प्रकाशित वाक्य 7

इदोइ घाताना न्हुसो का दयालोङ स्वर्गदुत गेलाइहेङ पृथ्विको दया कुन्हा जाअ्तेङ हिका तिङघा (जाअ्का तिङघा) इङको स्वर्गदुत गेलाइ भेरमाहेङ भोनोइता याते समुन्द्र्ता या ते सिङसो भेर्माहेङ चातेङ ताअ्का हिघाहि | 2 कालाउ न्हुसो का स्वर्गदुतहेङ नुहेसो लोकाताङपाका तिङघा | इङको स्वर्गदुतको दोफा हुसि किका परमेस्वरको मोहर हिघाहि | उङको स्वर्गदुतगेलाइ बारका गालाहोइ ङको दयामि स्वर्गदुतगेलाइ बारका गालाहोइ इङको स्वर्गदुतगेलाइ काइहि | उङको दयामि स्वर्गदुत गेलाइ इम्बालाइ हिघाखे ज्याइहेङ परमेस्वर पृथ्वि कालाउ समुन्द्रहेङ चोट पापालि सरबुङ पिका हिघाहि | उङको स्वर्गदुत उङको दयामि स्वर्गदुतगेलाइहेङ दोअ्हि | 3 'केलाइ केलाइको परमेस्वरको बान्धाइति गेलाइको कापालाता मोहर मालागाइपा पृथ्वि,समुन्द्र कालाउ सिङगेलाइहेङ हाइदोङ हानिमापा | 4 कालाउ का मोहर लगाइका गेलाइको सङख्या हिङघा | इम्बालाइ ए-लाख न्हें कुरि दया हाजार हिघाहि,कालाउ इम्बालाइ इस्राऍलको सन्तानको गोताङ कुलसो हिघाहि | 5 यहुदाको कुलसो ते-न्हे हाजार,रुबेनको कुलसो तेन्हे हाजार कालाउ गादको कुलसो तेन्हे हाजार 6 आसेरको कुलसो तेन्हे हाजार,नाप्तालिको कुलसो तेन्हे हाजार,कालाउ मनस्सेको कुलसो तेन्हे हाजार 7 सिमियोनको कुलसो तेन्हे हाजार,लेबिको कुलसो तेन्हे हाजार,कालाउ इस्साखारको कुलसो तेन्हे हाजर 8 जबुलुनको कुलसो तेन्हे हाजार,युसुफको कुलसो तेन्हे हाजार कालाउ बेम्यामिनको कुल्सो तेन्हे हाजार 9 कालाउ न्हुसो का तिङघा,इन्ता हासुबुङ गान्धिलि मादोअ्का दयाङगेलाइ हिघाहि | इम्बालाइ पृथ्विको गोताङ रास्त,जाति,कुल कालाउ भिनाङ-भिनाङ भासाको दयाङगेलाइ हिघाहि | इम्बालाइ सिङहासन कालाउ थुमाको आगाता जाअ्तेङ हिघाहि,इम्बालाइ झाराङ जे:का धावा लोखन कालाउ इम्बालाइको खुरता खजुरको डालेङ हिघाहि | 10 इम्बालाइ बारका गालोहोइ र्हिकाइ हि,''केलाइको परमेस्वर ज्याइ सिङहासनता बिराजमान हिका हि कालाउ थुमाको जय ज्याको (ह्न्याको) |'' 11 कालाउ सिङहासन,धर्मा गुरुगेलाइ कालाउ दयातेङ हुसिहिका गपुसगेलाइको कोरपाहाङ गोताङ स्वर्गदुतगेलाइ जाअ्हि,कालाउ इम्बालाइको सिङहासनको आगाता पोम्भेलेतेङ एसापा दोअ्काताङ परमेस्वरहेङ धन्यबाद चढाइहि | 12 इम्बालाइ दोअ्हि,''आमेन ! बाखानाइ,महिमा,ग्यान,धन्यबाद,बाराबोर,सरबुङ कालाउ पराक्रम हेलाउलाउबुङ केलाइको परमेस्वर हेङ ह्न्याको | आमिन |'' 13 कालाउ धर्म -गुरुगेलाइ मध्येसो एमि कासेहेङ हि:हि,''इदोइ जे:का धावा लोखन लागाइकालाइ हासु ? इम्बालाइ हिसो-हिसो लोका को ?'' 14 कालाउ का दोअ्का,''महासय,ना पिलिखेना |''वा दोअ्हि''इम्बालाइ इङको दयाङगेलाइ ज्याइ महां -याताना भोगितेङ लोका हि | इम्बालाइ थुमाको हितिहोइ ताइको धावा झाअ्काहि | एला इम्बालाइ सुदृ कालाउ जाहाका जेङका हि | 15 एसापा एला इदोइ दयाङगेलाइ परमेस्वरको सिहासनको आगाता हि | इम्बालाइ न्हिसिन नितिम परमेस्वरको उपसना वाको थानता पाखे कालाउ वा ए:जाइ सिहासनता हिखे इम्बालाइहेङ सामाराइखे | 16 इम्बालाइ हेलाउबुङ माम्हितुनाङ,इम्बालाइ आरोङ हेलाउबुङ चि आम्लि माकिताङ |सान्हेको धाङकाहोइ,इम्बालाइहेङ माओअ्पाङ कालाउ इम्बालाइहेङ धाङ्काहोइ मासेअ्नाङ | 17 सिहासनता को मासाता हिका थुमा इम्बालाइको गोठालो जेनावा | वा इम्बालाइहेङ चिको मुरका भारि चुम्पावा ज्याइ जिबन प्यावा | कालाउ परमेस्वर इम्बालाइको मिसियाको गोतेङ मिति योप्यावा |