फिलिप्पियों 2

का नेलाइहेङ ख्रिस्ता हाइदोङ पासु दोअ्लि गोइका हि ? आधे काथागेलाइ हि | हाइ नेलाइको मायारू होइ नेलाइहेङ कासेहेङ सु:खपि दोअ्खे ? नेलाइ आत्माता केलाइदोफा जोम्सुखेन्हा ? नेलाइकोता कृपा कालाउ दाया हि ? 2 एदि इदोइ काथागेलाइ नेलाइकोता हिहेपानु काङ्को भाअ्सिङ हाइदोङ पापिसु दोअ्तेङ का सेउपाखा | इदोइ कासिहेङ मेनाङ लेङ्चापावा | नेलाइ झाराङ्को हृदय इन्सिकाङ काथागेलाइ सोच्याको कालाउ इनता इन्सिकाङ प्रेम ह्याको मिलितेङ एनौदोङ उदेस्य चुमतेङ बान्चिसु | 3 जेलाउ आधे काथा पासुखेन्हा, स्वार्थ कालाउ हाइदोङ मागिकाको बाखिनाइ मापासु | नम्र कालाउ ताइमिहेङ खान्तेङ आरु गेलाइहेङ झन इज्जत जेङ्का गिसु | 4 ताइको भाअ्सिङ खिनिङ रूचि मातासु,भरु भेनेङ्गेलाइको जिवनताबुङ रूचि ताअ्सु | 5 ताइको जिवनता ख्रिस्त ये:सुको भाइपाङ सोचे कालाउ पासु | 6 ख्रिस्त ताइमिङ गोताङ काथाता परमेस्वर भाइपाङ हिघाहि | वा परमेस्वर बाराबोरको हिघाहि | कालाउबुङ वा परमेस्वरदोफा हिका बराबोरहेङ ताइको भाअ्सिङ् ताअ्लि गोइका सम्पति भाइपा मापाहि | 7 परमेस्वर दोफा वाको थामे वा लाअ्पिहि कालाउ द्याङ जेङ्तेङ जोलोम हि | कालाउ सेवक जेङ्हि | 8 जेलाउ वा इदोइ पृथ्विता हिघाहि वा ताइमिहेङ मेनाङ नम्र बानाइहि | वा सि:का थेकापाङ आग्याकारि जेङ्हि कालाउ क्रुसता सि:हि | 9 ख्रिस्त परमेस्वरको आग्या पालन पाहि ओदोङ भाअ्सिङ परमेस्वर वासेहेङ झाउका थामेता थुकापाहि | परमेस्वर ख्रिस्तको मिङ्गेलाइहेङ आरु भेनेङ मिङ्गेलाखान्तेङ झाराङ खान्तेङ महान बानाइ हि | 10 वा एसा पाहि जेलाउ कि स्वर्ग,पृथ्वि कालाउ पातालता गोताङ आमेने येसु: को मिङ्ता तिरु थुववाको | 11 येसु: ख्रिस्तदोङ प्रभु हि''दोअ्तेङ गोताङ देतोङ्होइ सुइकार पाको | जेलाउ द्याङ्गेलाइ एसा दोअ्खे,वाते आबा परमेस्वरता महिमा चुमावा | 12 काङ्को आनाङ (प्रिय)सानाइतिगेलाइ | नेलाइ दिनाङ दोअ्का काथा किका हिसुन्हा | जेलाउ का नेलाइदोफा हिघाखा,नेलाइ परमेस्वरको आग्याकारि हिघासुखेन्हा | इदोइ झन हेन्जा महत्वपुर्ण काथाहि कि एला का नेलाइ दोफा मान्थुलाउबुङ नेलाइ परमेस्वरको आग्या किसुखेना | काङ्को साघाइ माकोसिङ्बुङ नेलाइ ताइको मुक्तिको भाअ्सिङ कोसिस पासु | परमेस्वरसो थिसु कालाउ आदार पातेङ इन्सिकाङ पासु | 13 परमेस्वर नेलाइकोता काम पादोङ्खे | वासिहेङ हिदोइहोइ लेङ्चापालि दो:लि इङ्को पालि वादोङ साघाइखे कालाउ सरबुङ पिखे | कालाउ इन्सिका पालि सरबुङ बुङ् वादोङ पिखे | 14 हिदोइबुङ गन्-गन् कालाउ काथाता माफेसुसिङ गोताङ काम पासु | 15 जेलाउ नेलाइ दुस्त द्याङ्गेलाइको आगाता न्रिर्दोसि,पोङ्घातेङ परमेस्वरको सुद्द जामालगेलाइ, सुमिङ्ता चिल्काका फुरु भाइपाङ जेङ्स्वाना | 16 जिवन निङ्का सिकस्यागेलाइ इम्बालाइहेङ पि कालाउ ख्रिस्त आरूङ लोलाउ काङ्को काम मामाताङ काङ्को कोसिस खेर मानिहि दोअ्तेङ का नेलाइको बाखिन पालि द्वाङ्का | 17 नेलाइको खान्धुरिसो नेलाइको जिवनहेङ परमेस्वरको सेवाता एलोङ बलि जेनावा | नेलाइको बलिपुर्न पालि का ताइको हिति पिलि गोइलि दोअ्लाबु्ङ पाहे पानुबुङ का नेलाइदोफा, झाराङ्दोफा लेङ्चाङका कालाउ सुकाका (आनन्दमय )जेनाङ्का हि | 18 एसापासोङ नेलाइबुङ कादोफा लेङ्चालि कालाउ सुकाकापा (आनन्दमय) जेङ्लि गोइस्वाना | 19 थिमोथिहेङ नेलाइकोता धेमाङ दिङ्गिल्लाङ्का दोअ्तेङ का प्रभु ये:सुता आसा पाखा | नेलाइको बारेता हिङ्तेङ का हाउसाह्याङ्का | 20 तिमोथि भाइका भेनेङ द्याङ का दोफा मान्थु | वा नेलाइकोता सत्ये चासो हि | 21 भेनेङ गेलाइते ताइमिताङ मस्त हि | ख्रिस्त येसु:को कामता इम्बालाइ हिदोइबुङ चासो मान्थु | 22 तिमोथि हिसिका द्याङ हि नेलाइ गिसुखेना | एलोङ चान हेसा आबाको सेवा पाखे एन्साङ्दोङ ये:बानालको बानालता वा का दोफा सेवा पाका हि दोअ्का काथा नेलाइ गिसुखेना | 23 का वासेहेङ धेमाङ दिङ्गिल्लि भोखा | कासेहेङ हाइ जेङ्खे इङ्को गितेङ्साङ , का वासेहेङ दिङ्गिल्लाङका | 24 का पुराङ भरोसाता हिघा कि नेलाइहेङ धेमाङ भेतिलि हानिलि प्रभु साघायाङ | 25 इपाफ्रोडाइटस ख्रिस्तता हिका काङ्को ओनेगेलाइ | ख्रिस्तको जेरता वा बुङ कादोफा काम कालाउ सेवा पाखे | जेलाउ कासेहेङ सघाइको खाचो परिका हिघाहि,नेलाइ वासेहेङ काङ्कोता दिङ्गिल्पिसुन्हा | एला वासेहेङ नेलाइको हिकातादोङ दिङ्गिल्लि गोयाङ दोअ्का बिचार पादोङ्खा | 26 का वासेहेङ इदोइ भाअ्सिङ दिङ्गिल्खा कि नेलाइहेङ भेतिलि वा बुङ मेनाङ बयाकुल हि | जेलाउ वा सिता लोतेङ हि दोअ्का हिङ्नासिङ वा पिरता हिघाहि | 27 एइ,वा जातिङ्कोङ मासाधेका हिघाहि | कालाउ सिलिना हिलि जेङ्का हिघाहि | परमेस्वर वासेहेङ खिनिङ मादायाहि कासेहेङ बुङ दायाहि,कालाउ का हेन्जा पिर पालि मागोइखा | 28 ओदोङ भाअ्सिङ का वासिहेङ दिङ्गिल्लि काङ्को मेनाङ इच्छा हि | वासेहेङ तिङ्तेङ न्हुसो नेलाइबुङ मेनाङ लेङ्चास्वाना कालाउ का नेलाइको फिक्रि पातेङ हिलि मागोयाङ | 29 प्रभुता वासेहेङ बारका सुकुपासो (आनान्दसो )स्वागत पासु | इपाफ्रोडाइट्स भाइका हिका द्याङ्हेङ आदार पालि गोइखे | 30 ख्रिस्तको कामको भाअ्सिङ वा झान्दै सि:हि | कासिहेङ साघाइलिको भाअ्सिङ वा ताइको प्राण दोङ सङ्कटता ताहि | इन्सिका साहायाता पालि नेलाइ मादोस्वाना |