प्रकाशित वाक्य 10

कालाउ का आरोङ भेनेङ सर्बुङ साइका स्वर्गदुतहेङ स्वर्गसो खुअ्काताङ पाका तिङ्घा, उङ्को स्वर्गदुत बादेलको धाबा लुन्धाइनाका हिघाहि | वाको पुरिङ धेङ्गुरहोइ खोराइका हिघाहि, उङ्को स्वर्गदुतको र्-हाइ सान्हे भाइका हिघाहि,वाको खोकोइगेलाइ मेको खाम्बागेलाइ भाइका हिघाहि | 2 उङको स्वर्गदुतदोफा एलोङ चर्म पाताराको मुठा हिघाहि, इङ्को पुस्तिका वाको खुरता खोलेका हिघाहि | इङ्को स्वर्गदुत वाको दाम्पाहाको खोकोइ समुन्द्रता कालाउ केअ्पाहाको खोकोइ भोनोइता ताअ्का हिघाहि | 3 उङ्को स्वर्गदुत खुहा र्हिकाइका भाइका बार्का गालाहोइ र्हिकाइहि, स्वर्गदुत र्हिकाइहि कालाउ न्हुसो,न्हिलोङ मेघ गर्जनगेलाइको बारका गाला लोहि | 4 उङ्को न्हिलोङ मे गर्जनगालागेलाइ ताइ-ताइको गाला ओल्लिपाहि, कालाउ का लेखेलि तोम्का हिघाखा | कालाउ ओदोङ बेला स्वर्गसो एसा दोअ्का गाला का हिङघा, इङ्को न्हिलोङ मे गर्जनगेलाइ ओल्लिपाका गाला दोअ्का काथा मालेखे इङ्को गेलाइहेङ म्होतेङ ताअ् |'' 5 कालाउ,का समुन्द्र कालाउ भोनोइता खोकोइ ताअ्का स्वर्गदुत ताइको दाम्पाहा खुर स्वर्गभारि तोल्हेका तिङ्घा | 6 इङ्को हेलाउलाउबुङ सिन्हुतेङ हिका, कालाउ वाको स्वर्ग कालाउ इङ्कोता हिका, काथागेलाइ पृथ्वि कालाउ इनता हिका, समुन्द्रगेलाइ कालाउ एन्ता हिका गोताङ काथागेलाइ सिरजाइहि | कालाउ सिरजाइन्हाका मिङ वा केरा चातेङ स्वर्गदुत दोअ्हि,''एला हिन्जा र्हुमलि मागोयाङ | 7 इङ्को दिनागेलाइता जेलाउ न्हिलोङ स्वर्गदुत तुरहि म्होलि तियार जेङ्खे,परमेस्वर वाको बान्धाइति अगबक्तागेलाहेङ घोसाना पाका भाइपाङ परमेस्वरको म्होनाका रहस्य पुरा जेनावा | 8 कालाउ का आरोङ स्वर्गदुतसो ओदोङ गाला हिङ्घा, इङ्को गाला कासेहेङ दोअ्हि,''हाने कालाउ इङ्को खालि चर्म पातारा को मुठा थुमा जेदोङ स्वर्गदुतको खुरता हि | इदोइ ओङ्कोङ स्वर्गदुत हि ज्याइ समुन्द्र कालाउ भोनोइता जाअ्तेङहि |'' 9 एसापा का उङ्को स्वर्गदुतकोता हानिघा इङ्को म्हुइका लुमका चर्म पातारा कासेहेङ पिलि दोअ्तेङ र्हेहि | उङ्को स्वर्गदुत कासेहेङ दोअ्हि,''इदोइ म्हुइका चर्म पातारा चुम्पु कालाउ इङ्को चाअ् नाङ्को हामुता इदोइ डा:तावा, कालाउ नाङ्को नुइता इदोइ मह भाइपा ता:कावा |'' 10 एसापा का स्वर्गदुतको खुरसो इङ्को म्हुइका लुम्का चर्म पातारा र्हुघा कालाउ का इङ्को चाघा , काङ्को नुइता इङ्को मह भाइपा ता:हि | कालाउ इङ्को चालि दोअ्तेङ इङ्को स्वाद हामुता डा:हि | 11 कालाउ कासेहेङ दोअ्हि,''ना आरोङ हेलाउबुङ हेन्जाङ द्याङ्गेलाइहेङ जातिगेलाइहेङ, खाल-खालको भासागेलाइ कालाउ राजागेलाइको बारेता अगमबानि पालि गोयाङ |''