गलातियों 2

पौलुस अर दूसरा थरपेड़ा

1 चौदा बरस पाछ्अ म बरनबास अर तीतुस न्अ म्हारी लारा लेर फेरू यरूसलेम मं गियो। 2 म परमेसर का दर्साव की बजेसुं उण्डअ गियो छो। अर म गेर यहूदी मनखा क गाब्अ जि चोखा समचार को परचार करू छु, उई चोखा समचार की बात न्अ म उण्डअ का बस्वास्या की टोळी का मुखिया न्अ अखळोटा लेजार सुणायो। म उण्डअ जिसुं गियो छो क परमेसर मन्अ दर्सायो छो क मन्अ उण्डअ जाणी चायजे। जिसुं म पाछला दना म ज्यो काम कर्यो छु या फेर ज्यांन्अ म अबार करर्यो छु, वे बनाकाम कोन जाणी चायजे। 3 तीतुस ज्यो म्हारी लार छो वो एक यूनानी छो पण वे उन्अ खतनो कराबा बेई जोरी कोन कर्या। 4 पण वे झूंटा बस्वासी ज्यो चोरी छान्अ बस्वास्या की टोळी क बीच मं भेदया का रुप मं उळग्या छा वे या बात उठाया। अर वे अस्यान मसी ईसु मं म्हाकी आजादी को तोल पटकर मान्अ दास बणाबो छाव्अ छा। 5 पण मै वांक्अ साम्अ एक घड़ी बी हार कोन मान्या जिसुं चोखा समचार की सच्चाई थाम्अ बणी रेव्अ।

6 पण वां ऊंचा नांऊ हाळा मनखा सुं ज्यो कस्यान का बी छा म्हारअ कांई बी फरक कोन पड़यो। क्युं क परमेसर सकल देखर न्याय कोन करअ। अर वान्अ म्हारा बताया चोखा समचार मं कांई फरक कोन लाद्‍यो। 7 अर परमेसर जस्यान पतरस न्अ यहूदया न्अ चोखो समचार सुणाबा को काम सुप्यो छ। वस्यानई परमेसर मन्अ गेर यहूदया न्अ चोखा समचार न्अ सुणाबा को खास काम सुप्यो छ। 8 परमेसर मन्अ बी वस्यान गेर यहूदया बेई थरपेड़ा की न्याय काम करबा की सक्‍ती दियो छ। जस्यान परमेसर पतरस न्अ यहूद्‍या बेई थरप्यो छ। 9 अस्यान वे म्हारअ उपरअ परमेसर की दीया न्अ समझग्या अर बस्वास्या की टोळी का खम्बा मान्या जाबाळा याकूब, कैफा अर यूहन्‍ना मंसुं अर बरनबास सुं हस्सादार की न्याई हाथ मला लिया। अर वे राजी होग्या क मे गेर यहूदया क गाब्अ उपदेस देता रेवा अर वे यहूदया का गाब्अ। 10 वे म्हासुं बस अस्यान'ई खिया क में वाका गरीबा को चेत रखाणा। अर म ई काम न्अ करबोई कोन छाव्अ छो पण इबेई उत्यावळो बी छो।

पतरस न्अ पौलुस की फटकार

11 पण जद्‍या कैफा अन्ताकिया नगर मं आयो तो म उंको चोड़्अ-धाड़्अ बिरोध कर्यो छो क्युं क वो गलत छो। 12 वो पेली गेर यहूदया की लार खाव्अ-पिव्अ छो। पण याकूब की ओड़ी सुं खन्दाया एकात मनखा का ड़र सुं वो वासुं आंतरअ होग्यो अर खुदन्अ वासुं न्यारो करलियो। वो अस्यान जिसुं कर्यो क वे छाव्अ छा क गेर यहूदी बस्वास्या को बी खतनो होणी चायजे। 13 दूसरा यहूदी बी ई दखावा मं उंको साथ दिया। अण्डअ ताणी क ई दखावा की बजेसुं बरनबास बी भटकग्यो। 14 म जद्‍या या देख्यो क चोखा समचार की न्याई वे सिधा गेला मं कोन चालर्या छा तो सबळा क साम्अ कैफा न्अ खीयो, “जद्‍या थे यहूदी होर बी गेर यहूदया ज्यान जीर्या छो, तो फेर गेर यहूदया न्अ यहूदया की रीत प चालबा बेई कस्यान खे सको छो?”

बस्वास सुं धरमी बणबो

15 मे तो जनम सुंई यहूदी छा। मे पापी गेर यहूदया जस्यानका कोन्अ। 16 फेरबी आपा या जाणा छा क कोई मनख मूसा का निमा न्अ मानबा की बजेसुं नही पण ईसु मसी मं बस्वास की बजेसुं धरमी मान्यो जाव्अ छ। अर जिसुंई आपा ईसु मसी को बस्वास कर्या छा। क्युं क मूसा का निमा न्अ मानबा सुं तो कोई बी मनख धर्मी कोन होव्अ। 17 पण ज्यो आपा ईसु मसी का गठजोड़ की बजेसुं धरमी बणायो जाबो चावां छा, अर आपा ही पाप्या की जस्यान मल्या, तो ईको मतलब यो कोन्अ कांई क मसी पाप न्अ बडाव्अ छ? एकधम कोन्अ या बात गलत छ। 18 ज्यां निमा न्अ म छोड़ दियो, वांई निमा न्अ फेरू मानबा लाग जाऊ तो म आज्ञा तोड़बाळो अपराधी बण जाऊलो। 19 क्युं क मूसा का निमा सुं तो म मर चुक्यो क परमेसर बेई फेरू जीवतो हो जाऊ। मसी की लार मन्अ करूस प लटका दिया। 20 इसुंई म अब आग्अ जीवतो कोन्अ पण मसी म्हारअ माईन्अ जीवतो छ। तो ई काया मं अब म ज्यो जन्दगी जीर्यो छु वा तो बस्वास प टकी छ। परमेसर का बी छोरा क बेई बस्वास प ज्यो मंसुं परेम कर्यो अर म्हारअ बेई जन्दगी दियो छ। 21 म परमेसर की दीया बेई कोन नटर्यो। अर ज्यो मूसा का निमा सुं धरमी होर परमेसर सुं नातो जुड़ जातो तो ईको मतलब मसी बनाबातई खुदकी ज्यान दियो छ!