इफिसुस का बस्वास्या की टोळी न्अ सन्देस
2
1 “इफिसुस का बस्वास्या की टोळी का सरगदूत न्अ या माण्ढ।वो ज्यो खुदका जीवणा हाथ मं सात तारा ले मेल्यो छ अर ज्यो दीया मेलबा का सात बरतना क बीच चाल्अ छ वो अस्यान खेव्अ छ, 2 ‘म थारा काम, थारा जोरका बाथेड़ा अर सबर न्अ जाणूं छु अर म या बी जाणू छु क तु बरा मनखा न्अ सहन कोन कर पाव्अ अर तु बान्अ परख्यो छ ज्यो अपणा-आपन्अ थरपेड़ा बताव्अ छ, पण वे कोन्अ। अर तु या जाण लियो क वे झूंटा छ। 3 म जाणू छु क थारअ मायन्अ सबर छ अर म्हारा नांऊ की बजेसुं तु दुख भोग्यो छ अर तु बीसुं थाक्यो कोन्अ।
4 पण मन्अ थारा बिरोध मं या खेणी छ क म्हारअ बेई थारो परेम पेली जस्यान को कोन रियो। 5 ई बजेसुं याद कर क तु कढा सुं पड़यो छ, मन फेर अर वां कामा न्अ कर ज्यो तु पेली करअ छो। अर ज्यो तु मन कोन फेरअलो तो म थारअ कन्अ आंउलो अर थारा दीपदान न्अ बीकी ठोर सुं हटा देऊला। 6 पण थारअ मायन्अ या बात चोखी छ क तु नीकुली मनखा का कामा सुं नफरत करअ छ। ज्यांसुं म बी नफरत करू छु।’
7 aजीक्अ कान होव्अ, वो सुणले क आत्मा बस्वास्या की टोळी सुं कांई खेव्अ छ। ज्यो जय पाव्अलो, म बीन्अ परमेसर का बाग मं लागेड़ा जन्दगी का रूंखड़ा को फळ खाबा को अधिकार देऊला।”
स्मुरना का बस्वास्या की टोळी न्अ सन्देस
8 b“स्मुरना का बस्वास्या की टोळी का सरगदूत न्अ या माण्ढ।
वो ज्यो पेलो अर आखरी छ, ज्यो मरगो छो अर अब पाछो जिन्दो होगो। वो अस्यान खेव्अ छ, 9 म थारा दुख-भोगबा न्अ अर गरीबाई न्अ जाणू छु, पण सांच्याई तु भागवान छ। ज्यो अपणा-आपन्अ यहूदी जताव्अ छ वे थारी ज्यो बुराई करअ छ म बीन्अ जाणू छु। वे यहूदी कोन्अ पण सेतान की टोळी का छ। 10 बा दुखा सुं मत डरप्अ ज्यो तन्अ भोगणा छ। सूणो, थाम्अ सुं थोड़ा न्अ सेतान जैळ मं पटकर परिक्षा मं पटकबो छाव्अ छ अर थान्अ बड़्अ दस दन ताणी दुख भोगणा पड़्अला। मोत को सामनो हो जाव्अ तोबी बस्वासी हेर रीज्यो। तो म थन्अ जन्दगी को मुकुटc देऊलो।
11 eजीक्अ कान होव्अ, वो सुणले क आत्मा बस्वास्या की टोळी सुं कांई खेव्अ छ। ज्यो जय पाव्अलो बीन्अ म दूसरी मोतd सुं कांई बी नुकसाण कोन होबा द्यु।”
पिरगमुन का बस्वास्या की टोळी न्अ सन्देस
12 “पिरगमुन का बस्वास्या की टोळी का सरगदूत न्अ या माण्ढ।
ज्यो तेज दोधारी तलवार ले मेल्यो छ। वो या खेव्अ छ, 13 म या जाणुं छु तु कढ्अ रेव्अ छ। तु सेतान का सिंहासन की ठोर प रेव्अ छ अर म जाणू छु क तु म्हारा नांऊ न्अ थाम मेल्यो छ अर तु म्हारअ माळ्अ बस्वास को कद्या बी अन्कार कोन कर्यो। थांका बी नगर मं ज्यो सेतान का रेबा की ठोर छ, म्हारो बस्वास क लायक अन्तिपास मार्यो गियो छो।
14 पण थारा बिरोध म म्हारअ कन्अ एकात बाता छ। क्युं क थां मंसुं थोड़ासाक मनख बिलाम की सीख प्अ चालबाळा छ। वो बालाक न्अ सखायो छो क, बालाक इजरायल्या न्अ मूरत्या को चढ़ावो खाबा बेई अर व्यभिचार बेई उकसाव्अ। 15 अस्यान'ई थां कन्अ बी थोड़ा मनख अस्या छ ज्यो नीकुलीयां की सीख प चाल्अ छ। 16 ई बजेसुं मन फराले नई तो म बेगोई थारअ कन्अ आंउलो अर वांका बिरोध मं म्हारा मूंडा सुं नखळबाळी तलवार सुं लड़ूलो।
17 fजीक्अ कान होव्अ, वो सुणले क आत्मा बस्वास्या की टोळी सुं कांई खेव्अ छ। ज्यो जय पाव्अलो बीन्अ म सरग मं लुखेड़ा मन्ना मंसुं देऊलो। म बीन्अ एक धोळो भाटो देऊला, जी माळ्अ एक नयो नांऊ मण्ढेड़ो हेव्अलो। बी नांऊ न्अ जीन्अ दियो जाव्अलो बीक्अ अलावा कोई कोन जाण पाव्अलो।”
थुआतीरा का बस्वास्या की टोळी न्अ सन्देस
18 “थुआतीरा का बस्वास्या की टोळी का सरगदूत न्अ या माण्ढ;
परमेसर को छोरो, जिकी आंख्या धधकती आग की जस्यान छ, अर जीका पग चोखा पीतळ की जस्यान छ। वो अस्यान खेव्अ छ, 19 म थारा परेम का कामा न्अ, थारा बस्वास न्अ, थारी सेवा अर थारा धीरज की लार सेनसक्ति न्अ जाणू छु। म जाणू छु क तु अब ज्यो करर्यो छ, बीन्अ पेली सुं बी साउटो करर्यो छ।
20 पण म्हारअ थारा बिरोध मं या खेणी छ क, तु इजेबेल नांऊ की उं लुगाई न्अ बरदास करर्यो छ ज्यो अपणा-आपन्अ परमेसर की ओड़ी सुं बोलबाळी खेव्अ छ। बा खुदकी सक्षा सुं म्हारा सेवका न्अ वेभिचार अर मूरत्या का चढ़ावा न्अ खाबा बेई उकसाव्अ छ। 21 म बीन्अ मनफराबा को मोको दियो छु पण बा व्यभिचार सुं मन फराबो कोन छाव्अ। 22 ई बजेसुं म बीन्अ दुखा की खाट माळ्अ पटकबाळो छु। अर बीकी लार बान्अ बी पटकूलो ज्यो बीकी लार व्यभिचार करअ छ। जद ताणी वे बीकी लार करेड़ा खोटा कामा सुं मन कोन फेरअला जद ताणी म बान्अ दुख देऊलो। 23 म बीकी मानबाळा न्अ बी मार नाखूलो अर बस्वास्या की सबळी टोळ्यां न्अ तोल पड़ जाव्अलो क म बोई छु ज्यो लोगबागा का मन अर बुद्धि न्अ जाणू छु। म थां सबळा न्अ थांका करमा जस्यो फळ देऊलो।
24 अब मन्अ थुआतीरा का बां बाकी लोगबागा सुं खेणो छ ज्योबी सीख प कोन चाल्अ अर ज्यो सेतान को भेद कोन जाण्अ। म थां माळ्अ और कोई बोझ कोन डालू। 25 पण ज्यो म्हारी सीख थां कन्अ छ बीक्अ माळ्अ म्हारा आबा ताणी चालता रेवो।
26 ज्यो जीत्अलो अर ज्यां बाता को आदेस म दियो छु बान्अ मानतो रेव्अलो, म बीन्अ जात्या माळ्अ अधिकार देऊलो। 27 अर वो बांक्अ माळ्अ लोया का राजदण्ड सुं राज करअलो। वो बान्अ गार का बासणा की जस्यान फोड़र चूर-चूर कर देव्अलो।g 28 मन्अ यो अधिकार परम बाप परमेसर सुं मल्यो छ। म बीन्अ सुंवारअ का तारा की जस्यान चमकाऊलो।”
29 “जीक्अ कान होव्अ, वो सुणले क आत्मा बस्वास्या की टोळी सुं कांई खेव्अ छ।”