प्रकाशित वाक्य 3

कालाउ सार्दिसको मण्डलिको दुतहेङ हाइ दोअ्खे या लेखे: एदोइ काथा परमेस्वरको न्हिलोङ आत्मा कालाउ न्हिलोङ फुरू हिका दोअ्खे | नाङ्को काम थाहा हि | ना सिन्हुका हिना दोअ्का मिङ्ते हि,कालाउ नेलाइ सि:का हिसुना | 2 जागितेङ हिसु कालाउ सिलि तोमका बाकि हिका काथागेलाइ बलियाका बानाइसु,हाइपालिदोनु का नाङ्को काम काङ्को परमेस्वरको नजरता सिद जेङ्का निङ्का मान्ठुघा | 3 ओदोङ भाअ्सिङ ना जेदोङ निङ्ना कालाउ हिङ्ना,इङ्को गेलाइ फोम्पा,इङ्कोहेङ मनता तातेङ कालाउ पास्ताइपा | यदि ना जागितेङ मॉहिना पानुते का चोर भाइपाङ ल्वाङ्का,कालाउ का हिदोइबुङ बेला ल्वाङ्का,इङ्को ना थाहा मागियाना | 4 कालाउ सार्दियासता हेठे द्याङ्गेलाइ हि,जाइ ताइको लोखनगेलाइ भेम्तिहोइ मिधिबानाइका मान्थु | इम्बालाइ का दोफा जाहाका लोखन होङ्तेङ हिगिल्लावा,हाइपालिदोनु इम्बालाइ योग्यका हि | 5 जाइ जितिखे,वासिहेङ एसापा जाहाका लोखन धावा गुपावा,कालाउ का वाको मिङ जिबनको किताबसो मा मोपा प्याङ्का | का वाको मिङ काङ्को आबाको आगाता कालाउ वाको दुतगेलाइ आगाता स्विकार पावा | 6 जाइको न्हातोङ हि, वा हिनाको,पबित्तरो आत्मा मण्डलिगेलाइहेङ हाइ दोखे | 7 कालाउ फिलाडेलफियाको मण्डलिको दुतहेङ या लेखे:इदोइ काथा वा दोखे,जाइ पबित्तर हि,जाइ सत्ये हि,जाइ दोफा दाउदको ताल्चा हि,जाइ हिखे,हासुबुङ मागितावा,कालाउ जाइ गिखे,हासुबुङ माहि तावा | 8 नाङ्को कामगेलाइ कासेहेङ थाहा हि | खाङ,नाङ्को आगाता का फिनु हिपितेङ ताका हिघा,जाइ हासुबुङ गिअ्लि मादावा | नाङ्को दोफा आतुङ्सा खिनिङ सरबुङ हि दोअ्का कासिहेङ थाहा हि,कालाउबुङ ना काङ्को बचन पालन पाका हिना,काङ्को मिङ हेङ इन्कार पाका मान्थुना | 9 खाङ्सु साइतानको चौघारासाता यहुदि माकालाउ बुङ यहुदिदोङ दोअ्तेङ धाताइका धुइकालाइहेङ का लोतेङ नाङ्को आगाता सेउपालि लागायाङ्का कालाउ नासिहेङ का प्रेम पाङ्का दोअ्का इम्बालाइहेङ जिम्मा पिपाङ्का | 10 न काङ्को धर्यको बचन साअ्नाङ,नासिहेङ जाचको इङ्को बेलासोङ का बान्चिपाङ्का,जाइ पृथ्विता हिका द्याङ्गेलाहेङ जाचिलि सारा सुमिङ्ता ल्वाङ | 11 का धेमाङ लोधोङ्खा | ना दोफा जेदोङ हि इङ्कोहेङ रिम्तेङ ताअ्, कालाउ नाङ्को मुकुट हासुबुङ मार्हुकाङ | 12 जाइ जितिखे, वासेहेङ का काङ्को परमेस्वरको मुन्दिरको एनोङ मुर्ति बानायाङ्का, कालाउ वा इन्तासो हेदेकालबुङ बाहार माओल्ह्याङ | कालाउ का इङ्कोता परमेस्वरको मिङ लेखिप्याङ्का, कालाउ काङ्को परमेस्वरको सहरको मिङ, यरूसलेम लेखियाङ्का, जाइ काङ्को परमेस्वरपाहासो सवर्गसो लेता लोखे | ताइकोङ नावा मिङ्बुङ का इङ्कोता लेखियाङ्का| 13 जाइको न्हातोङ हि, वा हिनाको,पबित्तरो आत्मा मण्डलिहेङ हाइ दोअ्खे | 14 कालाउ लाउदियाकोको मण्डलिको दुतहेङ या लेखे:इदोइ काथा आमेन, खान्धुरि योग्य कालाउ सत्ये सक्सि कालाउ परमेस्वरको सिर्जाइका सासक दोअ्खे | 15 कासेहेङ नाङ्को कामगेलाइ थाहा हि |ना तिर्काबुङ मान्थुन्हा, धाङ्काबुङ मान्थुन्हा, तिर्का माकुनु धाङ्का हिनुते जेङ्धाङ | 16 हाइपालिपानु ना बोबोका खिनिङ हिना, ना तिर्का ना धाङ्का, ओदोङ भाअ्सिङ का नासेहेङ काङ्को नुइसो बुरप्याङ्का | 17 का धनी हिघा, कालाउ कादोफा धन-सम्पति हि, कासेहेङ हाइदोङ काथाको खाचो मान्थु'' दोअ्ताना,कालाउ नासेहेङ थाहादोङ मान्थु कि ना दु:ख, होइका,दरिद्र, कान्हा,कालाउ नाङ्घाङ हिसुना | 18 ओदोङ भाअ्सिङ धनि जेङ्लि मेहोइ खारेका सोना कालाउ ताइको नाङ्घाङ हिकाको लेदेर म्होलिको जे:का धाबा कालाउ ना तिङ्लि दोअ्सु दोअ्तेङ ना मिसियाता लागाइलि मलहम, इदोइ गोताङ काङ्कोसो चोल्लि का साल्लाउ पियाङ्का | 19 जेथेहेङ का माया पाङ्का ,का इम्बालाइहेङ नायाङ्का, कालाउ दानाइयाङ्का|ओदोङ भाअ्सिङ हाइसाइसु| पास्ताइ पासु | 20 खाङ्सु का इता हिघा, का फिनुता जाअ्ताङ्का कालाउ द्कद्क पाङ्का, एदि हासुङ्बुङ द्याङ काङ्को गाला हिङ्खे कालाउ फिनु हिपिहि पानु का लिता दुलाङ्का कालाउ का वाको दोफा उम चाङ्का | कालाउ वा का दोफा उम चावा |'' 21 ' का झाराङ द्याङ्हेङ ,जाइ जितिखे, काङ्को सिङ्हसनता का दोफा हिलि खाबारा पियाङ्का | जेसाङ का जितिघा कालाउ का वाको दोफा वाको सिङ्हसनता हिघा | 22 झाराङ द्याङ, जाइ इदोइ काथागेलाइ हिङ्खे, मण्डलिगेलाइहेङ आत्माहोइ जेदोङ दोअ्खे, इङ्को हिङ्लि गोइखे |