लुका 19

येसु:यरिहोको सहर पातेङ हानिदोङ घाखे | 2 यरिहोता एमि जक्कै मिङ पाका द्याङ हिघाहि,वा पोत ल्होपाकाको हाकिम हिघाहि कालाउ धनि हिघाहि | 3 वा येसु:हासुको दोअ्तेङ वासेहेङ खाङ्लि भोअ्घाखे |जक्कै एकदम पतोका हिनाङ वा द्याङ्गेलाइको जेरसो येसु:हेङ खाङ्लि मादोअ्घाखे | 4 वा येसु:हेङ खाङ्लि आगा-आगा धाअ्तेसाङ हानितेङ एलोङ कोसेको सिङ हुत्ता ताङ्हि | येसु: वासेहेङ दोअ्हि,जक्कै धेमा(झटै) लेता खुअ्तेङ लोउ ! नानि का नाङ्को साता बासा ह्याङ्का |'' 5 कालाउ न्हुसो जक्कै धेमा लेता खुअ्तेङ लोहि,वा येसु:हेङ ताइको साता बासा ह्याङका |'' 6 कालाउ न्हुसो जक्कै धेमा लेता खुअ्तेङ लोहि,वा येसु:हेङ ताइको साता स्वागत पालि निङ्तेङ मेनाङ लेङ्चाहि | 7 झाराङ द्याङ्गेलाइ इङ्को तिङ्हि,इम्बालाइ एसा दोअ्तेङ गुनगुनाइहि | ''खाङ्सु येसुहेङ:इसिका द्याङ दोफा बान्सालाइ जेङ्लि हानिखे |''जक्कै ते पापि हि |'' 8 जक्कै प्रभुहेङ दोअ्हि,'का रेम्का काम पालि मन पाखा | का गरिब गेलाइहेङ काङ्को आधा सम्पति प्याङका,एदि का हासुहेबुङ ठगेका हिहे पानु ओबालाइहेङ द्यागुना खान्तेङ हेन्जा घुरि पापि प्याङ्का | 9 कालाउ येसु:वासेहेङ दोअ्हि,'' या द्याङ रेम्का हि, नानि इदोइ साता मुक्ति लोका हि,हाइपालिपानु याबुङ आब्राहामको चान | 10 द्याङ्को चान राम्का द्याङ्गेलाइहेङ भोलि कालाउ उदार पालि लोका हि |'' 11 येसु:यरुसलेम भेरपा लोका हिघाहि,आधिमि द्याङ्गेलाइ सोचेहेकि परमेस्वरको सारभि झटै लोदोङ्खे |'' 12 द्याङ्गेलाइ इन्सिकाङ सोचिहिवाला दोअ्तेङ येसु:थाहा निङ्हि ,कालाउ वा इम्बालाइहेङ इदोइ निङ्पिका काथा दोअ्हि,''एअ्मि हिकाचाका द्याङ एलोङ सारभि जितेतेङ घुरितेङ लोलि दोअ्तेङ हिदोइबुङ दुरेको सारभिता राजा जेङ्लि हानिहि कालाउ साता गुरितेङ ताइको द्याङ्गेलाहेङ सासन पाधावा | 13 ओदोङ भाअ्सिङ वा ताइको ''तेमि''चाकारिया गोलाइहेङ एअ्थामे जोम्पाहि | वा झाराङ्हेङ एलोङ-एलोङ पोका ताका पिहि,कालाउ वा दोअ्हि,'का घुरितेङ मालोपा भरि इदोइ नेलाइ ब्यापार पासु | 14 कालाउ सारभिता हिका आरु द्याङ्गेलाइ वासेहेङ मारेम्का पाहि | कालाउ इम्बालाइ एदल ताइको द्याङ्गेलाइहेङ एसा दोअ्लि दिङ्गिल्हि केलाइ इदोइ द्याङ्हेङ राजा बनाइलि मन्दा मातानाखे |'' 15 कालाउबुङ उङ्को द्याङ्हेङ राजा बनाइहि,जेलाउ वा ताइको सारभि घुरिहि वा दोअ्हि,इङ्को चाकारियागेलाइहेङ काइसु ज्याइ दोफा काङ्को ताका हि | का गिलि खाङ्खा इम्बालाइ इङ्को ताकासो हेथे थेकापा कामाइहि | 16 एतेङ लोका चाकारिया दोअ्हि,'माझन,का ना पिका ए, तोपाला सो तेपोका ताका कामाइघा |' 17 राजा उङ्को चाकारियाहेङ दोअ्हि,'स्याबास,ना रेम्का चाकारिया हिना | नेलाइ म्हुइका काथाता खुन्धुरि हिघा सुखेन्हा |ओदोङ भाअ्सिङ का काङ्को तेलोङ सहर सासन पालि नासेहेङ ताअ्ताङ्का |' 18 न्हेतेङ चाकारिया दोअ्हि,'माझन,का नाङ्को पिका ए, तोपाला ताका सो ना पोका आरु ताका कामाइघा |' 19 राजा उङ्को चाकारियाहेङ दोअ्हि,'नाबुङ नालोङ सहरगेलाइता सासन पा !'' 20 कालाउ न्हुसो भेनेङ चाकारिया लोहि,वा राजाहेङ दोअ्हि,'माझन! इता नाङ्को ताकाको तोपाला हि,का ताकाहेङ धावाहोइ लुम्तेङ म्होतेङ ताका हिघा | 21 का ना दोफा मेनाङ थिघा,हाइपालिपानु ना मेनाङ बल दिखेन्हा(राङका द्याङहिना) | ना माथिङ्सिङ चेखेना ना ताइमि माकामाइकाबुङ चुम्पुखेना ना चालाइ माबिसिङ सेका चेखेना | 22 कालाउ न्हुसो राजा इङ्को चाकारियाहेङ दोअ्हि,ना बेइमान चाकारिया हिना | का नासेहेङ नाङ्कोङ काथासो न्याय पाङ्का,ना दोअ्न्हा कि का राङ्थिउका कालाउ माकामाइसिङ ताका ह्-हुखेना ,कालाउ जेदोङ थिङ्का मान्थुन्हा इन्तासो सेका पेअ्खेना | 23 एदि या गोताङ सत्ये नु काङ्को पाइसा(ताका) ना बैङ्ता ताअ्लि दोधाना | कालाउ का घुरितेङ लोघा,काङ्को ताका सो ब्याज कामाइका हिधावा |' 24 कालाउ न्हुसो राजा इन्ता जाअ्तेङ हिका द्याङ्गेलाइहेङ दोअ्हि,ताकाको तोपाला वाकोसो चुमा,कालाउ जेदोङ चाकारिया दोफा तेतोपाला ताका हि वासेहेङ दोङ पि |' 25 उङ्को द्याङ्गेलाइ राजाहेङ दोअ्हि,'माझन,उङ्को चाकारियाकोते लाम्फासोङ ते तोपाला ताका हि |' 26 राजा दोअ्हि,का दोअ्खा ज्याइकोता हेन्जा हि वासिहेङ हेन्जादोङ प्यावा,कालाउ जाइको मान्थु,वाको ता जेदोङ हि इङ्कोबुङ चुम्पावा | 27 एला काङ्को सतुरगेलाइ हिसो हि ? खोइ इम्बालाइ हिसो हि ज्याइ का राजा जेङ्का मन्दामाताअ्धाखे ? उङ्को सतुरगेलाइहेङ इता चुमा,कालाउ काङ्को आगाता इम्बालाइहेङ सेअ्सु |'' 28 येसु:इदोइ काथा दोअ्लि दोअ्तेङ वा यरुसलेम भारि हानिहि | 29 वा जैतुन मिङ हिका लाख भेरपाको बेथफागे कालाउ बेथानि सहरता थुकाहि | वा ताइको न्हेमि चात्यागेलाइहेङ काइहि कालाउ, 30 इम्बालाइहेङ दोअ्हि,''इता जेदोङ देरा नेलाइको भेरपा हि इन्ता हानेसु | जेलाउ दुल्लि खाङ्लाउ इन्ता एलोङ गधाहेङ धेउतेङ हिका निङ्स्वाना | इङ्को गधाता लाम्फा हासुबुङ धोल्का मान्थु | गधाको जोरोमदि(लगाम) खाइसु कालाउ वासेहेङ काङ्कोता सुमासु |' 31 हासुबुङ'हाइपालि नेलाइ गधा खाइसुखेना ? दोअ्तेङ नेलाइहेङ हिअ्हेपानु,'प्रभुहेङ याको खाचो हि,दोअ्सु |'' 32 उङ्को चात्यागेलाइ हानिहि,कालाउ वा जेसा इम्बालाइहेङ दोअ्का हिअ्घाहि इन्सिकाङ निङ्हि | 33 जेलाउ चात्यागेलाइ गधाको जोरोमदि खाइघाखे,गधाको माझन चात्यागेलाइहेङ हि:हि,''हाइपालि नेलाइ गधा खाइसुखेन्हा ?'' 34 चात्यागेलाइ दोअ्हि,” ''प्रभुहेङ या गधा गोइका हि |'' 35 चात्यागेलाइ गधा येसु:कोता चुमाहि,कालाउ ताइको धावागेलाइ गधाको गान्धेता दाहि,कालाउ येसु:हेङ गधा हुता योमपाहि |' 36 येसु:गधा हुत्ता धोलतेङ यरूसलेम भारि हानिहि | द्याङ्गेलाइ येसु:को भाअ्सिङ ताइको धावागेलाइ दामाता दापिहि | 37 वा जैतुन तिकारको दोलाता थुकालाउ चात्यागेलाइको गोताङ जेर,ताइमिङ तिङ्का गोताङ सरबुङ कामगेलाइको भाअ्सिङ हाउसाइकाताङ,परमेस्वरको बाखानाइपाकाताङ हि्ङ्का गालाहोइ र्-हिकाइलि तेङ्हि, 38 'परमप्रभुको मिता लोका राजा धन्यको हि | स्वर्गता सान्ति कालाउ परमधामता महिमा |'' 39 जेरता जाअ्तेङ आधिमि फारिसिगेलाइ येसु:हेङ दोअ्हि,''गुरु ज्यु | इसिका काथागेलाइ मादोअ्सु दोअ्तेङ नाङ्को चात्यागेलाइ दोअ् |'' 40 कालाउबुङ वा दोअ्हि,का नेलाइहेङ दोअ्खा,इदोइ काथागेलाइ दोअ्लि गोयाङ | एदि काङ्को चात्यागेलाइ इङ्को काथा मादोअ्हे पानु उन्थुइ गेलाइदोङ र्-हिकायावा | 41 जेलाउ येसु:भेरपाङ थुकाहि कालाउ सहरहेङ तिङ्चाहि,वा वाको भाअ्सिङ खारहि, 42 ''सान्ति हिदोइ काथाहोइ लोखे दोअ्तेङ ना नानि थाहा गिका हिनु | नाङ्को खाङ्काता जेदोङ म्होन्हाका हि | 43 हाइपालि पानु ना हुता इन्सिका दिना ल्वाङ,जेलाउ नाङ्को सतुरगेलाइ नाङ्को कोरपाहाङ गेराइयावा,कालाउ गोताङ्पाहा नासिहेङ थुनितेङ ताअ्तावा | 44 इम्बालाइ नासेहेङ कालाउ नाङ्को द्याङ्गेलाइहेङ भोनोइता लोङ्पावा | फेअ्तावा नाङ्को सागेलाइको एलोङ उन्थुइ हुता आरोङ भेनेङ उन्थुइबुङ मालाप्यावा | इदोइ घाताना घतियावा हाइपालि पानु ना मागिखेना नासेहेङ बान्चिपालि परमेस्वर हेलाउ ल्वाङ |'' 45 जेलाउ येसु:परमेस्वरको थानता (मन्दिर )साता दुल्लि कालाउ उलिदुलीको आनेमाने पिकालाइ इन्तासो उल्लिपाहि, 46 कालाउ इम्बालाइहेङ दोअ्हि,''धर्मसासतरता लेखेका हि,'काङ्को सा दोमचाका सा जेनावा,कालाउ नेलाइते यासिहेङ डाका गेलाइको हिका सा बानाइसुन्हा |'' 47 वा दिनाङ परमेस्वरको थानसाता सिक्स्या धिरपाकाताङ हिघाहि | कालाउ मुख्य धामिगेलाइ,कालाउ सास्तिरिगेलाइ कालाउ जनताको बार्का द्याङ्गेलाइ वासेहेङ से:लि खाङ्धाखे | 48 इम्बालाइ वासेहेङ से:लि हिदोइबुङ उपाय निङ्लि मादोहि,हाइपालिपानु गोताङ द्याङ्गेलाइको वाको काथाता मन पितेङ हिङ्धाखे |