लुका 22

यहुदिगेलाइको अखमिरि तोलेको पारभा भेरपाङ लोका हिघाहि | इङ्कोहेङ निस्तार पारभा बुङ दोअ्खे | 2 मुख्य धामिगेलाइ कालाउ व्यवस्थाको सास्तिरिगेलाइ येसु:हेङ से:लि दाउगेलाइ भोगिलघाखे, कालाउ ओबालाइ चाहि द्याङ्गेलाइसो थिघाहि | 3 येसु:को तेन्हे प्रेरितगेलाइ मध्येसो एमिको मिङ यहुदा हिघाहि ज्याइहेङ इस्कारयोत दोअ्धाखे |साइतान यहुदाको लित्ता दुल्हि कालाउ वासेहेङ मारेम्का काम पालि हाउसाइहि | 4 ओबालाइको खुरता वासेहेङ हेसा रिमपा-पापिलि दोअ्तेङ मुख्य धामिगेलाइ कालाउ कप्तानगेलाइकोता हानितेङ वा सल्लाउ पाहि | यहुदा इम्बालाइ दोफा येसु:हेङ सुम्पिप्याङ्को बारेता काथा पासुहि | 5 इङ्को बिसयता मुख्य धामिगेलाइ मेनाङ लेङ्चाहि | एदि यहुदा येसु:हेङ रिम्पाहेपानु ओबालाइ ताका पिलि केरा चाहि | 6 यहुदा किअ्हि, इङ्को काथाता, कालाउ जेर मान्थुका बेला वासेहेङ रिम्पालि दाउगेलाइ भोगिल्लि तेङ्हि | 7 इङ्को अखमिरि तोले चाका दिना लोहि, | इङ्को दिना यहुदिगेलाइ निस्तारको पान्ठा मेसागेलाइ सेअ्तेङ चढाइहि | 8 येसु:पतरुस कालाउ यु:हान्नाहेङ दोअ्हि,''हानेसु कालाउ केलाइको भाअ्सिङ निस्तार उम तियार पासु |'' 9 पतरुस कालाउ यु:हान्ना येसु:हेङ हि:हि 'ना केलाइ हिसो उम तियार पाका मन पाखेन्हा ?'' येसु: ओबालाइहेङ दोअ्हि, 10 हिङ्सु ! जेलाउ नेलाइ सहर हानिस्वाना, इन्ता नेलाइ एअ्मि द्याङ्हेङ ए, घाल्से चि घेतेङ लोका दुसुस्वाना | वाको लेसारा पिताइसु ,वा एलोङ साता दुल्लावा | कालाउ नेलाइबुङ इन्ताङ दुल्सु | 11 इङ्को साको माझनहेङ 'दोअ्सु गुरु ज्य् वा कालाउ वाको चात्यागेलाइ निस्तार उम हिसो चालि दोअ्तेङ हिअ्लि दिङ्गिल्हि |' 12 कालाउ उङ्को साको माझन ताइको साको हुत्ताको कोठा साजाइतेङ ताका बार्का कोठा तिङ्प्यावा,इङ्को कोठादोङ नेलाइको भाअ्सिङ तियार पाप्याङ | निस्तार पारभाको उम इन्ताङ तियार पासु | 13 कालाउ न्हुसो पतरुस कालाउ यु:हान्ना इन्तासो उल्हितेङ लोहि | येसु:जेदोङ दोअ्का हिघाहि गोताङ काथागेलाइ इन्सिकाङ जेङ्का तिङ्हि, कालाउ ओबालाइ इन्ताङ्दोङ निस्तार पारभाको उम तियार पाहि | 14 जेलाउ ओबालाइको निस्तार तोले चाका बेला जेङ्का हिघाहि,येसु:कालाउ वाको चात्यागेलाइ कोरपाहाङ तोले चालि योमतेङ हिघाहि | 15 येसु: ओबालाइहेङ दोअ्हि,''का सि:लि कालाउ दु:ख निङ्लि खान्तेङ लाम्फादोङ नेलाइदोफा योमतेङ निस्तारको तोले चालि-आम्लि मन नेलाइदोफा पाका हिघाखा | 16 हाइपालि पानु का नेलाइहेङ दोअ्खा,परमेस्वरको सारभिता इदोइ पुरा माजेङ्पा भरि का इदोइ तोले आरोङ हेलाउबुङ माचाङ्का | 17 कालाउ न्हुसो ए, जाम -बाति दाखरस चुमतेङ वा परमेस्वरहेङ यिदोइको भाअ्सिङ धन्यबाद पिहि | कालाउ न्हुसो वा दोअ्हि,'' यिदोइ जाम: बाति चुम्पुसु कालाउ ता-ताइमिता बाखाराइसु | 18 का नेलाइहेङ दोअ्खा,का परमेस्वरको राइजि मालोपाभारि एला हेलाउबुङ दाखरस माआमाङ्का |'' 19 कालाउ न्हुसो येसु:तोले चुम्तेङ, वा तोलेको भाअ्सिङ परमेस्वरहेङ धन्यबाद पिहि कालाउ पोङ्हि | वा इङ्को तोले चात्यागेलाइ पिहि कालाउ वा दोअ्हि,''यिदोइ(इदोइ) काङ्को जिउ,जेदोङ्का नेलाइहेङ पिखा | कासिहेङ फोमपालिको भाअ्सिङ एसा पासु |'' 20 एसापाङ चालि दोअ्तेङ,येसु: जाम-बाति तोल्हेतेङ दोअ्हि,या बातिको माने नेलाइको भाअ्सिङ होपाका काङ्को हितिता परमेस्वर कालाउ वा द्याङ्गेलाइको माझाता एलोङ नावा बाचा (करार) यिदोङ नावा करार काङ्को हितिसो सुरुजेङ्खे जेदोङ का नेलाइको भाअ्सिङ होपाधा |'' 21 येसु:दोअ्हि,''नेलाइ मध्येसो हासुबुङ एअ्मि कासेहेङ धोका पिस्वाना | वाको खुर चाङ्चौकिता हि | 22 परमेस्वर जेदोङ योजना बानाइका हि ओदोङ द्याङ्को चान पुरा पावा,कालाउ धिक्कार हि ज्याइ वासेहेङ से:लिको भाअ्सिङ द्याङ्को चानहेङ रिमपाखे | 23 कालाउ न्हुसो चात्यागेलाइ ता-ताइमिता काथा पालि तेङहि,'केलाइ मध्येसो हासु चाहि येसु:हेङ एन्सा पाउ वाला ?'' 24 कालाउ ओबालाइ मध्येसो हासु चाहि झाराङ खान्तेङ माहान वाला दोअ्तेङ चात्यागेलाइ ता-ताइमिता काथा दोअ्सुलि तेङ्हि | 25 येसु:ओबालाइहेङ दोअ्हि,''सुमिङको (संसारमा ) राजागेलाइ ओबालाइको द्याङ्गेलाइता सासन पावा | जेदोङ द्याङगेलाइ खाबाराता हि ओबालाइ ताइमिहेङ ''जातगेलाइको महासहायकगेलाइ दोअ्न्हाङ | 26 कालाउ नेलाइ चाहि इन्सिका माजेङ्सु | नेलाइ मध्येसो ज्याइ बार्का हि,उङ्को म्हुइका दोङ्जेनाको कालाउ ज्याइ नेता (अगुवा हि) हिकालाइ चाहि सेवा वाको | 27 हाइपालिपानु बार्का हासु हि ? वा ज्याइ चाङ्चाउकि ता उम चालि योमका कि वासेहेङ सेवा पाकाताङ हि? हाइ चाङ्चाउकिता उम चालि योमका द्याङ बारका माको रो ? कालाउबुङ का नेलाइको माझाता एमि चाकारिया भाइकाङ हिघा | 28 नेलाइदोङ काङ्को कामगेलाइ कासेहेङ साघाइका गेलाइ | 29 जेसाङ काङ्को आबा कासेहेङ एलोङ राइजि (सारभि) पिका हि,काबुङ काङ्को दोफा हिकालाइहेङ सासन सरबुङ नेलाइहेङ प्याङ्का | 30 कालाउ कि काङको सारभिता नेलाइ काङ्को दोफा योमतेङ चास्वाना कालाउ आमस्वाना,कालाउ एस्राएलको ते-न्हे कुलको न्याय पातेङ सिङ्हासानगेलाइता योमस्वाना | 31 ''सिमोन,सिमोन,खाङ्सु साइतान नासेहेङ गहु भाइपाङ फाचिलि अनुमति र्-हेका हि, 32 का दोमचाका हिघा कि नेलाइको खान्धुरि मागुमाइपास्वाना दोअ्तेङ | का दोफा घुरितेङ न्हुसो नेलाइको दादा-ओनेगेलाइ झन बलिया का बानाइलि साघाइसु |'' 33 कालाउ पतरुस येसु:हेङ दोअ्हि,''हे प्रभु,का नाङ्को दोफा झ्यालखानाता हानिलि तियार हिघा, | का नादोफाङ्दोङ सिलिबुङ तियार हिघा, 34 कालाउ येसु:दोअ्हि,''ओइ पतरुस नानि न्हिसिन्ता धाङ्गाइ किया ओलि खान्तेङ , लाम्फाङ्दोङ,कासेहेङ ना, नाल्खा दोअ्लि सुमखे इन्कार पाना'' 35 कालाउ येसु:चात्यागेलाइ दोअ्हि,''जेलाउ का नेलाइहेङ द्याङ्गेलाइहेङ ये:बानाल पालि,ताका माकोसिङ,झोला कालाउ जुत्ता माकोसिङ दिङ्गिल्घा,हाइ नेलाइहेङ हाइको कमि जेङ्हि ?''चात्यागेलाइ दोअ्हि,''माजेङ्हि |'' 36 कालाउ एला येसु:ओबालाइहेङ दोअ्हि,''कालाउ जेलाउ नेलाइदोफा ताका,पोका जेदोङ हि यिङ्को चुम्पुसु | एदि नेलाइदोफा तरबार मान्थुनु,ताइको भोतो पिसु कालाउ एलोङ चोल्तेङ तासु | 37 यिदोइ धर्मशास्तर दोअ्खे,'द्याङ्गेलाइ दोअ्खे वा अपराधि हि | धर्मसास्तरता लेखेका काथा सत्ये जेङ्लिदोङ गोयाङ | यिदोइ काङ्कोङ बिसयता लेखेका हिघाहि,कालाउ एला सत्ये जेङ्तेङ हि |'' 38 चात्यागेलाइ दोअ्हि,'हे प्रभु,खाङ्सु! इता न्हेलोङ तरबार हि |'' येसु:इम्बालाइहेङ दोअ्हि,''न्हेलोङ दोङ हेन्जा जेनाङ |'' 39 येसु;सहर यरुसलेम लाअ्तेङ कालाउ आरू बेला भाइपाङ दिनाङ जोसो जैतुन लाख भारि हानिहि | वाको चात्यागेलाबुङ वाको दोअ्फाङ हानिहि | 40 जेलाउ वा यिङ्को थामेता थुकाहि,वा चात्यागेलाइ दोअ्हि,''दोमचाकाइतेङ हिसु,कालाउ लोभता मापरेसु |'' 41 कालाउ येसु:ओबालाइसो न्हेकुरि ते पाइताला दुरे हानिहि,वा तिरु थोतेङ दोमचाकाइहि, 42 'हे आबा,एदि यिदोङ नाङ्को मन हिनुपानु,यिदोइ कस्तको पहर काङ्कोसो हानिपापि | यिदोइ नाङ्को मन बमोजिम पाको काङ्को इच्सा भाइका माको |'' 43 कालाउ स्वर्गसो एलोङ दुत वासिहेङ बल पिलि वाकोता तिङ्चालाहि | 44 वा मेनाङ आपतता परिहि कालाउ वा झन सेउपातेङ दोमचालि तेङ्हि,कालाउ वाको र्-हाइसो भेमति हितिको बार- बारका थोपा भाइपाङ भोनोइता ह्यातेङ हिघाहि | 45 दोमचाइकासो ल्होतेङ चात्यागेलाइ दोफा लोलाउ वा ओबालाइहेङ मेनाङ दु:ख जेङ्नाङ हेन्जा मिन्धा धुलाइतेङ जिमतेङ हिघाहि,कालाउ येसु:तिङ्हि | 46 येसु;ओबालाइहेङ दोअ्हि,''नेलाइ हाइपालि मिन्धा धुलाइतेङ हिसुन्हा ?ल्होसो कालाउ जाचता मापरिसु ओदोङ भाअ्सिङ दोमचाकाइसु |ताकि नेलाइ लोभता परितेङ दु:ख मानिङ्चासु | 47 जेदोङ बेला येसु:काथा पाकाताङ पालाउ, ए हुदा द्याङ्गेलाइ इन्ता लोहि | तेन्हे चात्यागेलाइ मध्येसो एमि ज्याइहेङ यहुदा दोअ्धाखे उङ्को हुदाहेङ चुमतेङ यहुदा येसु:को भेरपाङ वासेहेङ चुमाइ चालि लोहि | 48 कालाउ येसु:वासेहेङ दोअ्हि,''ओइ यहुदा,चुमाइ चातेङ ना द्याङ्को चान्हेङ रिमदोङ्खेना | 49 येसु:को चात्यागेलाइबुङ इन्ता भेरपाङ जाअ्तेङ हिघाहि | इम्बालाइहेङ हाइ जेन्धोङ्खे दोअ्का बुझिहि | कालाउ चात्यागेलाइ येसु:हेङ हि:हि,''हे प्रभु,हाइ केलाइ केलाइको तरबार चालायाङ ?'' 50 कालाउ ओबालाइ मध्येसो एअ्मि चात्या वाको तरबार चलाइहि कालाउ वा प्रधान धामिको चाकारियाको दामपाहाको न्हातोङ पुक्का पापिहि |'' 51 येसु:दोअ्हि,''थामे''कालाउ वा चाकारियाको न्हातोङ साइहि कालाउ आरोङ नहातोङ तोलितेङ तेपापिही कालाउ वासिहेङ एल्पापिहि | 52 येसु:हेङ रिम्लि लोकालाइको मुख्य धामिगेलाइ,यहुदि वाराङ प्रधानगेलाइ कालाउ थानको (मन्दिरको) लान्ठा गेलाइ हिघाहि | येसु:ओबालाइहेङ दोअ्हि,''नेलाइ हाइपालि तरबार कालाउ लाथिगेलाइ चुमतेङ लोसुन्हा ? हाइ का हिदोइबुङ अपराधि भाइका हिघा | 53 का दिनाङ थानताको साता नेलाइ दोअ्फाङ हिलाउ नेलाइ काङ्को बिरोदता खुर माल्होपासुन्हा | कालाउ एला नेलाइको बेला हि,कालाउ दाकिलकिलकाको सासन चालाइका समय सरबुङ यिदोइ दोङ |'' 54 इम्बालाइ येसु;हेङ रिमतेङ चुमपुहि,कालाउ वासेहेङ प्रधान धामिगेलाइको साता चुमाहि | कालाउ पतरुस चाहि दुरेसोङ वा न्हु-न्हु हानिहि | 55 लान्ठागेलाइ इन्ता सालेङ्को माझता मे धोअ्हि,कालाउ द्याङ्गेलाइ मे एमलि जोम्हि,पतरुसबुङ ओबालाइ दोफाङ योम्हि | 56 एलोङ चाकारिया बेजान मेको फाइसालामकाता वासेहेङ योमतेङ हिका तिङ्तेङ रेम्फा खाङ्हि,कालाउ दोअ्हि,यिदोइ द्याङबुङ वाको दोफाङ हिघाहि |'' 57 कालाउ पतरुस एसा दोअ्तेङ इन्कार पाहि''ए बेजान,का वासेहेङ मानाल्खा |'' 58 इधिरिङ्ता आरोङ भेनेङ बेजान वासेहेङ तिङ्तेङ दोअ्हि,''ना बुङ इम्बालाइ मध्येसो एअ्मि |''कालाउ पतरुस दोअ्हि,''इङ्को द्याङ,का माको '' 59 लगभग:ए, घन्ता न्हुसो,भेनेङ द्याङ दोअ्हि,जातिङ्भारि इदोइ द्याङ वाको दोफाङ हिघाहि | हाइपालिपानु याबुङ गालिलिसोङ लोका हि | 60 कालाउ पतरुस दोअ्हि,''ए द्याङ ना हाइ दोअ्तेङ हिना,का मागिखा |'कालाउ वा काथा दोअ्काताङ् पालाउ धाङ्गाइ किया ओहि |' 61 कालाउ प्रभु घुरितेङ पतरसहेङ खाङ्हि | ''नानि किया ओलि लाम्फा ना कासेहेङ सुमखे का वासेहेङ मानाल्खा दोअ्तावा,इदोइ दोअ्का प्रभुको बचन फोम पाहि | 62 कालाउ वा न्हुसो बाहार उल्हितेङ मनदोङ थुरपातेङ खार्लि तेङ्हि | 63 जेलाउ येसुहेङ रिमका द्याङ्गेलाइ वासेहेङ खुजलाइ हि,कालाउ दानाइहि, 64 वाको मिसिया थुमपितेङ वासेहेङ हिअ्हि,''नासिहेङ दानाइकालाइ हासु ? ते ना अगमबक्ता नु दोअ् |'' 65 ओबालाइ वाको बिरुद्ता आरु हेन्जा जेङ्का माजेङ्का काथागेलाइहोइ खुजालाइहि |'' 66 न्हुदिना झेङ्लि दोअ्का पहर इन्ता जोमतेङ हिका द्याङ्गेलाइको बार्का धामिगेलाइ धर्म गुरुगेलाइ कालाउ सासतिरिगेलाइ एदोअ्फाङ लोहि | ओबालाइ येसु:हेङ ताइको माहासभाता चुम्पुहि | 67 ओबालाइ दोअ्हि एदि नादोङ ख्रिस्त हिना पानु ,केलाइहेङ सत्ये दोअ्पि |'' येसु:ओबालाइहेङ दोअ्हि,''एदि का दोङ ख्रिस्त दोअ्हेपानिबुङ नेलाइ कासेहेङ खान्धुरि मापास्वाना | 68 कालाउ का एदि नेलाइहेङ हिअ्हे पानुबुङ इङ्कोको जोबाफबुङ मापिस्वाना | 69 कालाउ एला उसो इदोइ,द्याङ्को चान परमेस्वरको सिङ्हासानको दामपाहा योम्पावा | 70 ओबालाइ झाराङ दोअ्हि,''इन्सापानु हाइ नादोङ परमेस्वरको चानरो ?'' येसु:ओबालाइहेङ दोअ्हि,''नेलाइ हाइ दोअ्सुखेना ओदोङ सहि हि | 71 ओबालाइ दोअ्हि,''केलाइहेङ एला आरोङ हाइको खाचो हिरो ? हाइपालिपानु केलाइ नाङ्कोङ नुइसो हिङ्न्हाहोइ हिदोइबुङ साक्सि मागोयाङ |''