प्रकाशित वाक्य 5

सिङ्हासनता बिराजमान हिकाको दाम्पाहा खुरता लिता कालाउ बाहारता एनोङ लुम्का चर्म पताराको मुठ्ठा कातिङ्घा,जाइ न्हिलोङ मोहोर लागाइतेङ तु पाअ्तेङ हिघाहि | 2 कालाउ एनोङ बलियाका स्वर्गदुतहेङ बारका गाला होइ एसा दोअ्तेङ हिका कातिङ्घा,''इदोइ मुठ्ठा खाइलि कालाउ इङ्कोको मोहोरगेलाइ भोइलि हासु योग्य हि ?'' 3 स्वर्गता पृथ्विता कालाउ पृथ्विलिता इदोइ लुम्का चर्मपतराको मुठ्ठा खाइलि कालाउ इङ्को लिता खाङ्लि दोका हासुबुङ मान्थुघाहि | 4 हासुबुङ इङ्को लुम्का चर्मपतराको मुठ्ठा खाइलि कालाउ इङ्को लिता खाङ्लि योग्यको हासुबुङ मानिङ्नाङ का खुब खारघा | 5 जेलाउ धामिगेलाइ मध्ये एमि कासेहेङ दोअ्हि,''माखार | खाङ्सु,यहुदाको कुलको दा, दाउदको मुल या मुठ्ठा कालाउ इङ्को न्हिलोङ मोहोर गेलाइ खाइलि बिजयि जेङ्काहि |'' 6 जेलाउका एनोङ थुमा जाअ्तेङ्हिका तिङ्घा,जाइ सेन्हाका भाइका देखाल जेङ्घाहि | वा सिङ्हासन कालाउ द्यालोङ बान्चिका प्रानिगेलाइको माझाता,कालाउ धामिगेलाइको माझाता हिका हिघाहि | वाको न्हिलोङ दाङ कालाउ न्हिलोङ मिसियाँ हिघाहि,फुरुगेलाइ सारा पृथ्विता पिगिल्का परमेस्वरको न्हिलोङ आत्मादोङ | 7 वा हानिहि,कालाउ सिङ्हासनता बिराजमान हिकाको दाम्पाहा खुरसो इङ्को मुठ्ठा रहुहि | 8 जेलाउ वा इङ्को मुठ्ठा रहुहि,कालाउ इङ्को द्यालोङ सिन्हुका प्रानि कालाउ न्हेकुरि द्यामि धामिगेलाइ ठुमाको आगाता तुघुर हि | झाराङ्को खुरता बिना कालाउ धुमाना होइ पोङ्घाका सोनाको पातारा गेलाइ हिघाहि,जेदोङ सन्तगेलाइको दोमचाकाइका | 9 इम्बालाइ एसा दोअ्का ताङ एनोङ नावा ले लेहि: ''ना इदोइ लुम्का चरम पाताराको मुठ्ठा र्हुका कालाउ इङ्कोको मोहोरगेलाइ भोइका योग्य हिना,ना सेअ्न्हाना कालाउ ताइको हिति पाहा ना परमेस्वरको भाअ्सिङ गोताङ कुल,भासा,द्याङ कालाउ जातिजातिसो द्याङ् गेलाइहेङ लाअ्पान्हा, 10 कालाउ ओबालाइहेङ राइजि कालाउ केलाइको परमेस्वरको धामि बानाइना,कालाउ इम्बालाइ पृथ्विता राइजि पावा |'' 11 जेलाउका खाङ्घा,कालाउ सिङ्हासन,सिन्हुका प्रानिगेलाइ कालाउ धामिगेलाइको कोरपाहाङ हेन्जाङ स्वर्गदुतगेलाइको गाला हिङ्गा | इम्बालाइको सङ्ख्या लाखौ करोडौ हिघाहि | 12 इम्बालाइ चेराका गालाहोइ एसा दोअ्तेङ हिघाहि,''सेअ्न्हाका थुमा बलियाका ,वैभब,बुद्दि,सरबुङ, सम्मान,महिमा कालाउ बाखिन ग्रहन पाका योग्य हिका हिना |'' 13 कालाउ स्वर्गता,पृथ्विता,पृथ्विलिता,समुन्द्र कालाउ इन्ता हिका गोताङ प्रानि एसा दोअ्काताङ पाका का हिङ्घा,''सिङ्हासनता बिराजमान हिका हेङ कालाउ थुमाहेङ बाखिन,सम्मान,महिमा कालाउ सामर्थ कालाउ हेलाउलाउबुङ ह्याको |'' 14 जेलाउ इङ्को द्यालोङ दोङ सिन्हुका प्रानि दोअ्हि,|''आमेन |'' कालाउ उङ्को धामिगेलाइ तुघुरतेङ सेउपाहि |