लुका 13

इङ्को बेला आधिमि द्याङ्गेलाइ येसु:को दोफा हिघाहि | उङ्को द्याङ्गेलाइ गालिलको द्याङ्गेलाइको बिसयता एलोङ निङ्पिका काथा दोअ्तेङ येसु:हेङ हिङ्पाहि | पिलातस आधिमि द्याङ्गेलाइहेङ बाखानाइ पालाउ सेअ्का हिघाहि | पिलातस उङ्को द्याङ्गेलाइको हिति परमेस्वरहेङ बलि चढाइतेङ गपुसको हितिदोफा मिसालाइहि | 2 येसु:जोबाफ पिहि,''नेलाइ हुता इसिका घाताना घतिहि दोअ्तेङ हाइ नेलाइ गालिलको भेनेङ द्याङ्गेलाइको खान्तेङ नेलाइ झन पापि हिघाहि दोअ्तेङ सोचिस्वाना ? 3 माको,नेलाइ इम्बालाइ इन्सिका मान्थुघाखे | भरु नेलाइदोङ ताइको हृदय कालाउ परीबर्तन (माफेरिसुना पानु) मापासुन्हा पानु नेलाइबुङ सर्ब नासास्वाना | 4 सिलोआमको धरहरा इम्बालाइहुता हुल्लाउ तेक्या झना सि:लाउ द्याङ्गेलाइको बिसोयोता नेलाइ हाइ सोचि सुखेन्हा ? हाइ नेलाइ इम्बालाइहेङ यरुसलेमको आरुङ भेनेङ झाराङ द्याङगेलाइ खान्तेङ हेन्जा पापि सम्झि सुखेन्हा ? 5 इम्बालाइ इन्सिका मान्थुघाखे | कालाउ का नेलाइहेङ दोअ्खा ,एदि नेलाइ ताइको हृदय कालाउ नेलाइ आखेका हिका -चाका मालास्वान्हा पाहेपानु नेलाइबुङ इन्साङ दोङ नासास्वान्हा ? '' 6 येसु:एलोङ निङ्पितेङ दोअ्हि,''एअ्मि द्याङ्को एलोङ कोसेको सिङ हिघाहि | सिङ्हेङ वा ताइकोङ दाखको बारिता थिङ्का हिघाहि | उङ्को द्याङ सिङ्ता सेका सेहि बे दोअ्तेङ खाङ्लि लोहि, कालाउ इन्ता हाइबुङ मानिङ्हि 7 इङ्को दाखबारि कामलि कालाउ खाङ्लिको भाअ्सिङ वा एमि चाकारियाबुङ ताअ्का हिघाहि | ओदोङ भाअ्सिङ उङ्को द्याङ ताइको चाकारियाहेङ दोअ्हि, 'का सुम बासार लाम्फासो इदोइ सिङ्ता सेका भोतेङ हिघा ,कालाउबुङ हाइबुङ मानिङ्घा | यासिहेङ पाल्पि,हाइपालिपानु एसाङ मिलिङ्खेर पालि ? 8 चाकारिया जोबाफ पिहि,''माझन ! सेकाको भाअ्सिङ आरोङ ए, बासार या सिङ्हेङ ताअ्ताइने | कासेहेङ याको कोरपाहाङ तोतेङ मल लगाइलि पि | 9 जेङ्लि,दोअ्हेपानु लोका बासार इदोइ सिङ अबस्यबुङ सेका प्याङ | एदि एन्सालाउ थेकापाबुङ सिङ सेका मापिहे पानि इङ्को सिङ्हेङ पाल पियाङ्का |'' 10 माइसाका दिना येसु:चाउघारा सागेलाइता सिकस्या पिहि | 11 चाउघारा साता एमि बेबाल हिघाहि ; वाको लिता दुस्त आत्मा दुल्का हिघाहि जाइसो वा तेयेए बासार थेकापा कुकुरुक्का हिघाहि,वाको गान्ति कुकुरुका हिघाहि,कालाउ सोझा जालि मादोअ्घाखे | 12 जेलाउ येसु:वासेहेङ तिङ्हि कालाउ वा दोअ्हि,''आनाउ तिरी ,ना नाङ्को बेथासो एल्होइना |'' 13 येसु:वाको हुत्ता खुर ताअ्हि,कालाउ न्हुसो,वा ल्होलिदोअ्ते कालाउ वा परमेस्वरको बाखानाइ पाहि | 14 माइसाचाका दिना एसा येसु:एल्पाहि कालाउ चाउघारा साको मुख्य येसु:दोका चेर तामपाका हिघाहि | ओदोङ भाअ्सिङ वा इन्ता लोका द्याङ्गेलाइहेङ दोअ्हि, तु दिना काम पान्हाखे | कालाउ हिदोइबुङ दिना एल्पालिको भाअ्सिङ हासु बुङ लोलि दावा ,कालाउ माइसा चाका दिना एल्लिको भाअ्सिङ हासुहेङ्बु मालोलि दोअ्हि ? 15 प्रभु वासेहेङ दोअ्हि,''नेलाइ चिचा हिसुन्हा,नेलाइ झाराङ नेलाइको ग्वालेङ कालाउ गाधा खाइतेङ पिया कालाउ पिसाल सो इम्बालाइहेङ चि आम्पालि चुम्पुसुखेना,नेलाइ माइसाका दिनाबुङ पासुखेन्हा ? 16 उङ्को बेबाल जाइहेङ का एल्पाघा वा केलाइको यहुदि चामिन्दि | कालाउ वासेहेङ भुतगेलाइ तेक्वा बासार थेकापा जिङ्तेङ ताअ्हि | हाइ माइसाचाकाको दिना वाको बन्धन सो लाअ्पाका काम ठिक मान्थुघाखे रो ?'' 17 जेलाउ येसु:एसा दोअ्हि,झाराङ द्याङ्गेलाइ ज्याइ वासिहेङ खुजालाइहि इम्बालाइ लेदेरहि | कालाउ जेर सो गोताङ द्याङ्लाइ येसु:पाका इन्सिका भारबुसाइका कामको भाअ्सिङ हाउसाइहि | 18 कालाउ न्हुसो येसु:दोअ्हि,''परमेस्वरको सारभि हाइ भाइका हि ? इङ्कोहेङ का हाइदोफा तुलानापालि ? 19 परमेस्वरको सारभि पासाइको चालाइ भाइका हि,जेदोङ हिदोइबुङ द्याङ र्-हुहि कालाउ ताइको बागैचाता बि:हि (थिङ्हि) | इङ्को चालाइ योहि कालाउ बारातेङ सिङ जेङ्हि | बादेलको जिया जुइलेङ्गेलाइ वाको दालेङ्गेलाइता भासा बानाइ हि |'' 20 येसु:आरोङ दोअ्हि,''का परमेस्वरको सारभिहेङ हाइ दोफा तुलानापालि एला ? 21 इङ्को साउरि भाइका हि,जेदोङ बेबाल हिदोइबुङ एलोङ बारका भाडाता तोलेदोफा एङ्तेङ सेले बानाइलि मिलिपाखे,इङ्को साउरि(सोडा) गोताङ एङ्का तोलेहेङ फुलिपाखे |'' 22 येसु:गोताङ देरा कालाउ सहरगेलाइता सिक्सया पिकाताङ हानिहि | वा यरुसलेम हानिकाताङ पाघाखे | 23 हासुबुङ वासेहेङ दोअ्हि,''हे प्रभु ! हेथे झना द्याङ्गेलाइ हेङ मुक्ति पिलि द्वाङ ?आतुइसा खिनिङ ?''येसु;दोअ्हि, 24 'चेसुमेसुका फिनुसोदोङ दुल्लि कोसिस पासु,हाइपालि पानु इदोइदोङ स्वर्गको दामा | हेन्जा द्याङ्गेलाइ इन्तासो दुल्लि कोसिस पाखे,हासुबुङ दुल्लि मादोखे | 25 यदि हिदोइबुङ साको माझन ताइको साको फिनुता ताला लागाहेपानु ना बाहार जाअ्तेङ फिनु ढकढक पाना ,कालाउबुङ वा फिनु माहितावा | ना दोअ्लि दाना,हे माहासय,केलाइको भाअ्सिङ फिनु हिपि,कालाउ उङ्को द्याङ दावा,''का मानाल्खा ना हिसोसो लोका हिना ?' 26 जेलाउ ना दोअ्लि तेनाना,'केलाइ एअ्दोफाङ चानाहि आम्नाहि,केलाइको सहर कालाउ दामागेलाइ ता ना धिरपाना |' 27 कालाउ वा आरोङ दोअ्हि,'का नेलाइहेङ मानाल्खा,ना हिसोसो लोका हिना ? का सो दुरे हाने | नेलाइ झाराङ दुस्त काम पासुखेना | 28 नेलाइ परमेस्वरको सारभिता आब्राहाम,इसाहाक,याकुब कालाउ गोताङ अगमबक्तागेलाइ हेङ भेतिसुवाना | कालाउबुङ नेलाइहेङ बाहार थाल्गिलाङ | कालाउ नेलाइ खारस्वाना तासीङ जिस्वाना | 29 द्याङ्गेलाइ नुहेसो,दिहेसो, दाहेसो कालाउ माहेसो ल्वावा | परमेस्वरको सारभिता इम्बालाइ कुर्सिता योमावा | 30 खाङ्सु, न्हेसोगेलाइचाहि लाम्फा जेनावा,कालाउ लाम्फाको गेलाइ चाहि न्हुसो जेनावा |'' 31 ओदोङ्घुरि आधिमि फारसिगेलाइ येसु:कोता लोहि कालाउ दोअ्हि, ''इतासो दुरे हाने कालाउ म्होतेङ हि,हाइपालिपानु नासिहेङ हेरोद सेलि खाङ्खे |'' 32 येसु:इम्बालाइहेङ दोअ्हि,''हानेसु कालाउ उङ्को स्याइलेहेङ दोअ्सु,'नानि कालाउ जुम्नि द्याङ्गेलाइता हिका भुतगेलाइ दिगिल्लाङ्का कालाउ मासाधेका मिसा लोका लाइहेङ एल्पाका काम पाङ्का | सुमनिको दिना,काङ्को गोताङ काम दोअ्कावा |' 33 नानि कालाउ जुम्नि का काङ्को काम पालि गोयाङ जेलाउ भेनेङ दिना,का हानिलिदोङ गोयाङ,हाइपालिपानु गोताङ अगमबक्तागेलाइ यरुसलेमतादोङ सिलिगोयाङ | 34 ''ए यरुसलेम,यरुसलेम!नेलाइ अगमबक्ता गेलाइहेङ से:सुखेना कालाउ परमेस्वर नाङ्कोता दिङ्गिल्पिका उङ्को द्याङगेलाइहेङ उन्ठुइहोइ तोसुखेना | हेन्जा चोति नेलाइको द्याङ्गेलाइहेङ का साघाइलि मन पाघा | का जेसाङ इम्बालाइहेङ भुन्दि किया जेसाङ ताइको किचानगेलाइहेङ पाखेना लिता पोम्पाखे एन्साङदोङ पोम्लि मन पाघाखा | कालाउ नेलाइ कासेहेङ एन्सा पालि मापिसुन्हा | 35 ओदोङ भाअ्सिङ एला नेलाइको सा उडाउडाङ्का जेनावा | का नेलाइहेङ दोअ्खा,ओदोङ भाअ्सिङ कासेहेङ नेलाइ एन्सालाउ थेकापा तिङ्लि मानिङ्स्वाना जेलाउ थेकापा नेलाइ मादोअ्स्वाना कि स्वागत !परमेस्वर वासेहेङ आसिरबाद प्याको ज्याइ परमप्रभुको मिङ्ता लोखे |