लारहाळा बस्वास्या की सायता करो
9
1 अब उं सेवा का बारा मं मन्अ माण्ढबा की जुरत कोन्अ ज्यो यहूद्या मं रेबाळा परमेसर का मनखा का बेई थे करो छो। 2 क्युं क मन्अ तोल छ क थे ई काम न्अ करबा बेई सदाई त्यार रेवो छो। जद्याई तो म मकिदुनिया का मनखा क साम्अ थांका बारा म्अ घमण्ड सुं खियो क अखाया का मनख तो पाछला बरस सुंई त्यार छ अर थांका उछ्याव न्अ देखर घणा अस्यान करबा बेई आग्अ आया छ। 3 पण म म्हारी लारहाळा भाया न्अ थांक्अ कन्अ जिसुं खन्दार्यो छु, क थाप्अ ज्यो घमण्ड म्हे करां छा उं बेई म्हान्अ निचो कोन देखणो पड़्अ। ई बजेसुं जस्यान म खियो छु वस्यान ई थे त्यार रेवो। 4 क्युं क कद्या म्हारी लार मकिदुनिया नगरी का मनख थां कन्अ आजाव्अ अर ज्यो थांका बारा म वान्अ बतायो गियो छो वस्यान कोन दिख्अ तो मं सुं साउटो थान्अ सरमिन्दा होणो पड़्अलो। 5 ई बजेसुं म म्हारा आबासुं पेली म्हारी लारहाळा भाया न्अ थां कन्अ जाबा बेई मनायो छु जिसुं थे ज्यो बड़ो दान म्हाक्अ बेई देबा की जबान कर मेल्या छो उन्अ भेळो करर त्यार राखो। अस्यान करबो ई बात न्अ दखाव्अलो क थे थांकी इच्छा सुं दिया छो कोई थां सुं जोरी कोन कर्या।6 पण थे या बात याद राखो ज्यो थोड़ो बाव्अ छ वो थोड़ोई अर ज्यो साउटो बाव्अ छ वो साउटोई लावण्अलो। 7 हरेक मनख अतरोई दान देव्अ जतरो देबा को वो मन म बच्यारो छ वे मन सुं अर दूसरा का खेबासुं बी कोन देव्अ क्युं क परमेसर राजी होर देबाळा सुंई परेम करअ छ। 8 अर परमेसर थांकी सबळी जुरता न्अ पूरी करअलो। जिसुं भला काम करबा बेई थां कन्अ थांकी जुरतां सुं साउटो होव्अलो। 9 जस्यान सास्तर मं माण्ढ़र्यो छ क,
“ज्यो खुला मन सुं गरीबा न्अ दान करअ छ,
उंकी या भलाई सदाई बणी रेव्अली।”
10 ई बजेसुं परमेसर बिजणी करबाळा न्अ बीज, अर भूखा न्अ खाबा बेई रोटी देव्अ छ। वोई थारी जुरत पूरी करअलो अर थारी भलाई की फसल न्अ बढाव्अलो। 11 थान्अ सब तरा सुं भरयापुरा कर्यो जाव्अलो जिसुं थे हरेक मोका प दान देबाळा बणो। अर जद्या म्हे थांका दियेड़ा दान सुं दूसरा क आढ्अ आवला तो वे परमेसर न्अ धन्यवाद देव्अला।
12 क्युं क ई सेवा सुंई परमेसर का मनखा की जुरत पूरी कोन्अ होव्अ पण वे परमेसर न्अ धन्यवाद बी देव्अ छ। 13 थांकी ई सेवा की बजेसुं वे परमेसर न्अ मेमा देव्अला। क्युं क वां बेई अर सबळा बस्वास्या बेई थांको खुल्ला मन सुं सायता करबो यो साबित करअ छ क थे मसी का चोखा समचार प चालबाळा छो। 14 परमेसर थान्अ ज्यो बड़ी दीया सुं भर्यो-पुरो कर्यो छ उंकी बजेसुं वे थांक्अ बेई औरू मन लगार परातना करअला। 15 परमेसर का उं बरदानa बेई जिको बखान कोन कर्यो जा सक्अ। को धन्यवाद।