लुका 5

येसु:गेनेसरेत समुन्द्रको काम्भेता जाअ्तेङ हिघाहि,वाको द्यापाङ द्याङ्गेलाइ येसु: वाको भेर्पा कोर्पाहाङ चुमेसुपा हेन्जाङ द्याङ्गेलाइको हुदा जेङ्दोङ्घाखे | इम्बालाइ परमेस्वरको वचन हिङ्लि खाङ्घाखे | 2 येसु:समुन्द्रको काम्भे भेरपा न्हेलोङ नाउ तिङ्हि | हाया माङ्कालाइ नाउसो उल्लितेङ इम्बालाइको हाया माङ्का जालेगेलाइ झागाखे | 3 वा एलोङ नाउता धोल्हि,जेदोङ सिमोनको हिघाहि,कालाउ वासिहेङ इङ्को नाउहेङ आसा फारापा कालाउ काम्भेको भेरपा चुम्पुलि आरा्हाइहि | जेलाउ वा इन्ता योम्हि कालाउ द्याङ्गेलाइहेङ धिरपालि तेङ्हि | 4 जेलाउ येसु:ताइको काथा दोअ्लि दोअ्हि,''इदोइ नाउहेङ वाङ्खारा का चि भारि चुम्पु कालाउ हाया माङ्का जाले आअ् |'' 5 सिमोन जोबाफ पिहि,''गुरुज्यु केलाइ नानि झेङ्पाङ हाया माङ्नाहि कालाउबुङ एलोङ्बुङ हाया रिमलि मादोन्हाहि |कालाउबुङ ना दोअ्न्हा,का जाले आअ्ताङ्का |'' 6 इम्बालाइको ताइको जाले चि ता आअ्हि,इम्बालाइको जाले भरि हाया देतेङ जाले दोङ थेअ्लि तोम्का हिघाहि | 7 इम्बालाइ आरू नाउता हिकाताइको सानाइतिगेलाइहेङबुङ साघाइलि लोसु दोअ्तेङ काइहि | कालाउ सानाइतिगेलाइ लोतेङ नाउता वथे हाया लादेहि नाउदोङ दुबिलि टोम्हि | 8 जेलाउ इदोइ तिङ्तेङ येसु:को खोकोइता तुघुरतेङ सिमोन पतरस दोअ्हि,''हे प्रभु,कासो एलाङदोङ दुरेहाने हाइपालिपानु का पापि द्याङ हिघा |'' 9 वथे हेन्जा हाया रि्मका तिङ्तेङ इम्बालाइ कालाउ वाको दोफा हिकालाइ झाराङ भारबुसाइहि |'' 10 जबदिको चानगेलाइ याकुब:कालाउ यु:हान्नाबुङ भारबुसाइ जेङ्हि | याकुब कालाउ युहन्ना सिमोन दोफाङ हाया माङ्घाखे | येसु:सिमोनहेङ दोअ्हि,''थिलि मागोइस्वाना | एला उसो नेलाइ हाया माङ्का माको भरु द्याङ गेलाइहेङ रिम्स्वाना |'' 11 इम्बालाइ ताइको नाउगेलाइ समुन्द्रको काम्भे भेरपा चुमाहि,कालाउ इम्बालाइ इङ्को गोताङ लाअ्तेङ येसु:दोफा हानिहि | 12 जेलाउ ए पल्ट येसु:एलोङ सहरता हिघाहि,इन्ता एलोङ रोग्या खोका दु:खि द्याङबुङ हिघाहि | जेलाउ वा येसु:हेङ तिङ्हि,वा येसु:को आगाता हानितेङ तुघुरतेङ सेउपाहि,''हे प्रभु,कासिहेङ एल्पापि |,का गिखा ना मन पाहे पानु कासिहेङ एल्पालि द्वाना |'' 13 येसु:दोअ्हि,''का नासिहेङ एल्पालि मन पाखा |''एलाङ एल !''कालाउ न्हुसो वा इङ्को द्याङहेङ साइहि,ओदोङ घुरि रोग्या खोका खाअ्हि | 14 येसु:वासिहेङ आग्या पिहि,''इसिका जेङ्का काथा हासुहेङबुङ मादो | भरु ताइमिङ हानितेङ धामिहेङ तिङ्वा मोसा दोअ्का भाइपा ताइमि एल्का ता परमेस्वरहेङ बलि पि | इदोइ पाहासो ना एल्का प्रमान जेनावा |'' 15 कालाउ येसु:को बिसता बानाल झन ये:बानाल जेङ्काताङ हानिहि | इस्तु द्याङ्गेलाइ वाकोता हिङ्लि लोघाखे कालाउ मासेधेका मिसागेलाइ एल्तेङ हानिघाखे | 16 येसु:हेन्जा जोसो हासुबुङ मान्थुका थामेता दोम्चाकाइ घाखे |'' 17 ए -दिना येसु:द्याङ्गेलाइहेङ सिकस्या पिदोङ्घाखे,फारिसिगेलाइ कालाउ सास्तिरि गेलाइबुङ इन्ताङ योम्तेङ हिघाहि | इम्बालाइ यरुसलेम,यहुदिया कालाउ गालिलको गोताङ सहरगेलाइसो लोका हिघाहि | परमप्रभु वासिहेङ एल्पाका सरबुङ पिका हिघाखे | 18 एमि गाइल्हि खोका द्याङ इन्ता हिघाहि | कालाउ आधिमि द्याङ्गेलाइ एमि मासाधेका हेङ एलोङ चौकिता चुम्तेङ लोहि कालाउ इम्बालाइ लिता चुमालि कालाउ येसु:को आगाता ताअ्लि खाङ्घाखे | 19 इन्ता द्याङ्गेलाइको वथे बार्का जेर कालाउ गुल्सुमुल्सुपा हिघाहि उङ्को मासाधेकाहेङ लिता चुम्पुलि हिदोइबुङ दामा मानिङ्हि ओदोङ भाअ्सिङ इम्बालाइ चालाहुता ताङ्हि,कालाउ इम्बालाइ चाला आअ्तेङ उङ्कोहेङ चौकि सुधाङ येसु:को आगाता खुअ्पाहि | 20 इम्बालाइको अटल खान्धुरि तिन्तेङ येसु:दोअ्हि,''ओइ भाया,नाङ्को पापगेलाइ स्याम जेङ्होइ |'' 21 कालाउ कि सास्तिरि गेलाइता ता -ताइमिता काथा दोअ्लि तेङ्हि,''इदोइ द्याङ हासु को ? वाको जेदोङ दोअ्का परमेस्वरको बिरुद्ता दोअ्खे | परमेस्वरहेङ खिनिङ पापगेलाइ स्यामा पालि दोअ्खे |'' 22 कालाउ येसु:इम्बालाइ हाइ सोचेघाखे वा थाहा गितेङ दोअ्हि,''नेलाइ मनता इन्सिकाका हाइपालि प्रस्न गेलाइ पासुखेना ? 23 हिदोइ चाहि सजिलो हि:कि नाङ्को 'पापस्यामा जेङ्हि,माकुनु ल्हो कालाउ हाने दोअ्लि ? 24 का नेलाइहेङ तिङ्पाङ्का कि पृथ्विता द्याङ्को चानहेङ पापगेलाइ स्यायामा पालि खाबारा हि |''कालाउ वा उङ्को गाइल्हि खोकाहेङ दोअ्हि,''का नासिहेङ दोअ्खा,ल्हो,कालाउ नाङ्को चौकि तोलितेङ सिता हाने |' 25 झाराङ्को आगाता उङ्को गाइल्हि खोका द्याङ जुरुजारापा ल्होहि कालाउ ताइको सिधाउ तोअ्ल्हेतेङ परमेस्वरको बाखानाइ पातेङ सा भारि हानिहि | 26 झाराङ द्याङ्गेलाइ भारबुसाइका जेङ्हि,कालाउ परमेस्वरको बाखानाइ पालि तेङ्हि | इम्बालाइ झाराङ थिहि कालाउ दोअ्हि,''नानि केलाइ जेङ्लि मादोका काथा तिङ्न्हाहि |'' 27 कलाउ न्हुसो येसु:बाहार हानिहि कालाउ पोत ल्होपाका कार्यलयको आगाता एमि पोत ल्होपाका द्याङहेङ योम्तेङ हिका तिङ्हि,कालाउ वासिहेङ दोअ्हि,''काङ्को दोअ्फा लोउ |'' 28 कालाउ उङ्को लेबि जुरुक ल्होहि कालाउ गोताङ आनेमाने लाअ्तेङ वाको लेसारा पिताइहि | 29 कालाउ लेबि येसु:को भाअ्सिङ ताइको साता बार्का भातियार जुराइहि | इन्ता पोत ल्होपाकालाइ कालाउ आरु द्याङ्गेलाइबुङ एलोङ बार्का जेरबुङ उङ्को भातियारता ओबालाइ दोफाङ योम्तेङ चाघाखे | 30 फारिसिगेलाइ कालाउ इम्बालाइको सास्तिरिगेलाइ वाको चात्यागेलाइको बिरुदता एसा दोअ्तेङ गुनगुनाइलि तेङ्हि,कालाउ दोअ्हि,''नेलाइ पोत ल्होपाकागेलाइ कालाउ पापिगेलाइ दोफा हाइपालि चासुखेना -आम्सुखेना ? 31 येसु:जोबाफ पिहि,मिसा माकोलाइहेङ बैधे मागोइखे, भरू मिसालोकालाइहेङ बैधेको आवस्यक परिखे | 32 का धार्मिक,द्याङगेलाइहेङ काइलि लोका माको,का ते पापिगेलाइ हेङ कालाउ ओबालाइको हृदय कालाउ हिका- आमका चाका कालाउ लगाइका फेरिपालि दोअ्तेङ आहा्इलि इता लोघा |'' 33 इम्बालाइ येसु:हेङ दोअ्हि ''फारिसिगेलाइ भाइपाङ यु:हान्नाको चात्यागेलाइबुङ बेला- बेलाता ब्रत कालाउ दोम्चाकाइखे | कालाउ नाङ्को चात्यागेलाइते हेलालाउबुङ चाखे- आम्खे |'' 34 येसु:इम्बालाइहेङ दोअ्हि,''हिदोइबुङ बिहुता, जन्तिगेलाइ बेहुला दोफा,इम्बालाइ हिपा भरि ब्रत हिलि मागोइखे | 35 बेला इसिका लोखे जेलाउ बेहुला नेलाइसो हानिलि गोइखे, इङ्को बेला इम्बालाइ ब्रत हिखे |'' 36 येसु:इम्बालाइहेङ इदोइ निङ्पिहि ''हिदोइबुङ द्याङ नावा लोखोन थेअ्तेङ पुराना लोखोन मातालाइलिखे | हाइपालि ? हाइपालिदोनु एन्सा पाहे पानु नावा लोखोन बिगिरखे,कालाउ तालाइका टुक्रा पुरना लोखोन दोफा मामिलेखे | 37 हासुबुङ नावा दाखरसहेङ पुराना दाखरस को झोलाता माह्वाखे | हाइपालि ?हाइपालिदोनु नावा दाखरसको झोलागेलाइ थेअ्पाखे, इङको भाअ्सिङ दाखरस होअ्तेङ हानिखे कालाउ झोलागेलाइबुङ नासा खे | 38 द्याङ्गेलाइ हेलालाउबुङ नावा दाखरसहेङ नावा झोलाता ताअ्खे | 39 हासुबुङ पुराना दाखरस आम्लि दोअ्तेङ न्हुसो नावा दाखरस आम्लि माभोखे | हाइपालि पानु वा द्वा वा,''पुरना दाखरसदोङ रेम्का हि |''