लुका 15

पोत ल्होपाका गेलाइ कालाउ पापिगेलाइ झाराङ वाको बचन हिङ्लि वाको भेरपा लोदोङ घाहि | 2 'इदोइ द्याङ ते पापिगेलाइहेङ ग्रहन पाखे,कालाउ ओबालाइ दोफा उम चाखे'' उमचाखे दोअ्तेङ फारिसिगेलाइ कालाउ सास्तिरिगेलाइ गनगनाइलितेङ हि | 3 कालाउ वा ओबालाइहेङ या काथा दोहि, 4 इम्बालाइ मध्ये हिदोइद्याङ वाला, जाइको ए साय भेडा मेसा मध्ये एनोङ राम्लाउ उन्नानसय मेसाहेङ झारताङ लाअ्धितेङ राम्का भेडाहेङ मानिङ्पा थिकापा इङ्कोहेङ भोअ्तेङ म्हायारो ? 5 राम्का भेडा मेसा निङ्लि दोतेङ लेङ्चाका ताङ इङ्को हेङ ताइको कान्धेता ताखे, 6 कालाउ सितालोतेङ वा ताइको सानाइति भाया गेलाइ कालाउ देरागेलाइहेङ कायावा,कालाउ ओबालाइहेङ दोतावा,'कादोफा लेङ्चासु,हाइपालिपानु का ताइको राम्पाका भेडा मेसा निङ्का हिघा,' 7 इन्सिकाङ का दोअ्खा,नेलाइहेङ स्वर्गता मेनाङ आनन्द जेनावा जेलाउ एलोङ पापि ताइको हृदय परिबर्तन पाखे कालाउ आरु द्याकुरि तेक्वा धार्मिक द्याङ्गेलाइ ताइको हृदय परिबर्तन पालि हिदोइबुङ आवस्यक मागोइखे | 8 हिदोइ बेबाल वाला ज्याइ दोफा तेलोङ चादिको ताका मध्येसो एलोङ राम्हे पानु वा गेसा जोलाइतेङ वा उङ्को मानिङ्पा भारि साताफेतेङ जेलाउ थेकापा मानिनावा खुबमन मनपातेङ माभोकावारो ? 9 राम्का सिक्का निङ्लि दोअ्तेङ वा ताइको सानाइति गेलाइ कालाउ देरागेलाइहेङ काइतेङ द्वा,'का दोफा लेङ्चासु,हाइपानु का, काङ्को राम्का चादिको ताका निङ्घा |' 10 एसाङ्दोङ,का दोअ्खा,जेलाउ एमि पापि ताइको हृदय परिबर्तन पानु परमेस्वरको दुतगेलाइको आगाता लेङ्चासुवा वा |'' 11 कालाउ न्हुसो येसु:दोअ्हि,'एमि द्याङ्को न्हेलोङ चानगेलाइ हिघाहि | 12 कान्सा चान ताइको आबाहेङ दोअ्हि,'आबा केलाइको सम्पतिता काङ्को भागता जेथे अङ्स परिखे कासिहेङ पि | 'कालाउ आबा ताइको धन सम्पति इङ्को न्हेलोङ चान गेलाइहेङ बाखाराइ पिहि | 13 एअ्नि न्हेनिता कान्सा चान ताइको गोताङ सम्पति जोम्पाहि कालाउ हानिहि | उङ्को दुरेको सारभिता हानिहि | उङ्को दुरेको सारभिता हानिहि | इन्ता वा मुर्ख भाइपाङ ताइको ताका गोताङ दोपाहि | 14 ताइमि दोफा जेथे हिघाहि गोताङ होइपाहि | कालाउ,इङ्को थामेता आनिकाल जेङ्हि,वाइदोङ मालोहि | सारभिभरि द्याङ्गेलाइ चाका-आम्का आनेमाने गेलाइ निङ्लि लाअ्हि | उङको वाजान मेनाङ म्हितुहि कालाउ वासेहेङ ताका एकदम गोइहि | 15 कालाउ इन्ताको थामेको हिदोइबुङ एमि द्याङ्कोता हानिहि कालाउ ताइको जिउ बान्चिपालिको भाअ्सिङ इन्ता काम पाहि कालाउ वा उङ्को वाजेनहेङ मिलिङ्ता पायागेलाइ घोलि दिङ्गिल्हि | 16 उङ्को वाजान मेनाङ म्हितुका हिघाहि कि वा जेदोङ पायाको आहार पायागेलाइ चाघाखे इङ्को आहार चालि खाङ्घाखे | कालाउबुङ हासुबुङ वासेहेङ हाइबुङ मापिहि | 17 जेलाउ वा ताइमिहेङ मुर्ख (हाइमागिका) जेङ्घा दोअ्तेङ फोमपाहि | वा दोअ्हि,'काङ्को आबाको जेथे चाकारियागेलाइ हि ओबालाइ कोता चाहेका खान्त्तेङ हेन्जा उम हि | कालाउ का चाहि इता म्हितुपाङ सिलि तोमहोइघा | 18 का एला इतासो आबाकोता हानाङ्का कालाउ का वासेहेङ द्वाङ्का हे आबा ! का परमेस्वर कालाउ नाङ्को आगाता पाप पाघा | 19 का एला नाङ्को चान दोअ्लि योग्यको मान्थुघा | कासिहेङ नाङ्कोङ एमि चाकारिया भाइपाइ ताअ् | 20 एसापा उङ्को वाजान ल्होहि कालाउ ताइको आबाहेङ भेतिलि हानिहि | ''जेलाउ निकोङ दुरेसो वा लोदोङ्घाखे,वाको आबा तिङ्हि कालाउ ताइको चान प्रति आबाको मनता एकदम दाया जागेहि | कालाउ आबा चानहिकाभारि धाअ्तेसाङ हानितेङ खोम्हि कालाउ चुमाइ चाहि | 21 वाको चान वासेहेङ दोअ्हि,'हे आबा,का परमेस्वर कालाउ नाङ्को आगाता पाप काम पाका हिघा |'का नाङ्को चान दोअ्लि एला का योग्योको मान्थुघा | 22 कालाउ वाको आबा वाको चाकारियागेलाइ आराइहि,'मारफा! रेम-रेम्का लोखन धावा चुमा कालाउ यासेहेङ होङ्पासु | खुरता औखुतिबुङ सुम्पापिसु कालाउ खोकोइता जुत्ताबुङ लगाइपि | 23 इङ्को टोइका बाच्सा चुमा,उङ्कोहेङ से,कालाउ केलाइ चातेङ भोज मानिपाइने | 24 हाइपालिपानु इदोइ काङ्को चान सि:का हिघाहि,कालाउ एला वा बान्चितेङ घुरितेङ लोका हि | वा राम्का हिघाहि,कालाउ एला वासेहेङ निङ्का हि | ओदोङ भाअ्सिङ इम्बालाइ भोजको ब्यवस्था सुरुपालि तेङ्हि | 25 वाको जेथा चान मिलिङ भारिसो सिता लोहि,वा इन्ता नाहाका तोङ्का हिङ्हि | 26 ओदोङ भाअ्सिङ जेथा चान एअ्मि चाकारिया हेङ काइतेङ हिअ्हि,इदोइ गोताङ हाइपालि जेङ्तेङ हि हा... ? 27 चाकरिया जोबाफ पिहि,'नाङ्को आने घुरितेङ लोका हि,नाङ्को आबा भोजको भाअ्सिङ टोइका बाच्सा सेलि लगाइका हि,हाइपालि पानु ओने रेम्फाङ घुरितेङ लोकाता वा मेनाङ लेङचाका हि |'' 28 उङ्को जेथाचान चेर ताम्पाहि कालाउ भोजता हानिलि मन मापाहि | कालाउ वाको आबा ताइमिङ लोतेङ वासेहेङ उत्सवता जोमलि लोलि सेउपाहि (बिन्ती)पाहि | 29 उङ्को चान आबाहेङ दोअ्हि,'का वथे हेन्जा बासार थेकापा चाकारिया भाइपाङ नाङ्को सेवा पाघा | का दिनाङ नाङ्को आग्या पालाना पाघा | | कालाउबुङ ना काङ्को भाअ्सिङ एलोङ म्हुइका पान्ठा मेसाबुङ मापिन्हा ,कालाउ का काङ्को सानाइतिगेलाइ दोफा भोज मानिपालि दोअ्धाङघा | 30 उङ्को नाङ्को चान ताइको गोताङ सम्पति कासिबेरि गेलाइको सङ्गतता लागितेङ दोपाहि, कालाउ वा सा घुरितेङ लोलाउ चाहि टोइका बाच्सा सुधाङ से:लि लगाइन्हा |' 31 कालाउ आबा चानहेङ दोअ्हि,'ए आबाउ !('ए चान!)ना ते दिनाङ कादाफाङ हिना | काङ्कोता हिका (गोताङ)सारा सम्पति नाङ्कोदोङ हि | 32 केलाइ झाराङ लेङ्चाइने कालाउ भोज पाइने हाइपालिपानु नाङ्को इदोइ ओने सिका हिघाहि, एला सिन्हुतेङ घुरितेङ लोकाहि | वा राम्का हिघाहि कालाउ एला निङ्का हिनाहि |