लुका 21

येसु:खाङ्लाउ आधिमि धनि द्याङ्गेलाइ ताइ-ताइको थानको (मन्दिरको) दान पेटिता भेति ताअ्का तिङ्हि | 2 इन्ता वा एलोङ गरिब (दोका द्याङ) राडिहेङ इन्ता न्हेलोङ ताबाको म्हुइ-म्हुइका ताका दान पेटिता ह्वाका तिङ्हि | 3 येसु:दोअ्हि,''का नेलाइहेङ जातिङ्भारि दोअ्खा,उङ्को गरिब राडि आरू झाराङ खान्तेङ हिन्जा पिकाहि |'' 4 हाइपालि पानु इम्बालाइ झाराङ ताइको हेन्जा-हेन्जासो भेति पिका हि,कालाउ वा चाहि ताइको गरिबसो ताइको सारा कामाइदोङ पिका हि |'' 5 आधिमि चात्यागेलाइ थानको (मन्दिरको) बिसयता काथा दोअ्काताङ हिघाहि | इम्बालाइ दोअ्हि,रेम-रेमका उन्थुइसो बानाइका इङ्को एलोङ सुन्दर परमेस्वरको थान हि| इङ्को थानता (मन्दिरता) ,परमेस्वरहेङ चढाइका इङ्को रेम-रेमका आनेमानेगेलाइ खाङ्सु |'' 6 '' कालाउ येसु: दोअ्हि नेलाइ जेदोङ तिङ्तेङ हिसुन्हा गोताङ आनेमानेदोङ नासातेङ हानाङ , कालाउ इन्सिका समय ल्वाङ जेलाउ एलोङ उन्थुइता भेनेङ उन्थुइ माह्याङ,इङ्को गोताङ भाअ्पातावा | 7 कालाउ वाको चत्यागेलाइ येसु:हेङ हिअ्हि,''गुरु ज्यु इदोइ गोताङ हेलाउ जेनाङ ? कालाउ इङ्को काथा जेङ्लितोमलाउ हाइ चिन्हा जेनाङ ?'' 8 वा दोअ्हि,''थिसु, हाइदोङ्मागिका भाइपा मुर्ख माजेङ्सु नेलाइहेङ हासुबुङ मालाइपाको | काङ्को मिङ्ता हेन्जा का वादोङ( ख्रिस्तदोङ),द्वावा कालाउ' थिक समय भेरपाङ लोका हि,दोअ्तेङ द्वावा | इम्बालाइको लेसारा मापिताइसु, | 9 जेलाउ नेलाइ धुमगेलाइ कालाउ गुरगुराइका बिसयता हिङ्स्वाना,माथिसु | इदोइ काथा लाम्फा जेनावा,कालाउ न्हुसो अन्त चाहि ओदोङ घुरि माजेनाङ |'' 10 जेलाउ येसु:इम्बालाइहेङ दोअ्हि,''जाति जाति गेलाइको माझाता धुमगेलाइ जेनावा,सारभि-सारभिगेलाइको माझाता चेरस्वा | 11 बार्का भुइचाल हानावा,कालाउ भेनेङ -भेनेङ थामेता अनिकाल कालाउ मिसागेलाइ चारचाराइयावा | थिलि गोइ-गोइका घाताना गेलाइ जेनावा कालाउ स्वर्गसो बार्का -बार्का चिन्हागेलाइ जेनावा |'' 12 कालाउ इदोइ घातानागेलाइ जेङ्लि खाङ्तेङ,द्याङ्गेलाइ नेलाइहेङ रि्मावा कालाउ नेलाइहेङ साताइयावा | इम्बालाइको चाउघारा सा गेलाइता नेलाइको न्याय पावा कालाउ नेलाइहेङ झ्यालखानाता ह्वातावा | राजागेलाइ कालाउ हाकिमगेलाइको आगाता नेलाइहेङ जाअ्पावा | द्याङ्गेलाइ नेलाइहेङ एसा पालिको कारन नेलाइ काङ्को चात्यागेलाइ जेङ्नाङ | 13 कालाउ इदोइ पाहासो काङ्को बिसयता हाइबुङ दोअ्लि मौकाबुङ निङ्स्वाना | 14 नेलाइ ताइमिहेङ बान्चिपालिको भाअ्सिङ हाइ दोअ्लि गोयाङ इङ्को बिसयता चिन्तापालि मागोयाङ | 15 का नेलाइहेङ इसिका घुरिपालि काथागेलाइको बुद्दि प्याङ्का कि नेलाइको हिदोइबुङ सतुरबुङ जवाफ पिलि मादोअ्वा | 16 नेलाइको आबा-आमाइ,दादा ओनेगेलाइ,ताइकोगेलाइ,कालाउ सानाइतिगेलाइ सुधाङ नेलाइहेङ प्रसासनता चुम्पावा,कालाउ इम्बालाइ नेलाइसो आधिमिहेङ सेतावाबुङ | 17 झाराङ काङ्को मिङ्को कारन नेलाइहेङ मन्दामाताकावा | 18 कालाउबुङ इदोइ गोताङ काथाहोइ नेलाइको एलोङ्बुङ पुसुङ्बुङ मानासातावा |'' 19 नेलाइको खान्धुरिको कारनसो इदोइ गोताङ बिपतिगेलाइसो बान्चिस्वाना |'' 20 ''नेलाइ यरुसलेमहेङ द्यापाहाङ गोताङ पाहासो लान्ठागेलाइ (सिपाहि,पुलिस,सेना) खोराइका निङ्स्वाना | जेलाउ नेलाइ थाहा गिअ्स्वाना कि यरुसलेमको पतनको (दोका) बेला भेरपाङ लोका हि | 21 जेलाउ यहुदियाता हिकालाइ राभारि खाअ्स्वाको,कालाउ सहरलिता हिकालाइ बाहार खाअ्ताको,कालाउ बाहार देराभारि हिकालाइ सहरलिता मादुल्लाको | 22 अगमबक्तागेलाइ परमेस्वर वाको द्याङ्गेलाइहेङ दण्ड प्याङ दोअ्तेङ लेखेका हि | इङ्को इदोइ समय जेलाउ इङ्को गोताङ काथागेलाइ पुरा जेनावा | 23 इङ्को (ओङको बेला ) बेला गान्धितेअ्का बेबाल कालाउ दुदि चु:का जामालको आमाइगेलाइको भाअ्सिङ दु:ख दय जेनाङ | हाइपालि ? हाइपालिपानु इङ्को पृथ्विता मेनाङ कस्त जेनाङ | परमेस्वरको चेर इङ्को द्याङ्गेलाइ हुता जेनावा | 24 आधिमि द्याङ्गेलाइहेङ लान्ठा गेलाइसो सेअ्तावा | आधिमिहेङ कैदि बानाइतेङ गोताङ सारभिगेलाइता चुम्पावा | यरुसलेमको पबित्तरो सहरता खान्धुराइ मापाका यहुदिगेलाइको बेला अन्त माजेङ्पा भरि इम्बालाइको पाइतालाहोइ तेकेतेङ ताअ्तावा |'' 25 ''माथिसु'' ''बेला'' तालि,फुरुगेलाइताबुङ सारभुसाइका घातानागेलाइ घतेयावा | कालाउ पृथ्विता गोताङ जाति-जातिगेलाइ सङ्कटता, आपतता परियावा | समुन्द्र साल्का गुर-गुरायावा कालाउ उल्लातेङ लोका साल्कागेलाइसो गोताङ सारभिगेलाइ सङ्कटता परियावा | 26 द्याङ्गेलाइ थिचोङ्तावा,सुमिङ्ता एला हाइ जेनाङ वाला दोअ्तेङ पिरहोइ इम्बालाइ झाका लोनावा, | बादेलको सारबुङ्गेलाइ हेङ्गान्हावा | 27 कालाउ न्हुसो द्याङ्को चान सरभङ कालाउ माहा माहिमा दोफा बादेल हुत्ता लोकाताङ पाका तिङ्नाङ | 28 जेलाउ इदोइ गोताङ आनेमानेगेलाइ लाम्फा जेङ्लि तेनावा,माथिसु | हुत्ता खाङ्सु,कालाउ लेङ्चासु | हाइपालिपानु जेदोङ बेला परमेस्वर नेलाइहेङ मुक्ति प्यावा,इङ्को बेला भेरपाङ हि |'' 29 कालाउ न्हुसो येसु:इसिका एलोङ निङ्पिका काथा दोअ्हि:''इदोइ गोताङ सिङ्गेलाइहेङ खाङ्सु, कोसेकोसिङ याको भाअ्सिङ असल (रेम्का) उदारन | 30 जेलाउ उङ्को आरोङ दोरावा कालाउ सिङ्जालजालका जेनावा,नेलाइहेङ थाहा जेनावाकि ग्रिस्मरितु भेरपाङ लोहि | 31 एसापाङ जेलाउ इदोइ गोताङ जेङ्तेङ हिका तिङ्स्वाना, कालाउ परमेस्वरको राइजि भेरपाङ लोलि तोमका ह्यावा | 32 'का नेलाइहेङ जातिङ्भारि दोअ्खा,जेलाउ थेकापा इदोइ गोताङ घाटाना पुरा माजेङ्पाभरि या पुस्ता नासातेङ मान्हाङ | 33 बादेल कालाउ पृथ्वि नासातेङ, हानाङ कालाउबुङ काङ्को दोअ्का बचनगेलाइ हेलाउबुङ नासातेङ मानाङ | 34 'थिसु ! नेलाइ ताइको बिसयता,माकुनुते बार्का-बार्का माहाभात्यार ता खिनिङ ताइको बेला कालाउ जिवन सुमिङ्को चाका-आम्का गोरा म्हातेङ कालाउ पिरतेङ समय एन्साङ माथाल्सु | हाइपालिपानु इङ्को दिना नेलाइ दोफा पासो भाइपाङ झटै ल्वाङ | 35 हाइपालिपानु एसापाङ्दोङ सारा (गोताङ) पृथ्विता हिकालाइ झाराङ हुता इदोइ झटै ल्वाङ 36 कालाउबुङ लोका इदोइ गोताङ काथागेलाइसो खाअ्लि कालाउ द्याङको चानको आगाता जाअ्लि दोअ्लि गोताङ समय दोमचाकाताङ हिसु,कालाउ गोताङ्खालको सकटसो बान्चिली तियार पातेङ हिसु, | 37 येसु:लिपाङ थानता(मन्दिर) उपदेस पिहि,कालाउ न्हिसिन्ता चाहि सहर सो बाहार उल्हेतेङ जैतुन दोअ्का आरडाङ्गाता झेङ्पाङ इनताता हि | 38 दिनाङ र्-हिमा वाको बचन हिङ्लि झाराङ द्याङङगेलाइ रि्हिमाङ थान्ता (म्न्दिरता) लोघाखे कालाउ वाकोसो सिक्स्या हिङ्घाखे |