फिलिप्पी 3

सांची भगती

1 आखरी मं ओ म्हारा भायाओ, परबु सुं थांका गठजोड़ मं राजी रेवो। बाई बाता न्अ बार-बार माण्ढबा मं मन्अ तो जोर कोन्अ आव्अ क्युं क यो थांकी रुखाळी करअलो। 2 यां गण्डकड़ा सुं चोकन्‍ना रेवो ज्यो चोखा समचार न्अ उल्ट-पुल्ट कर सखाव्अ छ, बुरा काम करबाळा अर खतना माळ्अ जोर देबाळा सुं चोकन्‍ना रेवो। 3 सांचा खतना करेड़ा मनख तो आपा छा क्युं क आपां'ई परमेसर की भगती बीकी आत्मा सुं करां छा। अर आपा आपणो भरोसो दखावटी रिवाजा माळ्अ कोन्अ रांखा पण मसी ईसु माळ्अ रांखा छा। 4 हां, कोई अस्यान की चीजा माळ्अ भरोसो करबो छाव्अ तो म बी कर सकुं छु। यो करबा ताणी तो म्हारअ कन्अ नरी बाता छ। 5 जद म आठ दन को छो, म्हारो खतनो होयो छो। म एक इजरायल का बिन्यामीन वंस को छु अर इब्रानी मं सुं बी एक असली इब्रानी छु। अण्डअ ताणी मूसा का कायदा कानून मं लगाव राखबा की बात छ जद्‍या तो म एक फरीसी छु। 6 मूसा का कायदा कानून की जस्यान जीबा मं खरो छु अर जोस का बारा म खेवो तो मं बस्वास्या की टोळी न्अ सताबाळो छो। 7 पण म सोचर्यो छु क ज्यो-ज्यो बाता म्हारा फायदा की छी ब मसी की बजेसुं अब म्हारअ ताणी बेकार छ। 8 खाली येई नही पण सबळी बाता न्अ म्हारा परबु मसी ईसु न्अ जाणबा की महानता क सामन्अ बेकार समझुं छु। अर बी मसी क ताणी सबळी चीजान्अ छोड़ दियो अर सबळी चीजान्अ कजोड़ो समझुं छु जिसुं म मसी का गठजोड़ को फायदो पा सकुं 9 अर म बीकी लार मलर रे सकुं। यां मूसा का कायदा कानून न्अ मानबा की बजेसुं म परमेसर क साम्अ सही कोन्अ पण ईसु मसी माळ्अ बस्वास करबा सुं छु। परमेसर क साम्अ सही होबो ईसु मसी माळ्अ बस्वास करबा सुं होव्अ छ जिन्अ परमेसर देव्अ छ। 10 अर म मसी न्अ जाणबो अर बीकी मरया मंसुं जिन्दो होबा की सक्‍ती न्अ मेसुस करबो चाऊ छु। बीका दुख मं सामिल होर बीकी मोत मं बीकी जस्यान होबो चाऊ छु। 11 जिसुं म खुद मरया पाछ्अ पाछो जिन्दो हो जाऊ।

निसाणा की ओड़ी भागबो

12 बी ईनाम न्अ जीतबा क ताणी कढी मेनत करर्यो छु जिक्अ ताणी मसी ईसु मन्अ पेलीसुंई खुदक्अ ताणी जीत लियो। 13 ओ भायाओ म या कोन्अ सोचर्यो क म बीन्अ जीत लियो। पण बोई एक काम करू छु क पाछली बाता न्अ भुलर आग्अ की चीजान्अ लेबा की जोरी करर्यो छु। 14 म निसाणा की ओड़ी भागर्यो छु जिसुं वो ईनाम पाऊ। ई ईनाम ताणी परमेसर मन्अ मसी ईसु का गठजोड़ म उपरअ जन्दगी ताणी बलायो छ।

15 ज्योबी आपा मंसुं पाका मनख छ बान्अ अस्यानको बच्यार रांखणो चायजे। कोईको दूसरो बच्यार होवे तो परमेसर बिन्अ बी खुलासो कर देव्अलो। 16 ई बजेसुं आपण्अ माळ्अ परमेसर ज्योबी खुलासो कर्यो छ फेरबी बीकी जस्यान आपा जीवां।

17 ओ भायाओ म्हारा चाल-चलण की नकल करो। अर बाक्अ माळ्अ ध्यान देवो ज्यो बियान् चाल चालो जस्यानकी थे म्हारअ मं देख्या छो। 18 म थान्अ पेलीई बतायो छो अर अब बी रोरोर बतार्यो छु क नरासारा मनख रेबा का ढंग सुं करूस माळ्अ मसी की मोत का बेरी छ। 19 बांको अन्त नास छ। बांको पेट ई बांको परमेसर छ। अर ब बीक्अ माळ्अ घमण्ड करअ छ, जीक्अ माळ्अ तो बान्अ सरम आणी चायजे। बान्अ तो बस संसार की चीजा की चंता छ। 20 पण आपणो देस तो सरग छ अर आपा बंड़ा सुं आपणा बचाबाळा परबु ईसु मसी का आबाकी बाठ नाळर्या छा। 21 वो खुदका जोरसुं सबळी चीजान्अ खुदका बसम्अ रांख्अ छ। अर बी जोरसुं ई आपणी दूबळी काया न्अ बदलर बीकी महमा की काया जस्यान बणा देव्अलो।