आपणो दान देबो
8
1 aदेखो भायाओ, अब म्हे थान्अ परमेसर की उं दीया का बारा मं बतावा छा ज्यो मकिदुनिया नगर का बस्वास्या की टोळी प कर्यो छो। 2 म्हारा खेबा को मतलब यो छ क उं टोळी का मनख घणा कळेस मं अर गरीब होता होया बी घणा राजी होर दान देबा का मामला म पाछ्अ कोन रिया। 3 अर वांका बारा मं म खे सकुं छु, क वे जतरो दे सका छा अतरो दिया अर उसुं बी बढ़र खुदकी मन्सा सुं दिया छा। 4 वे म्हासुं हाथा जोड़ी करर बुज्या छ। क म्हे यहूद्या मं रेबाळा परमेसर का मनखा की सायता करबा का सोभाग मं पांती होबो चावां छा। 5 अर जस्यान मै आस कर्या छा वे उसुं बी साउटो कर्या। पेली वे खुदन्अ परमेसर न्अ सुंप दिया उंक्अ पाछ्अ परमेसर की मन्सा सुं खुदन्अ म्हान्अ सुंप दिया। 6 ई बजेसुं म्हे तीतुस न्अ समझाया छा क जस्यान दान भेळो करबा का काम न्अ थांक्अ गाब्अ सरू कर्यो छ, वस्यान ई वो उन्अ थांक्अ गाब्अ चोखा पूरो करबा मं थांकी सायता करअ। 7 थे सबळी बाता मं खुब बढरया छो जस्यान, बस्वास मं, बोली मं, ज्ञान मं, ईमानदारी मं, परेम मं, ज्यो थे मंसुं राखो छो। वस्यानई ई दान देबा का काम मं बी बढ़ता जावो।8 या बात म आज्ञा देर कोन खेर्यो पण दूसरा मनखा का खुला मन सुं दान देबा को ज्यो उछ्याव छ, उन्अ बतार थांका परेम की सच्चाई न्अ परखबो छार्यो छु। 9 क्युं क थे आपणा परबु ईसु मसी की दीया न्अ जाणोई छो। अर थे या बी जाणो छो क वो भागवान होर बी थांक्अ बेई कंगलो बण्यो। जिसुं थे उंकी गरीबी की बजेसुं भागवान बण सको।
10 यो थांक्अ बेई चोखो बी छ क थे जिन्अ पाछल्अ बरस सरू कर्या छा उन्अ खतम करो। थे दान देबा मं ई नई पण दान देबा की मन्सा दखाबा मं बी सबळा सुं आग्अ छा। 11 ई बजेसुं अब ई बात म म्हारी राय याई छ क थे ई काम न्अ पूरो करो। अर थांकी मन्सा का उं उछ्याव न्अ ज्योबी थां कन्अ छ उं मंसुं दान देर पूरो करो। 12 अर ज्यो देबा बेई थांका मन मं उछ्याव छ तो परमेसर थांका दान न्अ थांकी देबा की मन्सा की जस्यान अपणाव्अ बी छ। पण थे उम्अ सुंई दिज्यो ज्यो थां कन्अ छ उसुं साउटो करबा की जुरत कोन्अ। 13 क्युं क म्हे कोन चावां क थान्अ दुख भगतणी पड़्अ अर दूसरा को काम बण्अ, पण म्हे तो सबळा न्अ बरयाबर करबो चावां छा। 14 पण बरयाबरी का बच्यार सुंई बगत थांकी बढ़ती वांकी घटती मं वाक्अ आढ्अ आव्अ, जिसुं आग्अ थांकी कमी घटी मं वे थांक्अ आढ्अ आ सक्अ। अर अस्यान सबळी बाता बराबर बी हो जाव्अ। 15 जस्यान सास्तर खेव्अ छ क,
“ज्यो साउटो ‘मन्नो’ भेळो कर्यो उं कन्अ फालतु कोन बच्यो
अर ज्यो कम भेळो कर्यो उन्अ कम कोन पड़यो।”
तीतुस अर उंकी लारहाळा
16 परमेसर को धन्यवाद होव्अ, क वो तीतुस का हीया मं थांकी सायता करबा बेई वोई उछ्याव दियो छ जस्यान को म्हे रांखा छा। 17 क्युं क वो म्हाकी परातना मान लियो अर या उंकी बी मन्सा छी क वो थां सुं फेरू मल्अ। ई बजेसुं वो खुदकी मरजी सुं थां कन्अ आबा बेई म्हाखन्अ सुं रवाना होग्यो। 18 अर म्हे तीतुस की लार उं भाया न्अ बी खन्दावा छा, जिको बस्वास्या की सबळी टोळ्यां मं चोखा समचार न्अ परचार करबा की बजेसुं खुब मान कर्यो जाव्अ छ। 19 अर अतरोई कोन्अ पण बस्वास्या की टोळी ई भाया न्अ म्हाकी लार जार दान भेळो करबा बेई थरपी छ। अर म्हे ई परेम की सेवा का काम न्अ परबु की महमा बेई अर दूसरा क आढ्अ आबा बेई करां छा। 20 अर म्हे ई बात बेई चोकस रेवा छा क कोई म्हा प आंगळी कोन उठाव्अ क ई साउटा दान की बेवस्था का काम मं म्हे खरा कोन्अ। 21 क्युं क मै वाई बाता की चन्ता करां छा ज्यो परबु की नजरा म ई नई, पण मनखा की नजरा म बी भली छ।
22 अर म्हे वांकी लार म्हाका उं भाया न्अ बी खन्दार्या छा, जिन्अ म्हे परखर घणी बाता मं भलाई करबा बेई उत्यावळो देख्या छा। अर अब उन्अ थांप्अ घणो भरोसो, जिसुं उम्अ थांक्अ आढ्अ आबाकी जोराई इच्छा छ। 23 अर ज्यो कोई तीतुस का बारा म बुज्अ, तो वो म्हारी लार अर थांक्अ गाब्अ सायता का काम मं म्हारी लार काम करबाळो मनख छ। अर जण्ढ्अ ताणी भाया को सुवाल छ, वे मसी की मेमा बेई बस्वास्या की टोळी का थरपेड़ा दूत छ। 24 ई बजेसुं थे वान्अ थांको परेम दखाज्यो अर थांका बारा म म्हे ज्यो बड़ाई करां छा, उन्अ बस्वास्या की टोळ्यां क साम्अ साबित करज्यो।