गलातियों 4

1 म खेऊ छु क जद्‍या ताणी वारिस बाळक होव्अ छ सबको मालिक होता होया बी वो दास सुं सावटो कोन्अ। 2 वो घरका अर पाळी-पोसी करबाळा मुनीम का बसम्अ जद्‍या ताणी रेव्अ छ। जद्‍या ताणी उंका बाप को ठेरायड़ो बगत कोन आजाव्अ। 3 आपणी बी अस्यान की दसा छ। आपा बी पेली संसार का निमा का दास छा। 4 पण जद्‍या ठेरायड़ी बगत आयी तो परमेसर खुदका छोरा न्अ खन्दायो ज्यो एक बेरबानी सुं जनम्यो छो। अर बेवस्था क बसम्अ होर जीव्अ छो। 5 जिसुं क वो मूसा का निमा का बसम्अ रेबाळा न्अ छुड़ा सक्अ जिसुं आपा परमेसर का बाळक बण सका।

6 अर फेर थे परमेसर का छोरा छो तो वो थांका मना मं खुदका छोरा की आत्मा न्अ खन्दायो। वाई आत्मा ज्यो “ह अब्बा, ह पापा” खेर पुकारअ छ। 7 जिसुं अब थे दास कोन्अ पण छोरा बेटी छो, अर थे छोरा छो जिसुं परमेसर थान्अ वारिस बी बणायो छ।

गलातिया का बस्वासी मनखा बेई पौलुस को हेत

8 पेली जद्‍या थे लोगबाग परमेसर न्अ कोन जाण्अ छा। अर थे ज्यां चीजा का दास छा, वे परमेसर कोन छा। 9 पण अब थे परमेसर न्अ जाणो छो, या फेर अस्यान खेणी चायजे क परमेसर थान्अ पेचाण लियो। तो फेर थे बना मतबल, कमजोर निमा की ओड़ी पाछा क्युं जारया छो? फेर थे वाका गुलाम क्युं होबो छावो छो? 10 थे कोई खास दना न्अ, मिना न्अ, रूतां न्अ, अर बरसा न्अ मानो छो। 11 म थांका बारा मं डरपु छु क थांक्अ बेई ज्यो काम म कर्यो छु वो कढी बेकार तो कोन हेग्यो।

12 ह भायाओ, म थासुं अरदास करू छु क थे म्हारअ जस्यानका बण जावो। देखो, म बी तो थां जस्यान को बणग्यो, अस्यान कोन्अ क थे म्हारा बारा मं कोई गुनो कर्या छो। 13 थे तो जाणोई छो क म्हारी काया का रोग की बजेसुं म सबसुं पेली थान्अ चोखो समचार सुणायो छो। 14 अर थे बी म्हारी काया ओस्था की बजेसुं, ज्यो थांकी घणी परक्ष्या छी, उम्अ मन्अ छोटो कोन समझ्या अर न्अ मंसुं आंतरो कोन कर्या। पण परमेसर का सरगदूत की न्याई थे म्हारो सुवागत कर्या। जाण्अ म खुदई मसी ईसु छो। 15 तो थांका उं राजी होबा को कांई होयो? म थांक्अ बेई खुद उं बात को गुवा छु क ज्यो थांको बस चालतो तो थे थांकी आंख्या नखाळर मन्अ दे देता। 16 तो सांची खेबा सुंई म थांको बेरी होग्यो कांई?

17 थान्अ मूसा का निमा मं चलाबाळा थाम्अ घणो चत लगाव्अ छ, पण वांको मतलब चोखो कोन्अ। वे थान्अ म्हासुं न्यारो करबो छाव्अ छ। क थे बी वाम्अ बांकी जस्यानई चत लगा सको। 18 कोई मं सदाई गाढ़ो चत लगाया रखाण्अ या तो चोखी बात छ पण यो कोई चोखा मकसद बेई होणी चायजे। अर बस उं बगत'ई नही जद्‍या म थांकी लार छु। 19 म्हारा लाड़ला छोरा-छोरीओ! जद्‍या ताणी थे मसी ईसु जस्यानका कोन हे जावो, म थांक्अ बेई एकबार फेर बाळक जणबा की पिड़ा उठार्यो छु। 20 म अबार थां कन्अ आबो अर न्याराई तरीका सुं बतळाबो चाऊ छु, क्युं क म्हारअ समझ मं कोन आर्यो क म थां बेई कांई करू।

सारा अर हाजिरा को कस्सो

21 मूसा का निमा सुं बन्धर रेबाळा सुं म बुजबो चाऊ छु, थे मूसा का निमा को यो खेबो कोन सुण्या कांई? 22 क अबराम क दो छोरा छा। एक को जनम दासी सुं होयो अर दूसरा को जनम परणी सुं होयो ज्यो दासी कोन छी। 23 दासी सुं पदा होयो छोरो दनीया की रीत सुंई जनम्यो छो, पण परणी सुं ज्यो छोरो पदा होयो छो, वो परमेसर की प्रतिज्ञा को फळ छो। 24 या बाता को मतलब अस्यान छ क ये दो बेरबान्या, दो करार न्अ दखाव्अ छ। एक करार सिनै का डुंगर सुं मल्यो ज्यो वा मनखा न्अ दखाव्अ छ ज्यो दास होबा बेई जनम्या छा। यो करार हाजीरा न्अ दखाव्अ छ। 25 हाजिरा अरब देस मं उबा सिनै डुंगर की न्याय छ। ज्यो अबार का यरूसलेम नगर ओड़ी असारो करअ छ क्युं क वा खुदका बाळका की लार गुलामी भगतरी छ। 26 पण दूसरी बेरबानी सारा ज्यो गुलामी मं कोन्अ आपा बस्वास्या की माई छ वा सरग मं उबा यरूसलेम न्अ दखाव्अ छ। 27 सास्तर खेव छ;

“बांझ बेरबानी राजी होर मोज कर,

थन्अ बाळक जणबा की पिड़ा कोन होई!

क्युं क सुहागण सुं बी साउटी ओलादा, छोडेड़ी की छ।”

28 जिसुं भायाओ, अब थे अबराम की ओलाद इसहाक की जस्यान छो ज्यो परमेसर की प्रतिज्ञा सुं पदा होयो छो। 29 पण जस्यान उं बगत काया सुं जनम्यो परमेसर की आत्मा का खिया सुं जनम्या न्अ सताव्अ छो, वस्यान की दसा आज बी छ। 30 पण देखो, पवितर सास्तर कांई खेव्अ छ? “ई दासी अर उंका छोरा न्अ बारअ नखाळद्‍यो क्युं क यो दासी को छोरो तो परणी का छोरा की लार वारिस कोन हेव्अलो।” 31 जिसुं ह भायाओ, आपा उं दासी की ओलाद कोन्अ पण आपा तो उं परणी की ओलाद छा ज्यो दासी कोन्अ।