गलातियों परदेस का बस्वास्या की टोळी क नांऊ पौलुस को कागद
गलातियों
1
1 म पौलुस, ज्यो एक खास थरपेड़ो चेलो छु, अर यो अधिकार मन्अ मनखा सुं कोन मल्यो पण ईसु मसी अर परम-पिता परमेसर सुं मल्यो छ, ज्यो ईसु मसी न्अ मरया मंसुं फेर जिन्दो कर्यो छ, 2 अर म्हारी लारका सबळा बस्वासी भाया की ओड़ी सुं गलातिया परदेस की बस्वास्या की टोळी न्अ नमस्कार मल्अ।3 आपणा परम-पिता परमेसर अर परबु ईसु मसी की ओड़ी सुं थान्अ दीया अर सान्ति मल्अ। 4 आपणा पापा बेई मसी खुदन्अ बलिदान होबा बेई सुंप दियो क ई पापी संसार मं, जिम्अ आपा रेरया छा, वो आपान्अ छूटवाड़ो दुवा सक्अ। आपणा परम-पिता परमेसर की याई मन्सा छ। 5 परमेसर की जुग-जुग महमा होती रेव्अ। अस्यान'ई होव्अ।
चोखो समचार एक'ई छ
6 मन्अ अचम्बो छ क थे लोग अतरा बेगाई उं परमेसर सुं मुण्डो मोड़र ज्यो मसी की दीया सुं थान्अ बलायो छो, कोई दूसरा चोखा समचार ओड़ी जारया छो। 7 कोई दूसरो चोखो समचार तो सांच्याई छ्अई कोन्अ, पण एकात लोगबाग अस्या छ ज्यो थान्अ बेखारया छ अर मसी का चोखा समचार मं हेर-फेर की जोरी करर्या छ। 8 पण छाव्अ आपा होवां या फेर कोई सरगदूत, ज्यो थान्अ म्हासुं सुणाया गिया चोखा समचार सुं न्यारो चोखो समचार सुणाव छ तो उंको नास जावलो। 9 जस्यान म्हे पेली खे चुक्या छा वस्यान ई अब फेर खेवां छा क ज्यो कोई थान्अ उं चोखा समचार सुं न्यारो चोखो समचार सुणाव छ तो उंको नास जावलो। 10 थान्अ कांई लाग्अ छ क म मनखा को साथ चाऊ छु या फेर परमेसर को? या फेर म मनखा न्अ राजी करबा की जोरी करू छु? म मनखा न्अ राजी करतो तो म मसी की सेवा करबाळो कोन होतो।
पौलुस न्अ चोखो समचार परमेसर सुं मल्यो छ
11 ओ भायाओ, म थान्अ दखाबो चाऊ छु क वो चोखो समचार जिको उपदेस म थान्अ दियो छु, मनखा सुं कोन मल्यो। 12 क्युं क न्अ तो कोई मनख सुं म ईन्अ लियो अर न्अ ही कोई मनख मन्अ ईकी सक्ष्या दियो। पण ईसु मसी खुद ईन्अ म्हारअ साम्अ प्रगट कर्यो छ।
13 aथे या तो सुणमेल्या छा क म पेली यहूदी धरम मं कस्यान जीव्अ छो, अर थे या बी जाणो छो क म परमेसर का बस्वास्या की टोळ्यां प कतरा जुलम कर्यो छु अर वान्अ एकधम खतम करबा की बी जोरी कर्यो छु। 14 bम यहूदी समाज न्अ मानबा मं म्हारा जमाना का सबळा यहूदी मनखा सुं आग्अ छो क्युं क म्हारा आग्लाबड़ा सुं ज्यो रीत मन्अ मली छी उम्अ म्हारो घणु बस्वास छो।
15 cपण परमेसर तो म्हारा जनम सुं पेलीई मन्अ चुण लियो छो। अर खुदकी दीया मं मन्अ बला लियो छो, क 16 वो मन्अ खुदका छोरा को ज्ञान करां दे। जिसुं म गेर यहूदया क बीच मं उंका चोखा समचार को परचार करू। उं बगत म कोई सुं राय कोन लियो। 17 अर म वा मनखा कन्अ यरूसलेम नगर मं कोन गियो, ज्यो म्हारसुं पेली थरपेड़ा बण्या छा। पण म अरब देस मं गियो अर फेर उण्डअ सुं दमिस्क नगर मं पाछो आग्यो। 18 dफेर तीन बरस पाछ्अ कैफा सुं मलबा बेई म यरूसलेम नगर मं पुच्यो अर वांकी लार पन्द्रा दन ताणी रियो। 19 पण उण्डअ मं परबु का भाई याकूब क अलावा कोई बी दूसरा थरपेड़ा सुं कोन मल्यो। 20 म परमेसर क साम्अ सोगन खार खेऊ छु क ज्योबी म माण्ढ़र्यो छु उम्अ झूंट कोन्अ।
21 उंक्अ पाछ्अ म सीरिया अर किलिकिया का परदेसा मं गियो। 22 पण यहूदया परदेस मं रेबाळा मसी का बस्वास्या की टोळ्यां का मनख मन्अ साम्अ-मूंड्अ कोन जाण्अ छा। 23 पण वे लोगबागा न्अ म्हारा बारा मं या खेता सुण्या छा क, “यो पेली वां मनखा न्अ सताव्अ छो ज्यो मसी मं बस्वास करअ छा, अर अब उई मसी का बस्वास को परचार करर्यो छ, जिन्अ वो खतम करबा की जोरी करअ छो।” 24 अर म्हारी बजेसुं वे परमेसर की महमा कर्या।