लुका 11

एलोङ समयता येसु:एलोङ थामेता दोमचातेङ हिघाहि जेला दोमचालि दोहि,वाको चात्यागेलाइ मध्येसो एमि वासेहेङ दोअ्हि,''यु:हान्ना जेसाङ ताइको चात्यागेलाइहेङ दोमचाकालि हेसा पालि गोइखे दोअ्तेङ धिरपाहि | हे प्रभु केलाइबुङ हेसा दोमचाकाइलि गोइखे,धिरपापि |'' 2 येसु:चात्यागेलाइहेङ दोअ्हि,''जेलाउ नेलाइ दोमचाकाइस्वाना,एन्सालाउ ऐसा दोअ्सु:''हे आबा ! केलाइ दोमचाकाइयाङ कि नाङ्को मि् हेलालाउबुङ पबित्तरो ह्याको | केलाइ दोमचाकाइयाङ कि नाङ्को सारभि लाको | 3 दिनाङ गोइका चाका आमका उम केलाइहेङ पि | 4 केलाइको पाका पापगेलाइ स्यामा पि, जेसाङ केलाइ केलाइदोफा हिका भुल पाकालाइ हेङ स्यामा पिका हिनाहि | कालाउ केलाइहेङ सहिलि मादोअ्का जाचिका माचुमापि | 5 कालाउ वा इम्बालाइहेङ दोअ्हि,''एलोङ काथा,नेलाइको मध्येसो हासुकोबुङ एमि भाया(साथि) हि | वा आधान्हिसिंन्ता वाकोता हानितेङ दावा,''सानाइति कासेहेङ सुमलोङ तोले खिल्लिपि | 6 हाइपालिपानु काङ्को एमि भाया काङ्को साता लोका हि | कालाउ वासिहेङ चाका आम्का पिलि का दोफा हाइबुङ मान्थु | 7 नाङ्को सानाइति( साथी) लितासो द्वा,कासिहेङ मानाङ्घापा | फिनु आन्चाङ गिअ्होइका का कालाउ काङ्को चानचामेन्दिगेलाइ का, दोफा सिघाउता हि | का ल्होतेङ नासिहेङ हाइबुङ पिलि माद्वाङ्का |'' 8 का नेलाइहेङ हाइ दोअ्खा, पानु सानाइति दोअ्तेङ खिनिङ वा माल्होखे भरु वासेहेङ गोइका आमने प्यावा एदि वा लागातार रे्-हेतेङ हिहेपानु वाको धित्तहोइ कालाउ सानाइको नाताहोइ ल्होतेङ चाहीका जोति प्यावा | 9 आरोङ का नेलाइहेङ दोअ्खा,''र्-हेसु कालाउ नेलाइहेङ प्यावा,भोसु कालाउ नेलाइ निङस्वाना, ढ़कढ़क पासु कालाउ नेलाइको भाअ्सिङ फिनु हिअ्प्यावा | 10 हाइपालिपानु झाराङ ज्याइ र्-हेखे,वा निनावा, कालाउ ज्याइ भोअ्खे वा निनावा | कालाउ ज्याइ द्कद्क पावा,फिनु हिअ्नावा | 11 नेलाइ मध्येसो हासुको चान वाला ? नाङ्को चान हाया र्-हेनु, ना वासेहेङ हाइ प्याना ? हाइ नाङ्को चानहेङ ना पुय्याँ प्याना ? हा:हा ! ना वासेहेङ हायादोङ प्याना | 12 पाकुनु,नाङ्को चान तुइ र्-हेपानु,वासेहेङ हाइ चिमताङ प्याना ? हा:हा ! 13 नाबुङ आरु द्याङ्गेलाइ भाइपाङ दुस्त हिना | कालाउबुङ गिसुखेना ताइको जामालगेलाइहेङ हेसा रेम्का आमेनेगेलाइ पिलि गोइखे | नाङ्को स्वर्गिय आबा वाको दोअ्फा र्-हेकालाइहेङ्बुङ झन हेथे हेन्जा पबित्तरो आत्मा प्यावा | 14 हिदोइबुङ समयता एमि द्याङ्सो येसु: नुइ धुइलि मादोका बानाइका भुतहेङ उल्लि पापाहि जेलाउ इङ्को भुत बाहार उल्लिहि,इङ्को द्याङ नुइ धुइलि दोअ्का जेङ्हि कालाउ द्याङ्गेलाइ भाङ भाङ हि | 15 कालाउ आधिमि द्याङ्गेलाइ दोअ्हि,''बालबिजुल,भुतगेलाइको माझनको सरबुङ सो वा भुत गेलाइ खाअ्पाखे |'' 16 भेनेङ द्याङ्गेलाइबुङ येसु:हेङ जाचिलि मन पाघाखे | इम्बालाइ वासेहेङ स्वर्गसो चुमाका एलोङ चिन्हा तिङ्पालि लगाइहि | 17 कालाउ इम्बालाइको बिचार थाहा गिअ्तेङ येसु: इम्बालाइहेङ दोअ्हि '' गोताङ सारभि खेङ्न्हाखे पानु, कालाउ इङ्को एमि -भेनेङ्दोफा फेसुहेपानु इङ्को ताइमिङ नासातावा| एनसाङ्दोङ एलोङ जाहानता ता-ताइमिता फेसुहेपानु इङ्को साबुङ एनसाङ नासातावा | 18 एदि साइतानबुङ ताइ-ताइमि दोअ्फा लाअ्न्हानु,वाको सारभि हेसा तिकियावा ? हाइपालिपानु नेलाइ दोअ्सुखेना,कि का बालजिबुलको सरबुङ्सो भुतगेलाइ दिगिल्खा |'' 19 एदि का बालजिबुलको सरबुङ लागाइतेङ भुतगेलाइ उल्लिपानु,नेलाइ को चानगेलाइ आरुसो भुतगेलाइ उल्लिपालि हिदोइ सरबुङ्को प्रयोग पावा? ओदोङ भाअ्सिङ नाङ्को ताइकोङ द्याङ्गेलाइ इम्बालाइ भुलता हि दोका प्रोमानित पिखे | | 20 कालाउ काते भुतगेलाइहेङ खाअ्पालि परमेस्वरको सरबुङ प्रयोग पाखा | इदोइ पाहासो प्रमान जेङ्खे कि परमेस्वरको सारभि नेलाइकोता लोलिदोअ्होइ | 21 'जेलाउ हिदोइबुङ बलबान द्याङ हेन्जा हात हातियार गेलाइ चुम्तेङ साको पाले पाखे,वाको साको गोताङ आनेमानेगेलाइ सुरक्स्या ह्यावा | 22 कालाउ वा खान्तेङ बलबान द्याङ लोअ्तेङ वाको हुत्ता धुम पातेङ वासेहेङ जितिहेपानु,वा भर परेका द्याङ वाको गोताङ हतियारगेलाइ धिङ्तेङ चुम्पुखे,कालाउ वाको आनेमाने गेलाइ खुअ्तेङ बाराराइयावा | 23 ज्याइ काङ्को पक्स्याता मान्थु, उङ्को काङ्को बिरुद्ता हि,कालाउ काङ्को दोफा माजारायावा,वाते रायावा |(ज्याइ द्याङ कादोफा काम मापाखे वा काङ्को बिरुदता हि ) 24 'जेलाउ एमि द्याङ्सो दुस्त आत्मा उल्लिखे, उङ्को माइसाचालिको भाअ्सिङ बोबोका थामेगेलाइ भोगिल्खे | कालाउ जेलाउ वा हिसोबुङ माइसाका थामे मानिङ्खे, कालाउ वा दोअ्खे,'का जेदोङ सा सो बाहार लोका हिघाखा इन्ताङ घुरितेङ हानाङ्का | 25 जेलाउ उङ्को आत्मा उङ्को साता घुरियावा वा उङ्को सा फेतेङ हिका कालाउ साजाइतेङ ताअ्का निनावा | 26 कालाउ उङ्को दुस्त-आत्मा आरु न्हिलोङ दुस्त-आत्मा नान्हावा वा खान्तेङ झन दुस्त चुमावा | कालाउ इङको झाराङ आत्मागेलाइ एदोफाङ हानितेङ इङ्को द्याङ लित्ता दुल्लावा कालाउ इन्ताङ ह्यावा | कालाउ इङ्को द्याङ्को दासा लाम्फाको खान्तेङ झन मारेम्का जेनावा |'' 27 जेलाउ येसु:इङ्को काथागेलाइ दोअ्काताङ पाघाखे,एलोङ बेबाल वा इन्ता हिघाहि येसु:हेङ एसा दोअ्तेङ मेनाङ र्-हिकाइतेङ, दोअ्हि,''धन्य उङ्को बेबाल ज्याइ नासिहेङ गान्धितेअ्पाहि कालाउ नासेहेङ दु;दु लाम्पाहि | 28 कालाउ वा दोअ्हि, धन्य''द्याङ्गेलाइ ज्याइ परमेस्वरको बचनगेलाइ हिङखे,कालाउ पालाना पाखे इम्बालाइ जातिङभारि हाउसाइतेखे | 29 द्याङ्गेलाइको जेर आल्हो-आल्होपा पाकाताङ बाधिकाताङ हानिहि | येसु:दोअ्हि,''इदोइ युग ता हिका द्याङ्गेलाइ दुस्त हि | इम्बालाइ चिन्हाको रुपता परमेस्वरको सरबुङ भोखे | कालाउबुङ हिदोइबुङ चिन्हा इम्बालाइहेङ माप्याङ , खिनिङ योनाको ता हिका सरबुङ खिनिङ जेनावा |'' 30 योना निनवेका सहरको द्याङ्गेलाइको भाअ्सिङ चिन्हा जेनावा | एसा वादोङ इदोइ पुस्ताको भाअ्सिङ द्याङ्को चानबुङ चिन्हा जेनावा | 31 न्यायको दिना माहेको सारभिको रानि इदोइ पुस्ताको द्याङ्गेलाइको बिरुदृ ल्होकावा,कालाउ इम्बालाइहेङ दुसियावा | हाइपालि पानु सुलेमानको बुदिृको सिक्सा हिङ्लि वा हेन्जा दुरेसो लोका हिघाहि | कालाउ का दोअ्खा कि खाङ्सु सुलेमान खान्तेङ माहान इता एमि द्याङ हि | 32 न्यायको दिना निनवेको द्याङ्गेलाइ इदोइ पुस्ताको बिरोधता ल्होकावा,कालाउ इम्बालाइ दुसिलि जेङ्का प्रमान प्यावा | हाइपालि पानु इङ्को बेला योना द्याङ्गेलाइहेङ बानाल पाहि इम्बालाइ ताइको हृदयता कालाउ हिका चाका सुधाङ परिबर्तन पाहि | कालाउ का नेलाइहेङ दोअ्खा का योना खान्तेङ महान हिघा | 33 'हिदोइ बुङ द्याङ गेसा जोलाइतेङ पाथि लिता माअ्ताखे,याते माअ्म्होखे | भरु लिता दुल्काताङ पालाउ झाराङ तिनाको दोअ्तेङ इङ्को गेसा ताकि हुत्ता ताअ्खे |'' 34 नाङ्को जिउको गेसा नाङ्को मिसिया | एदि नाङ्को मिसियागेलाइ ठिक हिनु नाङ्को गोताङ जिउ फाइसालामका होइ पोङघाता वा | एदि नाङको मिसिया गेलाइ बिगिरका हिअ्हे पानु नाङ्को गोताङ जिउ दोङ कितिकितितावा | 35 ओदोङ भाअ्सिङ थिसु,नाङ्को हिका फाइसालामका कितिकितिका मालाको माजेनाको | 36 एदि नाङ्को गोताङ जिउ फाइसालमाकाहोइ पोङ्घाकाहिनु कालाउ वाको हिदोइबुङ भाग कितिकितिका मान्ठुनु उङ्को गोताङ चम्कियावा,जेलाङ गेसाको किरन नाङ्को दोअ्फा चम्कितेङ ह्यावा | 37 येसु:काथा पालि दोअ्तेङ ,एअ्मि फरिसि दोफाङ उम चाइने दोअ्तेङ सेउपाहि | कालाउ येसु:हानिहि कालाउ उम चाहि | 38 कालाउ उम चालि खान्तेङ लाम्फा येसु:खुर माझाहि कालाउ इङ्को तिङ्तेङ फारिसिगेलाइ भारबुसाइ हि | 39 इङ्कोता प्रभु येसु:दोअ्हि,''ना फरिसिगेलाइ जामबाति कालाउ थालि बाहार खिनिङ मान्झीसुखेना,कालाउ लिता चाहि नेलाइ दिकाहोइ खुकाहोइ कालाउ दुस्त मनहोइ पोङघाका हिखे | 40 हाइदोङ मागीका (मुर्ख) द्याङ्गेलाइ,जाइ बाहारको भाग बानाहि,वादोङ लिताकोबुङ बानाइका माकोरो ? 41 ओदोङ भाअ्सिङ जेदोङ हि इङ्को गरिब द्याङ्गेलाइहेङ पिसु | कालाउ न्हुसो नाबुङ पुर्नरुपता जाहाका जेनाना | 42 कालाउ धिक्कार ना, फारिसिगेलाइहेङ ! नेलाइकोता हिका पुदिना,आरुद कालाउ बगैचाता हिक आरु गोताङ आनेमानेगेलाइको द्साङ्सा परमेस्वरहेङ चढ़ाइसुखेखा,कालाउ नेलाइ परमेस्वर दोफा न्याय काम प्रेम आसा पासुखेना | उङ्कोङ कामगेलाइ नेलाइ पालि गोइका हि भेनेङ काम लाअ्तेङ्बुङ | जेलाउ नेलाइ आरोङ भेनेङ काम गेलाइ पाका हिसुन्हा | 43 धिक्कार ना फारिसिगेलाइहेङ,ना चाउघारासागेलाइता मुख्य-मुख्य योमका थामेगेलाइ खिनिङ भोअ्सुखेन्हा | एन्साङ्दोङ हातेबाजार गेलाइता हानिलाउ द्याङ्गेलाइ नेलाइहेङ सेउपाको दोअ्तेङ मन पासुखेन्हा | 44 धिक्कार हि ना फारिसिगेलाइहेङ ! हाइपालिपानु नेलाइ हासुबुङ याद मापाका तोमगेलाइ भाइकाङ हिसुन्हा | द्याङ्गेलाइ थाहा मागिसिङ इङ्को हुत्ता तेतेङ हानिखे | 45 ब्यबस्थाको सास्तिरिगेलाइ मध्येसो एमि येसु:हेङ दोअ्हि,''हे गुरु,जेलाउ नेलाइ इदोइ काथागेलाइ पाखेन्हा, नेलाइ केलाइहेङ्बुङ निन्दा पाखेन्हा |'' 46 येसु:जोबाफ पिहि,''धिक्कार ना ब्यबस्थाको सास्तिरिगेलाइ !नेलाइ द्याङ्गेलाइहेङ पालाना पालि मादोका नियमगेलाइ बानाइ सुखेन्हा | नेलाइ द्याङ्गेलाइहेङ इङ्को नियोम पालना पालि गोयाङ दोअ्तेङ बाध्ये पासुखेना | कालाउ नेलाइ ताइमिङ चाहि इङ्को नियमगेलाइ पालाना पालि गोयाङ दोअ्तेङबुङ कोसिस मापासुखेन्हा | 47 धिक्कार नेलाइहेङ,हाइपालिपानु नेलाइ अगमबक्तागेलाइ को भाअ्सिङ तोम बानाइसुखेना | कालाउ उङ्को अगमबक्तागेलाइ इङ्कोदोङ जाइ नेलाइको आजाइ -आजुगेगेलाइहेङ से:का हिघाहि | 48 या एसापा सिदृ जेनावाकि नेलाइ नाङ्को आजाइ-आजुइगेलाइ पाका कामगेलाइता भागि जेङ्का हिसुन्हा | इम्बालाइ, अगमबक्तागेलाइ हेङ से:का हिघाहि कालाउ नेलाइ अगमबक्ता गेलाइको भाअ्सिङ तोम बनाइस्वाना | 49 ओदोङ भाअ्सिङ परमेस्वरको बुधिहोइ दोअ्हि | 'का नेलाइकोता अगमबक्तागेलाइ कालाउ प्रेरितगेलाइ इम्बालाइको भाअ्सिङ दिङ्गिल्प्याङ्का | इम्बालाइ आधिमि अगमबक्तागेलाइहेङ कालाउ प्रेरितगेलाइहेङ सेअ्तावा कालाउ आरुगेलाइहेङ सातायावा | 50 ओदोङ भाअ्सिङ पृथ्विको सिरजाइकासो जेथे बुङ अगमबक्तागेलाइ सेन्हाहि बर्तमान पुस्ताको ना, द्याङ्गेलाइ याको भाअ्सिङ द्न्दित जेङ्लि गोइस्वाना | 51 हाबिलसो जकरिया जाइहेङ बेदि कालाउ परमेस्वरको थानको माझाता सेअ्का हिघाहि इम्बालाइ झाराङको सिअ्काको भाअ्सिङ इदोइ | इदोइ,का नेलाइहेङ दोअ्खा ,नानि जेथेबुङ ना द्याङ्गेलाइ बान्चिकाङ हिसुन्हा इङ्को कान्दको भाअ्सिङ झाराङ द्न्दित जेनावा | 52 'धिक्कार ना ब्यबस्थाको सास्तिरिगेलाइ ! परमेस्वरको बुदिृको काथागेलाइको ताल्चा नेलाइ चुम्पुका हिसुन्हा | नेलाइ ताइमिङ्दोङ माधिरसुन्हा,कालाउ आरुगेलाइ धिरपालि बुङ बाधा पिसुन्हा |'' 53 जेलाउ येसु:हानिलि तोमलाउ,ब्यबस्थाको सास्तिरिगेलाइ कालाउ फारिसिगेलाइ हेन्जा कस्त पिहि | वासेहेङ हेन्जाङ प्रस्न गेलाइ हिअ्हि | 54 वा हाइदोङ द्वाङ कि वा दोअ्तेङ इम्बालाइ जालेता देपालि दाउ भोअ्घाखे |