लुका 12

हाजारदोङ हाजार द्याङ्गेलाइ एदोफाङ जोमका हिघाहि | इम्बालाइ ओसारा हेन्जा हिघाहि कि इम्बालाइ एमि सो भेनेङ्हेङ याङ्घाखे | द्याङ्गेलाइहेङ सेउपालि खान्तेङ लाम्फा येसु:वाको चात्यागेलाइहेङ दोअ्हि,नेलाइ फारिसिगेलाइको साउरि सो थिसु | काङ्को दोअ्लि खाङ्को माने नेलाइको चिचा सो होसियार हिसु | 2 गोताङ काथा जेदोङ म्होका हि ,इङ्को बाहार जेनाङ | गोताङ रहस्यका काथा गिलि प्याङ | 3 इङ्को जेदोङ बचनगेलाइ ना कितिकितिका ता दोअ्का हिना इङ्को तालि थाइथाइकाता हिनावा | ना कोठालिता न्हातोङता दोअ्का काथा हिना इङ्को साको चालोसो दोअ्प्यावा |'' 4 कालाउ न्हुसो येसु:द्याङ्गेलाइहेङ दोअ्हि,''का नेलाइहेङ दोअ्खा,ओइ काङ्को सानाइतिगेलाइ ! द्याङ्गेलाइसो माथिसु | द्याङ्गेलाइ जिउहेङ सेअ्लि दावा,इङ्को खान्तेङ हेन्जा इम्बालाइ हाइबुङ पालि मादावा | 5 हासुदोफा थिलि गोइखे,का नेलाइहेङ दोअ्ताउका | नेलाइ वा एलोङ खिनिङ दोफा थिलि गोइखे जाइदोफा सेअ्तेङ नरकता थाइगिलका सरबुङ हि | एइ,वा खिनिङ एलोङ हि ज्याइ दोफा नेलाइ थिलि गोइस्वाना | 6 'नालोङ म्हुइ-म्हुइका जिहा-जुइलेङ्को दाम न्हेताका खिनिङ गोइखे | कालाउ परमेस्वर इङ्को मध्येसो एलोङ बुङ मानिल्लावा | 7 एइ,नेलाइको पुरुङ्ता हेथे पुसुङ्हि हि, इङ्कोबुङ परमेस्वरहेङ थाहा हि | ओदोङ भाअ्सिङ माथिसु | इङ्को जिहाजुइलेङगेलालाइ खान्तेङ नेलाइ हेन्जा दामको हिसुन्हा | 8 'का नेलाइहेङ दोअ्खा,एदि हिदोइबुङ द्याङ आरु द्याङ्गेलाइको आगाता वासेहेङ काङ्को दोअ्हे पानु,का बुङ एन्साङ परमेस्वरको दुतगेलाइको आगाता द्वाङ्का कि उङ्को द्याङ काङ्को | 9 एदि हिदोइबुङ द्याङ आरु द्याङ्गेलाइको आगाता वासिहेङ काङ्को माको दोअ्नु का वासेहेङ काङ्को माको द्वाङ्का | इदोइ गोताङ का परमेस्वरको दुतगेलाइको आगाता द्वाङ्का | 10 ''एदि हासुबुङ द्याङ चानको बिरुदृता काथा पाहेपानु वासिहेङ स्यामा जेनावा | एदि हिदोइ बुङ द्याङ पबित् र आत्माको बिरुदृ निन्दा पाहे पानु इङ्को स्यामा माजेनाङ | 11 'जेलाउ द्याङ्गेलाइ नेलाइहेङ चाउघारा सागेलाइता हिका सासक कालाउ आधिकारिक आगाता ताअ्हे पानु ताइमिहेङ बान्चिपालिको भाअ्सिङ हेसा हाइ दोअ्लि गोइका हि इङ्कोता माथिसु | 12 इङ्को बेला पबित्तरो आत्मादोङ नासेहेङ ना दोअ्लि गोइका काथागेलाइ धिरपावा |'' 13 जेरसो एमि द्याङ येसु:हेङ दोअ्हि,''हे गुरु,केलाइको आबा सि:हि | ताइको आबाको धन-सम्पतिको काङ्को दोफा अङ्स-बान्डा पालि काङ्को दादाहेङ दोअ्पि नि |'' 14 कालाउ येसु: वासेहेङ दोअ्हि,''का नेलाइको आबाको सम्पति नेलाइ न्हेमिको माझाता बाखाराइपिलि गोयाङ ? कासेहेङ हासु निरनायक बानाइ बानाइहि ?'' 15 आरोङ येसु:इम्बालाइहेङ दोअ्हि,''थिसु कालाउ गोताङ खालको दिका गेलाइसो ताइमिहेङ जोगाइसु | हासुहेङ्बुङ गोइका सम्पति खान्तेङ हेन्जा हिलि द्वा,कालाउ बुङ वासेहेङ इङ्को जिवन पिलि मादावा |'' 16 कालाउ वा इसिका एलोङ निङ्पिका काथा दोअ्हि :''हिदोइबुङ बेलाता एमि धनि द्याङ हिघाहि | वाको मिलिङ्ता असल कालाउ प्रसस्त उमगेलाइ सेघाखे | 17 इङ्को द्याङ ताइमिङ सोचिघाखे,'का हाइ पालि ? काङ्को दोफा हिका ओथे हेन्जा उम ताअ्का थामेबुङ मान्थु |' 18 कालाउ उङ्को धनि द्याङ दोअ्हि,'का गिखा का हाइ पालि गोइका हि,का काङ्को भाकारगेलाइ र्-हाताइका कालाउ इङ्कोहेङ आसा बारका बानाइयाङ्का | इङ्को नावा भाकारगेलाइता का गोताङ उम गेलाइ कालाउ आरु काङ्को रेम्का आमेनेगेलाइ ताअ्ताङ्का | 19 जेलाउ का ताइमिहेङ दोअ्ताङ्का,काङ्कोता प्रसस्त रेमरेम्का आनेमानेगेलाइ हि | लोका हेन्जा सा :बासारको भाअ्सिङ का थुबाराइका हिघा | सुकापा योम,चाअ्,आम कालाउ जिवनता आनन्द मानिपा |' 20 जेलाउ परमेस्वर इङ्को द्याङ्हेङ दोअ्हि,'ना मुर्ख हिना,नाति न्हिसिन्तादोङ ना, स्याना | कालाउ ना ताइकोङ भाअ्सिङ तियार पाका आनेमाने हासुको जेनावा ? 21 ओदोङ भाअ्सिङ ज्याइ ताइको भाअ्सिङ खिनिङ थुबाराइखे वा उङ्को द्याङ्हेङ हाइ जेनावा कालाउ परमेस्वरको आगाता इसिका द्याङ धनि माको |'' 22 येसु:ताइको चात्यागेलाइहेङ दोअ्हि,ओदोङ भाअ्सिङ का नेलाइहेङ दोअ्खा,बान्चिलिको भाअ्सिङ चाका आम्का गोइखे दोअ्का बिसयता चिन्ता मापासु | नाङ्को जिउको बिसयताबुङ चिन्ता मापासु याते ना हाइ होङसुखेन्हा? 23 चाका-आम्का खान्तेङ जिवन हेन्जा मुल्यवान हि | कालाउ लोखोन दावा खान्तेङ जिउको महत्व हेन्जा हि | 24 जिहा-जुइलेङ्गेलाइ खाङ्सु इम्बालाइ चालाइबुङ माबिखे,कालाउ उमबुङ माथिङ्खे | जिहा-जुइलेङ्गेलाइ भाकारताबुङ माजोम्पाखे ना ते भाकारता चाका-आम्का थुबाराइपाखे | कालाउ नेलाइ जिहा-जुइलेङ खान्तेङ हेन्जा मुल्यवान हिसुन्हा | 25 नेलाइ हासुबुङ चिन्तासो ताइको आयुता आतुइसा समय थपिलि दोसुवाना ? 26 एदि नेलाइ म्हुइ-म्हुइका कामगेलाइदोङ पालि मादोसुखेनापानु बार् का बिसयको हाइपालि फिक्रि पासुखेना ? 27 झारभारिको ल्हेगेलाइहेङ खाङ्सु,सोचेसु,इम्बालाइ हेसा चाखे | इम्बालाइ ताइकोङ भाअ्सिङ हाइबुङ मापाखे ना ते धावादोङ बानाइखे | का नेलाइहेङ दोअ्खा कि सुलेमान भाइका राजा ताइको गोताङ बैभबको दोफाङ्बुङ इदोइ ल्हे गेलाइ भाइपाङ एलोङ धावा होङका मान्थुघाखे | 28 परमेस्वरदोङ मिलिङ्ता इङ्को घासिहेङ धावा लगाइपिखे,जेदोङ नानि इता हि जुम्नि इङ्कोहेङ मेता थाइ गिल्लावा | ओदोङ भाअ्सिहेङ नेलाइ गिलि गोइस्वाना कि परमेस्वरदोङ नेलाइहेङ झन हेन्जा रेम्फा धावा साजिपावा | नाङ्को एकदम आतुइसा खान्धुरि हि | 29 ओदोङ भाअ्सिङ नेलाइ हाइचालि कालाउ हाइ आम्लि दोअ्तेङ पिर मापासु | इङ्को बिसयता हिदोइबुङ चिन्ता मापासु | 30 सुमिङ को झाराङ द्याङ्गेलाइ इदोइ आमेनेगेलाइको लेसारा पिताइखे | कालाउ नेलाइको आबा गिखे कि नेलाइ इदोइ गोताङ खोदाइसुखेना | 31 ओदोङ भाअ्सिङ नेलाइ भोलि गोइका मुख्य ते परमेस्वरको सारभिदोङ हि,कालाउ कि नेलाइहेङ इदोइ गोताङ आनेमाने गेलाइबुङ प्यावा | 32 'हे म्हुइका जेर ! माथिसु नेलाइको भाअ्सिङ आबा नेलाइहेङ सारभि पिलि खाङ्खे | 33 ताइकोता हिका गोताङ सम्पति पितेङ जाइहेङ चाहिका हि इम्बालाइहेङ ताका पि | धन इदोइ सुमिङ्ता स्थाइ माहिखेबुङ स्वर्गको जोम्पाका भाकार निङ्लि कोसिसपासु | इङ्को जोम्पाका भाकार हेलाउबुङ ह्यावा | स्वर्गता नाङ्को भाकारता जोम्पाका चोरगेलाइ बुङ खुलि मोदावा,ना ते पेसागेलाइ दोङ नासा पालि दावा | 34 नाङ्को हृदय इन्ताङ ह्यावा जेता नाङ्को जोम्पाका भाअ्कार हि | 35 तियार हिसु ! धावा होङ्सु कालाउ नाङ्को गेसा फाइसालामका हृयाको | 36 इङ्को चाकारियागेलाइ भाइपाङ ब्याभाहार पासु जाइ बिहुको भाततियार सो घुरितेङ लोका ताइको माझनको भाअ्सिङ र्-म्हतेङ हिखे | माझन लोखे कालाउ फिनु ढ्कढ्क पाखे | चाकारिया माझनको भाअ्सिङ फिनु हिप्यावा | 37 धन्य इङ्को चाकारिया गेलाइ जाइ माझनसिता घुरिलाउ साता सतरक जेङ्तेङ ह्यावा, का नेलाइहेङ जातिङ्भारि दोअ्खा ,माझन ताइमिङ ताइको काम पालाउ होङ्का लोखोन लागाइखे, कालाउ वाको चाकारिया गेलाइ कुसिर्ता योम्लि लगाइयावा | कालाउ न्हुसो माझन ताइमिङ इम्बालाइहेङ उम चोप्यावा | 38 चाकारियागेलाइ ,सायद ताइको माझन हेङ आधा न्हिसिंन्ता कालाउ न्हुसो थेकापा र्-म्लि गोयाङ | कालाउ बुङ इम्बालाइ लेङ्चावा हाइपालि पानु नेलाइको माझन लोलाउ वासेहेङ र्-म्हेतेङ हिका निङ्स्वाना | 39 इदोइ काथा फोमपातेङ हिसु:साको माझन हेथे बेला चोर लोखे दोअ्का काथा थाहा गिहे पानु वा चोरहेङ साता दुल्लि पिका मान्थुवावा | 40 ओदोङ भाअ्सिङ नेलाइबुङ सर्तक हिसु ! द्याङ्को चान आचानाक ल्वाङ जेलाउ कि वा लोका नेलाइहेङ आसा दोङ पाका मान्थुस्वाना | 41 पतरुस दोअ्हि,''हे प्रभु ! ना केलाइहेङ खिनिङ कालाउ झाराङ्हेङ इदोइ काथा दोअ्खेना ?'' 42 प्रभु दोअ्हि,''हासु चाहि गयानि कालाउ खान्धुराइ चाकारिया वाला ? खान्धुराइ चाकारिया इदोइ दोङ जाइ दोफा आरु भेनेङ चाकारियागेलाइ ठिक समयता इम्बालाइको भाग उम प्याङ दोअ्तेङ खान्धुरि पाखे | 43 माझन लोलाउ ताइमिङ आराहाइका भाइपाङ चाकारिया कामता ब्यस्त हिका निङ्हे पानु इङ्को चाकारिया मेनाङ लेङ्चावा | 44 का नेलाइहेङ जातिङ्को दोअ्खा,माझन इङ्को चाकारियाहेङ ताइको जेथे हि,इङ्को रक्स्या पालि द्याङ ताअ्खे | 45 एदि चाकारिया दुष्ट प्रकृतिको हिनु कालाउ ताइको माझन धेमाफाङ माघुरियाङ दोअ्तेङ सोचिहि पानु इङ्को को नतिजा हाइ जेनावा वाला ? उङ्को चाकारिया आरु भेनेङ चाकारिया वाजान कालाउ बेबाल गेलाइहेङ सुताइयावा कालाउ चातेङ -आम्तेङ म्हातेङ मस्त ह्यावा | 46 जेलाउ माझन लावा,वासेहेङ आतुरि जेङ्का मानिनावा | इसिका इङ्को दिना लावा,उङ्को चाकारिया माझन ल्वाङ दोअ्तेङ सोचिकाङ मान्थुवा,माझन लोदोङ्खे दोअ्तेङ थाहा दोङ मागिखे | माझन उङ्को चाकारियाहेङ साजाय प्यावा कालाउ वासिहेङ भेनेङ खान्धुराइ मापाका गेलाइ दोफा दिङ्गिलप्यावा | 47 'उङ्को चाकारिया गिघाखे,वाको माझन हाइ चाहिघाखे कालाउ वा काम पालि आतुरि मापाखे या ते माझन आराइका काम पालि बिचारबुङ मापाहि,ओदोङ उङ्को चाकारिया हेन्जा साजाय निनावा | 48 वाको माझन जेदोङ चाहिखे एदि उङको चाकारिया मागिखे जेदोङ पाखे साजायको योग्य काम पाखे,वाको हाइ गति जेनावा वाला ? उङ्को चाकारिया सजायते निनाङ, कालाउ वाको खान्तेङ आतुइसा साजाय निनावा जेदोङ चाकारिया माझन हाइ भोखे दोअ्तेङ गिखे कालाउबुङ मापाखे | जेदोङ द्याङ्हेङ हेन्जा पिकाहि,वाको जिम्मेवारिबुङ हेन्जा हिखे | झन ज्याइहुत्ता हेन्जा खान्धुरि पाका हि वाकोसो हेन्जाङ आसाबुङ ताअ्का हिखे |'' 49 येसु:लागातार दोअ्हि: 'का पृथ्विको मे चुमालि लोका हिघा | का हेसा आसा पालि कि इदोइ आन्चासोङ्दोङ जोलाइन्हाकादोङ दोअ्तेङ | 50 का बप्तिस्ता पाका भेनेङ भेनेङ तरिकासो बप्तिस्ता जेङ्लि गोइघा | इदोइ कामको अन्त माजेङ्पा थेकापा का चिलिबिलिदोङ जेनतेङ हृयाङका | 51 हाइ नेलाइ फोमपासुखेन्हा कि पृथ्विहेङ सान्ति पिलिदोङ का लोका हिघा, माको ! का पृथ्विहेङ भाग पालि लोका हिघा | 52 एला थेकापा नामिको एलोङ जाहानता लाअ्सुन्हावा, सुमिता न्हेमि को बिरुदृता हानावा,कालाउ न्हेमि सुमिको बिरुदृ हानावा | 53 आबा कालाउ चानगेलाइ लाअ्सुवा चान आबाको बिरुदृता ह्यावा | आमाइ कालाउ चामिन्दिगेलाइको माझाता लाअ्सुन्हावा : चामिन्दि आमाइको बिरुदृता हृयावा | आमाइ चामिन्दिको बिरुदृता ह्यावा | जुबे कालाउ नामाको माझाता मारेम्का जेनावा :नामा जुबेको बिरुदृता हृयावा | जुबे नामाको बिरुदृता हृयावा | 54 कालाउ येसु:द्याङ्गेलाइहेङ द्वाङ ,जेलाउ नेलाइ 'नुहेता बादेलदा किलकिलका तिङस्वाना ,कालाउ नेलाइ दोअ्स्वाना ,' दुम भेरमा ल्वाङ 'कालाउ इन्सिकाङ जेनावा | 55 एन्साङदोङ ,जेलाउ माहेभारिसो भेरमा लोलि तेनावा कालाउ नेलाइ दोअ्स्वाना ,'एला ते भेमका दिना ल्वाङ | कालाउ नेलाइ ठिक हिसुन्हा | 56 नेलाइ दिइका हिसुन्हा ! नेलाइ गिसुखेना हेसा बादेल कालाउ पृथ्विको इसारा गेलाइ बुझिसु | 57 'हाइ चाहि थिक हि दोअ्तेङ नेलाइको माझाता हाइपालि निरनय पालिमादोअ्सुखेना,कालाउ नेलाइ हाइपालि बुझिलि मादोअ्सुखेना ,एला हाइ जेङ्तेङ हि ? 58 नेलाइको उजुरि वालादोफा हाकिमकोता हानिलाउ, दामाताङ वाको दोअ्फा मिलिसु , माकुनुते वा नासेहेङ न्यायधिसकोता तानितेङ चुम्पावा ,कालाउ न्यायधिस नासिहेङ आफिसरको खुरता जिम्मा प्यावा,कालाउ आफिसर नासिहेङ झ्यालखानाता ह्यावातावा | 59 का नासेहेङ दोअ्खा दोअ्खा , जेलाउ थेकापा नाङ्को हुत्ता तोकिका ताका ना तिरिलि मादोअ्पा भरि इन्तासो ना लाअ्न्हानि मानिङ्नाना |''