लुका 3

सिजर तिबेरियसको तेनाओङ बासारता पन्तियस पिलातस यहुदियाको सारभि हिघाहि,कालाउ जेलाउ हेरोद गालिलको सासक हिघाहि | वाको ओने फिलिप इतुरिया कालाउ तराखोनितिसको सासक हिघाहि कालाउ लुसानियास अबिलेनेका सासक हिघाहि | 2 जेलाउ अन्नास कालाउ कैयाफा प्रधान धामिगेलाइ जेङ्का हिघाखे, मारालाका थामेता जकरियाको चान यु:हान्ना परमेस्वरको वचन निङ्हि | 3 वा यर्दन झोराको द्यापाहाङ गोताङ थामेगेलाइता हानिहि | ओबालाइको पाप स्यामाको भाअ्सिङ बक्तिस्ता र्-हुतेङ हृदय कालाउ जिवन परिबर्तन पालि गोयाङ दोअ्तेङ द्याङ्गेलाइहेङ बानाल पाघाखे | 4 इदोइ गोताङ काथागेलाइ अगमबक्ता यसैया लेखेका किताबको ब्यख्या आन्सार जेङ्हि मारालाका थामेता र्-हिकाइतेङ हिका गाला:'परमप्रभुको भाअ्सिङ दामा तियार पासु | वाको दामागेलाइ सिधा बानाइसु | 5 गोताङ धोबलेङ्गेलाइ पुराइन्हावा,कालाउ गोताङ तिकार कालाउ भोनोङ्को भुकुन्दि गेलाइ देहेलन्हापावा,आखेका दामागेलाइ सारिपाङ कालाउ तिकारगेलाइ कालाउ रा गेलाइ भारिबुङ,कालाउ तिकार दोल्हा दामागेलाइ सुकापा तेअ्का बनायावा | 6 गोताङ द्याङ्गेलाइ परमेस्वरको मुक्तिको दर्सन पावा |'' 7 यु:हान्ना:पाहा सो बप्तिस्ता पापालि द्याङ्गेलाइ लोहि | यु:हान्ना ओबालाइ हेङ दोअ्हि,''नेलाइ बिस हिका पुँय्यागेलाइ भाइकाङ हिसुन्हा | नेलाइहेङ परमेस्वरको चेर जेदोङ लोदोङ्खे इन्तासो खालि हासु दोअ्हि ? 8 नेलाइ ताइको हृदय परिबर्तन पालि दोका हिसुन्हा दोअ्का तिङ्पालि ठिक कामगेलाइ पालि गोइखे | बलमादिसु(घमण्ड) मापासु,कालाउ दोअ्सु,आब्राहाम केलाइको आबा हि | 'का नेलाइहेङ दोअ्खा कि परमेस्वर आब्राहामको भाअ्सिङ इदोइ उन्थुइ सो बुङ सन्तान बानाइपिलि द्वावा | 9 सिङ्गेलाइ पाल्लि दुफेबुङ तियार हि | गोताङ सिङ जेदोङ सिङ रेम्का सेका मासेपाखे इङ्कोहेङ पालावा कालाउ मेता थाइगिल्लावा |'' 10 द्याङ्गेलाइ यु:हान्नाहेङ हिअ्हि,केलाइ हाइपालि गोइका हि ?'' 11 यु:हान्ना:जोबाफ पिहि,''एदि नेलाइ दोफा न्हेलोङ दौरा सुरुवाल हिनु भेनेङ माहिकाहेङ एलोङ पि | चाका आम्का हिनुबुङ आरुगेलाइहेङ बाखाराइपि |'' 12 पोत ल्होपाकालाइबुङ यु:हान्नाकोता लोहि, इम्बालाइ बप्तिस्ता र्-हुलि मन पाघाखे | इम्बालाइ यु:हान्नाहेङ दोअ्हि,''गुरुज्यु,केलाइ हाइपालि गोयाङ ?'' 13 यु:हान्ना:इम्बालाइहेङ दोअ्हि,''नेलाइहेङ जेथे ल्होपालि आदेस हि,उङ्को खान्तेङ हेन्जा पोत माल्होपा |'' 14 आधिमि लान्ठागेलाइ यु:हन्नाहेङ हिअ्हि,''केलाइ चाहि हाइ पालि ?''यु:हान्ना:इम्बालाइहेङ दोअ्हि,''बलतिङ्पातेङ द्याङगेलाइसो ताका मार्-हे्सु | हासुकोङ बारेता माधाताइसु | ताइमिङ कमाइका जेदोङ जेथे ताका हि ओदोङ्ता सनतुस्ती हिसु | 15 गोताङ द्याङगेलाइ ख्रिस्त ल्वाङ दोअ्तेङ र्-हुम्तेङ हिघाहि कालाउ यु:हान्नाको बारेता भारबुसाइतेङ हिघाहि | इम्बालाइ सोचिहि,''हाइ वा दोङ ख्रिस्त कुन्नु ?'' 16 यु:हान्ना झाराङ्हेङ जोबाफ पिहि,''का नेलाइहेङ चिसो बप्तिस्ता पिखा,का न्हुसो ज्याइ एअ्मि ल्वाङ वादोङ का खान्तेङ हेन्जा माहान कामपालि द्वाङ | का वाको जुत्ताको तुनाबुङ खाङ्लि योग्योको मान्थुघा | वादोङ नेलाइहेङ पबित्तरो आत्मा कालाउ मेको बप्तिस्मा प्याङ | 17 वा खाइरामहेङ फेलिबुङ तियार हि | वा रेम्का सेउमहेङ गुन्धासो खेनावा | वा रेम्का सेउमहेङ वाको भाकारता जोम्पावा | कालाउ मारेम्का हेथे हि वा हेलाउबुङ मासिका मेता दुकावा |'' 18 कालाउ न्हुसो वा द्याङ्गेलाइहेङ हेन्जाङ आरु काथागेलाइसो हाउसाइपाहि (उत्साह पिहि) कालाउ ये:बानालगेलाइ इम्बालाइहेङ दोअ्हि | यु:हान्ना ये:बानालगेलाइ हिङ्पाका हिङ्पाकाङ हि | 19 हेरोद ताइको ओनेको बे हेरिदियाहेङ ताअ्हि वाको इन्सिका मारेम्का दुस्तकाम कालाउ सम्बन्ध तानाङ यु:हान्ना सासक हेरोदहेङ मारफाङ चेरहि | 20 हेरोद इन्सिकाङ मारेम्का काम पाका हिघाखे:वा युहन्नाहेङ झयालखानाबुङ ह्- वाका हिघाहि | हेरोदको पाका मारेम्का कामगेलाइ इदोइ एलोङ थोपिन्हाहि | 21 जेलाउ झाराङ द्याङ्गेलाइ बप्तिस्ता पाहि,येसु:बुङ लोहि कालाउ बप्तिस्ता र्-हुहि |येसु:दोमचाकातेङ हिलाउ बादेल आन्हाहि | 22 कालाउ सारिरिक जिउ भाइपाङ ढुकुर वाको हुत्ता पबित्तरो आत्मा लोहि | कालाउ न्हुसो स्वर्गसो एलोङ गाला लोहि,''ना काङ्को चान हिना कालाउ का नादोफा मेनाङ लेङ्चाखा |'' 23 जेलाउ येसु:ताइको काम पालि तेङ्हि ओदोङ बेला वाको बासार झान्डै एकुरि ते पुगिका हिघाहि | द्याङ्गेलाइ सोचिका हिघाहि | येसु:युसुफको चान युसुफ एलिको चान हिघाहि | 24 एलि मत्तातका चान हिघाहि,मत्तात लेबिको चान हिघाहि,लेबि मल्किको चान हिघाहि,मल्कि याम्नाको चान हिघाहि,कालाउ यान्ना युसुफको चान हिघाहि | 25 युसुफ मत्ताथियासको चान हिघाहि,मत्ताथियास ओमोसको चान हिघाहि,ओमोस नहुमको चान हिघाहि,नहुम इसलिका चान हिघाहि,इसलि नग्यैको चान हिघाहि | 26 नग्यै माथको चान हिघाहि,माथ मत्ताथियासको चान हिघाहि,मत्ताथियास सेमैनको चान हिघाहि,सेमैन योसेखको चान हिघाहि,योसेख योदाको चान हिघाहि | 27 योदा योअननको चान हिघाहि,योअनन रेसाको चान हिघाहि,रेसा यरुबाबेलको चान हिघाहि,यरुबाबेल सालतिएलको चान हिघाहि,सालातिएल नेरिका चान हिघाहि | 28 नेरि मल्किका चान हिघाहि,मल्कि अदिृका चान हिघाहि,अदिृ कोसामको चान हिघाहि | कोसाम एलमादमको चान हिघाहि,एलमादम एरका चान हिघाहि | 29 एर,यहोसुको चान हिघाहि,यहोसु एलिएजरको चान हिघाहि,एलिएजर योरिमका चान हिघाहि,योरिम मत्तातको चान हिघाहि,मत्तात लेबिको चान हिघाहि | 30 लेबि सिमियोनको चान हिघाहि,सिमियोन यहुदाको चान हिघाहि,यहुदा युसुफको चान हिघाहि,युसुफ योनानको चान हिघाहि,योनान एल्याकिमको चान हिघाहि | 31 एल्याकिम मलेआका चान हिघाहि, मलेआ भिन्नाको चान हिघाहि, भिन्ना मत्ताथाको चान हिघाहि,मत्ताथाको नातानको चान हिघाहि,कालाउ दाउदको चान हिघाहि | 32 दाउद यिसैको चान हिघाहि,यिसै ओबेदको चान हिघाहि,ओबेद बोअजको चान हिघाहि, बोअज सल्मोनको चान हिघाहि,कालाउ सल्मोन नहसोनका चान हिघाहि | 33 नह्सोन अम्मिनादाबको चान हिघाहि,अम्मिनादाब आरामको चान हिघाहि,आराम हेस्रोनको चान हिघाहि,हेस्रोन फारेसको चान हिघाहि,कालाउ फारेस यहुदाको चान हिघाहि | 34 यहुदा याकुबको चान हिघाहि,याकुब इसाहाकको चान हिघाहि,इसाहाक अब्राहामको चान हिघाहि,अब्राहाम तेरहको चान हिघाहि,कालाउ तेरह नाहोरका चान हिघाहि | 35 नाहोर सरुगको चान हिघाहि,सरुग रउको चान हिघाहि,रउ पेलेगको चान हिघाहि,पेलेग एबेरको चान हिघाहि,कालाउ एबेर सेलहको चान हिघाहि | 36 सेलह केनानको चान हिघाहि,केनान अर्पस्यदको चान हिघाहि,अर्पस्यद सेमको चान हिघाहि,सेम नुह्को चान हिघाहि,कालाउ नुह लेमेखको चान हिघाहि | 37 लेमेख मतुसेलहको चान हिघाहि,मतुसेलह हनोकको चान हिघाहि,ह्नोक येरेदको चान हिघाहि,येरेद म्ह्लालेलको चान हिघाहि,कालाउ मह्लालेल केनानको चान हिघाहि | 38 केनान एनोसको चान हिघाहि,एनोस सेतको चान हिघाहि,सेत आदमको चान हिघाहि,कालाउ आदम परमेस्वरको चान हिघाहि |