परबु क आबासुं पेली की बाता
2
1 aह भाई-बेणो, अब मे आपणा परबु ईसु मसी क पाछा आबा अर उंकी लारा आमा-सामा भेळा होबा का बारा मं अरदास करां छा, 2 कोई भविष्यवाणी, कोई परबचन या कोई अस्यान का कागद न्अ म्हाकी माण्ढी बाता जाण्णर थें खुदका मन न्अ डगमगाबा मत दिज्यो। जिम्अ बतायो गियो होव्अ क परबु को पाछो आबा को दन आ चुक्यो। 3 कस्यान बी कोई का छळबा मं मत आज्यो। म अस्यान जिसुं खेर्यो छु क्युं क वो दन उं बगत ताणी कोन आवलो जद्या ताणी परमेसर सुं मुण्डो मोड़बा की बगत कोन आवली अर बेवस्था न्अ कोन मानबाळो वो मनख मतलब बिनास की ओलादb साम्अ कोन आवलो। जिन्अ परमेसर नरक की आग मं पटक्अलो। 4 वो खुदन्अ हरेक चीज क उपरअ खेवलो अर वांको बिरोध करअलो ज्यो चीजा परमेसर की छ या ज्यो पूजबाळी छ। अण्डताणी क वो परमेसर का मन्दर मं जार उंकी गद्दी प बेठर यो दावो करअलो क वोई परमेसर छ।5 कांई थान्अ याद कोन्अ क जद्या म थांकी लारा ई छो तो थान्अ ये सब बतायो छो? 6 अर थे तो या जाण्अ ई छो क उन्अ कांई रोक मेल्यो छ क वो सई मोको आया सुं प्रगट होव्अ। 7 म अस्यान जिसुं खेर्यो छु क्युं क बना बेवस्था की राजहाळी सक्ती हालताणी बी खुदको काम कर'री छ। अब कोई उन्अ डाटर्यो छ अर वो जद्या ताणी उन्अ डाटया रेव्अलो, जद्या ताणी उन्अ डाटया रखाणबाळा न्अ गेला मंसुं कोन हटा दियो जाव्अलो। 8 जद्याई वो बना बेवस्थाळो प्रगट होव्अलो। जद्या परबु ईसु खुदकी महमा मं प्रगट होवलो, तो वो उन्अ मारगाल्अलो अर खुदक्अ पाछा आबा का मोका प खुदकी फूंक सुं उन्अ नास कर देव्अलो।
9 cउं बना बेवस्थाळा को आबो सेतान की सक्ती सुं होवलो अर वो घणी लुंठी सक्ती, झूंटा नसाण अर अचम्बा का काम 10 अर सब तरा का पापहाळा छळ-पाखण्ड सुं भर्यो होवलो। वो यांन्अ वां मनखा का बिरोध मं काम लेवलो ज्यो नास होबाळा गेला मं गुम मेल्या छ। वे भटकग्या क्युं क वे सांच का परेम न्अ कोन मान्या जिसुं वांको उद्धार हो जातो। 11 जिसुं परमेसर वाम्अ एक छळबाळी सक्ती न्अ काम करबा देव्अलो जिसुं वे झूंट मं बस्वास करबा लाग जाव्अला। 12 जिसुं ज्यो सांच मं बस्वास कोन कर्या अर झूंट सुं राजी होव्अ छ, सज्या पावला।
थान्अ छूटवाड़ा बेई चुण्या छ
13 परबु का प्यारा म्हाका भाई-बेणो, थांक्अ बेई म्हान्अ सदाई परमेसर को धन्यवाद करणी चायजे क्युं क परमेसर सरूवात सुंई थान्अ पवितर-आत्मा सुं पवितर करर सांच मं थांका बस्वास की बजेसुं उद्धार पाबा बेई थान्अ थरप्यो छ। ज्यां मनखा को उद्धार होव्अलो थे उं फसल मं एक भाग छो। 14 अर ई उद्धार बेई जि चोखा समचार को उपदेस मे दिया छा जिसुं परमेसर थान्अ बलायो छ क थे बी आपणा परबु ईसु मसी की महमा न्अ पेर सको। 15 जिसुं भाईवो, अटल बण्यारेवो अर ज्यो परबचन थान्अ मुण्ढा सुं या म्हाका कागदा सुं दिया गिया छ वान्अ पकड़या रेवो।