गलातियों 3

परमेसर का बरदान बस्वास सुं मल्अ छ

1 ओ गलातिया मं रेबाळा बावळ्या मनखाओ, थान्अ कुण भरमा दियो? ईसु मसी न्अ करूस प कस्यान चढ़ाया छा थान्अ तो ईको पूरो ब्योरो दिया छा। 2 म थासुं बस अतरोसोक जाणबो चाऊ छु क, कांई थे परमेसर की आत्मा का वरदान मूसा का निमा न्अ मानबा सुं पाया छा? या फेर चोखा समचार न्अ सुणबा सुं अर उंप्अ बस्वास करबा सुं? 3 थे अतरा मुरख कस्यान हो सको छो क जि जिन्दगी न्अ थे परमेसर की आत्मा सुं सरू कर्या छो उन्अ हाड़-मांस की काया सुं नास करबो चावो छो कांई? 4 थे अतरा दुख बनाबातई उठाया छा, कांई? या पक्‍की बात छ बनाकाम कोन्अ। 5 परमेसर ज्यो थान्अ आत्मा देव्अ छ अर ज्यो थांक्अ गाब्अ अचम्बा का काम करअ छ वो जिसुं करअ छ कांई क थे मूसा का निमा न्अ मानो छो या फेर जिसुं क थे चोखा समचार न्अ सुण्या छो अर उंप्अ बस्वास कर्या छो?

6 यो अस्यान छ जस्यान अबराम का बारा मं सासतर खेव्अ छ क, “वो परमेसर मं बस्वास कर्यो अर वा बीकी धार्मिकता होगी।” 7 तो फेर थे अस्यान जाणल्यो, क अबराम का सांचा बंस का मनख वेई छ ज्यो बस्वास करअ छ। 8 सास्तर पेलीई बता दिया छा क, परमेसर गेर यहूदया न्अ वाका बस्वास की बजेसुं धरमी ठेराव्अलो। अर या बचना की लार पेलीसुंई अबराम न्अ चोखा समचार का बारा मं बता दियो छो क, “तसुं धरती की सबळी जात्या आसिस पाव्अली।” 9 जिसुं वे मनख ज्यो बस्वास करअ छ वे अबराम की लार आसिस पाव्अ छ।

10 पण वे सबळा मनख ज्यो मूसा का निमा न्अ मानबा मं डट्‍या रेव छ, वे तो कोई सराप म बंदया रेव्अ छ। सास्तर मं मण्ढरी छ क “अस्यो हरेक मनख सरापित छ ज्यो मूसा का निमा की पोथी मं मण्ढी हरेक बात न्अ पुरा मन सुं कोन मान्अ।” 11 अब ये बाता साफ होगी क मूसा का निमा सुं परमेसर क साम्अ कोई बी मनख धर्मी कोन होव्अ। क्युं क सास्तर मं मण्ढरी छ क, “धरमी मनख बस्वास सुं जीवतो रेवलो।”

12 पण मूसा का निम तो बस्वास प कोन टक मेल्या अर ज्यो मूसा का निमा न्अ मान्अलो, वो वाक्अई सायरे जीवतो रेव्अलो। 13 मसी आपणा सराप न्अ खुदक्अ उपरअ लेर आपान्अ मूसा का निमा का सराप सुं आजाद कर दियो। क्युं क सासतर खेव्अ छ, “हरेक मनख जिन्अ रूंखड़ा प लटका दियो जाव्अ छ वो सरापित छ।” 14 मसी खुदन्अ जिसुं छुड़ायो क अबराम न्अ मली आसिस मसी ईसु सुं गेर यहूदया न्अ बी मल सक्अ अर आपा बस्वास सुं उं आत्मा न्अ ले सका, जिन्अ देबा को परमेसर बचन दियो छ।

मूसा का निम अर प्रतिज्ञा

15 ह भायाओ, अब म थान्अ रोजीना की जन्दगी सुं एक बात बताऊ छु। देखो, जस्यान कोई मनख क करार कर्या पाछ्अ, न्अ तो उन्अ हटायो जा सक्अ अर न्अ ही उम्अ कोई-कांई घटायो अर न्अ बढायो जा सक्अ छ, 16 वस्यान ई अबराम अर उंका आबाळा वंस की लार प्रतिज्ञा करी गेई छ। परमेसर अस्यान कोन खियो क मं थारा वंस का सबळा मनखा सुं पण अस्यान खियो छ क, थारा वंस सुं बीको मतलब मसी छ 17 म्हारो मतलब यो छ क जि करार न्अ परमेसर पेलीसुंई निस्चित कर दियो उन्अ च्यार सौ तीस बरस पाछ्अ आबाळो मूसा को निम कोन बदल सक्अ अर न्अ ही उंकी प्रतिज्ञा न्अ वे मतलब को ठेरा सक्अ।

18 क्युं क बापोती मूसा का निमा सुं मलती तो फेर वा प्रतिज्ञा सुं कस्यान मलती? पण परमेसर अबराम प दीया करर सितमात मं प्रतिज्ञा सुं बापोती देदियो।

19 फेर थे बतावो मूसा का निमा को कांई मतलब रियो? आज्ञा उंगालबा का पाप की बजेसुं मूसा का निमा न्अ प्रतिज्ञा सुं जोड़ दिया छा। जिसुं जिबेई प्रतिज्ञा करी गई छी उं वंस न्अ आबाकी बगत ताणी वा रेव्अ। बेवस्था का निम एक बिचोल्या की न्याई मूसा की सायता सुं एक सरगदूत क जरीये दिया गिया छा। 20 अब देखो, बिचोल्यो तो दो क बीच मं हेव्अ छ, पण परमेसर तो एक'ई छ।

मूसा का निमा को मतबल

21 ईको यो मतलब छ कांई क बेवस्था का निम परमेसर की प्रतिज्ञा को बिरोधी छ? पण अस्यान कोन्अ। क्युं क ज्यो मूसा का निम मनखा का जीवन न्अ चला सकतो तो वे मूसा का निम ई परमेसर क साम्अ धार्मिकता न्अ साबित करबा को साधन बणजाता। 22 पण सास्तर अस्यान खेव्अ छ, क यो सबळो संसार पाप की सक्‍ती को गुलाम छ। जिसुं वा प्रतिज्ञा ज्यो ईसु मसी प्अ अर परमेसर की प्रतिज्ञा प बस्वास करबाळा मनखा बेई पूरी हो जाव्अ। 23 पण ई बस्वास क आबासुं पेली, आपा मूसा का निमा की रुखाळी मं, ई आबाळा बस्वास क प्रगट होबा की बगत ताणी, बन्दी की न्याई रेव्अ छा। 24 अस्यान मूसा का निम आपान्अ मसी ताणी लेजाबा बेई कळ्डा हार-सम्भाळ लेबाळा छा क आपा बस्वास सुं परमेसर क साम्अ धरमी रेवा। 25 अब जद्‍या यो बस्वास साम्अ आग्यो तो अब आपा उं हार-सम्भाळ करबाळा सुं आजाद होग्या।

26 मसी ईसु मं बस्वास की बजेसुं थे सबळा परमेसर की ओलाद छो। 27 क्युं क थे सबळा ज्यो मसी को बतिस्मो लिया छो मसी मं समाग्या छो। 28 तो अब कोई मं कांई बी आंतरो कोन रियो, न्अ कोई यहूदी रियो, न्अ गेर यहूदी, न्अ कोई दास रियो, न्अ आजाद रियो, न्अ कोई मोट्‍यार रियो अर न्अ कोई लुगाई रेई, क्युं क मसी ईसु मं थे सबळा एक छो। 29 अर ज्यो थे मसी का छो तो फेर थे अबराम का बंस का बी छो अर परमेसर ज्यो बचन अबराम न्अ दियो छो उंका वारीस बी छो।