लुका 9

येसु:तेन्हे चात्यागेलाइहेङ ए -दोफाफाङ काइहि | वा मासाधेकालाइहेङ एल्पालि कालाउ भुत धेललाइहेङ लाअ्पालि सरबुङ कालाउ खाबारा इम्बालाइहेङ पिहि | 2 येसु:इम्बालाइहेङ परमेस्वरको सारभिको बिसयता बानाल पालि मासाधेकालाइहेङ कालाउ मिसा एल्पालि बाहार दिङ्गिल्हि | 3 वा चात्या गेलाइहेङ दोअ्हि,जेलाउ नेलाइ हिसोबुङ हानिस्वाना,नेलाइ दोफा लाहि,चाका आम्का,झोला कालाउ ताका हाइबुङ माचुम्पुसु | ताइमिको जिउता होङ्का धावा लोखोन खिनिङ दोफाङ चुम्पुसु | 4 हिदोइबुङ साता हानेनु घुरिका पहर माजेङ्पा भरि इनताङ हिसु | 5 एदि सहरको द्याङ्गेलाइ नेलाइहेङ स्वागत मापाहेपानि इङ्को सहरको बाहार हानेसु,कालाउ खोकोइको धुला रिह्-तेङ हानेसु | इङ्को नेलाइको बिरुद्ता गवाहि जेनावा |'' 6 ओदोङ भाअ्सिङ चात्यागेलाइ बाहार हानिहि इम्बालाइ ये:बानाल पाकाताङ कालाउ गोताङ मासाधेका द्याङ्गेलाइहेङ एल्पाकाताङ गोताङ सहर गेलाइता हानिहि | 7 सासक हेरोद इदोइ गोताङ घाताना थाहा गिहि | वा आवाइहि, हाइपालिपानु हेथे द्याङ्गेलाइ दोअ्हि,''बप्तिस्ता पिका यु:हन्ना सिकासो सिन्चालतेङ ल्होका हि |'' 8 भेनेङ द्याङ्गेलाइ दोअ्हि,''एलिया केलाइकोता लोका हि |''कालाउ आधिमि द्याङ गेलाइ दोअ्हि,''हेन्जा लाम्फाको बेलासोङ अगमबक्तागेलाइ सो एमि सिकासो बान्चितेङ ल्होका हि |'' 9 'हेरोद दोअ्हि,''का यु:ह्न्नाको पुरुङ पोपिका हिघा | कालाउ का ज्याइको बिसयता हिङ्दोङ्खा उङ्को द्याङ हासु हि ? हेरोद येसु:हेङ खाङलि भोघाखे | 10 जेलाउ चात्यागेलाइ घुरितेङ लोहि,इम्बालाइ पाका गोताङ काम गेलाइ हिङ्पाहि | कालाउ न्हुसो येसु:इम्बालाइहेङ बस्सैदा दोअ्का एलोङ सहरता सुटुक्क चुम्तेङ हानिहि | 11 वा हिसो हानिहि द्याङ्गेलाइ थाहा निङ्हि,इम्बालाइ वाको लेसारा पिताइहि | इम्बालाइ येसु:को स्वागत पालि कालाउ परमेस्वरको सारभिको बारेता इम्बालाइहेङ दोअ्पिहि,वा मासाधेका लाइहेङ एल्पापि हि | 12 बेल्हाका पहर तेन्हे चात्यागेलाइ येसु:कोता लोहि कालाउ दोअ्हि,''इदोइ थामेता हिदोइबुङ द्याङ माहिखे,इम्बालाइहेङ घुरिपासु, इदोइ द्याङ्गेलाइ ओबालाइको चाका - आम्का कालाउ जिम्का बेबस्थाको भाअ्सिङ भेरपाको देरागेलाइ कालाउ सहर गेलाइता हानाको | 13 येसु:उङको चात्यागेलाइ दोअ्हि,''इम्बालाइको भाअ्सिङ चाका आम्का बेबस्था पासु |''चात्यागेलाइ दोअ्हि,''केलाइ दोफा नालोङ तोले कालाउ न्हेलोङ पोङ्न्हाका हाया खिनिङ हि | हाइ ना किखेताना केलाइ इम्बालाइको भाअ्सिङ चाका आम्का चोल्तेङ चुमाङ ?'' 14 इन्ता इम्बालाइ हेन्जा जोसो ना हाजार वाजानगेलाइ हिघाहि | वा ताइको चात्यागेलाइहेङ दोअ्हि,''इम्बालाइहेङ एलोङ लाहारिपा द्याकुरिते-द्याकुरिते खेङ्तेङ योम्लि लागाइ हि |'' 15 कालाउ न्हुसो चात्यागेलाइ सन्साङ पाहि,कालाउ झाराङ द्याङ्गेलाइहेङ सिङ्जाल-जालका धासिता योमपाहि |'' 16 येसु:नालोङ तोले कालाउ न्हेलोङ हाया खुरता चुम्तेङ बादेल हुता खाङ्तेङ चाका आम्काको भाअ्सिङ परमेस्वरहेङ धन्यबाद पिहि | कालाउ न्हुसो वा उङ्को तोलेहेङ पोङ्तेङ चात्यागेलाइ पिहि,वा चाका-आम्का द्याङ्गेलाइहेङ बाखाराइपिलि चात्यागेलाइहेङ आरा्-हाइहि | 17 झाराङ आघाइपाङ तोले कालाउ हाया चाहि कालाउ चात्यागेलाइ दाइका तोले जोमपाहि इङ्को तोलेगेलाइ तेन्हे डाल्हो पोङ्घाहि | 18 एअ्नि येसु:एकलाङ दोमचाकाइघाखे, गोताङ चात्यागेलाइ वाको दोफाङ हिघाहि | येसु:इम्बालाइहेङ हिअ्हि ''द्याङ्गेलाइ कासिहेङ हासुहाइ दोअ्खे ? |'' 19 चात्यागेलाइ दोअ्हि,आधिमि नासिहेङ बप्तिस्ता पिका यु:हन्ना दोअ्खे |आधिमि द्याङ गेलाइ नासिहेङ एलिया दोअ्खे | कालाउ आधेमि द्याङ्गेलाइ लाम्फाको अगमबक्तागेलाइ मध्येसो जिवनता घुरितेङ लोका एमि दोअ्खे | 20 कालाउ न्हुसो येसु:ताइको चात्यागेलाइहेङ हिअ्हि,कालाउ नेलाइ चाहि कासिहेङ हाइ दोअ्सुखेना ? |'' 21 येसु:इदोइ काथा हासुहेङ्बुङ मादोअ्सु दोअ्तेङ इम्बालाइहेङ चेताउनि पिहि | 22 कालाउ न्हुसो येसु:दोअ्हि,द्याङको चान हेन्जा कष्ट सहिलि गोयाङ, यहुदि:प्रधानगेलाइ, बार्का धामिगेलाइ कालाउ सास्तिरिगेलाइ वासिहेङ मन्दामाताका वा द्याङ्को चानहेङ सेअ्तावा | कालाउ वा सि:काको सुम्निको दिनाता वासिहेङ आरुङ सिन्हुपावा,कालाउ ल्होकावा | 23 येसु:इम्बालाइहेङ दोअ्हि,''एदि हासुबुङ कादोफा लोलि खाङनु वा ताइमिहेङ सुइकार मापाको कालाउ दिनाङ दिनाङ क्रुस चुम्तेङ काङको दोफा लाको | 24 ज्याइ ताइको प्राण बान्चिपालि खाङ्खे पानु वा उङ्को राम्पावा ज्याइ काङ्को भाअ्सिङ प्राण पिखे उङ्को चाहि बान्चिपावा | 25 हाइपालिपानु हाइ फाइदा हि रो,एदि हासुबुङ सारा सुमिङ जितितेङ लाउबुङ ताइमिहेङ नासापानु माकुनु राम्नु ? 26 हासुइबुङ काङ्को वचनसो लेदेरहे पानु द्याङ्को चानबुङ ताइको महिमाता कालाउ आबाको कालाउ पबित्तरो दुतगनको महिमाता लोलाउ वाको दोफा का लेदेरयाङ्का | 27 का नेलाइहेङ जातिङभारि दोअ्खा,नेलाइ सिलिखानतेङ लाम्फाङ नेलाइ मध्येसो आधिमि द्याङ्गेलाइ इताङ जातेङ परमेस्वरको सारभि तिङ्लि निनावा |'' 28 ए, दिना न्हुसो येसु इङ्को काथागेलाइ दोअ्हि,वा पतरुस,यु:हान्ना कालाउ याकुब हेङ चुम्पुतेङ कालाउ लाख भारि दोमचाकाइलि हानिहि | 29 जेलाउ येसु:दोमचाकाइतेङ हिघाखे;वाको र्-हाइ भाङ्घाइन्हाहि कालाउ वाको होङ्का धावा जाहाका जेङ्तेङ चिल्काघाखे | 30 न्हेमि द्याङ इन्ता तिङ्चाहि, येसु:ओबालाइ दोफा काथापाघाहि ओबालाइ मोसा कालाउ एलिया हिघाहि | 31 मोसा कालाउ एलियाबुङ जाहाका तिङ्घाखे,ओबालाइ येसु:दोफा वाको सिकाको बिसयता काथा पाकाताङ हिघाहि जेदोङ यरुसलेमता जेङ्लि तोम्का खाङ्घाखे | 32 पतरुस कालाउ आरुगेलाइ मस्त जिम्का हिघाखे | इम्बालाइ नाङ्घाहि कालाउ येसु:को महिमा तिङ्हि | इम्बालाइ येसु:दोफा न्हेमि द्याङ्गेलाइ जातेङ हिका तिङ्हि | 33 जेलाउ मोसा कालाउ एलिया हानिलि तोम्का हिघाहि,पतरुस दोअ्हि,''हे गुरुज्यु,केलाइहेङ इताङ हिलि रेम्का हि | केलाइ इता सुमलोङ खोपारा धामाङ, एलोङ नाङ्को भाअ्सिङ, एलोङ मोसाको भाअ्सिङ कालाउ एलोङ एलियाको भाअ्सिङ |''पतरुस मागिघाखे कि वा हाइ दोअ्तेङ हि | 34 पतरुस जेलाउ इदोइ काथा दोअ्काताङ हिघाहि,ओदोङ्घुरि इम्बालाइहेङ कोरपाहाङ सो बादेलहोइ थुम्हि | पतरूस ,याकुब कालाउ यु:हन्ना बादेलहोइ थुम्न्हाका तिङ्तेङ थिहि | 35 बादेलसो एलोङ गाला एसा दोतेङ लोही | ''इदोइ काङ्को चान हि | का वासिहेङ साल्का हिघा, वाको आग्या किअ्सु |'' 36 जेलाउ उङ्को गाला लोहि,येसु:खिनिङ इन्ता हिघाहि | पतरुस,याकुब कालाउ यु:हन्ना हाइबुङ मादोअ्सिङ हि | इम्बालाइ हाइ तिङ्हि हासुहेङ बुङ मादोअ्हि | 37 न्हु दिना येसु:पतरुस,याकुब कालाउ यु:हान्ना रा, सो लेता खुअ्हि | द्याङ्को बारका हुदा वासिहेङ भेतिलि लोहि | 38 बारका जेर सो एमि र्-काइतेङ येसु:हेङ दोअ्हि,''हे गुरुज्यु,दाया पातेङ लोउ कालाउ काङ्को चानहेङ खाङ्पि | इदोइ काङ्को एलोङ खिनिङ चान | 39 साइतानको दुस्त आत्मा काङको चानता लोखे कालाउ वासिहेङ ओदोङ्घुरि भोनोइता लोङ्पाखे कालाउ र्-हिकाइतेङ नुइसो थोसि गुजुगुजुपा उल्लिपाखे तासिङ रेअ्खे,कालाउ रानथिउ- थिउखे | उङको दुस्त आत्मा जेलाउबुङ कस्त पिखे कालाउ वाको सो हेलाउबुङ लाअ्तेङ मान्हिखे | 40 का नाङ्को चात्या गेलाइहेङ्बुङ वाकोसो दुस्त आत्मा उल्लिपालि दोअ्घा,कालाउ इम्बालाइ इन्सा पालि मादोअ्हि |'' 41 येसु:जोबाफ पिहि,''ओइ खान्धुराइ मापाकालाइ कालाउ जोसो ओसोङ हिगिल्कालाइ ! का नेलाइदोफा हेलाउ थेकापा हिलि कालाउ सहेतेङ हिलि ? कालाउ वा दोअ्हि उङ्को द्याङ्हेङ ''नाङ्को चानहेङ इसो चुमा | 42 परमेस्वरको माहान सरबुङ तिङ्तेङ झाराङ द्याङ्गेलाइ भारबुसाइका जेङ्हि | येसु:को पाका कामगेलाइसो द्याङ्गेलाइ एला थेकाबुङ भारबुसाइ जेङ्तेङ हि | वा ताइ चात्यागेलाइहेङ दोअ्हि | 43 'एला का नेलाइहेङ जेदोङ दोअ्खा हेलाउबुङ मानिलसु : द्याङ्को चानहेङ आधिमि द्याङ्गेलाइ रिमतेङ द्याङ्गेलाइ को खुरता प्यावा |'' 44 जेलाउ वाजान लोदोङ्घाखे,उङ्को भुत वासिहेङ इन्ताङ भोनोइता फेतेङ लोङ्पाहि कालाउ उङ्को वाजान फिरकाताङ हिघाहि,नुइ सो थोसि बिरतेङ लोताइलि तेङ्हि |'' कालाउ येसु:उङ्को दुस्त आत्माहेङ बारका चेताउनि पितेङ चेरहि् | कालाउ न्हुसो उङ्को वाजानहेङ एल्पातेङ वाको आबाहेङ सुम्पिपिहि | 45 चात्यागेलाइ येसु:को दोअ्का उङ्को काथा गेलाइको माने हाइबुङ माबुझिहि | याको माने नेलाइ थाहा मानिनाको दोअ्तेङ म्हेतेङ ताअ्का हिघाहि | ओदोङ भाअ्सिङ चात्यागेलाइ वासेहेङ हिअ्लि थिहि |'' 46 येसु:को चात्यागेलाइ ताइ ताइमिता इम्बालाइमध्येसो हासु चाहि बार्का चात्या वाला दोअ्तेङ काथा पालि तेङ्हि | 47 येसु:इम्बालाइको काथा पाकाको बिसयता बुझिहि,कालाउ वा एलोङ जामालहेङ ताइ दोफा चुमाहि कालाउ भेरपा जाअ्पाहि | 48 कालाउ ताइ चात्यागेलाइहेङ दोअ्हि,''एदि हासुबुङ काङ्को मिङ र्-हुतेङ इदोइ जामालहेङ ग्रहन पाखे पानु,वा कासेहेङ ग्रहन पाहे पानु वा उङ्को कासिहेङ दिङ्गिल्का हेङ ग्रहन पाखे,जेदोङ द्याङ्ने नेलाइको माझाता झाराङ खान्तेङ महुइका हि,उङ्को दोङ बारका जेनावा | 49 यु:हान्ना जोबाफ पिहि,''हे गुरुज्यु,द्याङ गेलाइसो भुत गेलाइ खाअ्पालि एअ्मि द्याङ नाङ्को मिङ र्-हुखे | उङको द्याङ केलाइको जेरको माकोनाङ केलाइ वासेहेङ एन्सापालि मापिन्हाहि |'' 50 येसु:यु: हान्नाहेङ दोअ्हि,''वासिहेङ मारोकिसु | एदि हिदोइबुङ द्याङ नाङ्को बिरुद्ता मान्थुहेपानु इङ्को नाङ्को पत्ति दोङ हिखे |'' 51 येसु:को स्वर्गरोह्नको बेला भेरपाङ लोघाखे | वा यरूसलेम हानिलि निस्चित पाहि | 52 येसु:आधिमि द्याङ्गेलाइहेङ ताइमि खान्तेङ लाम्फा दिङ्गिल्हि ; उङ्को द्याङ्गेलाइ येसु:को भाअ्सिहेङ गोताङ आनेमाने तियार पालि सामारियाको एलोङ सहरता हानिहि | 53 कालाउ इन्ताको द्याङ्गेलाइ वासेहेङ स्वागत पालि माकिहि हाइपालि पानु वा यरुसलेम भारि हानिघाखे | 54 याकुब,यु:हन्ना कालाउ येसको चात्यागेलाइ इदोइ गोताङ तिङ्हि,इम्बालाइ दोअ्हि,''हे प्रभु हाइ केलाइ स्वर्गसो मे चुमातेङ द्याङ्गेलाइहेङ बुसिरि बानाइलि केलाइ आग्या पाङ |'' 55 कालाउ येसु:लेसारापाहा घुरितेङ इम्बालाइहेङ चेर् हि | 56 कालाउ न्हुसो येसु:कालाउ वाको चात्यागेलाइ भेनेङ सहरभारि हानिहि | 57 ओबालाइ झाराङ दामाता हानिदोङ्घाखे | एमि वासेहेङ दोअ्हि,''ना हिसो हानाना काबुङ ना दोअ्फाङ हानाङ्का |'' 58 येसु:दोअ्हि,''स्याइलेगेलाइको हिका धारागेलाइ हि | जिहा जुइलेङको बासा हिका भासागेलाइ हि | कालाउबुङ द्याङ्को चानको चाहि हिदोइबुङ थामे मान्थु, जेता वाको ताइको पुरिङ म्होका थामेबुङ मान्थु | 59 येसु:आरुङ भेनेङ द्याङ्हेङ दोअ्हि,''काङ्को दोफा लोउ |''कालाउ उङ्को द्याङ दोअ्हि,''हे प्रभु,लाम्फा काङ्को आबाहेङ लिअ्लि पि |'' 60 कालाउ येसु:वासेहेङ दोअ्हि,''सि:कागेलाइहेङ ताइकोङ सिका द्याङ लिअ्लि पि | नेलाइ हानेसु कालाउ परमेस्वरको सारभिको बारेता ये: बानाल पासु |'' 61 भेनेङ द्याङ दोअ्हि,''प्रभु का नाङ्को दोफा ल्वाङ्का,लाम्फा काङ्को ताइकोगेलाइ सो बिधा र्-हुलि पि |'' 62 येसु:दोअ्हि,एदि हिदोइबुङ द्याङ हालेता खुर चातेङ लेसारा भारि खाङ्हे पानु,उङ्को परमेस्वरको सारभिता योग्योको माजेलाङ |