लुका 4

येसु:यर्दन धोरासो घुरिहि | वा पबित्तरो आत्मासो भरितेङ हिघाहि | उङ्को आत्मासो वासिहेङ उदादाङ्का थामेभारि चुम्पुहि | 2 इन्ता द्याकुरि न्हिसिन द्याकुरि नितिम थेकापा येसु:हाइबुङ चाका-आम्का मान्थुघाखे | भुत येसु:हेङ द्याकुरि दिना थेकापा जाचिहि,ओदोङ भाअ्सिङ येसु:मारफाङ म्हुतुहि | 3 भुत वासिहेङ दोअ्हि,''एदि ना परमेस्वरको चान नु इदोइ उन्ठुइहेङ तोले जेङ्लि आग्या पि |'' 4 येसु:भुतहेङ जोबाफ पिहि,''धर्मंसासतरता इसिका लेखिका हि:''तोले चातेङ खिनिङ द्याङ्गेलाइ सिन्हुतेङ माहिखे |'' 5 कालाउ भुत येसु:हेङ एलोङ झाङ्का थामेता चुम्पुहि,कालाउ एघुरिङ्ताङ पृथ्वि भारिता हिका गोताङ राइजिगेलाइ तिङ्पाहि | 6 कालाउ भुत येसु:हेङ दोअ्हि,''का नासिहेङ इदोइ गोताङ राइजिगेलाइको खाबारा,सारबुङ्गेलाइ कालाउ इम्बालाइता हिका गौरव दोफाङ प्याङ्का | इदोइ गोताङ कासिहेङ पिका हि | का इदोइ गोताङ हासुहेङ्बुङ पिलि द्वाङका | 7 एदि ना कासिहेङ सेउपान्हापानु कालाउ बाखानाइपानु का इदोइ गोताङ नासिहेङ प्याङ्का |'' 8 येसु:जोबाफ पिहि,''धर्मसास्तरता इसिका लेखिएका हि:'ना परमप्रभु नाङ्को परमेस्वर हेङ खिनिङ सेउपालि कालाउ बाखानाइपालि गोइखे,कालाउ वाको खिनिङ सेवा पालि गोइखे !'' 9 कालाउ इङ्को भुत आरुङ येसु:हेङ यरुसलेमता चुम्पुतेङ ग्रोमथानको तुप्पाता जाअ्पाहि | भुत येसु:हेङ दोअ्हि,''एदि ना परमेस्वरको चान हिनु पानु इता सो धासे ! 10 हाइपालिपानु धर्मसास्तरता इसिका लेखिएका हि:''वादोङ नाङ्को साघाइलिको भाअ्सिङ ताइको स्वर्गदुत गेलाइहेङ आग्या प्यावा |'' 11 इदोइबुङ लेखिएका हि:'इम्बालाइ नासिहेङ खुर -खुरता खोअ्तावा,ओदोङ भाअ्सिङ नाङ्को खोकोइ उन्ठुइता माथुन्हाना |'' 12 येसु:जोबाफ पिहि:''इदोइबुङ धर्मसास्तरता दोअ्न्हाका हि:'परमप्रभु नाङ्को परमेस्वरको हेङ माजाचिलि |'' 13 भुत येसु:हेङ गोताङ पाहासो साताइहि कालाउ येसु:हेङ इन्तासो लाअ्तेङ हानेहि | 14 येसु:पबित्तरो आत्माको सरबुङ चुम्तेङ गालिलता घुरिहि | गालिलभारि वाको बारेता बानालगेलाइ चारचाराइहि | 15 येसु:इम्बालाइको चाउघारा सागेलाइता धिरपालि तेङ्हि | गोताङ द्याङ्गेलाइ वाको बाखानाइ पाहि | 16 येसु:ताइमि बाराका सहर नासरताबुङ तेगिल्हि | माइसा चाका दिना लाम्फादोङ वा चाउघारा साता हानिहि | वा इन्ता हाइदोङ पढेलि जाअ्हि | 17 यसैया अगमबक्तापाहा सो लेखिएका ग्रन्थ वासिहेङ पिका हिघाहि | वा ग्रन्थ पल्तिपाहि कालाउ एलोङ थामेता इसिका काथा लेखिएका निङ्हि : 18 'परमप्रभुको आत्मा काङ्को हुत्ता हि,हाइपालिदोनु हाइदोङ मान्थुका गरिबगेलाइहेङ ये: बानाल हिङ्पालिको भाअ्सिङ परमेस्वर वा कासेहेङ गोसाना पालि दिङ्गिल्का हि| झिन- झिरिता हिकालाइहेङ लाअ्पालिको लाअ्लिको भाअ्सिङ,कालाउ कान्हागेलाहेङ मिसिया तिङ्पालि दो:लि, हेन्जाङ दु:ख निङ्चाकालाइहेङ लाअ्पालिको भाअ्सिङ, परमेस्वर कासेहेङ दिङ्गिल्हि | 19 कालाउ घोसाना पालि कि ताइको द्याङ्गेलाइहेङ बान्चिपालि परमप्रभुको ठिक पहर लोका हि |'' 20 येसु:ग्रन्थ बन्द पाहि |वा इङ्को ग्रन्थ एमि साघाइकाहेङ पितेङ इन्ताङ योम्हि | चाउघारा साता हिका गोताङ द्याङ वासिहेङ खान्तेङ हिघाखे | 21 येसु:ओबालाइ दोफा नुइ धुइलि तेङ्हि,| वा दोअ्हि,''का नेलाइको आगाति जेदोङ धर्मग्रन्थ को इदोइ भाग पढेका इङ्को नानि पढेकाताङ पालाउ पुरा जेङ्हि |'' 22 गोताङ द्याङ्गेलाइ येसु:को बाखानाइ पाहि,वाको ता:का बचन हिङ्तेङ ओबालाइ भारभुसाइहि | ओबालाइ दोअ्हि,''हेसा वा एसापा इसिका दोअ्लि दोअ्हि ? हाइ याते युसुफको चान माकोरो ?'' 23 येसु:ओबालाइहेङ दोअ्हि,''का गिखा कि नेलाइ कासिहेङ या निङ्पिस्वाना, कालाउ दोअ्सुवाना,'ओइ बैधे! ताइमिहेङ एल्पा |'ना जेदोङ कर्फनहुमता पान्हा ओदोङ केलाइ हिङ्नाहि | एला ना ताइको सहरताबुङ एन्साङ पा |'' 24 कालाउ न्हुसो येसु:दोअ्हि,''का नेलाइहेङ जातिङ्को दोअ्खा | अगमबक्ताहेङ ताइको देरागेलाइता कालाउ सहरता हेलाउबुङ सुइकार मापाखे | 25 जेदोङ दोअ्दोङ्खा इङ्को जातिङ हि | एलियाको पालाता सुम बासार आधा बासार थेकापा इस्राएलको मिलिङ्ता बारका अनिकाल जेङ्हि | गोताङ सारभिता हिसोबुङ चाका -आम्का मान्थुघाखे | ओदोङ्बेला इस्राएलता इस्तुङ राडि(बिधुवा) गेलाइ हिघाहि | 26 कालाउबुङ एलियाहेङ उङ्को हिदोइबुङ राडिको ता मादिङ्गिल्हि | सिदोन प्रान्तको सारपात दोअ्का थामेता चाहि एलियाहेङ एलोङ राडिको साता दिङगिल्हि | 27 कालाउ अगमबक्ता एलियाको समयता इस्राएलता इस्तु रोग्या खोका बेथागेलाइ हिघाहि | कालाउ नामान बाहेक हासुहेङबुङ माएल्पाहि |''नामान इस्राएललि माको वाते सिरिया राइजिको द्याङ हिघाहि |' 28 गोताङ द्याङ्गेलाइ ज्याइ चाउघारा साता हिघाहि,कालाउ इङ्को काथागेलाइ हिङ्हि मारफाङ चेर ताङ्पाहि | 29 इम्बालाइ ल्होहि कालाउ वासिहेङ सहरसो बाहार उल्हापातेङ जेदोङ झाउका तिरकाता इम्बालाइको सहर बानाइका हिघाहि,इङ्को झाउका तिकारता चुम्पुतेङ वासिहेङ लेता धाकालाइतेङ हुल्पालि खाङ्धाखे | 30 कालाउबुङ वाते इम्बालाइकोङ माझासो सिरितेङ इन्तासो बाहार हानिहि | 31 गालिलको कर्फनहुम दोअ्का सहरता येसु:हानिहि | वा माइसाचाका दिना द्याङ गालाइहेङ सिकस्या पिहि | 32 इम्बालाइ येसु:को सिकस्याता भाङ -भाङघाखे | हाइपालिपानु वा खाबाराको साथ धिरपाघाखे | 33 चाउघारा साता एअ्मि दुस्त आत्मा धेल्का द्याङ हिघाहि | इङ्को द्याङ बारका गालासो रिह्-काइ हि | 34 'हे नासरतको येसु:!केलाइसो ना हाइ भोखेना ? हाइ केलाइहेङ नासापालि ना इता लोका हा ? का नासिहेङ गिखा परमेस्वरको एलोङ पबित्तरो जन |'' 35 कालाउबुङ येसु:इङ्को दुस्त आत्माहेङ चेरहि,''सिकापा हि | इङ्को द्याङ्सो बाहार उल्लिहितेङ लोउ |''इङ्को दुस्त आत्मा धेल्का हिका द्याङ्गेलाइको आगाताङ इङ्को द्याङ्हेङ भोनोइता लोङ्पाहि | कालाउ न्हुसो दुस्त आत्मा धेल्का इङ्को वाजानहेङ हाइदोङ मारेम्का मापासिङ लाअ्तेङ हानिहि | 36 गोताङ द्याङ्गेलाइ आइवातुहि कालाउ ओबालाइ ता- ताइमिता काथा पाहि,''याको माने हाइ को ? येसु:ते खाबारादोफाङ कालाउ सरबुङ दोफा दुस्त आत्मा धेल्कालाइहेङ उल्लिलि आग्या पिखे,कालाउ इम्बालाइबुङ उल्लिखे |'' 37 कालाउ न्हुसो इङ्को थानेको गोताङ थामेता येसु:को नावाइ चार -चाराइहि | 38 येसु:चाउघारा सा लाअ्हि,वा सिमोनको साता हानिहि | सिमोनको जुबे एकदम मिसालोतेङ मारफाङ थाला जेङ्तेङ हिघाहि | ओबालाइ वाको भाअ्सिङ हाइदोङ पापिलि दोअ्तेङ सेउपाहि | 39 येसु:वाको भेरपा हानिहि कालाउ मिसाहेङ इन्ता सो हानिलि आग्या पिहि कालाउ लाअ्तेङ हानिहि | मिसा झटैृ एल्हि,कालाउ वा ल्होहि इम्बालाइहेङ सेवा पाहि | 40 बेलादुबिलि तोम्लाउ झाराङ द्याङ्गेलाइ ज्याइ ज्याइको ताइको द्याङ्को द्याङ्गेलाइ मासाधेका हिघाहि ओबालाइहेङ येसु:कोता चुमाहि | ओबालाइ भेनेङ -भेनेङ मिसासो मासाधेका हिघाहि | येसु:गोताङ मासाधेकालाइहेङ साइहि कालाउ ओबालाइहेङ एल्पाहि | 41 हेन्जाङ द्याङ्गेलाइसो भुतगेलाइ बाहार उल्लितेङ हानिहि | भुतगेलाइ आहुतेङ हिघाहि,''ना परमेस्वरको चान हिना |''कालाउ येसु:भुतगेलाइहेङ सिकापा हिलि आग्या पाहि | येसु:दोङ ख्रिस्त हि:दोअ्तेङ भुतगेलाइ गिका हिघाहि | 42 न्हु -दिनाको रि्-ह्माङ येसु:चाकामान्दा हिका थामेता हानिहि | कालाउ हुदागेलाइ वासिहेङ भोगिल्तेङ हिघाहि,उङ्को हुदागेलाइ येसु:को हिका थामेता लोहि | कालाउ इम्बालाइ येसु:हेङ तिङ्हि,इम्बालाइ वासिहेङ लाअ्तेङ मान्हे दोअ्तेङ सेउपाघाखे | 43 कालाउ येसु:इम्बालाइहेङ दोअ्हि,''का भेनेङ सहरगेलाइता बुङ परमेस्वरको सारभिको बारेता ये:बानालगेलाइ दोअ्लि गोइका हि | ओदोङ भाअ्सिङ कासिहेङ दिङ्गिल्का हि |'' 44 कालाउ येसु:यहुदियाको चाउघारा सागेलाइता ये: बानाल पालि तेङ्हि |