मनखा बेई एकात निम
2
1 सबसु पेली खास तो म्हारी थासुं या अरदास छ क सबळा बेई बिनती, परातना, अरदास अर धन्यवाद सबळा मनखा न्अ दियो जाव्अ। 2 राज करबाळा अर अधिकारयां बेई परातना करो क आपा चेनसुं, सांति सुं, पूरी सरदा सुं अर परमेसर बेई सम्मान सुं जन्दगी जी सका। 3 अस्यान परातना करबो चोखो छ अर आपणा उद्धार करबाळा परमेसर न्अ भाव्अ बी छ। 4 वो या छाव्अ छ क सबळा मनखा को उद्धार होव्अ अर वे सांच न्अ खुब चोखा पेचाण लेव्अ। 5 क्युं क परमेसर एक'ई छ अर परमेसर अर मनखा क गाब्अ बी एक'ई बिचोल्यो छ मतलब मसी ईसु ज्यो एक मनख छ। 6 ज्यो खुदन्अ सबळा का छूटवाड़ा का दाम मं देदियो। क ठीक बगत म ईकी गुवाई दी जाव्अ क परमेसर सबळान्अ बचाबो छाव्अ छ। 7 aम सांच खेऊ छु झूंट कोन बोलु, क म उं मकसद सुं एक परचार करबाळो अर थरपेड़ो अर गेर यहूद्या बेई बस्वास अर सांच का परबचन देबाळो बणायो गियो छु।लुगाई अर मोट्यार का बारा म नर्देस
8 जिसुं म्हारी मन्सा छ क हरेक ठोर सबळा मनख पवितर हाथा न्अ जोड़र बना रोष अर रयाड़ कर्या परातना करअ। 9 bअस्यान'ई बेरबान्या सुं बी म याई चाऊ छु क सुवावणा लत्ता फेरर खुदन्अ सजाव्अ, बाळ गूंथर नही, सोना अर मोत्यां अर महंगा लत्ता सुं संणगार कोन करअ, 10 पण अस्यान की बेरबान्या न्अ ज्यो खुदन्अ परमेसर की सेवा करबाळी मान्अ छ वांक बेई सई या छ क वे भला कामा सुं खुदन्अ सजाव्अ।
11 एक बेरबानी न्अ चायजे क वा ठण्डा सुभाऊ सुं पुरा खिया मं रेर सक्ष्या लेव्अ। 12 मं या कोन चाऊ क कोई बेरबानी कोई मोट्यार न्अ उपदेस देव्अ मतलब उंप्अ राज करअ। पण उन्अ तो छानी रेणी चायजे। 13 क्युं क आदम न्अ पेली बणाया छा अर पाछ्अ हव्वा न्अ। 14 आदम न्अ बेखायो कोन जा सक्अ छो पण बेरबानी न्अ बैखा लिया अर वां पाप मं पड़गी। 15 पण वे छोरा-छोरी जणबा सुं उद्धार पाव्अली अर ज्यो वा थरचा सुं बस्वास, परेम अर पवितरता म बणी रेव्अ।