लुका 6

एअ्नि,माइसाका दिनाता,येसु:सिङसोङ हिका मिलिङ पाहासो हानिघाखे | वाको चात्यागेलाइ सिङ्सोङको सिसा पेतेङ खुरता माझितेङ चाहि | 2 आधिमि फारिसिगेलाइ दोअ्हि,''नेलाइ हाइपालि एसा पासुखेना ? माइसाका दिना एसा पालि मोसाको ब्यबस्थाको बिरुद् जेङ्खे ?'' 3 येसु:जोबाफ पिहि,''नेलाइ पढेका मान्थु सुन्हा,दाउद जेलाउ वा कालाउ वा दोफा हिकालाइ म्हितुका हिघाहि,कालाउ हाइपाका हिघाहि ? 4 दाउद परमेस्वरको सा ता हानिहि कालाउ वा परमेस्वरहेङ चढाइका सेले चुमाहि कालाउ चाहि | कालाउ वा सेलेगेलाइ ताइमि दोफा हिका द्याङ्गेलाइबुङ बाखाराइपिहि | जातिङ्को इदोइ मोसाको बिरुद् हिघाहि | ब्यवस्था आन्सार धामिगेलाइहेङ खिनिङ इसिका सेले चाहि आग्या हिघाहि |'' 5 कालाउ येसु: फारिसिगेलाइहेङ दोअ्हि,''द्याङको चानदोङ माइसाचाकाको दिनाको प्रभु |'' 6 भेनेङ माइसाचाका दिना चाउघारा सा लिता दुल्तेङ वा सिक्स्या पिहि | इन्ता एमि द्याङ हिघाहि वाको दाम्पाहाको खुर सेङ्का हिघाहि | 7 वा माइसाका दिनाबुङ एल्पाका काम पाकाको बिसयता वासिहेङ दुसिलि खाङ्घाखे उङ्को सास्तिरि कालाउ फारिसिगेलाइ वाको गल्ति गेलाइ भोगिल्घाखे | 8 येसु:इम्बालाइ हाइ बिचार पाखे दोअ्तेङ बुझिहि | कालाउ वा उङ्को सेङ्का खुर हिका द्याङ्हेङ दोअ्हि,''ल्हो,कालाउ इदोइ द्याङ्गेलाइको आगाता जाअ् |''ओदोङ भाअ्सिङ उङ्को द्याङ जुरुकै ल्होहि कालाउ इन्ता जाहि | 9 येसु:इम्बालाइहेङ दोअ्हि,''का नेलाइहेङ हिअ्खा साइसाका दिना हाइपालि थिक हि वाला: रेम्का कि मारेम्का ? प्राय बान्चि पालि माकुनु नासा पालि ?'' 10 येसु:इङ्को कोरपाहाङ योम्का झाराङ हेङ खाङ्हि | कालाउ उङ्को द्याङहेङ दोअ्हि,''खोइ कासिहेङ नाङ्को खुर खाङ्लि पि |''उङको द्याङ वासिहेङ खुर तिङ्पाहि | वाको खुर ओदोङ्घुरि एल्हि | 11 फारिसिगेलाइ कालाउ सास्तिरिगेलाइ मारफाङ चेर ताङ्पाहि | इम्बाला ता -ताइमिता काथा दोअ्सुलि तेङ्हि,''येसु:हेङ केलाइ हाइ पानि गोयाङ कि ?'' 12 ओदोङ बेला येसु:एलोङ झाउका तिकारता हानितेङ दोमचाकाइ घाखे | झेङ्पाङ वा दोमचाकाइतेङ इङको न्हिसिन बितिपाघाखे : 13 न्हु दिना रिहृमा,वा ताइको चात्यागेलाइहेङ काइहि | इम्बालाइको माझासो तेन्हे जाना वा साल्हि | कालाउ वा इम्बालाइहेङ चात्या मिङ पिहि | इम्बालाइ हिघाखे : 14 सिमोन येसु:वासिहेङ पतरस मिङ ताअ्पिका हिघाखे | कालाउ अन्द्रियास पतरसको ओने,याकुब:कालाउ युहन्ना:,फिलिप कालाउ बरथुलमाइ ; 15 मति,थोमा,याकुब:(अल्फायसको चान),कालाउ सिमोन (ज्याइहेङ जेलोटबुङ दोअ्खे), 16 यहुदा (याकुबको चान) कालाउ यहुदा इस्करयोति | इदोइ यहुदादोङ उङको एमि हि ज्याइ येसु:हेङ सतुरगेलाइको खुरता रिम्पावा | 17 येसु:कालाउ चात्यागेलाइ लाख सो लेअ्ता खुउतेङ लोहि | वा इन्ताङ एलोङ सारिपा मिलिका मिलिङ्ता जाअ्हि | वाको चात्यागेलाइ एलोङ बार्का जेर इन्ता हिघाहि | कालाउ टायर कालाउ सायडन सागर तटको सहरगेलाइसो कालाउ यहुदियाको गोताङ थामेगेलाइसो,यरुसलेमगेलाइसो लोका हिन्जा द्याङ्गेलाइबुङ इन्ता हिघाखे | 18 इम्बालाइ झाराङ इन्ता वाको वचन हिङ्लि कालाउ ताइ -ताइको मासाधेको मेसासो एल्लि लोका हिघाखे | दुस्त आत्मागेलाइसो साधिनान्हाकागेलाइबुङ एल्हि | 19 झाराङ येसु:हेङ साइलि खाङ्घाखे हाइपालिपानु उङ्को झाराङहेङ एल्पाकाताङ वाकोसो सरबुङ बाहार उल्हितेङ हानिघाखे | 20 वा ताइको चात्यागेलाइहेङ खाङ्हि कालाउ दोअ्हि,''हे दु:खि द्याङ्गेलाइ,नेलाइहेङ आसिरबाद हि,हाइपालिदोनु परमेस्वरको राइजि नेलाइको दोङ | 21 नेलाइ,एला हासु म्हितुकालाइहेङ्बुङ आसिरबाद हि,हाइपालिपानु नेलाइ चि आम्लि माकिसवाना | नेलाइ एला हासु खार्तेङ हिकालाइहेङ आसिरबाद हि,हाइपालिदोनु नेलाइ मायारू सो लेङ्चास्वाना | 22 'द्याङ्को चानको भाअ्सिङ एदि नेलाइहेङ द्याङ्गेलाइ मन मापरेवा,ताइको जेर सो उल्हिपावा,इम्बालाइ मन्दा माताकावा,इम्बालाइ नेलाइहेङ सुइकारमापावा नेलाइ धन्यको | 23 इङ्को बेला मयारू पासु कालाउ लेङ्चातेङ तोङ्सु,हाइपालिपानु स्वर्गता नेलाइको बार्का इनाम निङ्स्वाना | नेलाइको आजाइ- आजुगेलाइको अगमबक्ता गेलाइहेङ एल्साङ पाघाखे,एन्साङ दोङ उङ्को द्याङ्गेलाइ नेलाइहेङबुङ इन्सिकाङ बेउरा पावा | 24 'ओइ धनि द्याङ्गेलाइ ! नेलाइहेङ धिक्कार ! हाइपालिदोनु नेलाइको जिवनता लेङ्चाका हिसुन्हा | 25 नेलाइ आधाइकालाइहेङ,धिक्कार!हाइपालिपानु नेलाइ म्हितुस्वाना | नेलाइ एला लेङतेङ हिकालाइ,धिक्कार | हाइपालिपानु नेलाइ चिन्ता पास्वाना कालाउ खार्लि गोइस्वाना | २६. ''धिक्कार !नेलाइको बारेता द्याङ्गेलाइ पाहासो बाखानाइ पालाबुङ,हाइपालिपानु नेलाइको आजाइ-आजुबुङ धाताइका अगम्बकतागेलाइहेङ जेलाउबुङ बाखिन पाहि | 26 ''धिक्कार !नेलाइको बारेता द्याङ्गेलाइ पाहासो बाखानाइ पालाबुङ,हाइपालिपानु नेलाइको आजाइ-आजुबुङ धाताइका अगम्बकतागेलाइहेङ जेलाउबुङ बाखिन पाहि | 27 का लाइहेङ दोअ्खा,ताइको सतुरगेलाइहेङ माया पा | ज्याइ नेलाइहेङ मन्दा माताखे इम्बालाइहेङ बुङ रेम्फाङ पा | 28 नेलाइहेङ सारापपिकालाइहेङबुङ आसिर्बाद पिसु | नेलाइदोफा मारेम्का दुस्तवेभार पाकालाइहेङबुङ दोमचाकाइ पिसु | 29 एदि हासुबुङ नेलाइको एलोङ गालाता चाउरिनु आरुङ भेनेङ गालाबुङ धोपि | एदि हासुबुङ नाङ्को धावा चुम्पुनु वासिहेङ दौराबुङ पि | 30 ज्याइ र्-हेखे झाराङहेङ पि,एदि नाङ्को हाइदोङ आमेने चुम्पुनु वासिहेङ उङ्को आमेने माघुरिपा | 31 आरुगेलाइसो ना हाइ भोखेना,आरुको भाअ्सिङ बुङ एन्साङ पापि | 32 ज्याइ नेलाइहेङ माया पाखे कालाउ इम्बालाइहेङ खिनिङ माया पानु,नेलाइहेङ हाइ हिदोइबुङ बाखानाइको योग्य जेङ्स्वाना ? आइ!पापिगेलाइबुङ नेलाइहेङ माया पाकालाइहेङ माया दोङ्पाखे | 33 नेलाइको रेम्का पाकालाइहेङ खिनिङ रेम्फा पासुखेनापानु नेलाइहेङ हाइ फाइदा जेङ्हि रो ? हाइपालिपानु पापिगेलाइबुङ एन्साङ पाखे | 34 एदि घुरिपातेङ निनाङ्का दोअ्तेङ आसाता ना हासुहेङ्बुङ रिन पिन्हा पानु हाइ ना बाखानाइको योग्य जेनानारो ? माको,पापिगेलाइबुङ पापिगेलाइहेङ इङ्कोङ झोको दोङ घुरिप्यापापियावा कालाउ का निनाङ्का दोअ्तेङ आसा पाखे | 35 ओदोङ भाअ्सिङ ताइको सतुरगेलाइहेङ माया पासु | इम्बालालाइहेङ रेम्फा पासु,कालाउ इम्बालाइ सो हाइदोङ आसा माकोसिङ रिन पिसु | एदि नेलाइ एसा पासुन्हा पानु नेलाइ बार्का इनाम निङ्स्वाना,नेलाइ सर्बोच्च परमेस्वरको सान्तानगेलाइ भाइपाङ जेङ्स्वाना,हाइपालिपानु परमेस्वर बैगुनि कालाउ दुस्टगेलाइ दोफाबुङ कृपालु हि | 36 जेसाङ नाङ्को आबा मायालु कालाउ दयालु हि एन्साङ मायालु कालाउ दयालु जेङ्सु | 37 आरुको न्याय मापासु,कालाउ बोमिबुङ नाङ्को न्याय मापावा | आरुगेलाइ दोसिलि मातिङ्पासु नासिङ्हेङ्बुङ दोसिलि मातिङ्प्यावा | आरुगेलाइहेङ स्यामा पासु,कालाउ नाबुङ स्यामा निनावा | 38 आरुगेलाइहेङ पिसु कालाउ नाबुङ निनावा | नेलाइबुङ रेम्फा दोअ्ङतेङ निङस्वाना,नेलाइहेङ थि्चाइतेङ तामपाकाताङ,तामपाकाताङ हेङ्गालाइकातेङ होपाङ निङ्स्वाना जेदोङ दोङ्होइ ना आरूगेलाइहेङ प्याना परमेस्वरबुङ नेलाइहेङ ओदोङ दोङ्होइ प्यावा |'' 39 येसु:नेलाइहेङ इदोइ निङ्पितेङ दोअ्हि:''हाइ एलोङ कान्हा आरुङ भेनेङ कान्हाहेङ थोङ्लि द्वावा ? अह:न्हेमिदोङ वाङ्खाराता लोअ्नावा | 40 एलोङ चात्या ताइको गुरु खान्तेङ हुत्ता जेङ्लि मादोखे | गोताङ द्याङ ज्याइ पुर्नरूपता घिरलि दोअ्खे कालाउ खिनिङ वा गुरु भाइपाङ जेङ्लि द्वावा | 41 ' ताइको ओनेको मिसियाता हिका बाला ना हाइपालि तिङ्खेना, कालाउ ताइकोङ मिसियता हिका डेङ्ग्रा चाहि थाहा मागिखेना ? 42 ना ताइको मिसियाता हिका डेङ्ग्रा मातिङ्न्हापानु,ताइको ओनेहेङ 'ओइ ओने,नाङ्को मिसियाको बाला कासिहेङ उल्लापालि पि'दोअ्तेङ ना हेसा दोअ्लि द्वाना ? ओइ दिकालाइ,लोम्फा ताइकोङ मिसियाता हिका डेङ्ग्रा उल्लापा,कालाउ खिनिङ ना ओनेको मिसियता हिका बाला उल्लापाहि सरलाङ्गापा तिङ्लि द्वाना | 43 'एलोङ रेम्का सिङ मारेम्का सेका हेलाबुङ मासेफाखे | एन्साङदोङ एलोङ मारेम्का सिङ रेम्का सेका सेपालि मादावा | 44 गोताङ सिङ वाको सेका पिकासो नाल्लि दोअ्खे | द्याङ्गेलाइ चुइको झुन्जिसो कोसे पेलि मादावा | कालाउ इम्बालाइ चुइ झुन्जिसो अंगुर पेलि मादावा | 45 एलोङ रेम्फा द्याङ ताइको हृदयता रेम्का काथादोङ ताअ्खे | कालाउ वा ताइको हृदयसो रेम्का काथा बाहार उल्लिपाखे | कालाउ एलोङ दुष्ट द्याङ ताइको हृदयता दुष्ट काथागेलाइदोङ ताअ्का हिखे | कालाउ वा मारेम्का आखेका काथागेलाइदोङ बाहार उल्लिपाखे | जेदोङ काथाहोइ हृदयता पोङ्घाका हिखे ओदोङ द्याङ्को नुइसो उल्लिखे | 46 ''जेलाउ काङ्को दोअ्का माकिसुखेनापानु हाइपालि कासिहेङ ''प्रभु,''प्रभु,दोअ्स्वाना ? 47 ज्याइ द्याङ जेलाउ का दोफा लोखे कालाउ काङ्को वचनगेलाइ हिङ्खे कालाउ पालाना पाखे,का इम्बालाइहेङ वा हिसिकाहि दोअ्तेङ तिङ्प्याङका | 48 वा एमि सा बनाइका द्याङ भाइकाङ हि | वा खाङ्रापा तोतेङ बोलियाका उन्थुइ हुत्ता खाम्भा गिनावा | जेदोङ्बेला झोराता बाने लावा चिहोइ साता थुन्हातावा कालाउबुङ इङ्को बानेहोइ सा हेङ हेङ्गालाइलि मादावा हाइपालि पानु इङ्को सा रेम्फा बानाइका ह्यावा | 49 जेदोङ द्याङ काङ्को वचन हिङ्खे कालाउबुङ वा पालाना पालि माकिनु उङ्को द्याङ रेम्फा बलियाका खाम्बा मागिङ्सिङ सा बानाइका द्याङ भाइकाङ हि,ज्याइको सा झोरासो बाने लोलाउ इङ्को साता थुन्हावा कालाउ इङ्को एधामासिङ ओनावा कालाउ गोताङ नासातावा |