लुका 10

कालाउ न्हुसो प्रभु सुमकुरि तेन्हे झना चात्यागेलाइहेङ साल्हि | वा इम्बालाइहेङ न्हेमि न्हेमिको दल बानाइहि वा जेदोङ सहर कालाउ थामेभारि हानिलि खाङ्घाखे ओदोङ सहरगेलाइ दिङ्गिल्हि | 2 येसु:दोअ्हि,''सेकाङ उम ते हेन्जा हि,कालाउ खेतालागेलाइ चाहि आतुइसा हि | ओदोङ भाअ्सिङ सेका उम को प्रभुहेङ दोमचाकाइसु कालाउ वा गोइका हेथे खेतलागेलाइ दिङ्गिल प्यावाको | 3 हानेसु,कालाउ खाङ्सु ,का नेलाइहेङ खुकागोलाइको माझाता भेडा मेसाको चानगेलाइ भाइपाङ दिङ्गिल्लाङ्का | 4 ताका,झोला,जुत्ता हाइबुङ दोफा माचुम्पु ,दामाता हानिलाउ द्याङ्गेलाइ दोअ्फा नुइ धुइलि मालासु | 5 हासुकोबुङ साता दुल्लि खान्तेङ लाम्फा दोअ्सु,'इदोइ साता नेलाइहेङ सान्ति जेनाको | 6 एदि सान्तिप्रियो द्याङ इन्ता हिहेपानु नेलाइको सान्तिको आसिरबाद वाको दोफा ह्यावा | एदि इन्ता सान्तिप्रियो द्याङ मान्थुहेपानु नेलाइको सान्तिको आसिरबाद नेलाइदोफाङ घुरितेङ लावा | 7 सान्तिको साता योम द्याङ्गेलाइ जेदोङ चाका-आम्का पिखे चाअ् | हाइपालिपानु एमि खेताला ताइका कामका ताका निङ्लि योग्योको हि | भेनेङ साता हिलि लाम्फाको सा मालासु |'' 8 एदि नेलाइ सहरता हानिस्वाना कालाउ द्याङ्गेलाइ इन्ता स्वागत पाहेपानु,इम्बालाइ जेदोङ चाका आम्का पिखे चासु | 9 इन्ताको थामेगेलाइको मासाधेकालाइ एल्पासु,कालाउ इम्बालाइहेङ दोअ्सु,'परमेस्वरको सारभि(राइजि) नेलाइको भेरपाङ लोका हि |' 10 जेलाउ नेलाइ सहरता,हानिस्वाना,कालाउ द्याङ्गेलाइ इन्ता नेलाइको स्वागत मापाहेपानि,सहरको कुन्हा कुन्हाता हानेसु कालाउ दोअ्सु | 11 नेलाइको खोकोइता तेअ्का इम्बालाइको सहरको धुलाबुङ नेलाइ इम्बालाइको बिरुद्ता र्-हिसु | कालाउ थाहा गिसु कि परमेस्वरको सारभि चेम्ताङ लोका हि | 12 का नेलाइहेङ दोअ्खा,न्यायको दिना इङ्को सहरता द्याङ्गेलाइको बेथा सदोमको द्याङ्गेलाइको खान्तेङ झन सहिलि मादोअ्का जेनावा | 13 'धिक्कार नासिहेङ,खोराजिन,नासेहेङ,बेथसेदा ! हाइपालिपानु नेलाइकोता हिका सरबुङ्को काम टुरोर कालाउ सिदोनता पाधा पानुते नेलाइको आगाता दोङ भाङ्ग्रा लागाइतेङ बुसिरि घोसितेङ पासताइ पाधावा | 14 न्यायको दिनाता टायर कालाउ सायतनको द्याङ्गेलाइ बेथा खान्तेङ नेलाइको अबस्था झन सोहिलि मादोका जेनावा | 15 ए, कर्फनहुम ! नासेहेङ स्वर्गता तोल्ह्यानाङ ? माको नासेहेङ्बुङ हेलाउबुङ मेमासिका थामेता हुल्पानाउ | 16 'ज्याइ नेलाइको काथा हिङ्खे,वा काङ्का काथा हिङ्खे | ज्याइ नेलाइहेङ मन्दामाताखे कालाउ उङ्को कासेहेङ्बुङ मन्दामाताखे | ज्याइ कासिहेङ सुइकार मापाखे,वा कासेहेङ दिङ्गिल्काहेङ्बुङ सुइकार मापाखे | 17 जेलाउ उङ्को सुमकुरि तेन्हे जाना द्याङ्गेलाइ घुरितेङ लोहि,इम्बालाइ मेनाङ लेङ्चाहि(खु:सि जेङ्हि) | इम्बालाइ दोअ्हि,''हे प्रभु जेलाउ नाङ्को मिङ्ता केलाइ आग्या पिनान्हि भुतगेलाइबुङ केलाइको आग्या किहि |'' 18 येसु:इम्बालाइहेङ दोअ्हि,''का भुतहेङ स्वर्गसो बिजुलि चिल्का -चिल्का भाइपाङ हुल्का तिङ्घा | 19 हिङ्सु,का नेलाइहेङ पुयाँगेलाइ कालाउ चिम्ताङ्गेलाइ याङ्लि सरबुङ पिका हिघा | का नेलाइहेङ सतुरगेलाइको गोताङ सरबुङ हुत्ता खबरा पिकाहिघा | कालाउ हासुबुङ नेलाइहेङ नासा पालि मादावा | 20 कालाउ उङ्को आत्मागेलाइ नेलाइको आग्याहेङ पालाना पाखे दोअ्तेङ नेलाइ माहाउसाइलि | भरु नेलाइको मिङ स्वर्गता लेखेका हि दोअ्तेङ नेलाइ लेङ्चासु |'' 21 कालाउ न्हुसो येसु:हेङ पबित्तरो-आत्मा मेनाङ हाउसाइपाहि | वा दोअ्हि,''हे आबा ! स्वर्ग कालाउ पृथ्विको परमप्रभु ! का नासिहेङ सेउपाखा | का नाङ्को बाखानाइ पाङ्कि बुदिृमान कालाउ सोम्झिलि दोअ्का द्याङ्गेलाइ पाहा सो ना इङ्को काथागेलाइ म्होतेङ ताअ्का हिना | कालाउ ना इदोइ काथागेलाइ उङ्को जामालगेलाइ भाइकाङ सोझाका द्याङ्गेलाइता तिङ्पा पिन्हा | 'हे आबा,ना एसा पान्हा हाइपालिपानि उङ्को नाङ्को मन हिघाखे | 22 'काङ्को आबा कासिहेङ गोताङ आनेमानेगेलाइ पिकाहि | हासुबुङ मागिखे कि ''चान'हासु खिनिङ आबा गिखे | कालाउ आबा हासु,हासुबुङ मागिखे-खिनिङ चानहेङ थाहा हि | द्याङ्को आबाहेङ इम्बालाइ गिखे,ज्याइहेङ चान दोअ्पिलि खाङ्का हि |'' 23 कालाउ न्हुसो येसु:एक्लाङ ताइको चात्यागेलाइ दोफा हिघाहि,वा इम्बालाइ भारि घुरितेङ दोअ्हि, ''नेलाइ धन्यको हिसुन्हा | जेदोङ नेलाइ तिङ्स्वाना | 24 का नेलाइहेङ दोअ्खा,हिन्जा अगमबक्तागेलाइबुङ कालाउ राजागेलाइ इङ्को खाङ्लि मन पाघाखे जेदोङ नेलाइ तिङ्तेङ हिसुन्हा,कालाउ इम्बालाइ इङ्को आमेनेगेलाइ मातिङ्हि | कालाउ हिन्जा अगमबक्तागेलाइ कालाउ राजागेलाइ,हिङ्लि मन पाघाखे कालाउबुङ इङ्को माहिङ्हि |'' 25 कालाउ न्हुसो एमि ब्यवस्थाका सास्तिरि इन्ता लोहि कालाउ येसु:हेङ जाचिलिको भाअ्सिङ बिचार पाहि, | वा दोअ्हि ''हे गुरुज्यु,का अनन्त जिबन निङ्लि का हाइपालि गोयाङ ? |'' 26 येसु:वासेहेङ दोअ्हि,''ब्यवस्थाता हाइ लेखेका हि ? ना इन्ता हाइ मापढेखेना | 27 उङ्को द्याङ दोअ्हि,''ना परमप्रभु नाङ्को परमेस्वरहेङ ताइको गोताङ आत्माहोइ,गोताङ सरबुङ्होइ कालाउ गोताङ मनसो प्रेम पालि गोइखे | कालाउ नाबुङ ताइमिएङ भाइपाङ बोमि द्याङ्गेलाइहेङ प्रेम पालि गोइखे |'' 28 येसु:उङ्को द्याङ्हेङ दोअ्हि,नाङ्को दोअ्का ठिक हि | ओदोङ भाअ्सिङ एन्साङ पा कालाउ ना अनन्त जिबन निनाना |'' 29 उङ्को द्याङ वाको हिअ्का रेम्का पालि भोअ्घाखे | ओदोङ भाअ्सिङ वा येसु:हेङ दोअ्हि,''कुनु उङ्को द्याङ्गेलाइहासु ज्याइहेङ का प्रेम पालि गोइखे ?'' 30 वाको जोबाफता येसु:दोअ्हि,''एअ्मि द्याङ यरुसलेमसो यरिको हानिघाखे | आधिमि डाकुगेलाइ वासेहेङ गोराइहि इम्बालाइ वाको लोखोन थेअ्पिहि कालाउ आधामारापाङ दानाइहि कालाउ दामाभारि सिअधेतेङ हानिहि | उङ्को द्याङको जिउ खिनिङ सापा सापा धाखे | 31 सङ्जोकहोइ एअ्मि धामि ओङ्कोङ दामा पातेङ हानिघाखे कालाउ उङ्को आधामाराका द्याङ्हेङ तिङ्तेङ वा भेनचातेङ भेनेङ दामापाहा हानिहि |'' 32 एन्साङ्पाङ एअ्मि लेबिबुङ ओदोङ थामेपातेङ लोघाखे उङ्को आधामाराका द्याङ्हेङ तिङ्तेङ भेनेङ दामा भेनचाकातेङ हानिहि | 33 एमि सामारिबुङ ओदोङ दामापाहा हानिघाखे उङ्को द्याङ हिका थामेता लोहि,कालाउ वासेहेङ तिङ्तेङ वाको मन दायाहोइ भरिहि | 34 उङ्को सामारि उङ्को आधामाराका द्याङ्को भेरपा हानिहि,कालाउ जैतुनको चुइति कालाउ दाखरस लागाइतेङ वाको पेचाराता ओसेरे पैति लगाइतेङ जिम्पपाहि | कालाउ वा उङ्को आधामाराकाहेङ गाधाता लादाइतेङ एलोङ पौवाता चुम्पुहि,कालाउ वासेहेङ सामार्हाइहि | 35 कालाउ न्हुदिना उङ्को सामारि न्हेलोङ चानदिको ताका पौवाको माझनहेङ पितेङ दोअ्हि,यासेहेङ रेम्फा सामार्-हाइपि,कालाउ याको भाअ्सिङ आरुङ हेन्जा खर्च जेङ्नु का घुरिकापाहासो नासिहेङ तिरिप्याङ्का | '' 36 कालाउ येसु:दोअ्हि,''इदोइ सुमिता डाकुगेलाइ आधामारापाङ दान्हाइका द्याङ्हेङ हासु चाहि दाया पाहि ?'' 37 ब्यवस्थाको सारस्तिरि जोबाफ पिहि,''ज्याइ वासेहेङ साघाइहि वादोङ |''येसु:वासिहेङ दोअ्हि,''नाबुङ हाने कालाउ एन्साङ पा |'' 38 जेलाउ येसु:कालाउ वाको चात्यागेलाइ हानिदोङ्घाखे,येसु:एलोङ सहरलिता दुल्हि | मार्था मिङ पाका एलोङ बेबाल वासिहेङ ताइको सा ता स्वागत पाहि | 39 मार्थाको एलोङ मरियम मिङ, पाका बेजान ओने हिघाहि | मरियम येसु:को खोकोइ भेरपा योमतेङ वाको दोअ्का बचन हिङ्तेङ हिघाहि | कालाउ वाको बाइ मार्था चाहि साको कामता धाउ -धाउ जेङ्तेङ काम पातेङ हिघाहि | 40 मार्था हेन्जा काम पालि गोइलाउ चेरताम्पाघाखे,मार्था हानितेङ दोअ्हि,''हे प्रभु ! काङ्को ओने कासिहेङ एक्लाङ सा को कामता लाअ्धिकाहि वा वास्ता मापाखेना, दाया पातेङ वासेहेङ दोअ्पि वा कासिहेङ साघाइलि लाको | 41 कालाउ प्रभु वासिहेङ दोअ्हि,''मार्था-मार्था,ना हेन्जा काथा ता पिरखेना कालाउ फिक्रि पाखेना | 42 एलोङ काथा चाहि महत्वपुर्न हि,इङ्कोङ काथा, रेम्का मरियम साल्का हि,उङ्को वाकोसो माधिङ्न्हावा |''