लुका 2

ओदोङ्बेला अगस्तस सिजर रोमको खाबाराता हिका गोताङ सारभिगेलाइहेङ एलोङ आग्या पिगिल्हि | इङ्को आदेस अनुसार गोताङ द्याङ ताइको मिङ पंजिकृत पालि गोइघाखे | 2 इङ्कोदोङ लाम्फाको मुन्धुमको(रितिको) जनगनाना हिघाहि | कुरेनियस सिरियाको सारभि आधिकारी जेङ्लाउ इन्सिका जेङ्का हिघाहि या लाङ पलटको जनगनाना हिघाहि | 3 गोताङ द्याङ्गेलाइ ताइको सहरगेलाइता मिङ लेखेपालि हानिहि | 4 युसुफबुङ गालिलको नासरत सहरसो यहुदियाको बेथेलेहेम दोअ्का सहरता हानिहि | बेथेलेहेम सहरहेङ दाउदको सहर दोअ्घाखे | युसुफ इन्ता हानिहि हाइपालिदोनु युसुफ दाउदको हारा (हारागुतिया) हिघाहि | 5 युसुफ पन्जिकरणको भाअ्सिङ मरियमदोफा वाको बिहु निश्चित जेङ्लिदोका हिघाहि | मरियम उङ्को बेला गान्धितेका हिघाहि | 6 युसुफ कालाउ मरियम बेथेलेहेमता हिलाउदोङ जामालको जेङ्का पहर हिघाहि | 7 कालाउ वा जेठा चानको जोलोङ पाहि |इङ्को बेला धर्मसाला लिता थामे मान्थुघाखे | ओदोङ भाअ्सिङ वा ताइको जामालहेङ धावागेलाइहोइ पोम्हि कालाउ एलोङ दोङ्गोता जिम्पाहि | 8 इङ्को न्हिसिन्ता इङ्को थामेताको बाहार मिलिङ्ता आधेमि गोठालागेलाइ ताइको भेडा मेसा खाङसुतेङ हिघाहि | 9 परमप्रभुको एलोङ स्वर्गदुत ओदोङ्घुरि ओबालाइको आगाता जाहि | परमप्रभुको महिमा ओबालाइको दायापाहाङ चिल्कातेङ हिघाहि, कालाउ गोठालोगेलाइ मारफाङ थिहि | 10 इङ्को स्वर्गदुत ओबालाइहेङ दोअ्हि,''थिलि गोइका हाइबुङ मान्थु,हाइपालिदोनु का नेलाइहेङ सुभ ये:बानाल दोअ्लिलोघा | इदोइहोइ झाराङ द्याङगेलाइहेङ मेनाङ लेङचापाका बानाइहि | 11 हाइपालिपानु नानिदोङ दाउदको सहरता नेलाइको भाअ्सिङ एलोङ मुक्तिदाताको जोलोम जेङ्का हि,वादोङ ख्रिस्त,प्रभु हि | 12 वासिहेङ नेलाइ एसापा नाल्स्वाना:नेलाइ एलोङ जामालहेङ धावाहोइ पोम्तेङ हिका कालाउ दोङ्गोता जिम्तेङ हिका निङस्वाना |'' 13 कालाउ न्हुसो अचानक इस्तुङ गान्दिलि मादोपाङ स्वर्गिय दुतगेलाइ लाम्फाको दुतदोफा जोम्पावा | गोताङ स्वर्गदुतगेलाइ एसा दोअ्तेङ परमेस्वरको बाखानाइ पातेङ ह्यावा: 14 ''सर्बोच्चा परमेस्वरहेङ महिमा, कालाउ जेथेबुङ द्याङ्गेलाइ दोफा परमेस्वर लेङ्चाका हि नेलाइता सान्ति ह्याको | 15 इङ्को स्वर्गदुतगेलाइ गोठालोगेलाइहेङ लाअ्हि कालाउ स्वर्गभारि हानिहि | गोठालोगेलाइ,ओबालाइता काथा दोसुहि,''एला केलाइ बेथेलेहेम हानाइने,कालाउ हाइ जेङ्का हि खानाइने,ज्याइको बिसयता परमप्रभु परमेस्वर केलाइहेङ थाहा पिका हि |'' 16 कालाउ इम्बालाइ मार्फा-मार्फा हानिहि इनता मरियम कालाउ युसुफहेङ दुसुहि,इङ्को जामाल दोङ्ता जिम्तेङ हिघाहि | 17 गोठालोगेलाइ जामालहेङ तिङ्हि,कालाउ इम्बालाइ इङ्को जामालको बिसयता स्वर्गदुत हाइ दोअ्का हिघाहि उङ्कोङ हिङ्पाहि | 18 गोठालोगेलाइको काथा हिङ्तेङ झाराङ आवाइ तुहि | 19 मरियम इदोइ गोताङ काथागेलाइ ताइकोङ हृदयता ताअ्हि कालाउ इङ्को बिसयता फोमपातेङ हि | 20 गोठालोगेलाइ इम्बालाइ तिङ्का कालाउ हिङ्का घाटाना गेलाइको भाअ्सिङ परमेस्वरको बाखानाइ पाकाताङ कालाउ महिमाता लेकाताङ ताइको भेडागेलाइ हिका थामेता घुरिहि | स्वर्गदुत इम्बालाइहेङ बर्णनपाका भाइपाङ गोताङ सत्ये जेङ्हि | 21 जेलाउ जामाल येए दिनाको जेङ्हि,वाको खतना पाहि,कालाउ येसु:मिङ ताअ्पिहि | इङ्को मिङ दोङ जेलाउ जामाल हामुता लोका लाम्फादोङ स्वर्गदुत दोअ्का हिघाहि | 22 मोसाको ब्यवस्था भाइपाङ जेलाउ मरियम कालाउ युसुफहेङ चोखाइलि दिना लोहि इम्बालाइ जामालहेङ परमप्रभुको आगाता समर्पन पापालि यरुसलेम चुम्पुहि | 23 परमप्रभुको ब्यबस्थाता इसिका लेखेकाहि:एदि हिदोइबुङ जाहान लाम्फोरतिको सन्तान चान जेङ्नु वा 'परमप्रभुको भाअ्सिङ पबितरो मानिखे |'' 24 कालाउ,''ना एलोङ जोरि दुकुर माकुनु ए जोरि पारेउको चान चढाइलि गोइखे |''ओदोङ भाअ्सिङ परमप्रभुको ब्यवस्थाको भाइपाङ इदोइ बलिदान चढाइलि यरुसलेम हानिहि | 25 सिमियोन मिङ पाका एमि द्याङ यरूसलेमता हिघाहि |वा भक्त कालाउ खुब धार्मिक द्याङ हिघाहि | वा इस्राएलको मुक्ति खाङ्लि र्-म्हुधाखे कालाउ वा पबित्तरो आत्माता हिघाखे | 26 परमप्रभु ख्रिस्तहेङ मातिङ्पा थेकापा ना मासिस्याना दोअ्तेङ वासिहेङ पबित्तरो आत्मा दोअ्का हिघाहि | 27 आत्माहोइ वासिहेङ थोङ्तेङ थानता चुमाहि | यहुदिको नियम आन्सार जेदोङ हाइपालि गोइधाखे ओदोङ पालि येसु:को आमाइ कालाउ वाको आबा येसु:हेङ थान्ता चुमाहि | 28 सिमियोन ताइको जामालहेङ कोल्हेता बाहि कालाउ परमेस्वरहेङ बाखानाइ पाहि कालाउ दोअ्हि:| 29 ''एला,हे परमप्रभु,ताइको बचन आन्सार नाङ्को बान्धाइतिहेङ सान्तिदोफा बिदा लाअ्पि, 30 हाइपालिदोनु काङ्को मिसियाहोइ नाङ्को उदार तिङ्का हि | 31 जेदोङ नादोङ गोताङ सारभिगेलाइको आगाता तियार पान्हा | 32 नाङ्को दामा तेअ्काता गैरयहुदिगेलाइको भाअ्सिङ प्रकास वादोङ | वादोङ नाङ्को द्याङगेलाइ एस्राएलको महिमा चुमा प्यावा |'' 33 वाको बिसयता सिमियोन इसिका काथा दोअ्का तिङ्तेङ येसु:को आमाइ आबा भाङ भाङ हि | 34 कालाउ न्हुसो सिमियोन इम्बालाइहेङ आसिर्बाद पिहि कालाउ मरियम,येसु:को आमाइ दोअ्हि,इदोइ जामाल इस्राएलता हेन्जा को उत्थान कालाउ पतनको कारण जेनावा | वा चिन्हा जेनावा कालाउ ज्याइहेङ हेन्जा जोसो सुइकार माजेनावा | 35 ओदोङ भाअ्सिङ हेन्जा द्याङ गेलाइको बिचार गेलाइ प्रकासता लावा | कालाउ एलोङ तरबार नाङ्को सुकुलुबुङ बानातेङ हानावा'' 36 हन्ना,एलोङ अगमबादिनि बेबालबुङ कालाउ इङ्कोङ थानता हिघाहि वा इनताङ हिघाही | वा आसेर कुल को फनुएलको चामिन्दि हिघाहि | हान्ना इस्तुङ बेराङ जेङ्लि दोका हिघाहि | बिहु पातेङ वा के बे को जिवन न्हि बासार खिनिङ बितिपाहि | 37 ह्न्नाको के सि:हि,वा द्या कुरि द्या बासार थेकाका हिघाहि | वा थानता हिलि मालाअ्घाखे भरु उपबास कालाउ दोम्चाकाइतेङ झेमपाङलिपाङ उपसना पाघाखे | 38 ठिक बेलाता वा कालाउ जामालको आबा आमाइकोता थुकालि लोहि,लोतेङ परमेस्वरहेङ सेउपालि तेङ्हि | इङ्को गोताङ ज्याइ ज्याइ यरुसलेमको उदारको बिसयता काथा पाहि | 39 युसुफ कालाउ मरियम परमप्रभुको ब्यवस्था आन्सार गोताङ काम दोपाहि कालाउ इम्बालाइ गालिलको ताइकोङ सहर नासरता हानिहि | 40 म्हुइका जामाल दिनाङ- दिनाङ बाराकाताङ हानिहि | वा बलियाकाताङ हानिहि कालाउ बुद्धिहोइ पोङ्घाहि |परमेस्वरको अनुग्रह वाको दोफा हिघाहि | 41 निस्तार पार्बाको बेला बासार किपाङदोङ येसु:को आमाइ आबा यरुसलेमको हानिघाखे | 42 जेलाउ येसु:तेन्हे बासारको जेङ्हि, दिनादोङ भाइपा वाको आबा- आमाइ वाको दोफा इङ्को भातियारता योम्हि | 43 जेलाउ भातियार दो:हि ओबालाइ साभारिघुरितेङ हिघाहि | कालाउ जामाल येसु:चाहि यरुसलेमतादोङ हि | वाको बिसयता आबा -आमाइहेङ हाइबुङ थाहा मागिहि, | 44 ओबालाइ सोचिहि कि वाते भेनेङ हुल गेलाइ दोफा हि,ओदोङ भाअ्सिङ ओबालाइ लिअ्पाङ तेतेङ हि | कालाउ वासिहेङ ताइको सानाइति कालाउ ताइको द्याङ्गेलाइ भारि भोलि तेङ्हि | 45 कालाउ युसुफ कालाउ मरियम वासिहेङ ओबालाइको माझाता मातिङ्लाउ ओबालाइ वासिहेङ भोलि यरूसलेमभारि घुरिहि | 46 सुम्नि ता ओबालाइ वासिहेङ थान्ता निङ्हि | येसु: थान्ता धार्मिक सिकस्कगेलाइ दोफा ओबालाइको काथागेलाइ हिङ्काताङ कालाउ इम्बालाहेङ प्रस्न पाकाताङ योम्तेङ हिघाखे | 47 ज्याइ ज्याइ वासिहेङ हिङहि,वाको सम्झिका कालाउ उतरगेलाइता भाङ भाङ हि | 48 जेलाउ वाको आबा आमाइ वासिहेङ निङ्हि ओबालाइ भारभुसाइहि | येसु:को आमाइ वासिहेङ दोअ्हि,'चान,हाइपालि ना केलाइहेङ एसा पान्हा ? नाङ्को आबा कालाउ का नासिहेङ भोलाउ मारफाङ दु:खि हिघानाखे | 49 कालाउ येसु:इम्बालाइहेङ दोअ्हि,''नेलाइ कासिहेङ हाइपालि भोतेङ हिसुखेना ? हाइ नेलाइहेङ थाहा मागिसुखेना कि काङ्को आबाको काम जेता जेङ्खे का इन्ताङ हिलि गोयाङ्का ? 50 कालाउबुङ इम्बालाइ येसु:को ओबालाइहेङ पिका जोबाफ को माने नाल्लि मादोहि | 51 कालाउ कि येसु:ओबालाइदोफाङ नासरत हानिहि | वा ताइको आबा आमाइको दोअ्का गोताङ काथागेलाइ किअ्हि | जेदोङ वाको आमाइ दोअ्का एलाबुङ उङ्कोङ काथागेलाइदोङ मनता तातेङ हिघाखे | 52 येसु:सारिरिक रुपता कालाउ बुदिृता बाराकाताङ हिघाहि कालाउ परमेस्वर कालाउ द्याङ्गेलाइ सो अनुग्रह निङ्तेङ हिघाहि |