म्हाक्अ बेई परातना करो
3
1 ह भाईवो, थान्अ एकात ओर बाता बताणी छ। म्हाक्अ बेई परातना करो क परबु को संदेस बेधड़क फेल्अ अर महमा पाव्अ जस्यान क थां मनखा म गाब्अ होयो छ। 2 परातना करो क मे भटक्या अर दुष्ट मनखा सुं बच्या रेवां, क्युं क सबळा मनखा को तो परबु मं बस्वास कोन्अ होव्अ। 3 पण परबु तो बस्वासहाळो छ। वो थांकी सक्ती बढ़ावलो अर थान्अ उं दुष्ट सुं बचाया रखाण्अलो। 4 म्हान्अ परबु मं थांकी ठोर का बारा मं बस्वास छ। अर म्हान्अ पूरो निस्चय छ क मे थान्अ ज्यो करबा बेई खिया छा, थे वस्यान ई करर्या छो अर करता रेवला। 5 परबु थांका हीया न्अ परमेसर का परेम अर मसी की थरचाळी दृढ़ता की ओड़ी बडाव्अ।काम की जुरत
6 भाईवो! अब थान्अ आपणा परबु ईसु मसी का नांऊ सुं यो आदेस देवा छा क थें उं हरेक भाई सुं आंतरअ रेवो ज्यो आळसी छ अर म्हाका खिया मं कोन्अ चाल्अ। 7 म या जिसुं खेर्यो छु क्युं क थे तो खुदई जाणो छो क थान्अ म्हाक्अ पाछ्अ कस्यान चालणी छ क्युं क थांक्अ गाब्अ रेताहोया मे कद्या बी आळसी कोन रिया। 8 मे बना दाम दिया कोई सुं भोजन कोन लिया, पण जुगत अर मेनत करता होया मे रयात दन काम मं लाग्या रिया क थाम्अ सुं कोई प बी बोझ कोन पड़्अ। 9 अस्यान कोन्अ क थासुं सायता लेबाको म्हान्अ कोई अधिकार कोन्अ, पण मे जिसुं जोरदार मेनत करता रेव्अ छा क थे बी अस्यान करो। 10 जिसुं मे जद्या ताणी थांकी लारा छा, मे थान्अ यो आदेस दिया छा, क “ज्यो कोई काम कोन करबो छाव्अ तो वो खाणो बी कोन खाव्अ।”
11 म्हान्अ अस्यान बतायो गियो छ क थांक्अ गाब्अ एकात अस्या बी छ ज्यो आळसी छ, वे कोई काम धन्धो कोन करअ अर दूसरा की बाता मं टांग अड़ाता होया अण्डी-उण्डी डोलता फरअ छ। 12 अस्यान का मनखा न्अ मे परबु ईसु मसी का नांऊ सुं समझाता होया यो आदेस देवा छा क वे सांति सुं खुदका काम न्अ करअ अर खुदकी कमाई को ई खाणो खाव्अ। 13 पण ह भाईवो, जण्ढ्अ ताणी थांकी बात छ, भलाई करता होया कद्या बी मत हारो।
14 ई कागद सुं ज्यो म्हाका आदेस दिया गिया छ अर ज्यो कोई वाप्अ कोन चाल्अ तो उं मनख प नजर रखाणो अर बीकी लारां मत रेवो क वान्अ लाज आव्अ। 15 पण उंकी लारा बेरी जस्यान को बुवार मत करो पण भाई की जस्यान उन्अ चताओ।
कागद की समाप्ती