1 तीमुथियुस 1

तीमुथियुस क नांऊ पौलुस को पहलो कागद

1 तीमुथियुस

1 पौलुस की ओड़ी सुं ज्यो आपणा उद्धार करबाळा परमेसर अर आपणी आस मसी ईसु को खास थरपेड़ो बण्यो छु।

2 तीमुथियुस न्अ ज्यो बस्वास म म्हारो सांचो छोरो छ, पिता परमेसर अर आपणा परबु मसी ईसु ओड़ी सुं आसीर्वाद, दीया अर सांति मल्अ।

झूंटा परबचन देबाळा का बारा मं चेतावणी

3 मकिदुनिया जाती बगत मं थान्अ समझायो छो क इफिसुस म रुको अर वान्अ आज्ञा देवो क झूंटी सक्षा कोन देव्अ। 4 बणायेड़ा कस्सा अर आग्लाबड़ा की लाम्बी लेण मं लड़ाई-झगड़ा न्अ बढ़ावो देव्अ छ वाप्अ चत मत लगाओ। ये बाता परमेसर की उं जुगत न्अ सिद्ध कोन होबा देव्अ, ज्यो बस बस्वास पई टक मेली छ।

5 ई आदेस को मतलब यो छ क थे उं परेम सुं भरजावो ज्यो पवितर हीया, चोखी समझ अर बना छळहाळा बस्वास सुं पदा होव्अ छ। 6 एकात मनख तो या बाता म फंसर भटकग्या अर बनाकाम का सुवाल-जुवाबा म जा फंसया। 7 वे बेवस्था का निम सखाबाळा तो बणबो छाव्अ छ, पण ज्योबी वे खेर्या छ या फेर ज्यां बाता प वे घणो चत लगारया छ, वान्अ वे समझ्अ बी कोन्अ।

8 पण मे या जाण्अ छा क ज्यो कोई बेवस्था का निमा न्अ चोखां-चोखां काम म लेव्अ तो बेवस्था चोखी छ। 9 मतलब या जाणता होया क बेवस्था का निम धर्मया बेई कोन्अ पण उठाईगिरा बेई, लड़ाई-दंगा करबाळा बेई, बना भगता बेई, पाप्या बेई, अपवितर, अधर्मया, माई-बाप न्अ मारबाळा हत्यारा, 10 व्यभिचारी, बेगड़ा मनखा, दूसरा को सोषण करबाळा, झूंट बोलबाळा, सोगन तोड़बाळा या अस्यान'ई दूसरा कामा बेई ज्यो सांची सिक्षा का बिरोध म छ। 11 वा सांची सिक्षा परमेसर का महमाळा चोखा समचार बेई चोखी छ, ज्यो मन्अ सुंपी गई छ।

परमेसर की दीया को धन्यवाद

12 म आपणा परबु मसी ईसु को धन्यवाद करू छु। वोई मन्अ सक्‍ती दियो छ। वो मन्अ बस्वासहाळो समझर खुदकी सेवा मं लगायो छ। 13 पण पेली म परमेसर को अपमान करबाळो, परमेसर का लोगा न्अ सताबाळो अर एक बना दीया को मनख छो, पण म्हारअ उपरअ दीया होई क्युं क एक बेबस्वासी का रुप मं या कोन जाणता होया क मं कांई करर्यो छु, मं सब कुछ कर्यो 14 अर परबु की दीया मन्अ खुब मली अर उंकी लारा वो बस्वास अर परेम बी ज्यो मसी ईसु मं छ।

15 या बात सांची छ अर सबक्अ मानबा जस्यानकी छ क मसी ईसु संसार म पाप्या को उद्धार करबा बेई आयो छो। फेर मं तो सबळा सुं बड़ो पापी छु। 16 अर जिसुं मारअ उपरअ दीया होई छ क ईसु मसी एक बड़ा पापी की जस्यान मन्अ काम म लेता होया आग्अ चालर ज्यो मनख उम्अ बस्वास करअला, वां बेई सदामेस की जन्दगी लेबा बेई एक उदारण की जस्यान मन्अ बणार खुदकी घणीसारी सेनसीलता दखा सक्अ। 17 अब उं आण्द का महाराज, कद्‍या बी नास कोन होबाळा, बना दिखबाळा, ऐकला परमेसर को जुगा-जुगा ताणी मान-सम्मान अर महमा होती रेव्अ। अस्यान'ई हो जाव्अ। आमीन!

18 म्हारा छोरा तीमुथियुस, परमेसर की ओड़ी सुं बोलबाळा का बचना की जस्यान घणो पेलीसुंई थारा बारा म ज्यो भविष्यवाणी करदी गेई छी, मं थन्अ उं भविष्यवाणी की जस्यान यो आदेस देर्यो छु क तु उंकी जस्यान चोखी लड़ाई न्अ लड़तो रेव्अ। 19 बस्वास अर चोखी समझ न्अ पकड़या रे। एकात मनख अस्यान का छ ज्यांको बस्वास अर चोखी समझ को नास होग्यो क्युं क वे वान्अ छोड़ दिया छा। 20 हुमिनयुस अर सिकन्दर अस्यान कांई छ। म वान्अ सेतान न्अ सुंप दियो क वान्अ परमेसर का बिरोध म नन्दा करबा सुं रोकबा को सबक सखायो जा सक्अ।