थिस्सलुनीकिया नगर का बस्वास्या की टोळी क नांऊ पौलुस को दूसरो कागद
2 थिस्सलुनीकियों
1
1 bपौलुस, सिलवानुस अर तीमुथियुस की ओड़ी सुं आपणा पिता परमेसर अर परबु ईसु मसी मं बणी थिस्सलुनीकियों सहर का बस्वास्या की टोळी क नांऊ यो कागद छ। a2 पिता परमेसर अर परबु ईसु मसी की ओड़ी सुं थान्अ दीया अर सांति मल्अ।
पौलुस को धन्यवाद
3 ह भाईवो, थां बेई म्हान्अ हमेसा परमेसर को धन्यवाद करणी चायजे, अस्यान करबो सई बी छ। क्युं क थांको बस्वास अणोता रूप सुं बढर्यो छ अर थांक्अ बीच को परेम बी बढर्यो छ। 4 जिसुं परमेसर की बस्वास्या की टोळ्यां मं मे खुद थाप्अ अभिमान करां छा। थांका दुखा क बीच अर कळेसा न्अ सेन करता होया थरचा सुं सेन करबो थांका बस्वास न्अ बताव्अ छ।
परमेसर का न्याय को अर मसी को आबो
5 यो ई बात को परमाण छ क परमेसर को न्याय सांचो छ। उंको मकसद योई छ क थे परमेसर का राज मं उळबा क लायक बणो। थे अब उं बेई तो दुख पारया छो। 6 जरूर परमेसर की नजरा मं यो न्याऊहाळो छ क ज्यो थान्अ दुख देर्या छ वान्अ परमेसर बदला मं दुख ई देव्अलो। 7 अर थे ज्यो दुख उठार्या छो, वान्अ आपणी लारा जद्या आराम दियो जाव्अलो जद्या परबु ईसु तागतहाळा सरगदूता की लारा सरग सुं भभकती आग मं प्रगट होव्अलो। 8 अर ज्यो परमेसर न्अ कोन जाण्अ अर आपणा परबु ईसु का चोखा समचार प कोन चाल्अ, वान्अ सज्या दी जाव्अली। 9 वान्अ सदामेस की सज्या दी जाव्अली। अर वान्अ परबु अर उंकी महमाळी सक्ती क साम्अ सुं हटा दियो जाव्अलो। 10 अस्यान जद्या होव्अलो जद्या वो सबळा पवितर मनखा सुं ज्यो उम्अ बस्वास करअ छ वासुं महमा अर आदरमान पाबा बेई आवलो। थे बी वाम्अ छो क्युं क थे म्हाकी गुवाई प बस्वास कर्या छो।
11 जिसुं म्हे थांक्अ बेई परमेसर सुं सदामेस परातना करां छा क आपणो परमेसर थान्अ उं जन्दगी जस्यान को समझे जिन्अ जीबा बेई थान्अ बलायो गियो छ। अर वो थांकी हरेक चोखी मन्सा न्अ पुरा रुप सुं पूरी करअ अर परमेसर थान्अ सक्ति सुं भरअ क थे उं काम न्अ पूरो करो, ज्यो थांका बस्वास को फळ छ। 12 अस्यान आपणा परबु ईसु मसी को नांऊ थासुं आदर पाव्अ तो थे उसुं आदर पावोला। यो सब आपणा परमेसर अर परबु ईसु की दीया सुं होव्अलो।