लुका 7

जेलाउ येसु:ताइको गोताङ काथा द्याङ्गेलाइहेङ हिङ्पालि दोअ्तेङ वा कर्फनहुमता हानिहि | 2 कर्फनहुमता एमि कप्तान हिघाहि | वाको एमि चाकारिया आधामारापाङ मिसालोका हिघाहि | उङ्को सिलितोम्का हिघाहि,उङ्को कप्तान चाकारियाहेङ मेनाङ मायारोपाघाखे | 3 जेलाउ वा येसु:को बारेता हिङ्हि कालाउ वाराङ यहुदि प्रधानगेलाइहेङ वाकोता दिङ्गिल्हि कालाउ उङ्को चाकारियाहेङ बान्चिपालिको भाअ्सिङ लोलि दोअ्तेङ सेउपाहि | 4 उङ्को द्याङ्गेलाइ येसु:कोता हानिहि,कालाउ उङ्को कप्तानहेङ साघाइपि दोअ्तेङ मेनाङ सेउपाहि कालाउ दोअ्हि ''उङ्को कप्तान नाङ्को साघाइका निङ्लि जातिङभारि योग्यको हि |'' 5 वा केलाइको द्याङ्गेलाइहेङ मायारु पाखे कालाउ केलाइको भाअ्सिङ चाउघारा सा बुङ बनाइपिका हि |'' 6 ओदोङ भाअ्सिङ येसु:उङ्को द्याङ्गेलाइदोफा हानिहि | वा सा थुकालि दुरेदोङ हिलाउ कप्तान ताइको सनाइतिगेलाइहेङ वाको दोफा एसा दोअ्लि दोअ्तेङ सेउपालि दिङ्गिल्हि,''हे प्रभु,ना काङ्को सा ता लोलि दु:ख मापापि | ना भाइका द्याङ काङ्को सा ता खोकोइ टेकिली पालि सोबाइका का मान्थुघा | 7 ओदोङ भाअ्सिङ का ताइमिङबुङ नाङकोदोफा मानइज्जत दोभाइपा हानिलि सोबाइका मान्ठुघा,ना आग्या खिनिङ पि काङ्को चाकारिया एल्लावा | 8 नाङ्को खाबारा कासिहेङ थाहा हि,काबुङ आरु द्याङ्गेलाइको खाबारा ता हिघा | कालाउ काङ्को खाबाराता लान्ठा गेलाइ हि | एदि का एमि लान्ठाहेङ द्वाङ्का 'हाने' कालाउ उङ््को हानावा | कालाउ आरूङ भेनेङ लान्ठाहेङ द्वाङका'लोउ', कालाउ वा ल्वावा | कालाउ एदि काङ्को चाकारियाहेङ दोअ्खा,'इङ्को पासु,कालाउ वा पावा |'' 9 जेलाउ येसु:इङ्को काथा हिअ्हि,वा सारबुसाइ हि | येसु:वासिहेङ पिताइतेङ लोका द्याङ्गेलाइ भारि घुरिहि कालाउ दोअ्हि,'का नेलाइहेङ दोअ्खा का इसिका खाङ्घुरि सारा इस्राएलताबुङ सिसोबुङ मानिङ्घा |'' 10 येसु:हेङ काइलि हानिका झाराङ द्याङ्गेलाइ सा भारि घुरिहि | इम्बालाइ उङ्को चाकारियाहेङ एल्लिदोका निङ्हि | 11 कालाउ न्हुदिना येसु:नाइन दोअ्का सहरता हानिहिहि |वाको चात्यागेलाइ कालाउ हिन्जा द्याङ्गेलाइबुङ वाको दोफाङ हानितेङ हिघाहि | 12 जेलाउ येसु:सहरको दृवार भेरपा थुकाहि,वा सि:का चानचाउलिहेङ चुम्पुकाताङ पाका तिङ्हि | एमि राडिको एलोङ खिनिङ चानसिका हिघाहि | जेलाउ सि:कावाजानहेङ चानचाउलिता चुम्पुकाताङ पालाउ उङ्को राडिदोफा सहरको द्याङ्गेलाइ हिन्जा हानिघाखे | 13 जेलाउ प्रभु येसु:हेङ वासिहेङ तिङ्हि वा उङ्को राडिको भाअ्सिङ हृदयसो दु:खि जेङ्हि कालाउ वासिहेङ दोअ्हि,''माखार ?'' 14 येसु:चानचाउलिको भेरपा थुकाहि कालाउ वासिहेङ साइहि | सि:का वाजानहेङ चानचाउलि चुम्पुतेङ हानिको मालापि गेलाइ टक्क जाहि,वा उङ्को सि:का वाजानहेङ दोअ्हि,''ओइ वाजान,का नासिहेङ दोअ्खा ल्हो |'' 15 कालाउ न्हुसो उङको् सि:का वाजान एन्साउदोङ ल्होतेङ योम्हि कालाउ काथा दोअ्लि तेङ्हि | येसु:उङ्को वाजानहेङ वाको आमाइको खुरता पिहि | 16 झाराङ द्याङ्गेलाइ भारबुसाइहि कालाउ एसा दोअ्काताङ परमेस्वरको बाखानाइ पाहि,''एलोङ महान अगमबक्ता केलाइकोता लोका हि |''कालाउ ओबालाइबुङ दोअ्धोङ्धाखे,''परमेस्वर ताइको प्रजागेलाइहेङ सामाराइह्इतेङ हि |'' 17 वाको बिसयको इदोइ बानाल सारा यहुदिया कालाउ इन्ताको भेरपाङ सारभिताबुङ नावाइ चार- चाराइहि | 18 यु:हान्नाको चात्यागेलाइ इदोइ गोताङ घाटानागेलाइको बिसयता वासिहेङ इन्ताको गोताङ काथागेलाइ दोअ्पिहि | यु:हान्ना ताइको चात्यागेलाइ मध्येसो न्हेमि चात्याहेङ काइहि | 19 यु:हान्ना इम्बालाइहेङ प्रभु येसु:दोफा हिअ्लि दिङ्गिल्हि,''एमि ज्याइ लोलि खाङ्का हिघाहि,उङ्को नादोङ ना हिना कि ? माकुनु आरुङ भेनेङहेङ दोङ र्-म्लि गोयाङ कि ?'' 20 कालाउ न्हुसो द्याङ्गेलाइ येसु:कोता लोहि,इम्बालाइ दोअ्हि | ''बप्तिस्ता पिका यु:हान्ना:केलाइहेङ इदोइ हिअ्लि नाङ्कोता दिङ्गिल्हि,'हाइ लोलि खाङ्को नादोङ ना हिना कि ? माकुनु ते केलाइ आरुङ भेनेङ दामा खानाइने ?'' 21 ओदोङ बेला,येसु:हेन्जा द्याङ्गेलाइहेङ इम्बालाइको मिसा, ब्यथा कालाउ इम्बालाइ सो डुस्ट आत्मा लाअ्पापिहि | वा इस्तु कान्हा द्याङ्गेलाइहेङबुङ मिसियाँ तिङ्पालि दोअ्पापिका बानाहि | 22 कालाउ वा यु:हान्ना:को चात्यागेलाइहेङ दोअ्हि ''नेलाइ इता जेदोङ काथागेलाइ तिङ्सुन्हा,कालाउ हिङ्सुन्हा हानितेङ युहाहन्नाहेङ दोअ्सु | कान्हा द्याङबुङ एल्हि कालाउ तिङ्लि दोका जेङ्हि | लेङ्ग्रा गेलाइ तेलि तेङ्हि | रोग्या खोकालाइ बुङ एल्हि | न्हातोङ माहिङ्का बैइरागेलाइबुङ काथा हिङ्लि तेङ्हि | सिकालाइबुङ सिन्हुहि जिबन निङ्हि | कालाउ गरिब द्याङ्गेलाइ परमेस्वरको सारभिको ये:बानालगेलाइ हिङ्तेङ हिका हि | 23 हासुबुङ कासिहेङ ग्रहन पालाउ बाधाको हिदोङ कारन मानिङ्खे इङ्को वाजान वादोङ धन्यको हि |' 24 जेलाउ यु:हान्ना:को चात्यागेलाइ हानिहि | येसु:यु:हान्नाको बिसयता दोअ्लि तेङ्हि: ''नेलाइ उदादाङ्का थामेभारि हाइ खाङ्लि हानिसुखेना ? हाइ भेरमा होइहेङगालाइका निगालो हेङ ? 25 मारालाकाता नेलाइ हाइ खाङ्लि लोसुन्हा ? एलोङ मेनाङ रेम्का लोखोन होङ्का द्याङ्गेलाइहेङ खाङ्लि ? माको | सोबाइका कालाउ रेम्का धावा लोखोन होङ्कालाइ ते राज दरबारमा हिखे | 26 जातिङभारि,नेलाइ इता हाइ खाङ्लि लोसुन्हा ? एमि अगमबक्ताहेङ ? हाइ !,का ते नेलाइहेङ दोअ्खा,यु:हान्ना:अगमबक्ता खान्तेङबुङ (श्रेस्ठ) स्स्रेस्ट हि | 27 वाते इङ्को द्याङ ज्याइको बिसयता इसिका लेखेका हि: | 'हिङ्सु! का नासिहेङ साघाइकाहेङ नाङ्को आगा दिङ्गिल्लाङका | ज्याइदोङ नाङ्को आगाता नाङ्को दामा तियार पापियावा |' 28 का नासिहेङ दोअ्खा,यु:हान्नादोङ एलाथेकापा जोलोम जेङ्का द्याङ्गेलाइसो झाराङ खान्तेङ बार्का हि,कालाउबुङ ज्याइ परमेस्वरको सारभिता म्हुइका हि,उङ्को वा खान्तेङ बार्का हि |'' 29 जेलाउ द्याङ्गेलाइ इदोइ बिसयता हिङ्हि,इम्बालाइ मानेहि कि परमेस्वरको सिकस्या रेम्का हि | उङ्को पोत ल्होपाकालाइबुङ सत्ये मानिहि | उङ्को द्याङ्गेलाइहेङ यु:हान्ना पाहाँसोङ बप्तिस्ता पापाका हिघाहि | 30 कालाउबुङ फारिसिगेलाइ कालाउ सास्तिरिगेलाइ नेलाइको भाअ्सिङ बनाइका परमेस्वरको अभिप्रायहेङ इम्बालाइको भाअ्सिङ यु:हान्नासो बप्तिस्ता र्-हुलि सुइकार मापाहि | 'कालाउ रदृ पाहि |' 31 'इदोइ पुस्ताको द्याङगेलाइको बिसोयोता का हेसा बर्नन पालि ?नेलाइ हाइ भाइका हिसुन्हा ? 32 इदोइ द्याङ्गेलाइ हातेबाजारता योमतेङ्हिका जामालाइ भाइकाङ हि | एलोङ हुदाकोजामाललाइ भेनेङ हुदाको जामालहेङ काङ्खे कालाउ दोअ्खे: केलाइ नेलाइको भाअ्सिङ बासुरि धुइपान्हाहि,कालाउबुङ नेलाइ मान्हासुन्हा;केलाइ मन आउलिका लेअ्लेअन्हाहि कालाउबुङ नेलाइलाइ माखारसुन्हा |' 33 बप्तिस्ता पिका यु:हन्ना लोहि कालाउ वा आरु द्याङ्गेलाइ भाइका चाका आम्का माचाहि कालाउ माआम्हि | कालाउ नेलाइ दोअ्सुखेना,'यासिहेङ भुत धेल्का हि |' 34 द्याङको चान चाहि आरु द्याङ्गेलाइ भाइपाङ चाकाताङ कालाउ दाखरस आम्काताइ लोहि | कालाउ नेलाइ दोअ्सुवाना,खाङ्सु वासिहेङ;वा खुब चाखे कालाउ आम्खे | वा पोत ल्होपाकालाइको कालाउ पापिगेलाइको भाया |' 35 बुदिृ ठिक हि दोअ्का काथा बुदृ आन्सार कामपाकालाइदोङ प्रमानित पाखे | 36 फारिसिगेलाइ मध्ये सो एमि येसु:दोफा योम्तेङ उम चालि काइहि | वा फारिसिको सा ता हानि कालाउ चालि योम्हि | 37 इङ्को सहरता एमि पापि बेजान हिघाहि | वा येसु:हेङ फारिसिको साता उम चाका थाहा निङ्तेङ वा एलोङ सिगमरमरको सिसिको बोतलता माला मालाका चुइति चुम्तेङ लोहि | 38 उङ्को बेजान येसु:को भेरपा खार्- काताङ वाको खोकोइता मितिहोइ भिजाइतेङ कालाउ ताइको पुरुङको पुसुङहोइ मोकाताङ वाको खोकोइता चुमाइपातेङ वाको अत्तर को चुइति लगाइपिहि 39 वासिहेङ निम्ता(नेउता) पाका फारिसि उङ्को तिङ्तेङ मनमनता एसा दोअ्लि तेङ्हि,''याते अगमबक्ता हिनु ते यासिहेङ साइका हासु कालाउ हाइखालको बेजान दोअ्तेङ वा गिधावा,हाइपालिपानु इदोइते पापिनि कि वा |'' 40 येसु:उङ्को फारिसिहेङ दोअ्हि,''ओइ सिमोन,नासिहेङ हाइदोङ दोअ्लि हि |''वा दोअ्हि,''गुरुज्यु दोअ् |'' 41 येसु:दोअ्हि,''इन्ता न्हेमि द्याङ हिघाहि,न्हेमिदोङ एनोङ्दोङ माझनको रिन र्-हुका हिघाहि | एमि नासाइ चाँनदिको ताका,कालाउ भेनेङ चाहि न्हेकुरि तेताका चाँदिको ताका र्-हुका हिघाहि | 42 इम्बालाइकोता हेन्जा ताका मान्थुघाखे,ओदोङ भाअ्सिङ इम्बालाइ ताइको रिन चुक्ता पालि मादोहि | कालाउ माझन ओबालाइ न्हेमिकोङ रिन-मिन्हा पापिहि | उङ्को न्हेमि मध्येसो हासु चाहि उङ्को माझनहेङ हेन्जा मायारो पाघाखे वाला ?'' 43 सिमोन दोअ्हि,''काङ्को बिचारता ज्याइ हेन्जा रिन चुम्पुका हिघाहि वादोङ वासिहेङ हेन्जा मायारो पाघाखे वाला |''येसु:सिमोनहेङ दोअ्हि,''नाङ्को काथा ठिक हि |'' 44 कालाउ न्हुसो वा उङ्को बेजानहेङ खाङ्तेङ सिमोनहेङ दोअ्हि,''ना उङ्को बेजानहेङ तिङ्न्हा ? जेलाउ का नाङ्को साता लोघा,ना काङ्को खोकोइ झालिचिबुङ मापिन्हा | वाते काङ्को खोकोइगेलाइ वाको मितिहोइ झातेङ कालाउ पुसिङहोइ योपिहि | 45 ना कासिहेङ माचुमाइन्हा,कालाउ वाते का लोकासोङ काङ्को खोकोइ ता चुमाइ चाकाइ चाकाङ हि वा एन्सापालि लाअ्का मान्थु | 46 ना काङको् पुरिङ्ता चुइति माघोसिपिन्हा,कालाउ वाते काङ्को खोकोइता मालामालाका अत्तरको चुइति घोसिपिहि | 47 ओदोङ भाअ्सिङ का नेलाइहेङ दोअ्खा कि वाको हेन्जा पापगेलाइ स्यामा जेङ्का हि | एसापाहा गिखे कि वा हेन्जा मायारु तिङ्पाहि ज्याइहेङ आधेपाप स्यामा पापिखे वा आतुइसा मायारु बाखाराइखे |'' 48 कालाउ न्हुसो येसु:उङ्को बेजानहेङ दोअ्हि,''नाङ्को पापगेलाइ स्यामा जेङ्का हि |'' 49 चालि योमकालाइ ताइ -ताइमिता दोअ्लि तेङ्हि,''इदोइ द्याङ ताइमिहेङ हासुको दोअ्तेङ ठानिखे ? पापसोबुङ स्यामा पाका द्याङ,या हासु को ?'' 50 येसु:उङ्को बेजानहेङ दोअ्हि,''नाङ्को खान्धुरि होइ नासिहेङ बान्चिपाहि | एला ना सान्तिसो हाने |''