृथ्विता हिका द्याङ्गेलाइहेङ धोका पिखे , इङ्को इदोइ भारभुसाइका गेलाइ लाङ गपुसको सेवाको भाअ्सिङ सरबुङ पिका हि, न्हेतेङ गपुस लाङ गपुसहेङ इज्जत पालिको भाअ्सिङ द्याङ्गेलाइहेङ एलोङ मुर्ति बानाइलि आदेस पिहि |इङ्को इदोइदोङ गपुस हि जाइहेङ तरवारको चोट निङ्चाका हिघाहि,कालाउ बुङ मासिहि | 15 इङ्को न्हेतेङ गपुसहेङ इङ्को लाङ गपुसको मुर्तिहेङ सिन्हुपाका सरबुङ पिका हिघाहि , कालाउ इङ्को मुर्ति नुइ धुइलि द्वाको, कालाउ इङ्कोहेङ पुजा मापाका झाराङहेङ सेअ्ताको | 16 इङ्को न्हेतेङ गपुस बार्का कालाउ म्हुइका,धनि कालाउ गरिब,मुक्त लाअ्पालि कालाउ बान्धाइति,झाराङ द्याङ्गेलाइहेङ इम्बालाइको दाम्पाहा खुर माकुनु कापालाता चिन्ह लागाइलि बाध्येता पाहि | 17 या चिन्ह हिका द्याङ्गेलाइ बाहेक हासुबुङ हाइदोबुङ चोल्लि कालाउ पिलि मादोअ्घाखे | कालाउ इङ्को चिन्हा गपुसको मिङ कालाउ इङ्कोको मिङ्को सङ्ख्या हिघाहि | 18 बुद्दि मति एडोइताङ हि: जाइको सम्झिका सरबुङ हि, वा इङ्को गपुसको सङ्ख्या जोरेयाको, हाइपालि दोनु इङ्को इदोइबुङ द्याङ्को सङ्ख्या हि, कालाउ इङ्को सङ्ख्या चाहि इदोइ ६६६ हि |