यूहन्ना को प्रकासित वाक्य
प्रकासित वाक्य
1
1 यो ईसु मसी की ओड़ी सुं खुलासो करर दियेड़ो सन्देस छ। ज्यो बाता बेगीई होबाळी छ वांका बारा मं परमेसर यो सन्देस दियो छ, अर खुदका दासा न्अ बताबा बेई मसी खुदका सरगदूत न्अ खन्दार बीका दास यूहन्ना माळ्अ खुलासो करर बतायो छ। 2 यूहन्ना ज्यो देख्यो छो, बीका बारा मं बतायो। ई सांचा संदेस न्अ ईसु मसी बतायो छो। यो संदेस परमेसर की ओड़ी सुं छ। 3 धनै छ वो ज्यो ई खुलासा करेड़ा संदेस का बचना न्अ सुण्अ अर बांच्अ छ, अर मान्अ छ। क्युं क ये बाता बेगीई हेबाळी छ।सातू बस्वास्या की टोळी क नांऊ संदेस
4-5 aम यूहन्ना, एसिया परदेस की सातू बस्वास्या की टोळी क नांऊ या माण्ढु छु।
बी परमेसर की ओड़ी सुं ज्यो अबार छ, अर सरूवात सुं छो, अर ज्यो आबाळो छ अर वां सात आत्मा की ओड़ी सुं ज्यो बीका सिंहासन क साम्अ छ अर ईसु मसी की ओड़ी सुं ज्यो बस्वास क लायक गुवा, मरेड़ा मं सुं जिन्दो होबाळा मं पेलो अर धरती का सबळा राजां माळ्अ राजो छ, बीकी ओड़ी सुं दिया अर सांति मल्अ।
वो आपसुं परेम करअ छ अर बीका लोई सुं आपान्अ पापा सुं छूटवाड़ो दुवायो छ। 6 bवो आपान्अ एक राज करबाळा अर परम बाप परमेसर की सेवा बेई याजक होबा क ताणी बणायो छ। बीकी महमा अर सक्ति जुगजुग होती रेव्अ। अस्यान'ई होव्अ।
7 cदेखो, ईसु मसी बादळा माळ्अ आर्यो छ! हरेक आंख्या बीन्अ देख्अली, अर ज्यो बीन्अ छेद्या छ वे बी देख्अला। अर धरती का सबळा लोगबाग बीकी बजेसुं रोव्अला। हां, अस्यान'ई होव्अ।
8 eपरबु परमेसर ज्यो अबार छ, ज्यो पेली छो, अर ज्यो आबाळो छ, ज्यो सबसुं सक्तिमान छ, वो खेव्अ छ क, “म अल्फा ओर ओमेगा छु।”d
मसी को दर्साव
9 म यूहन्ना थांको भाई छु, ईसु का कळेस, अर राज अर दुख-भोगबा मं सहनसील सीरी रेताहोया थांको गुवा छु। मन्अ परमेसर को बचन परचार करबा की बजेसुं अर ईसु की गुवाई की बजेसुं पतमुस नांऊ का टापू माळ्अ देस नखाळो देर पुचायो गियो छो। 10 परबु का दन मं पवितर-आत्मा मन्अ बसम्अ लेलियो अर म्हारी आंख्या खुलगी, अर म्हारअ पाछ्अ सुं मन्अ एक तुरी की जस्यान एक जोरकी आवाज सुणाई दी। 11 बा आवाज या खेरी छी क, “तु ज्यो देखर्यो छ, बीन्अ एक कताब मं मांडतो जा अर फेर बीन्अ इफिसुस, स्मुरना, पिरगमुन, थुआतीरा, सरदीस, फिलादेलफिया अर लौदीकिया की सातू बस्वास्या की टोळ्यां कन्अ खन्दा दे।”
12 फेर या देखबा क ताणी क वा आवाज कुणकी छ म पाछो फर्यो। अर मन्अ दीया मेलबा का सात सोना का बरतन दिख्या, 13 अर वां सोना का सात बरतना क बीच मं मन्अ एक मनख दिख्यो, ज्यो मनख का छोरा की जस्यान को छो। वो पगा ताणी लांबो चोगो पेर मेल्यो छो। अर बीकी छाती माळ्अ सोना को एक पट्टो लपटेड़ो छो। 14 बीको माथो अर बाळ दूध की जस्यान धोळाफट छा, अर बीकी आंख्या बळती लाई की जस्यान छी। 15 बीका पग भट्टी मं तपाएड़ा पीतळ की जस्यान चलकर्या छा। बीकी आवाज नरी सारी जलधारा की जस्यान गाजबा की छी। 16 वो जीवणा हाथ मं सात तारा ले मेल्यो छो। बीका मूंडा सुं एक तेज दोधारी तलवार नखळरी छी। बीको मुण्डो जोरका चमकबाळा सुरज की जस्यान चमकर्यो छो।
17 fजद मं बीन्अ देख्यो तो बीक्अ साम्अ मरेड़ा की जस्यान पड़ग्यो। फेर वो म्हारअ माळ्अ जीवणो हाथ मेलर खियो, “डरप्अ मत, म ई पेलो अर आखरी छु। 18 अर म बोई छु जिकन्अ जन्दगी छ। म पेली मरगो छो, पण देख अब मं जुगजुग जिन्दो छु। म्हारअ कन्अ मोत अर पताळ की कुच्या छ। 19 ई बजेसुं ज्योबी तु देख्यो छ, अर ज्यो होर्यो छ, अर ज्यो आबाळी बगत मं होव्अलो, बीन्अ माण्ढल्अ। 20 ज्यो सात तारा तु म्हारा हाथ मं देख्यो छ, अर ज्यो सात दीया मेलबा का बरतन छ, वांको मतलब यो छ क, ये सात तारा सात बस्वास्या की टोळी का सरगदूत छ, अर दीया मेलबा का सात बरतन बस्वास्या की सात टोळ्यां छ।”