फिलिप्पी 2

मसी की नरमाई

1 मसी थांकी हिम्मत्त बड़ावे छ अर बीको परेम थान्अ तसल्‍ली देव्अ छ पवितर-आत्मा की लार थांकी संगती छ अर थे आमा-सामा तरस अर दीया रांखो छो। 2 ई बजेसुं थे आमा-सामा एक'ई बच्यार, एक'ई परेम, एक'ई मन अर एक'ई मकसद राखर मन्अ गाडो राजी करो। 3 खुदका फायदा अर झूंटी बढ़ाई ताणी कांई मत करो। पण नरमाई सुं एक-दूसरा न्अ खुदसुं चोखो समझो। 4 थे सबळा खुदकाई बारा मं कोन्अ पण दूसरा का भला को बी चेत राखो। 5 थांका सोच-बच्यार मसी ईसु की जस्यानका ई होणा चायजे। 6 वो हमेसा परमेसर का रूप मं छो, पण परमेसर क बराबर रेबा की जोरी कोन्अ कर्यो। 7-8 ईकी बजाय सबने छोड़र एक हाळी को रूप धारण करर मनख बणग्यो। अर मनख बणर वो खुदन्अ अतरो दीन बणा दियो क मोत का बारा मं बी खियो मानबाळो रियो। अण्डअ ताणी क करूस की मोत बी सेन करलियो। 9 जिसुं परमेसर बिन्अ सबळा सुं ऊंचो ओहदो दियो अर अस्यानको नांऊ दियो ज्यो सबळा सुं बड़ो छ। 10 जिसुं सरग मं, धरती माळ्अ, अर पताळ मं रेबाळा सबळा ईसु का नांऊ को आदरमान करबा गोढ़ा टेक्अ। 11 अर पिता परमेसर की महमा ताणी हरेक मनख मान लेव्अ क ईसु मसी ई परबु छ।

उजाळा की जस्यान चमको

12 ई बजेसुं ओ म्हारा लाड़ला भायाओ, जद मं थांकी लार छो बी बगत जस्यान थे सदाई म्हारी आज्ञा न्अ मान्अ छा वस्यानई अब जद म थासुं आंतरअ छु म्हारी आज्ञा न्अ मानबो जरूरी छ। थांका उद्धार न्अ पूरो करबा ताणी डरपता अर धूजता होया जतन करो। 13 क्युं क परमेसर'ई छ, ज्यो थांकी जिन्दगी मं काम करर्यो छ जिसुं क थाम्अ बीका मकसद न्अ पूरो करबा की मनसा अर तागत होवे। 14 सबळा काम न्अ बना बड़बड़ाया अर बना बहस करता रेवो। 15-16 जिसुं थे ई खोटी अर दुष्ट पीढ़ी मं परमेसर का नरदोष, खरा अर सायर बेटा-बेटी हो सको। थे जन्दगी देबाळा परमेसर का बचन न्अ थांम'र अस्यान का संसार मं तारा की जस्यान चमको। जिसुं मसी का पाछा आबा का दन मं यो म्हारो घमण्ड को कारण होवेलो क म्हारा चोखा समचार न्अ फेलाबा का काम अर मेनत फालतु कोन्अ गी। 17 थांको बस्वास परमेसर न्अ चढायड़ी बली अर सेवा की जस्यान छ। बीकी बजेसुं मन्अ म्हारो लोई बी बुवाणो पड़्अ तो म राजी छु अर थां सबळा की लार खुसी मनाऊ छु। 18 अस्यान थे बी राजी रेवो अर म्हारी लार आण्द मनाओ।

तीमुथियुस अर इपाफ्रुदीतुस

19 मन्अ परबु ईसु माळ्अ आस छ क तीमुथियुस न्अ थां कन्अ बेगोई खन्दाऊलो जिसुं थांका समचार सुण'र म्हारी हिम्मत बन्द जावे। 20 क्युं क म्हारअ कन्अ अस्यानको कोई बी कोन्अ जिका बच्यार म्हारा जस्यानका होवे अर थांका भला ताणी सांचा मन सुं चंता करतो होवे। 21 क्युं क सबळा खुदकाई फायदा ताणी सोच्अ छ पण ईसु मसी क ताणी कोई कोन्अ सोच्अ। 22 वो ई बात न्अ साबित कर्यो छ क ईक्अ ताणी वो लायक छ। थे ई बात न्अ जाणो छो। वो सेवक की जस्यान चोखा समचार का परचार मं म्हारी लार बियान्'ई काम कर्यो छो जस्यान एक छोरो खुदका बाप की लार करअ छ। 23 तो मन्अ जस्यान'ई यो तोल पड़्अलो क म्हारी लारा जैळ मं कांई होवेलो म बिन्अ थां कन्अ खन्दाबा की आस रांखू छु। 24 अर मन्अ भरोसो छ क परबु की सायता सुं म बी बेगोई आंउलो।

25 म ईन्अ जरूरी समझुं छु क इपाफ्रुदीतुस न्अ थां कन्अ खन्दाऊ ज्यो आपणो भाई छ, म्हारी लार संघर्ष अर काम मं साथी छ, अर म्हारी जुरत मं सायता ताणी थांकी ओड़ी सुं थरपेड़ो दूत छ। 26 वो थासुं मलबा की गाडी बाठनाळर्यो छ। अर वो ई बात न्अ जाण'र ओर बी उदास होगो क थान्अ बीका बिमार होबा को पतो पड़ग्यो। 27 हां वो बिमार छो, अर अतरो क मरबाळोई छो। पण परमेसर बी माळ्अ दीया कर्यो, खाली बीक्अ माळ्अ ई कोन्अ पण म्हारअ माळ्अ बी कर्यो क मन्अ ओर दुख कोन्अ मल्अ। 28 ई बजेसुं मं ओर बी चाऊ छु क बीन्अ खन्दाऊ। थे बीन्अ देखर पाछा राजी हो जावो अर म्हारो दुख बी कटजाव्अ। 29 जिसुं परबु माळ्अ बस्वास रखाणबाळा भाया की जस्यान घणी खुसी सुं बीको सुवागत करो अर अस्यान का मनखा को आदर करता रेवो। 30 क्युं क वो मसी की सेवा क ताणी खुदका जीव न्अ घणा जोखम मं पटकर मोत क सांकड्अ आग्यो छो, जिसुं थांकी ओड़ी सुं सेवा मं ज्यो कमी रेगी छी बिन्अ पूरी कर सको।