लुका 17

येसु:ताइको चात्यागेलाइहेङ दोअ्हि, पाप पालि लागाइका घातानागेलाइ लोखे | ज्याइ एन्सा पाखे वासेहेङ धिक्कार हि | ज्याइसो इन्सिका घातानागेलाइ जेङ्खे | 2 जेदोङ द्याङ इदोइ म्हुइ-म्हुइका जामालगेलाइ मध्येसो एअ्मिहेङ पाप पालि लागाइखे वाको निरघाता जान्ताको एलोङ उन्थुइ तोइपितेङ वासेहेङ समुन्द्रता थाइगिल्लि वाको भाअ्सिङ रेम्का जेनावा | 3 ताइको बिसयता थिसु |'' नाङ्को ओने अपराध पाहे पानु वासेहेङ चेर,कालाउ एदि वा पास्ताइ पाहे (पसुताब) पानु ना वासेहेङ स्यामा पि | 4 एदि नाङ्को ओने दिनाता न्हि पतक नाङ्को बिरुदृ अपराध पाहे पानु,कालाउ न्हि पतकदोङ नाङ्कोदोफा घुरितेङ 'का तास्ताइ पाङ्का दोअ्हे पानु | ना वासेहेङ स्यामा पि |'' 5 प्रेरितगेलाइ प्रभुहेङ दोअ्हि,'केलाइको खान्धुरि बाराइपापि |'' 6 प्रभु दोअ्हि,''एदि नाङ्कोता पासाइको सिन्हा झोको खिनिङ खान्धुरि हि:हे पानु,नेलाइ इदोइ दाका मिचकिरिको सिङ्हेङ दोअ्लि दोअ्स्वाना,'ना ताइमिङ उन्हातेङ समुन्द्रता थिङन्हालि हाने ! 'कालाउ इङ्को सिङ नेलाइको आग्या पालाना पावा | 7 'एलोङ काथा नेलाइसो मध्ये हासुबुङ एमि चाकारिया हि ज्याइ मिलिङ चोइतेङ ह्यावा माकुनु भेडा मेसा घोतेङ ह्यावा | जेलाउ काम दोअ्पातेङ लित्ता लावा,वासेहेङ ना हाइ दोवाना ? 'हाने कालाउ उम चालि योम ? 8 माको ! ना उङ्को चाकारियाहेङ दोअ्ताना 'काङ्को भाअ्सिङ सार-उम तियार पा कालाउ कासेहेङ चालि पिलिको भाअ्सिङ लोखोन होङ | जेलाउ का चालि-आम्लि दोअ्काङ्का कालाउ ना चाअ् | 9 ताइमि आहा्इका काम पाकाता हाइ वा उङ्को चाकारियाङ धन्यबाद प्यावा रो ? 10 ना दोफाबुङ इन्सिकाङ , जेलाउ नेलाइहेङ पालि पिका गोताङ काम पासुखेना,नेलाइ दोअ्लि गोइस्वाना,'केलाइ हिदोइबुङ गोइका धन्यबाद निङ्लि योग्योको माको | केलाइ जेदोङ पालि गोइका हिघाहि इङ्को खिनिङ पाका हिनाहि | 11 येसु:यरुसलेमभारि हानिघाखे | वा सामारिया कालाउ गालिल पाहा हानिहि | 12 वा एलोङ देराता थुकाहि, इन्ता वासेहेङ तेमि दुन्दिया रोग्या खोका द्याङ दुसुहि | उङको द्याङ्गेलाइ येसु:को भेरपा लोलि मादोहि,ओबालाइ दुरेसोङ जातेङ खाङ्हि | 13 बारका तिराराइका गालाहोइ दोअ्हि,''हे येसु:गुरु ज्यु,केलाइ क्रुपा पा |'' 14 जेलाउ येसु:उङ्को द्याङ्गेलाइहेङ तिङ्हि, वा ओबालाइहेङ दोअ्हि,''हानेसु कालाउ धामिगेलाइहेङ नेलाइ ताइमिङ तिङ्पासु |''जेलाउ उङ्को तेमि द्याङ्गेलाइ धामिगेलाइ कोता हानिघाखे,इम्बालाइ एल्हि | 15 जेलाउ एमि द्याङ ताइमि एल्का थाहा निङ्हि, वा घुरितेङ येसु:कोता हानिहि | वा बारका गालाहोइ परमेस्वरहेङ धन्यबाद पिहि | 16 उङ्को येसु:को खोकोइता पोम्भेलेतेङ कालाउ येसु:हेङ धन्यबाद पाहि | उङ्को द्याङ यहुदि मान्थुघोखे, भरु सामारि हिघाहि | 17 येसु:दोअ्हि,''तेमि द्याङ्गेलाइ एल्हि,ठिक हि ? आरु क्वाहामि हिसो हि ? 18 हाइ इदोइ सामरि खिनिङ परमेस्वरहेङ धन्यबाद पिलि लोका ?'' 19 कालाउ येसु:वासेहेङ दोअ्हि,''ल्हो! ना गिलि द्वाना | नाङ्को खान्धुरिहोइ नासिहेङ एल्पाका हि |'' 20 आधिमि फारिसिगेलाइ येसु: हेङ हि:हि ''परमेस्वरको सारभि हेलाउ जेनाङ ? कालाउ ओबालाइको जोबाफ येसु:पिहि | ''परमेस्वरको सारभि तिङ्लि दोअ्पा माल्वाङ | 21 ना ते द्याङ्गेलाइ द्वावा,'खाङ्सु इता हि !'' माकुनु ओसो हि!' हाइपालि पानु,परमेस्वरको सारभि नेलाइकोङ माझाता हि |'' 22 वा चात्यागेलाइ दोअ्हि ''इङ्को दिना ल्वाङ, जेलाउ नेलाइ द्याङ्को चानको हिदोइ बुङ दिना खाङ्लि मन पासुवाना ,कालाउबुङ नेलाइ मानिङ्स्वाना | 23 द्याङ्गेलाइ नेलाइहेङ द्वावा,'खाङ्सु, उङ्को ओसो हि !'माकुनु 'खाङ्सु, उङ्को इता हि | जेथा हिसुन्हा इन्ताङ योम्तेङ हिसु, दुरे मान्हेसु कालाउ माभोसु | 24 'नेलाइ इदोइ गिस्वाना कि द्याङ्को चान आरोङ हेलाउ ल्वाङ | वाको लोका दिना बिजुलि भाइका जेनावा जेदोङ बादेल ए- कुन्हा सो भेनेङ कुन्हाको ओताका थेकापा चिल्कातावा | 25 कालाउ या खान्त्तेङ लाम्फा,द्याङ्को चान हेन्जा खालको कस्त गेलाइ सोहिलि गोयाङ कालाउ या पुस्ताको द्याङ्गेलाइसो बहिस्कृत जेङ्लि गोयावा | 26 द्याङ्को चान लोलाउबुङ एन्साङ जेनावा जेदोङ न्हुको पालाता जेङ्का हिघाहि | 27 नुहको समयता,जेलाउ थेकापा नुह नाउता मादुल्ला भरि द्याङ्गेलाइ चाघाखे,आम्घाखे,बिहु पादोङ्घाखे, कालाउ ले, घाखे| जेलाउ बाने लोहि कालाउ गोताङ नासाहि | 28 याबुङ लुतको समय भाइपाङ जेनाङ जेलाउ परमेस्वर सदोमहेङ गोताङ्पाहासो सर्ब नासापाहि | उङ्को द्याङ्गेलाइ चादोङ्घाखे,आम्दोङ्घाखे,चोल्दोङ्घाखे,पिदोङ्घाखे,थिङ्दोङ्घाखे कालाउ ताइकोङ भाअ्सिङ सा, गेलाइ बानाइदोङ्घाखे | 29 लुत सहर लाअ्तेङ हानिका बेला थेकापा द्याङ्गेलाइ इदोइ गोताङ पादोङ्घाखे | जेलाउ बादेलसो मे कालाउ झिल्का लोहि कालाउ झाराङ्हेङ नासापाहि | 30 जेलाउ द्याङ्को चान ल्वाङ,एकदम इन्सिकाङ जेनावा | 31 'इङ्को दिना,एदि हासुबुङ द्याङ वाको साको चाला हुता ताङ्का हिहेपानु,कालाउ आनेमानेगेलाइ सा लिता हिहेपानु वा इङ्को आमेनेगेलाइ नालि सिता लिता मानानाको | एन्साङ एदि हासुबुङ द्याङ मिलिङ्ता हिहेपानु वा बुङ सा माघुरियाको | 32 बिचार पासु,लुतको बेहेङ हाइ जेङ्का हिघाखे | 33 जेदोङ द्याङ ताइको जिबन बान्चिपालि खाङ्खे वा इङ्को मोअ्पावा | भरु हासुबुङ ताइको जिबन मोअ्पाखे वा इङ्को बान्चिपावा | 34 इङ्को बेला एलोङ चौकिता न्हेमि द्याङ्गेलाइ ए, दोफाङ जिम्तेङ ह्यावा,एअ्मिहेङ चुम्पावा भेनेहेङ लाअ्धियावा | 35 न्हेमि बेबाल एदोफाङ जान्ता घुमाइपाकाताङ ह्यावा,एमिहेङ चुम्पावा कालाउ भेनेङ्हेङ लाअ्ध्यावा |'' 36 न्हेमि द्याङ मिलिङ्ता ह्यावा,एमिहेङ चुम्पावा,भेनेङहेङ चाहि लाअ्धेवा |'' 37 चात्यागेलाइ येसु:हेङ दोअ्हि''इदोइ हिसो जेनावा,प्रभु ?'' येसु:उत्तर पिहि,जेथा सि:का द्याङ ह्यावा इन्ता सिघुनगेलाइ जोमावा |